យោងតាមបណ្ដាញទូរទស្សន៍ CTN ឡូយ៩ បានទាក់ទាញទស្សនិកជនជាង២លាននាក់ក្នុង១សប្ដាហ៍ តើលោកភ្ញាក់ផ្អើលនឹងជោគជ័យនេះទេ?
នៅពេលដែលយើងកំពុងតែថតឈុតឆាកសម្រាប់រដូវកាលទី១បណ្ដើរៗ យើងបានទទួលនូវប្រតិកម្មពីភាពជោគជ័យនៃកម្មវិធីនេះ។ យុវជនទាំងឡាយពិតជារំភើបនិងចូលចិត្តវាណាស់។ មុននោះ យើងក៏បានធ្វើការស្រាវជ្រាវពីនិន្នាការនិយមរបស់យុវជនផងដែរមុន នឹង យើងធ្វើគម្រោងយ៉ាងយកចិត្តទុកដាក់។ ដូច្នេះយើងជឿជាក់ថា យើងនឹងទទួលបានប្រជាប្រិយភាពខ្ពស់។ ទស្សនិកជនរបស់យើងមានអាយុជាមធ្យម២៣ឆ្នាំ។ ប៉ុន្តែខ្ញុំនៅតែភ្ញាក់ផ្អើលចំពោះភាពជោគជ័យដ៏មិនគួរឲ្យជឿនេះ។
តើឈ្មោះ «ឡូយ៩» នេះមានប្រភពមកពីណាដែរ?
តាមការពិតឈ្មោះនេះគឺជាការនឹកឃើញរបស់អ្នកហាត់ការរបស់យើង ម្នាក់ ដែលធ្លាប់ធ្វើការឲ្យទស្សនាវដ្ដី LIFT របស់ភ្នំពេញ ប៉ុស្ដិ៍។ ឈ្មោះនេះត្រូវបានជ្រើសរើសចេញពីបញ្ជីចំនួន២៥០ ឈ្មោះ។ «ឡូយ៩» គឺជាឈ្មោះដែលសមនឹងកម្មវិធីនេះណាស់ ព្រោះវាខ្លី ងាយចាំ ហើយនិយាយពីទង្វើដ៏ល្អៗរបស់យុវវ័យ ធ្វើឲ្យអ្នកណាៗក៏ស្គាល់។
តើលោកធ្វើយ៉ាងណាទើបអាចបង្កើតកម្មវិធីទាក់ទាញអារម្មណ៍យុវវ័យខ្មែរដែលមានវប្បធម៌ខុសពីលោកនោះ?
យើងមិនបានចម្លងយកកម្មវិធីពីបរទេសឡើយ។ ប្រព័ន្ធផ្សព្វផ្សាយនៅប្រទេស «ក» មិនអាចយកមកប្រើប្រាស់នៅប្រទេស «ខ» បានទេ។ យើងបានធ្វើការស្វែងយល់តាមរយៈការផ្ដល់ឱកាសឲ្យយុវជនធ្វើការ ផលិតកម្មវិធី ដូចជាចម្រៀង ខ្សែភាពយន្តភាគ រឿងកំប្លែង និងកម្មវិធីទូរស័ព្ទចូលវិទ្យុជាដើម។ ទាំងអស់នេះអាចបង្កើតបានជាការកម្សាន្តបែបអប់រំមួយប្រកបដោយ ជោគជ័យ។
ឡូយ៩ នឹងវិលមកជួបទស្សនិកជននៅខែមករាឆ្នាំក្រោយ។ តើចន្លោះពេលនេះ លោកមានអ្វីផ្ដល់ជូនយុវជនដែរ?
យើងនៅមានកម្មវិធីវិទ្យុប្រចាំសប្ដាហ៍នៅប៉ុស្ដិ៍ FM ១០៣ រៀងរាល់ថ្ងៃសៅរ៍ វិបសាយ www.Loy9.com.kh និងទំព័រ។ យើងក៏នឹងបន្តចាក់ផ្សាយស្ប៉តពាណិជ្ជកម្មតាមទូរទស្សន៍ និងវិទ្យុពេញមួយឆ្នាំ ស្ដីអំពីព័ត៌មានសំខាន់ៗដូចជាការចុះឈ្មោះបោះឆ្នោតជ្រើសរើសតំណាង រាស្ត្រជាដើម។
ទន្ទឹមនឹងនោះយើងក៏មានរថយន្ត «ឡូយ៩» បើកបរជុំវិញប្រទេសដើម្បីស្វែងរកមនុស្សដែលមានសមត្ថភាព ឬខ្សែជីវិតគួរឲ្យចាប់អារម្មណ៍មកចូលរួមផលិតកម្មវិធីផងដែរ។
តើនៅរដូវកាលឆ្នាំទី២ កម្មវិធីឡូយ៩ នឹងមានអ្វីប្លែកពីស៊េរីមុន?
រដូវកាលឆ្នាំទី២នឹងនាំមកនូវគុណភាពផលិតកម្មកាន់តែប្រសើរជាង មុន ខណៈដែលក្រុមការងាររបស់យើងបានទទួលការបណ្ដុះបណ្ដាលកម្រិត BBC។ ក្នុងស៊េរីថ្មីនេះ យើងនឹងធ្វើឲ្យអ្នកទស្សនាមានការចូលរួមកាន់តែច្រើនជាមួយ កម្មវិធី។ ធ្វើដូច្នេះយើងនឹងធ្វើឲ្យទស្សនិកជនក្លាយជាម្ចាស់នៃកម្មវិធី នេះ។ យើងព្យាយាមជីករករឿងរ៉ាវចេញពីពួកគេ ជាជាងការដើររកប្រធានបទនៅកន្លែងផ្សេងទៀត។ ប្រសិនបើទស្សនិជនណាចង់ចែករំលែកគំនិតរបស់ពួកគេនោះ យើងស្វាគមន៍ជានិច្ច។
តើកម្មវិធីឡូយ៩នឹងមានការផ្លាស់ប្ដូរលើផ្នែកអ្វីខ្លះ?
យើងនឹងរក្សាទម្រង់ដើម ប៉ុន្តែខុសពីរដូវកាលមុនដែលផ្ដោតទៅលើថ្នាក់ភូមិ ឃុំ សម្រាប់ឆ្នាំថ្មីនេះយើងនឹងទាក់ទាញចំណាប់អារម្មណ៍យុវជនមកកម្រិត ថ្នាក់ជាតិឲ្យត្រូវនឹងការបោះឆ្នោតថ្នាក់ជាតិនៅឆ្នាំក្រោយនេះផង ដែរ៕
