ភ្នំពេញ:
ប្រទេសកម្ពុជា និងប្រទេសថៃ
បានសហការបង្កើនពាណិជ្ផកម្ម និងទេសចរណ៍
ក្រោមកិច្ចព្រមព្រៀងថ្មីមួយ ដែលមានសុពលភាពចាប់ពីថ្ងៃទី១៤
ខែមិថុនានេះតទៅ។ កិច្ចព្រមព្រៀងនេះ នឹងសម្រួលដល់នីតិវិធីនានា
នៅតំបន់ព្រំដែនដ៏សំខាន់ សម្រាប់ឆ្លងកាត់ប្រទេសទាំងពីរ។ លោក Craig Steffensen នាយកធនាគារអភិវឌ្ឍន៍អាស៊ីប្រចាំប្រទេសថៃ ដែលបានចូលរួមពិធីសម្ពោធ ដើម្បីអនុវត្ដកិច្ចព្រមព្រៀងដឹកជញ្ផូនឆ្លងដែន ដែលប្រារឰធ្វើឡើងនៅព្រំដែន អារញ្ញប្រាថេត-ប៉ោយប៉ែត នៅថ្ងៃនេះ បានមានប្រសាសន៍ថា “លទ្ធភាពនៃការធ្វើចរាចររបស់ប្រជាជន ការដឹកជញ្ផូនទំនិញ និងយានជំនិះ ឆ្លងដែនព្រំដែនប្រកបដោយប្រសិទ្ធភាព និងការទទួលខុសត្រូវ គឺជាស្នូលនៃសមាហរណកម្មសេដ្ឋកិច្ចថ្នាក់តំបន់”។ លោកបន្ដថា “កិច្ចព្រមព្រៀងថ្ងៃនេះ នឹងកាត់បន្ថយការចំណាយលើភ័ស្ដុភារ និងជួយសម្រួលដល់កំណើនសេដ្ឋកិច្ច និងការអភិវឌ្ឍសង្គម រវាងប្រទេសថៃ-កម្ពុជា និងបណ្ដាប្រទេសនានានៅក្នុងមហាអនុតំបន់ទន្លេមេគង្គ”។
ក្រោមកិច្ចព្រមព្រៀងទ្វេភាគី ដែលជាវិធានការផ្ដួចផ្ដើមដំបូងមួយ ដើម្បីអនុវត្ដកិច្ចព្រមព្រៀងដឹកជញ្ផូនឆ្លងដែន (CBTA) នៅច្រកព្រំដែន រថយន្ដដឹកទំនិញ និងរថយន្ដក្រុង នៃប្រទេសទាំងពីរ ដែលធ្វើដំណើរតាមផ្លូវដ៏មមាញឹក រវាងទីក្រុងបាងកក និងទីក្រុងភ្នំពេញ នឹងអាចធ្វើដំណើរឆ្លងកាត់ព្រំដែន និងបន្ដដំណើររបស់ពួកគេបាន ដោយមិនចាំបាច់ឈប់នៅព្រំដែន ឬត្រូវផ្ទេរទំនិញ ឬអ្នកធ្វើដំណើរ ទៅកាន់រថយន្ដមួយផ្សេងទៀត ដែលរង់ចាំនៅម្ខាងទៀត ដូចកាលពីពេលមុន។ ការលើកកម្ពស់ការភ្ជាប់ទំនាក់ទំនងដឹកជញ្ផូន រវាងរាជធានីទាំងពីរនេះ នឹងកាត់បន្ថយពេលវេលាសម្រាប់ការធ្វើដំណើរបានយ៉ាងច្រើន ហើយត្រូវគេរំពឹងថា នឹងលើកកម្ពស់សកម្មភាពសេដ្ឋកិច្ច នៅតាមច្រករបៀងសេដ្ឋកិច្ចភាគខាងត្បូង នៃមហាអនុតំបន់ទន្លេមេគង្គ (GMS)។
ចំនួនកូតាបឋម លើលិខិតអនុញ្ញាតឱ្យរថយន្ដធំ និងរថយន្ដក្រុង ដែលគ្មានកំណត់កាលវិភាគ ឆ្លងកាត់ព្រំដែននេះ ត្រូវបានឯកភាពដោយប្រទេសទាំងពីរ ហើយចំនួននេះនឹងត្រូវបង្កើនបន្ដិចម្ដងៗ នាពេលអនាគត។ ហើយវានឹងមានការរៀបចំស្រដៀងគ្នានេះ សម្រាប់ច្រកព្រំដែនតាមបណ្ដោយច្រករបៀង មហាអនុតំបន់ទន្លេមេគង្គផ្សេងៗទៀត នាពេលអនាគត។
កិច្ចព្រមព្រៀងដឹកជញ្ផូនឆ្លងដែន (CBTA) គឺជាគំនិតផ្ដួចផ្ដើមដ៏សំខាន់មួយ នៃកម្មវិធីសហប្រតិបត្ដិការសេដ្ឋកិច្ច របស់មហាអនុតំបន់ទន្លេមេគង្គ ដែលមានគោលបំណងដោះស្រាយបញ្ហាមិនស្របគ្នា និងបញ្ហាពិបាកៗនៃបែបបទឆ្លងដែនផ្សេងៗទៀត ដូចជា លក្ខខណ្ឌតម្រូវផ្នែកទិដ្ឋាការដែលមានភាពរឹតត្បិត ការកម្រិតសម្រាប់ការចូលយានយន្ដ និងការហាមឃាត់ ឬទប់ស្កាត់ចរាចរណ៍ឆ្លងកាត់ ជាដើម ដែលបញ្ហាទាំងនេះមានផលប៉ះពាល់មកលើពាណិជ្ផកម្ម និងការអភិវឌ្ឍក្នុងតំបន់។
រហូតមកដល់ពេលបច្ចុប្បន្ននេះ គ្រប់ប្រទេសទាំងអស់នៅក្នុងមហាអនុតំបន់ទន្លេមេគង្គ បានផ្ដល់សច្ចាប័នពេញលេញ លើកិច្ចព្រមព្រៀងចម្បង របស់កិច្ចព្រមព្រៀងដឹកជញ្ផូនឆ្លងដែន (CBTA) ហើយប្រទេសចំនួន ៤ បានផ្ដល់សច្ចាប័នពេញលេញ លើឧបសម្ព័ន្ធ និងពិធីសារនានារបស់ CBTA។
ធនាគារអភិវឌ្ឍន៍អាស៊ី ដែលមានមូលដ្ឋាននៅក្នុងទីក្រុងម៉ានីល ខិតខំបំពេញការងារ ដើម្បីកាត់បន្ថយភាពក្រីក្រនៅអាស៊ី និងប៉ាស៊ីហ្វិក តាមរយៈកំណើនសេដ្ឋកិច្ច ដែលមានការធានានិរន្ដរភាពបរិស្ថាន និងសមាហរណកម្មតំបន់ បង្កើតឡើងនៅក្នុងឆ្នាំ១៩៦៦។ ធនាគារនេះ គឺជាកម្មសិទ្ធិរបស់សមាជិកចំនួន ៦៧ ប្រទេស ដែលក្នុងនោះមាន ៤៨ ប្រទេសមកពីតំបន់នេះ។ នៅក្នុងឆ្នាំ២០១១ ធនាគារអភិវឌ្ឍន៍អាស៊ីបានផ្ដល់ការអនុម័ត លើហិរញ្ញប្បទានសរុបចំនួន ២១,៧ ពាន់លានដុល្លារ រួមទាំងសហហិរញ្ញប្បទានផង៕
