ជាមួយករណីនោះដែរ ប្រតិភូមួយក្រុមដឹកនាំដោយលោកវរសេនីយ៍ឯក ទិត ចយ ជាស្នងការរងនគរបាលខេត្ដកំពង់ឆ្នាំង កាលពីថ្ងៃទី១៩ ខែកក្កដា ឆ្នាំ២០១២ បានអញ្ជើញចុះជួបសំណេះសំណាលសាកសួរសុខទុក្ខយុវជនស្ម័គ្រចិត្ដ ក្រុមទី៨៨ ដែលកំពុងបំពេញការងារវាស់វែងដីធ្លីជូនប្រជាពលរដ្ឋ នៅក្នុងឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង។
នៅក្នុងឱកាសនោះ ប្រតិភូនគរបាលខេត្ដកំពង់ឆ្នាំង បាននាំយកសាច់គោចំនួន ១៥គីឡូក្រាម មាន់ចំនួន ៦ក្បាល ទឹកត្រី ៦យួរ ទឹកស៊ីអ៊ីវ ៣យួរ ស្ករស ៦គីឡូក្រាម ទឹកបរិសុទ្ធចំនួន៩កេស មីចំនួន ៩កេស ត្រីខកំប៉ុងចំនួន៣កេស ប៊ីចេងចំនួន៣គីឡូក្រាម ខ្ទឹមសចំនួន៥គីឡូក្រាម និងត្រឡាចចំនួន ៣០ផ្លែ ទៅប្រគល់ជូនដល់ក្រុមយុវជនស្ម័គ្រចិត្ដផងដែរ។
មាន ប្រសាន៍នៅក្នុងឱកាសនោះ លោកវរសេនីយ៍ឯក ទិត ចយ បានសំដែងនូវការកោតសរសើរចំពោះទឹកចិត្ដដ៏មោះមុត នៃក្រុមយុវជនស្ម័គ្រចិត្ដទាំងអស់ក្នុងការចូលរួមបំពេញបេសកកម្មដ៏ ធំធេងជាមួយរាជរដ្ឋាភិបាលក្នុងការអនុវត្ដនយោបាយចាស់ សកម្មភាពថ្មី លើវិស័យដីធ្លីនាពេលនេះ។
លោកបានមានប្រសាសន៍ផ្ដាំផ្ញើដល់ ក្រុមយុវជនទាំងអស់ ឲ្យយកចិត្ដទុកដាក់ក្នុងការថែទាំសុខភាពឲ្យបានល្អ ហើយបើមានបញ្ហាអ្វីត្រូវរាយការណ៍មកអាជ្ញាធរមូលដ្ឋានជាបន្ទាន់ ដើម្បីជួយអន្ដរាគមន៍ឲ្យបានទាន់ពេលវេលា៕ S
