ប្រជាពលរដ្ឋដែលរស់នៅតាមដង ផ្លូវលេខ២៧១ និងអ្នកដំណើរឆ្លងកាត់កន្លែងកើតហេតុបាននិយាយថា នៅវេលាម៉ោងប្រហែល១០:៣០នាទីព្រឹកម្សិលមិញនេះ គេឃើញបុរសសង្ស័យម្នាក់ អាយុជាង៣០ឆ្នាំ បានស្ទុះឆក់កាំភ្លើង អាកាស្វាយបត់មួយដើមពីសមត្ថកិច្ចនគរបាល ដែលកំពុងឈរយាមនៅគោលដៅមួយកន្លែងក្រោយផ្សារ សុវណ្ណា ដែលស្ថិតក្នុងសង្កាត់ទំនប់ទឹក នៅមុខមន្ទីរពេទ្យរុស្ស៊ីតែម្តង។
ក្រុម អ្នកភូមិ បាននិយាយទៀតថា ក្រោយពីជនសង្ស័យបានឆក់យកកាំភ្លើងពីមន្ត្រីនគរបាលនោះហើយ ក៏ចាប់ផ្ដើមធ្វើការបាញ់រះជាច្រើនគ្រាប់មកលើប្រជាពលរដ្ឋ ដែលរស់នៅនិងអ្នកកំពុងធ្វើដំណើរឆ្លងកាត់នៅក្នុងតំបន់នោះ បណ្ដាលឲ្យស្ត្រីម្នាក់ស្លាប់ភ្លាមៗនៅនឹងកន្លែង និង បុរស ស្ត្រី៥ នាក់ផ្សេងទៀតរងរបួសធ្ងន់។ បន្ទាប់មកជនសង្ស័យក៏បានបាញ់សម្លាប់ខ្លួនឯងតែម្ដង។
លោក ម៉ី ប៊ុនរិន នាយប៉ុស្តិ៍នគរបាលសង្កាត់ទំនប់ទឹក បានប្រាប់ភ្នំពេញ ប៉ុស្តិ៍ ថា បន្ទាប់ពីស្ថានភាពនៃការផ្ទុះអាវុធកណ្ដាលទីប្រជុំជនរាជធានី ភ្នំពេញនេះបានស្ងប់ស្ងាត់ សមត្ថកិច្ចរបស់លោក បានធ្វើការត្រួតពិនិត្យ និងជួយអន្តរាគមន៍ដឹកជនរងគ្រោះយកទៅកាន់មន្ទីរពេទ្យនៅក្បែរនោះ [មន្ទីរពេទ្យរុស្សី] ដើម្បីសង្គ្រោះ និងបានរកឃើញអត្តសញ្ញាណរបស់ជនសង្ស័យនោះ គឺឈ្មោះសូ វុទ្ធី ហៅពុំ អាយុ ៣៣ឆ្នាំ ជាមន្ត្រីអនុរក្សពន្ធនាគារព្រៃស។
លោកឃាង សែ អាយុ៣៣ឆ្នាំ ដែលត្រូវជាកូនរបស់ស្ត្រីរងគ្រោះឈ្មោះ ងួន ហេង អាយុ៥៨ឆ្នាំ និងជាបងប្រុសរបស់កញ្ញា ងួន ពិសី អាយុ២៤ឆ្នាំ ដែលកំពុងសម្រាកនៅបន្ទប់សង្គ្រោះបន្ទាន់នៅមន្ទីរពេទ្យ រុស្ស៊ី បានប្រាប់ភ្នំពេញ ប៉ុស្តិ៍ថា ជនសង្ស័យមានអាការដូចជាញៀនថ្នាំ ដើរមកកញ្ឆក់កាំភ្លើងពីមន្ត្រីនគរបាលម្នាក់ហើយដើរសំដៅទៅមុខផ្ទះ របស់គាត់ ពេលនោះម្ដាយគាត់ចេញទៅស្រាប់តែជននោះបាញ់តែម្ដង។ បន្ទាប់មកប្អូនស្រីរបស់លោកស្ទុះចេញទៅលើកម្ដាយ ក៏ត្រូវវាបាញ់ថែមទៀត។
លោក បានបន្តថា៖ «ឃើញដូច្នោះខ្ញុំក៏ពួនសម្ងំនៅក្នុងផ្ទះ ក្រោយមកឮស្នូរផ្ទុះកាំភ្លើងម្ដងទៀត...មួយសន្ទុះក្រោយមកខ្ញុំ ចេញ មកក្រៅក៏ឃើញវាដួលទៅលើដីស្លាប់តែម្ដង»។
លោក បានប្រាប់ឲ្យដឹងទៀតថា ម្ដាយនិងប្អូនស្រីរបស់គាត់ត្រូវជនសង្ស័យបាញ់ត្រូវក្នុងម្នាក់ៗ ចំនួន២គ្រាប់ ចំស្មាស្តាំផ្នែកខាងលើ និងត្រគាក ដូចៗគ្នា។
លោក បានបញ្ជាក់ថា៖ «ពេលនេះម្ដាយ និងប្អូនស្រីរបស់ខ្ញុំ កំពុងស្ថិតក្នុងស្ថានភាពធ្ងន់ធ្ងរនៅឡើយ ហើយខ្ញុំបារម្ភពីសុវត្ថិភាពរបស់ពួកគាត់ខ្លាំងណាស់។ តាមគ្រូពេទ្យប្រាប់ខ្ញុំ ពួកគាត់មានសង្ឃឹមរស់ប្រមាណជា៦០ភាគរយប៉ុណ្ណោះ»។
មកទល់ពេល នេះ គេនៅមិនទាន់ដឹងពីមូលហេតុ ដែលនាំឲ្យជនសង្ស័យ ស្ទុះទៅដណ្ដើមកាំភ្លើងពីមន្ត្រីនគរបាល ដែលប្រចាំការនៅក្នុងតំបន់នោះនៅឡើយទេ។ ប៉ុន្តែបើតាមលោក ស៊ុន លាន ប្រធានពន្ធនាគារព្រៃស(ម១) បានប្រាប់ឲ្យដឹងថា ជនសង្ស័យ ឈ្មោះ សូ វុទ្ធី ធ្លាប់មានវិបត្តិប្តីប្រពន្ធ ហើយបានសុំច្បាប់ឈប់សម្រាកអស់រយៈពេលមួយខែហើយ។
លោក បានថ្លែងថា៖ «ខ្ញុំមិនដឹងពីមូលហេតុច្បាស់លាស់អំពីករណីដែលគេបាន ប្រព្រឹត្តនោះទេ ព្រោះគាត់បានដាក់ច្បាប់ឈប់សម្រាកជាងមួយខែហើយ ដោយគាត់ប្រាប់ថាគាត់សុំឈប់ដើម្បីដោះស្រាយវិបត្តិនៅក្នុងគ្រួសារ របស់គាត់»។
ទោះជាបែបណាក្ដីគេនៅមិនទាន់ដឹងថាតើក្នុង ករណីសមត្ថកិច្ច បណ្ដោយឲ្យជនសង្ស័យដណ្ដើមអាវុធពីខ្លួនបាន ហើយយកទៅបាញ់ប្រហារមកលើពលរដ្ឋ បណ្ដាលឲ្យស្លាប់ និងរងរបួសបែបនេះ សមត្ថកិច្ចត្រូវទទួលខុសត្រូវចំពោះឧបទ្ទវហេតុនេះ ក្នុងកម្រិតបែបណានោះទេ?
លោក ចាន់ សូវេត មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សអាដហុក បាននិយាយថា ក្នុងករណីនេះ មន្ត្រីនគរបាលដែលចាំយាមនៅក្នុងតំបន់កើតហេតុ មានការធ្វេសប្រហែសខ្លាំងបំផុត រហូតបណ្ដោយឲ្យជនសង្ស័យ ឆក់យកអាវុធពីខ្លួនបានយកមកបង្កហេតុប៉ះពាល់ដល់អាយុជីវិតពលរដ្ឋ និងសណ្ដាប់ធ្នាប់ សុវត្ថិភាព សង្គម។
លោក ថ្លែងថា៖ «ជាការពិត មន្ត្រីនគរបាលរូបនោះ គឺត្រូវតែមានទោសចំពោះភាពធ្វេសប្រហែសរបស់គាត់។ តែ ទោះជាបែបណាក្ដី ខ្ញុំសូមឲ្យសមត្ថកិច្ចពាក់ព័ន្ធមេត្តាចាត់វិធានការ ស៊ើបអង្កេតទៅលើករណីនេះឲ្យបានច្បាស់លាស់ ជាមុនសិន មុនពេលដាក់ពិន័យរដ្ឋបាល ឬធ្វើយ៉ាងណានោះ»៕
