លោក វិញ ហួរ ប្រធានក្រុមហ៊ុន កំពង់ផែកំពតបានប្រាប់ភ្នំពេញ ប៉ុស្តិ៍កាលពីថ្ងៃចន្ទថា ការចាប់ផ្តើមសាងសង់រោងចក្រនេះនឹងត្រូវធ្វើឡើងក្នុងខែ វិច្ឆិកាខាងមុខ និងចំណាយពេល៣០ខែ ក្នុងការបញ្ចប់។ រោងចក្រអគ្គិសនីនេះនឹងសាងសង់នៅលើផ្ទៃដី៣០ហិកតាក្នុង តំបន់សេដ្ឋកិច្ចពិសេសខេត្តកំពត ដោយមានការផ្តត់ផ្គង់ធ្យូងថ្មពីប្រទេស ឥណ្ឌូនេស៊ី។ នេះបើតាមលោកវិញ ហួរ។
លោកបានបន្តថា រោងចក្រដើរដោយថាមពលធ្យូងថ្មនេះនឹងផលិតថាមពល២៧០មេហ្គាវ៉ាត់ នឹងដាក់ឲ្យដំណើរការ១៣៥ម៉េហ្គាវ៉ាត់ ក្នុងដំណាក់កាលដំបូង។
ការវិនិយោគសរុបក្នុងគម្រោងនេះ មានទឹកប្រាក់ ៣៧០លានដុល្លារ ក្នុងនោះ ២៧០លានដុល្លារសម្រាប់ការសាងសង់រោងចក្រអគ្គិសនី និង១០០លានដុល្លារសម្រាប់ គម្រោងហេដ្ឋារចនាសម្ព័ន្ធក្នុងតំបន់។ នេះបើតាមលោក វិញ ហួរ។
អភិបាលខេត្តកំពត លោក ខូយ ឃុនហ៊ូរ បានឲ្យដឹងថា ការបង្កើតរោងចក្រអគ្គិសនីដើរដោយថាមពលធ្យូងថ្មនេះ គឺជាការបំពេញបន្ថែមលើលទ្ធភាពផលិតអគ្គិសនីដោយទំនប់វារី អគ្គិសនីកំចាយ។ លោកបន្តថា៖ «មានភ្លើងកាន់តែច្រើនគឺកាន់តែល្អ ព្រោះអាចធ្វើឲ្យតម្លៃអគ្គិសនីចុះថោក ហើយវាក៏ជាផ្នែកនៃការទាក់ទាញវិនិយោគផងដែរ»។ លោកបន្ថែមថា នៅពេលមានការវិនិយោគ វានឹងជួយបង្កើតការងារឲ្យប្រជាជនក្នុងតំបន់ និងរួមចំណែកដល់ការកាត់បន្ថយចំណាកស្រុក។
លោក វិញ ហួរ បានឲ្យដឹងថា ថាមពលអគ្គិសនីដែលផលិតបាននឹងត្រូវផ្គត់ផ្គង់ដល់រោងចក្រ ចម្រាញ់ប្រេងមួយនៅតំបន់ក្បែរនោះ ហើយក្រៅពីនោះគឺត្រូវផ្គត់ផ្គង់នៅរោងចក្រផ្សេងៗនៅតំបន់សេដ្ឋកិច្ច ពិសេស ដែលនឹងមានឧស្សាហកម្មធុនធ្ងន់ច្រើន ដូចជា រោងចក្រស្លដែក រោងម៉ាស៊ីនកិនស្រូវ។ លោកបន្តថា៖ «រោងចក្រស្លដែកមួយរបស់ចិន ក៏កំពុងសិក្សាពីលទ្ធភាពសាងសង់រោងចក្រដើម្បីផលិតដែក៥លាន តោនក្នុងមួយឆ្នាំនៅតំបន់នោះដែរ»។
លោក ស៊ុយ សែម រដ្ឋមន្ត្រីក្រសួងឧស្សាហកម្មរ៉ែ និង ថាមពល បានប្រាប់អ្នកសារព័ត៌មាននៅពេលចុះហត្ថលេខាទទួលជំនួយហិរញ្ញវត្ថុ ពី អង្គការអភិវឌ្ឍន៍ឧស្សាហកម្មសហប្រជាជាតិ កាលពីថ្ងៃ១៤ មិថុនា ថា រោងចក្រអគ្គិសនីនោះផលិតអគ្គិសនីសម្រាប់តែផ្គត់ផ្គង់នៅក្នុងតំបន់ សេដ្ឋកិច្ចប៉ុណ្ណោះ។
លោកបន្តថា កម្ពុជាមានទំនប់វារីអគ្គិសនីបានដាក់ឲ្យប្រើប្រាស់ ហើយមួយចំនួនទៀតកំពុងសាងសង់។ ចំណែករោងចក្រអគ្គិសនីដើរដោយថាមពលធ្យូងថ្ម ក៏មានច្រើនកំពុងសាងសង់នៅក្នុងខេត្តព្រះសីហនុ និង ខេត្តកោះកុងផងដែរ។ លោកថ្លែងថា បន្ទាប់ពីឆ្នាំ២០១៥ កម្ពុជាមិនមានកង្វល់លើបញ្ហាអគ្គិសនីនោះទេ។
បើទោះបីការវិនិយោគលើវិស័យថាមពល ជាការជំរុញការអភិវឌ្ឍវិស័យសេដ្ឋកិច្ច ក៏ដោយ ប៉ុន្តែការសិក្សាពីផលប៉ះពាល់បរិស្ថានគួរត្រូវបានធ្វើឡើង។
លោក សុន ឆ័យ តំណាងរាស្រ្តគណបក្សសម រង្ស៊ី បានឲ្យដឹងថា ការសាងសង់នៅតំបន់ឆ្នេរ មិនត្រឹមតែធ្វើឲ្យប៉ះពាល់បរិស្ថានប៉ុណ្ណោះទេប៉ុន្តែវាក៏ប៉ះពាល់ ដល់ទេសចរណ៍ផងដែរ។ លោកបានបន្តថា៖ «ការសាងសង់រោងចក្រថាមពលអគ្គិសនីដើរដោយថាមពលធ្យូងថ្មបង្ក ការប៉ះពាល់ខ្លាំងដល់បរិស្ថាន ពិសេសនៅតាមតំបន់ឆ្នេរ»។ លោកបន្តថា រាល់ការសាងសង់រោងចក្រថាមពលអគ្គិសនីរដ្ឋាភិបាលមិនដែលដាក់ឲ្យ មានការដេញថ្លៃនោះទេ ប៉ុន្តែបែរជាធ្វើច្បាប់ឲ្យរដ្ឋសភាធានាលើតម្លៃអគ្គិសនីដែល ក្រុមហ៊ុនចេញលក់ទៅវិញ ដែលរាល់តម្លៃទាំងអស់សុទ្ធតែខ្ពស់ជាងប្រទេសជិតខាង។ លោកថ្លែងថា៖ «នៅប្រទេសគេផ្សេង គេមិនដែលឲ្យរដ្ឋសភាធានាទៅលើកតម្លៃអ៊ីចឹងទេ វាមិនមានតម្លាភាពនោះទេ។ គេធ្វើត្រូវរ៉ូវគ្នារួចហើយយកមកឲ្យរដ្ឋសភាធានា»៕
