ឆ្លងកាត់ការប្រកួតជាក់ស្តែងនៅលើសង្វៀន ខ្លាចាស់ អូត ភូថង ដែលកំពុងមានវិបត្តិផ្លូវចិត្តដោយសារម្តាយរបស់ខ្លួន ត្រូវបានតុលាការកាត់ទោសដោយកំបាំងមុខឲ្យជាប់ពន្ធនាគារចំនួន១៧ ឆ្នាំ ពីបទជួញដូរមនុស្សឆ្លងដែនខុសច្បាប់ នៅក្នុងអំឡុងឆ្នាំ២០០៧នោះ ហាក់មិនសូវមានអារម្មណ៍ពុះកញ្ជ្រោល ក្នុងការវាយបកទៅលើ ភេឌី ម៉ឺនសុភា នោះឡើយ បើទោះបីជាការប្រកួតនេះជាជំនួបសងសឹកក៏ដោយ។
សម្រាប់ការប្រកួត២ទឹកដំបូង អូត ភូថង បានត្រឹមទាត់ចេញមួយៗ នៅពេល ម៉ឺនសុភា បានទាត់ និងម៉ាត់សន្ធាប់ទៅលើផ្ទៃមុខរបស់គេបែបខ្លាចរអាម្តងម្កាល។ សកម្មភាពនេះ បានធ្វើឲ្យលោកអាជ្ញាកណ្តាល ធ្វើការព្រមានដល់អ្នកទាំងពីរ នៅដើមទឹកទី៣ ខណៈពួកគេនៅតែបន្តសកម្មភាពវាយបកគ្នាក្នុងសភាពគ្មានរសជាតិ។
ក្រោយការព្រមាន ភេឌី ម៉ឺនសុភា បានសម្រេចចិត្តចូលវាយលុកដោយគេបានចូលទាត់ និងប្រើប្រាស់កណ្តាប់ដៃឆ្វេងស្តាំម៉ាត់សន្ធាប់ចូលផ្ទៃមុខ អូត ភូថង លឿនៗ។ ផ្ទុយទៅវិញអ្នកប្រដាល់ចាស់វស្សាមកពីសមាគមកីឡាប្រដាល់ក្រសួង ការពារជាតិ នៅតែរក្សាការទាត់ចេញមួយៗ ដើម្បីទប់ស្ថានភាពនៃការប្រកួត។
តែទោះបីជាយ៉ាងណា នៅពេល ម៉ឺនសុភា បង្កើនការទាត់ និងម៉ាត់ចូលផ្ទៃមុខរបស់គេកាន់តែខ្លាំងនោះ អូត ហាក់បានបង្កើនការវាយបកវិញ ច្រើនជាងបណ្តាទឹកកន្លងមក ប៉ុន្តែស្នៀតទាត់របស់គេ នៅតែស្ថិតក្រោមការវាយប្រហារដោយកណ្តាប់ដៃដ៏លឿនរបស់ ម៉ឺនសុភា ដដែល។
ដោយសារអត់វិធីសាស្រ្តក្នុងការទប់ស្កាត់ពីការទាត់ និងម៉ាត់ចូលពេញៗរបស់ ម៉ឺនសុភា នោះ អូត បានបង្ខំចិត្តប្រើដៃទាំងពីររបស់ខ្លួនចូលប្តូរជាមួយ ម៉ឺនសុភា ហើយនៅពេល ម៉ឺនសុភា ចូលកៀកនោះ អូត បានស្ទុះចូលបុកជង្គង់ និងវាយកែងថែមយ៉ាងលឿន។ ស្នៀតទាំងនេះបានធ្វើឲ្យ ម៉ឺនសុភា បង្ហាញអាការៈភិតភ័យនៅពេល អូត ចាប់ក្រៀកបានម្តងៗ ហើយស្ថានភាពនេះ បានផ្តល់ឱកាសឲ្យ អូត អាចប្រើទម្ងន់ជើងទាត់សន្ធាប់ខ្លាំងទៅលើ ម៉ឺនសុភា បានយ៉ាងល្អ។
តែទោះបីជាយ៉ាងណាក្រោយស្នូរជួងបញ្ចប់ទឹកទី៥ភ្លាម អ្នកទស្សនាប្រមាណ៨០ទៅ៩០ភាគរយ ដែលបានចូលរួមទស្សនានៅសង្វៀនផ្ទាល់បានស្រែកខ្លាំងៗថា៖«ក្រហម (ភេឌី ម៉ឺនសុភា)ឈ្នះ!ក្រហមឈ្នះ!» ប៉ុន្តែស្ថិតក្នុងបរិយាកាសដ៏អាប់អួនោះលោក មាស សុខគ្រី បានញាក់ភ្នែកឲ្យគណៈកម្មការវិនិច្ឆ័យប្រកាសឲ្យ អូត ភូថង ស្មើពិន្ទុជាមួយ ភេឌី ម៉ឺនសុភា ជាឯកច្ឆន្ទ ហើយការសម្រេចនោះ បានធ្វើឲ្យមានការស្រែករិះគន់ខ្លាំងៗពីអ្នកទស្សនា។
ឆ្លើយតបទៅនឹងសំណួរ ដែលសួរថា តើឯងយល់បែបណាចំពោះការកាត់សេចក្តីនេះ? អ្នកប្រដាល់វ័យ១៩ឆ្នាំ ភេឌី ម៉ឺនសុភា បានឆ្លើយទាំងស្ទាក់ស្ទើរថា៖«ខ្ញុំក៏មិនដឹងពីការកាត់សេចក្តី នេះដែរ ប៉ុន្តែមុនពេលគេប្រកាសលទ្ធផលនេះ ខ្ញុំជឿថា ខ្ញុំជាអ្នកឈ្នះ ព្រោះខ្ញុំបានវាយចូលគាត់ច្រើន»។
ចំណែកលោក ភេឌី គ្រូបង្វឹកធំរបស់ ភេឌី ម៉ឺនសុភា ហាក់មិនសប្បាយចិត្តចំពោះសកម្មភាពវាយលុករបស់ ម៉ឺនសុភា នោះឡើយ។ ជនជាតិអាហ្វ្រិករូបនេះ បានធ្វើការណែនាំដល់ ម៉ឺនសុភា ក្រោយការប្រកួតថា៖«ជាអ្នកប្រដាល់ម្នាក់ត្រូវតែមានភាពជឿជាក់ ក្នុងការវាយលុករបស់ខ្លួន ព្រោះភាពជឿជាក់បានធ្វើឲ្យការវាយចេញបានលឿន និងមានទម្ងន់»។
លោកបានបញ្ជាក់ប្រាប់សិស្សរបស់ខ្លួនទៀតថា៖«វាជាការងាយស្រួល បំផុតក្នុងការយកឈ្នះលើ អូត ភូថង ព្រោះគេបានបង្ហាញអាការៈហត់ស្ទើរតែដកដង្ហើមលែងដល់គ្នាទៅហើយ ប៉ុន្តែឯងបែរជាមានភាពស្ទាក់ស្ទើរក្នុងការចូលវាយលុកទៅវិញ»៕
