រោគសញ្ញានៃជំងឺ EV-71។
ស្ទឹងត្រែងៈមន្ត្រី សុខភាពនៃមន្ទីរពេទ្យបង្អែកខេត្តស្ទឹងត្រែង កាលពីព្រឹកថ្ងៃអង្គារនេះ បានព្យាយាមនិយាយលាក់បំាងចំពោះការសាយភាយនូវប្រភេទជំងឺឆ្លងថ្មី EV-71 ដែលកំពុងកើតមានចំពោះកុមារក្រោមអាយុ៥ឆ្នាំ ក្នុងពេលបច្ចុប្បន្ន ខណៈដែលអ្នកភូមិជាច្រើននាក់ កំពុងមានការព្រួយបារម្ភខ្លាំងអំពីស្ថានភាពជំងឺនេះ ហើយបាននាំកូនរបស់ពួកគេមកសម្រាកព្យាបាលនៅមន្ទីរពេទ្យខេត្តជា បន្តបន្ទាប់។
ចំពោះការលាក់បាំងខាងលើនេះ ត្រូវបានក្រុមមន្ត្រីអង្គការសិទ្ធមនុស្សធ្វើការរិះគន់ថា វាគឺជាក្រមសីលធម៌វិជ្ជាជីវៈរបស់គ្រូពេទ្យ ប៉ុន្តែករណីនេះអាចនិងធ្វើឲ្យមានការភ្ញាក់ផ្អើលកាន់តែខ្លាំង ថែមទៀត ប្រសិនបើជំងឺEV-71 ពិតជាបានឆ្លងនិងកំពុងរាលត្បាតមកលើកូនអ្នកភូមិរស់នៅស្រុក ថាឡាបរិវ៉ាត់ពិតប្រាកដនោះ។
អ្នកស្រីធី ចិន្តា អាយុ២១ឆ្នាំ រស់នៅភូមិអូរត្រែល ឃុំ-ស្រុកថាឡាបរិវ៉ាត់ ខេត្តស្ទឺងត្រែង បានថ្លែងប្រាប់ភ្នំពេញប៉ុស្តិ៍ថា កូនអ្នកស្រីឈ្មោះសុខ ស្រីមួយ អាយុ១ខែកន្លះ បានផ្តើមមានអាការៈក្តៅខ្លួន ពងបែកលើបាទដៃ និងជើង អស់រយៈពេល៣ថ្ងៃ គិតចាប់ពីថ្ងៃទី១៥ ខែកក្តដាមក។
អ្នកស្រី ថា៖«ខ្ញុំគិតថា អាការៈនេះគឺអាចជាប្រភេទជំងឺឆ្លងថ្មី ព្រោះបើតាមព័ត៌មានដែលខ្ញុំបានលឺក្នុងវិទ្យុប្រាប់ថា ឥឡូវមានកុមារជាច្រើននាក់ត្រូវបានស្លាប់ដោយសារជំងឺដែលមាន អាការៈក្តៅខ្លួន និងមានពងនៅលើបាទដៃនិងជើង ដូច្នេះខ្ញុំក៏ប្រញាប់នាំកូនទៅមន្ទីរពេទ្យ បន្ទាប់ពីបានឃើញអាការៈកូនកើតមានយ៉ាងដូច្នេះដែរ »។
