លោក ស៊ីម សេនាជាតិ អគ្គនាយកគ្រឹះស្ថានមីក្រូហិរញ្ញវត្ថុប្រាសាក់ ឲ្យដឹងកាលពីថ្ងៃម្សិលមិញថា ប្រាសាក់នឹងដាក់ឲ្យដំណើរការម៉ាស៊ីន ATM នៅចុងខែកក្កដា ឬដើមខែសីហា ក្នុងនោះ១៥គ្រឿងដាក់នៅភ្នំពេញនិង១៥ទៀតដាក់ឲ្យដំណើរការនៅ តាមបណ្តាខេត្ត។
លោកបន្តថា ការសម្រេចដាក់ឲ្យដំណើរការម៉ាស៊ីន ATM គឺបន្ទាប់ពីគឹ្រះស្ថានមីក្រូហិរញ្ញវត្ថុមួយនេះបានឃើញនូវកំណើន នៃអ្នកដាក់ប្រាក់បញ្ញើ ដែលរហូតពេលនេះមានចំនួន ពី១៧លាន ទៅ១៨លានដុល្លារ។ ជាមួយគ្នានោះ មានអតិថិជនមួយចំនួនបានត្អូញត្អែរពីភាពលំបាកដោយសារមិនអាចដក ប្រាក់បាននៅចុងសប្តាហ៍។
លោកថ្លែងថា៖ «យើងគិតថា ដើម្បីទាក់ទាញអតិថិជន ហើយធ្វើឲ្យអតិថិជនងាយស្រួលក្នុងការប្រតិបត្តិការសាច់ប្រាក់ យើងក៏សម្រេចដាក់ ATM ឲ្យគាត់ ។យើងឃើញមានកំណើននៅក្នុងការដាក់ប្រាក់សន្សំ ហើយពេលយើងជួបអតិថិជន គាត់ច្រើនត្អួញត្អែរថា គាត់មិនអាចប្រតិបត្តិការនៅថ្ងៃចុងសប្តាហ៍ទេ។ ដូចនេះយើងគិតថា យើងត្រូវតែដាក់វា»។
យោងតាមការចុះផ្សាយរបស់ភ្នំពេញ ប៉ុស្តិ៍ កាលដើមខែមីនា គ្រឹះស្ថានមីក្រូហិរញ្ញវត្ថុប្រាសាក់ នឹងប្រែក្លាយខ្លូនទៅជាធនាគារពាណិជ្ជនៅចុងឆ្នាំ២០១៣ ឬ ២០១៤ ខាងមុខនេះ។
លោក ស៊ីម សេនាជាតិ បាននិយាយថា ក្នុងចំណោមគ្រឹះស្ថានមីក្រូហិរញ្ញវត្ថុទាំងអស់ ប្រាសាក់ជាគ្រឹះស្ថានមីក្រូហិរញ្ញវត្ថុដំបូងគេបង្អស់ ដែលបំពាក់ម៉ាស៊ីនATM។ លោកមានសង្ឃឹមថា ប្រាសាក់នឹងអាចរីកចម្រើនដូចធនាគារពាណិជ្ជធំៗដែរ។
លោកបន្តថា៖ «ខ្ញុំឃើញមានម៉ាស៊ីន ATM ច្រើនដែរ តែយើងឃើញច្រើនមានតែ អេស៊ីលីដាទេ ដូចនេះយើងសង្ឃឹមថា យើងមានកន្លែងសម្រាប់ការរីកចម្រើនជាមួយអេស៊ីលីដាដែរ»។
អេស៊ីលីដា ដែលជាធនាគារក្នុងស្រុកធំជាងគេ បានប្រែខ្លួនពីគ្រឹះស្ថានមីក្រូហិរញ្ញវត្ថុទៅជាធនាគារពាណិជ្ជ ក្នុងឆ្នាំ២០០១ ហើយរហូតដល់ពេលនេះក៏ជាធនាគារដែលមានការប្រតិបត្តិការម៉ាស៊ីន ATM ច្រើនជាងគេនិងទូលំទូលាយជាងគេផង។
លោក អ៊ិន ចាន់នី ប្រធាននាយកធនាគារអេស៊ីលីដាបានឲ្យដឹងថាលោកមិនបារម្ភអំពីការ ប្រកួតប្រជែងពីការដាក់ឲ្យមានម៉ាស៊ីនATM ពីណាក់គ្រឹះស្ថានមីក្រូហិរញ្ញវត្ថុនោះទេ ព្រោះមានការបម្រើឲ្យអតិថិជនរៀងៗខ្លួន។ហើយលោកក៏ចាត់ទុកថា នេះមិនមែនជាការប្រកួតអ្វីនោះទេ។
រហូតមកទល់ពេលនេះធនាគារនេះបានចេញកាត ATM ចំនួនជាងកន្លះលានដល់អតិថិជនរបស់ខ្លួន តែចំនួនដែលកំពុងប្រើប្រាស់មានចំនួនជាង ៤៦ ម៉ឺនកាត។ នេះបើយោងតាមការបញ្ជាក់របស់ លោកស្រី សុខ សោភា នាយិកាប្រតិបត្តិទីផ្សារនៃធនាគារអេស៊ីលីដា។
លោកស្រីបានឲ្យដឹងថា ម៉ាស៊ីន ATM ដាក់ឲ្យដំណើរការនៅភ្នំពេញទំាំងអស់មានចំនួន៥៧ ចំណែក៧៧ទៀតបានដាក់ឲ្យដំណើរការនៅតាមបណ្តាខេត្តនៅទូទាំង ប្រទេស ហើយ ចំនួនកាត ATM ស្មើនឹង៥៦ភាគរយ ចេញឲ្យអ្នកនៅភ្នំពេញ និង ៤៤ភាគរយ ចេញឲ្យអ្នកនៅតាមបណ្តាខេត្តទូទាំងប្រទេស។
លោកស្រីបន្តថា៖ «យើងបានចេញកាតភាគច្រើននៅភ្នំពេញ ព្រោះប្រជាជននៅភ្នំពេញមានការយល់ដឹងច្រើន តែយើងឃើញថារហូតមកទល់ពេលនេះ ប្រជាជននៅតាមខេត្តក៏មានកំណើននៃការប្រើប្រាស់ផងដែរ»។
លោកស្រី ងួន សុខា អគ្គនាយក និងជាអ្នកនាំពាក្យធនាគារជាតិនៃកម្ពុជា មានប្រសាសន៍ថា ស្ថិតិម៉ាស៊ីនបានកើនឡើងពីជាង៥០០គ្រឿងនៅដំណាច់ ២០១១ រហូតដល់៦១៣គ្រឿងនៅទូទាំងប្រទេស។ លោកបានស្រីបន្តថា៖ «ធនាគាររីកចម្រើនទៅតាមចំនួនអតិថិជនរបស់គាត់ ប្រសិនជាគ្មានកំណើនទេ ក៏គាត់មិនដាក់ដែរ ព្រោះការដាក់ម៉ាស៊ីននេះក៏គាត់ត្រូវចំណាយលុយដែរ»៕
