ក្រុមយុវជនស្ម័គ្រចិត្តប្រើឯក សណ្ឋានកងទ័ព តែពាក់ស្លាកសម្គាល់ ក្រសួងរៀបចំដែនដីនគរូបនីយកម្មនិងសំណង់បាន ចេញដំណើរដំបូងនៅថ្ងៃទី២៨ ខែមិថុនា ឆ្ពោះ ទៅកាន់ខេត្តចំនួន១៣ នៅក្នុងប្រទេស មាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពង់ចាម កំពង់ធំ ក្រចេះ ព្រះវិហារ កំពង់ស្ពឺ កំពត រតនគិរី មណ្ឌលគិរី និងខេត្តស្ទឹងត្រែង សរុបចំនួន១.១៧៨នាក់ ក្នុងយុទ្ធនាការវាស់ដីធ្លីប្រមាណ ១.២០០.០០០ហិកតា នៅទូទាំងប្រទេស ជូនប្រជាពលរដ្ឋចំនួន ៣៥០.០០០គ្រួសារ។
លោក ឈឿន យ៉ង អាយុ២៥ឆ្នាំ ជានិស្សិតនៃសាកលវិទ្យាល័យភូមិន្ទនីតិសាស្រ្តនិងវិទ្យាសាស្ត្រ សេដ្ឋកិច្ចដែលបានចុះវាស់វែងដីនៅក្នុងឃុំបន្ទាយឆ្មារ ស្រុកថ្មពួក បានឲ្យដឹងថា ក្រុមលោកកំពុងពុះពារឧបសគ្គដើម្បីអនុវត្តទៅតាមផែនការ បើទោះជាប្រឈមនឹងបញ្ហាខ្លះៗក៏ដោយ។ លោកថា៖ «ពួកយើងមានការលំបាកខ្លះ ដូចជា ខ្វះទឹកស្អាតត្រូវដេកនៅក្នុងវត្តអារាម តែនេះមិនបញ្ហាទេ យើងអាចទ្រាំបាន អ្វីដែលពួកយើងបារម្ភបំផុត គឺកន្លែងមានមីន នៅពេលដើរបោះព្រំប្រទល់ដីឲ្យប្រជាពលរដ្ឋ គឺពួកយើងនឹកភ័យខ្លាចជានិច្ច»។
លោកបន្តថា ការងារយើងលំបាកច្រើន គឺត្រូវដើរកាត់ព្រៃភ្នំដែលមានចម្ងាយឆ្ងាយ ដើម្បីពិនិត្យបោះព្រំដីឲ្យពលរដ្ឋ ហើយពួកយើងក៏មិនអាចខ្វះមន្ត្រីជំនាញបានដែរ ពីព្រោះយើងរៀនបានតែពីរថ្ងៃ មិនអាចធ្វើការដោយគ្មានការជួយពីមន្ត្រីជំនាញទេ។ លោកថា ៖ «យើងរស់នៅភ្នំពេញស្រួល តែពេលមកតាមជនបទ យើងក៏ធុញទ្រាន់ខ្លះដែរ ពីព្រោះមួយថ្ងៃៗឃើញតែព្រៃភ្នំ តែឥឡូវយើងបានស៊ាំខ្លះៗវិញហើយ»។
លោក បញ្ជាក់ដែរថា ក្រុមលោកពុំសូវជួបនឹងទំនាស់ជាមួយក្រុមហ៊ុនទេ តែក្រុមដទៃប៉ះទង្គិចនឹងក្រុមហ៊ុនខ្លះ ខណៈគេមិនព្រមសហការ។ បញ្ហាដែលក្រុមបានជួបនោះ គឺថាពលរដ្ឋតែងចោទថា «ក្រុមហ៊ុនយកដីពួកគាត់ រីឯខាងក្រុមហ៊ុន ចោទថា ពលរដ្ឋជាអ្នកទន្ទ្រានយកដីគេ នេះជាបញ្ហាលំបាកពីព្រោះពុំមានសមត្ថកិច្ចដោះស្រាយទេ គឺក្រុមយើង គ្រាន់តែចុះវាស់ព្រំដីនិងធ្វើប្លង់បណ្តោះអាសន្នប៉ុណ្ណោះ។
លោក កុក សុភួង និស្សិតនៃសាកលវិទ្យាល័យភូមិន្ទនីតិសាស្រ្ត ជាអនុប្រធានក្រុមយុវជនចុះវាស់វែងដីខេត្តពោធិ៍សាត់ បានប្រាប់ដែរថា ក្រុមលោកកំពុងស្ថិតនៅក្នុងស្រុកក្រគរ ជាទីដែលមានទំនាស់ក្តៅគគុកកន្លងមក រហូតប្រជាជនធ្វើបាតុកម្មបិទផ្លូវជាតិទាមទារឲ្យរកដំណោះស្រាយ ប៉ុន្តែថា ឥឡូវពុំមានបញ្ហាជាមួយនឹងក្រុមហ៊ុនទេ តែមានបញ្ហាពីការស្នាក់នៅកន្លែងចង្អៀត ត្រូវដើរទៅវាស់ដីឆ្ងាយកាត់ព្រៃភ្នំ ខ្វះខាតទឹក អីតែប៉ុណ្ណឹងទេ។
លោកបន្តថា៖ «រាល់ការងារតែងមានការលំបាក តែដើម្បីប្រយោជន៍ប្រជាជនរស់នៅបានសេចក្តីសុខ ទោះជាពួកខ្ញុំលំបាកយ៉ាងណាក៏ពួកយើងស៊ូទ្រាំបានដែរ»។
លោក ថា ក្រុមលោកប្រឈមនឹងបញ្ហាសម្ភារប្រើប្រាស់ពុំគ្រប់គ្រាន់ ជាហេតុនាំឲ្យការងារយឺតមិនបានទាន់តាមសេចក្តីត្រូវការរបស់ប្រជា ពលរដ្ឋ។ លោកថា ពេលខ្លះពួកនិស្សិតយើងប្រើទូរស័ព្ទដៃទំនើប ជំនួសម៉ាស៊ីនថត យកមកប្រើដើម្បីដំណើរការងារផងដែរ។ លោកត្អូញថា៖ «អ្វីដែលពួកយើងបារម្ភ គឺបញ្ហាគ្រុនចាញ់នៅតំបន់ដែលមានគ្រុនចាញ់ ពីព្រោះកន្លែងខ្លះពួកយើងធ្វើការនៅក្នុងព្រៃតែម្តង»។
ពាក់ ព័ន្ធជាមួយនឹងក្រុមហ៊ុនដីសម្បទានវិញ លោកថា ពេលក្រុមយុវជនចុះមកវាស់វែងដីនោះ គេពុំបានមករារាំងទេ ហើយគេក៏ផ្អាកសកម្មភាពទាំងអស់ដែរ ព្រោះអីក្រុមការងារចុះទៅធ្វើការនេះ ក៏មានអាជ្ញាធរមូលដ្ឋានចុះជាប់ទៅជាមួយដែរ។
លោក អ៊ឹម ឈុនលឹម ទេសរដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់កាលពីដើមខែកក្កដាបានថ្លែងនៅក្នុងពិធី ជូនដំណើរក្រុមយុវជនស្ម័គ្រចិត្តថា យុទ្ធនាការវាស់វែងដីនេះ តាមគម្រោងរបស់រដ្ឋាភិបាលត្រូវបញ្ជូនក្រុមយុវជនស្ម័គ្រចិត្ត ១៦៨ ក្រុម ស្មើនឹងជាង ២០០០នាក់ ដើម្បីចុះទៅវាស់វែងចែកដីជូនពលរដ្ឋចំនួន ៣៥០.០០០គ្រួសារ ដោយក្នុងមួយក្រុមៗ មាន១២នាក់ មានប្រើឧបករណ៍ ដូចជា GPS កុំព្យូទ័រ និងសម្ភារខ្លះទៀត និងមានកិច្ចសហការជាមួយមន្ត្រីជំនាញនិងអាជ្ញាធរមានសមត្ថកិច្ចនៅ មូលដ្ឋាន។
លោក លឹម លៀងសែ នាយរងខុទ្ទកាល័យលោកនាយករដ្ឋមន្ត្រីហ៊ុន សែនបានឲ្យដឹងថា លោកមិនបានធ្វើការជាមួយក្រុមយុវជនស្ម័គ្រចិត្តនេះទេ តែបើមានបញ្ហាសុខភាព ពួកគេមានមន្ត្រីសុខាភិបាលចុះជាប់ជាមួយហើយ ដូច្នេះពុំមានបញ្ហាទេ។
លោក អំ សំអាត មន្ត្រីស៊ើបអង្កេតជាន់ខ្ពស់របស់អង្គការលីកាដូថ្លែងដែរថា ការបារម្ភពីក្រុមយុវជនស្ម័គ្រចិត្ត មកពីពួកគេនៅថ្មីថ្មោង មិនធ្លាប់ចុះធ្វើការនៅក្នុងព្រៃភ្នំ ប៉ុន្តែថា ក៏មិនគួរបណ្តោយឲ្យពួកគេចុះទៅកន្លែងមានមីននោះដែរ។ លោកថ្លែងថា៖ «អ្វីដែលខ្ញុំបារម្ភ គឺត្រូវធ្វើការដោយតម្លាភាព ឯករាជ្យនឹងមិនស្ថិតនៅក្រោមសម្ពាធពីខាងណាទេ គឺត្រូវស្ថិតនៅក្រោមតែប្រមុខរដ្ឋាភិបាលមួយតែប៉ុណ្ណោះ»៕
