បន្ទាប់ពីលេចចេញនូវគណនេយ្យ ហ្វេសប៊ុក ដាក់ឈ្មោះ តារាចម្រៀង សុគន្ធ នីសា លាយឡំនឹងរូបស្រីស្រាត កាលពីរសៀលថ្ងៃទី៥ ខែមិថុនា ឆ្នាំ២០១២ កន្លងមក បានធ្វើឲ្យភ្ញាក់ផ្អើលដល់កញ្ញា សុគន្ធ នីសា នៅពេលដែល CEN បានទូរស័ព្ទសម្ភាសន៍ពាក់ព័ន្ធនឹងរូបភាពអាក្រាត។ ប៉ុន្តែនៅល្ងាចថ្ងៃទី៦ ខែមិថុនានេះ គណនេយ្យហ្វេសប៊ុកនោះ មិនត្រូវបានឃើញមាននៅលើគេហទំព័រហ្វេសប៊ុកទៀតទេ។
គួររម្លឹកថា ទំព័រហ្វេសប៊ុក ដែលដាក់ឈ្មោះកញ្ញា សុគន្ធ នីសា ដែលមានលាយឡំនឹងរូបភាពស្រីស្រាត ដែលដាក់ឆ្លាស់គ្នាយ៉ាងតិច ១០ សន្លឹកនោះ ត្រូវបានបង្ហោះនៅក្នុងគេហទំព័រហ្វេសប៊ុក។
ទន្ទឹមនឹងការបង្ហោះរូបភាព នីសា លាយឡំនឹងរូបស្រីស្រាតនេះដែរ កាលរសៀលថ្ងៃទី៥ ខែមិថុនា ឆ្នាំ២០១២ គេហទំព័រ CEN បានទំនាក់ទំនងតាមទូរស័ព្ទជួបជាមួយកញ្ញា សុគន្ធ នីសា ហើយនៅក្នុងបទសម្ភាសន៍នោះ កញ្ញាបានបញ្ជាក់ឱ្យដឹងថា "ការបង្ហោះ និងការបង្កើតគេហទំព័រដែលប្រើឈ្មោះខ្ញុំ ក្នុងការបង្ហោះរូបភាពលាយឡំនឹងរូបស្រីស្រាតនេះ វាមិនត្រឹមត្រូវនោះទេ ព្រោះថាខ្ញុំពុំបានដឹងទាល់តែសោះ ថាគេបង្កើតទំព័រហ្វេសប៊ុកដែលបង្ហោះរូបស្រីស្រាត និងមានទំព័រហ្វេកប៊ុកមួយទៀតប្រើឈ្មោះនាងខ្ញុំ ចូលពាក់ព័ន្ធក្នុងរឿងនយោបាយ ហើយខ្ញុំក៏ពុំបានដឹងថា គេក្លែងបន្លំទំព័រហ្វេសប៊ុកដែលធ្វើឱ្យខូចឈ្មោះនាងខ្ញុំ ក្នុងសង្គមនេះដែរ"។
នីសា បន្តថា "ទំព័រហ្វេសប៊ុកនេះ គឺបង្កើតឡើងដើម្បីទំនាក់ទំនងជាមួយក្មេងៗ និងប្រិយមិត្តដែលគាំទ្ររូបនាងខ្ញុំនៅក្នុងហ្វេសប៊ុក។ ម្យ៉ាងវិញទៀត ខ្ញុំក៏ចង់ទប់ស្កាត់វាដែរ ប៉ុន្តែខ្ញុំមិនដឹងថាវាមានប្រភពមកពីណានោះទេ ហើយខ្ញុំចង់ផ្តាំផ្ញើទៅអ្នកបង្កើតទំព័រហ្វេសប៊ុកនេះថា នេះត្រឹមតែបង្កើតឈ្មោះរបស់ខ្ញុំ តែបើបង្កើតឈ្មោះសិល្បករផ្សេងទៀត តើធ្វើឱ្យប៉ះពាល់កិត្តិយសរបស់គេយ៉ាងណា?"។
"ការបង្កើតទំព័រ ហ្វេសប៊ុកនេះ គឺខ្ញុំគ្រាន់តែចង់ផ្សព្វផ្សាយព័ត៌មានជាមួយប្រិយមិត្តទាំងអស់ដែល បានគាំទ្ររូបនាងខ្ញុំ ក៏ដូចជាទស្សនិកជនដែលស្រឡាញ់រូបនាងខ្ញុំនេះដែរ"។ នាងបញ្ជាក់ពីគោលបំណងនៃការបង្កើតទំព័រហ្វេសប៊ុក។
កញ្ញា សុគន្ធ នីសា បានឱ្យដឹងទៀតថា ទំព័រហ្វេសប៊ុកដែលប្រើឈ្មោះរបស់នាង គឺមានច្រើនណាស់ដែលនាងចង់ទប់ស្កាត់ និងលុបបំបាត់។ ប៉ុន្តែអ្នកបង្កើតខ្លះ គឺគេយកទៅប្រើក្នុងន័យល្អៗជាមួយប្រិយមិត្តនោះទេ។
ម្យ៉ាងវិញទៀត កញ្ញាសុគន្ធ នីសា បានឱ្យដឹងទៀតថា មួយរយៈពេលខ្លីដែលនាងបានទៅប្រទេសក្រៅនោះ គឺនាងពុំបានគ្រប់គ្រងទំព័រហ្វេសប៊ុកដោយផ្ទាល់នោះទេ ហើយនាងពុំបានដឹងពីរឿងដែលគេយកទំព័រហ្វេសប៊ុកនេះ ទៅសរសេរប៉ះពាល់ដល់ផលិតកម្មមួយចំនួននោះទេ។ នាងថា "ខ្ញុំសូមអភ័យទោសដល់ផលិតកម្មមួយចំនួន ដែលក្នុងទំព័រហ្វេសប៊ុករបស់ខ្ញុំ បានសរសេរប៉ះពាល់ដោយអចេតនា"។
នីសា បាននិយាយថា "ខ្ញុំសូមថ្លែងអំណរគុណដល់ទស្សនិកជន និងប្រិយមិត្តទាំងអស់ ដែលបានគាំទ្ររូបនាងខ្ញុំ តាំងពីដើមរហូតដល់បច្ចុប្បន្ន។ បើទោះជាមានព័ត៌មានលេចឮអាក្រក់យ៉ាងណាតាមទំព័រហ្វេសប៊ុក ក៏ប្រិយមិត្ត និងទស្សនិកជននៅតែគាំទ្ររូបនាងខ្ញុំ ហើយជឿជាក់ថា រូបនាងខ្ញុំពុំបានប្រព្រឹត្តអ្វីដូចដែលមាននៅក្នុងទំព័រហ្វេសប៊ុ កក្លែងបន្លំនោះទេ"៕
