ក្នុងវ័យ ២១ឆ្នាំ កញ្ញា រ៉ន រតនៈ ហៅមីគី គឺព្រឹន្ទបាលឯកការិយាល័យទី៥ នៃអគ្គបញ្ជាការកងទ័ពជើងគោក ដែលមានឪពុកឈ្មោះ សុខ សារ៉ន មានឋានៈជាឧត្តមសេនីយ៍ត្រី ម្តាយឈ្មោះ សុខ រតនា មានឋានៈជាវរសេនីយ៍ត្រី។ មីគីមានឪពុកម្តាយជាកងទ័ពជើងគោក នាង
មានស្រុកកំណើតនៅទីក្រុងភ្នំពេញ មានបងប្អូនស្រីៗ ៣នាក់ ក្នុងនោះនាងជាកូនទី២។
កញ្ញា រ៉ន រតនៈ ហៅមីគី បានរៀបរាប់ពីដំណើរជីវិតជាយុទ្ធនារីកងទ័ព និងជីវិតសិល្បៈចម្រៀងចម្រុះ ឲ្យអ្នកយកព័ត៌មានយើងបានដឹងថា ថ្វីបើនាងមានឪពុកម្តាយជាមន្ត្រីកងទ័ពក៏ពិតមែន តែដោយសារនាងមាននិស្ស័យសិល្បៈក្នុងខ្លួនតាំងពីកុមារភាពមកនោះ នៅពេលពេញវ័យ ក្រោយពីសិក្សាបញ្ចប់ត្រឹមថ្នាក់ទី១២ នៅឆ្នាំ២០០៨ នាងបានជ្រើសរើសការងារចូលបម្រើកងទ័ព និងឆ្លៀតពេលហាត់ច្រៀង ដោយយកម៉ាញ៉េ និងទូរទស្សន៍ចាក់ខារ៉ាអូខេច្រៀងតាម មិនយូរប៉ុន្មានក៏ចេះចាំប៉ារូល អាចច្រៀងត្រូវតាមចង្វាក់ភ្លេង។
នៅឆ្នាំពាក់កណ្តាលឆ្នាំ២០០៨ មីគីក៏បានបណ្តោយខ្លួនជ្រៀតចូលប្រឡូកក្នុងវិស័យសិល្បៈចម្រៀងសម័យ ចម្រុះ ដោយដំបូងច្រៀងថតសំឡេងចូលស៊ីឌីឲ្យផលិតកម្មអនប៊ីយ ជាផលិតកម្មក្រៅប្រទេស បានជាច្រើនបទលក់ទៅក្រៅប្រទេស។ ប៉ុន្តែនាងភ្លេចចំណងជើងបទចម្រៀងទាំងនោះអស់ទៅហើយ។
ថ្វីបើ មានរួបសម្ផស្សស្រស់ស្អាត គួបផ្សំនឹងទឹកដមសំឡេងពិរោះរណ្តំចិត្តផងនោះ ក៏មីគីនៅតែមិនទាន់ដណ្តើមបានប្រជាប្រិយភាព ធ្វើឲ្យកេរ្តិ៍ឈ្មោះបានល្បីនៅឡើយនោះទេ។ ទោះបីជាយ៉ាងនេះក្តី បងប្អូនប្រជាជនខ្មែរដែលរស់នៅឯក្រៅប្រទេស បានគាំទ្រទឹកដមសំឡេងរបស់នាង រហូតផ្តល់ឱកាសឲ្យនាងបានចេញទៅសម្តែងច្រៀងនៅក្រៅប្រទេសមួយចំនួន ដូចជាចេញទៅសម្តែងច្រៀងនៅឯប្រទេសអូស្ត្រាលី កាលពីឆ្នាំ២០១០ ហើយបច្ចុប្បន្នកំពុងត្រៀងខ្លួនចេញទៅច្រៀងនៅប្រទេសអូស្ត្រាលី និងប្រទេសបារាំង ក្នុងឆ្នាំ២០១២ ឆាប់ៗខាងមុខនេះ។
តារាចម្រៀង ថ្មីវ័យក្មេងរូបនេះ ក្រៅពីអាជីពជាកងទ័ពជើងគោក និងអាជីពជាតារាចម្រៀងប្រចាំភោជនីយដ្ឋានវ័នម័រ នាងមានបំណងចង់ក្លាយជាតារាសម្តែងកាយវិការខារ៉ាអូខេតាមបទចម្រៀង និងចង់ក្លាយជាតារាសម្តែងភាពយន្តផងដែរ។
ទាក់ទងនឹងជីវិត ស្នេហា សិល្បការិនីមានរូបសម្ផស្សស្រស់ស្អាតរូបនេះ ប្រាប់ទាំងអឹមអៀនថា "សព្វថ្ងៃនាងខ្ញុំនៅក្មេង នៅបន្តសិក្សាភាសាអង់គ្លេស មិនទាន់គិតស្រមៃឃើញចង់មានស្នេហា សង្សារអ្វីនោះទេ ហើយបានសច្ចាក្នុងចិត្តថា សង្សារនាងខ្ញុំមិនយកទេ បើយកគឺយកប្តីតែម្តង ប៉ុន្តែមិនមែនពេលនេះនោះទេ ចាំមានអាយុច្រើនបន្តិចសិន គឺនាងខ្ញុំកំពុងតែខិតខំសិក្សារៀនសូត្រ និងខិតខំកសាងកេរ្តិ៍ឈ្មោះសិន"៕
