ប្រធានាធិបតី ចិនលោក ហ៊ូ ជីន តាវ នាយករដ្ឋមន្រ្តីចិន លោក វេន ជាប៉ាវ និងមេដឹកនាំផ្សេងៗទៀត នឹងលាលែងពីតំណែងបក្សកុម្មុយនីស្តរបស់ពួកគេនៅឯសមាជមួយនៅរដូវ ស្លឹកឈើជ្រុះនេះ ដោយបើកទំព័រសករាជថ្មីនៃថ្នាក់ដឹកនាំសម្រាប់ប្រទេសដែលមាន ពលរដ្ឋច្រើនបំផុតក្នុងពិភពលោកនេះ។
ក្នុងរបាយការណ៍ទំព័រមុខ កាលពីថ្ងៃពុធ កាសែតPeoples'Daily បានសរសេរថា ក្នុងជំនួបមួយជាមួយក្រុមមន្រ្តីកំពូលរដ្ឋាភិបាល និងប៉ូលិស លោកជូ យ៉ុងកាង ប្រមុខសន្តិសុខ បានបញ្ជាឲ្យមានការបង្ក្រាបទូទៅលើភាពវឹកវរ។
លោក ជូរបាននិយាយថា៖ «ការការពារភាពសុខដុមរមនា និងស្ថិរភាពក្នុងសង្គម គឺជាលក្ខខណ្ឌជាមុនដ៏មានសារៈសំខាន់សម្រាប់ការបើកសមាជបក្សលើក ទី១៨ និងជាភារកិច្ចអាទិភាព និងការទទួលខុសត្រូវខាងនយោបាយនៃរដ្ឋាភិបាលគ្រប់ជាន់ថ្នាក់»។
លោក បានបញ្ជាក់ថា៖ «យើង ត្រូវតែពង្រឹង និងពង្រីកការប្រយុទ្ធប្រឆាំងនឹងការបំបែកខ្លួន និងភេរវកម្ម បង្កើតការបង្ការជាមុនឲ្យបានតឹងរ៉ឹង ចាត់វិធានការលើសកម្មភាពរំខានរបស់កម្លាំងអរិភាពទាំងក្នុង និងក្រៅប្រទេស...និងពង្រឹងការរក្សាស្ថិរភាព»។
របាយការណ៍នោះ បានបញ្ជាក់ថា លោក ជូ បាននិយាយដៀមដាមការតវ៉ារាប់ម៉ឺនលើកដែលបាន ផ្ទុះឡើងនៅចិនរាល់ឆ្នាំ ដោយបញ្ជារដ្ឋការមូលដ្ឋានដោះស្រាយជម្លោះលើវិស័យមួយចំនួនធំ ដែលរួមមានជម្លោះដីធ្លី ការបណ្តេញចេញដោយបង្ខំ ទំនាក់ទំនងការងារ សន្តិសុខសង្គម និងការ ការពារបរិស្ថាន។
លោកជូ គឺជាប្រធានគណៈកម្មការនយោបាយ និងច្បាប់ដ៏មានឥទ្ធិពលរបស់បក្ស ដែលមើលខុសត្រូវតុលាការចិន ការផ្តន្ទាទោស និងប៉ូលិស។
ប្រភពជា ច្រើន បានឲ្យដឹងថា មេ បក្សកុម្មុយនីស្តដែលគិតតែកំណែទម្រង់របស់ខេត្តគូយជូ ក្រីក្របំផុតមួយក្នុងចំណោមខេត្តជាច្រើន លោកលី ចាន់ស៊ូ វ័យ៦១ឆ្នាំ ទំនងជានឹងទទួលបានតំណែងនៅក្រុងប៉េកាំងដ៏មានឥទ្ធិពលមួយនៅ ឆ្នាំនេះ ជាផ្នែកមួយនៃការរុះរើនៅមុនការផ្លាស់ប្តូរថ្នាក់ជាតិមួយ ដែលគួរតែធានាថា ចិននៅតែបន្តការបើកចំហរបស់ខ្លួន៕ NR
