អាម៉េត សាហ្វិក នាយករដ្ឋមន្ត្រីរបស់ប្រធានាធិបតីដែលត្រូវបានបណ្តេញចេញពីតំណែង ប្រឈមជាមួយលោកម៉ូហាមេត មួស៊ីនៃក្រុមMuslim Brotherhoodក្នុងការបោះឆ្នោតរយៈពេល២ថ្ងៃដែលប្រជាជនអេហ្ស៊ីប៥០ លាននាក់មានសិទ្ធិចូលរួម។
ទាហាន១៥០.០០០នាក់ត្រូវបានដាក់ពង្រាយការពារការបោះឆ្នោតនៅក្នុង ប្រទេសដែលត្រូវចែងចែករវាងអ្នកដែលខ្លាចរបបចាស់វិលមកវិញនិងពួក ដែលដាក់សាសនាចេញពីនយោបាយនិងខ្លាចក្រុមBrotherhoodរឹតត្បឹត សេរីភាពផ្ទាល់ខ្លួនរបស់ពួកគេ។
លោកមួស៊ីបានទទួលសម្លេងនាំមុខ២៤,៧ភាគរយនៅជុំទី១ដោយអតីត ប្រមុខកងទ័ពអាកាសសាហ្វិកទទួលបាន២៣,៦ភាគរយនិងមិនមានសញ្ញា ច្បាស់លាស់ថាតើនរណានឹងមានសម្លេងនាំមុខនៅជុំទី២នេះទេ។
ការបោះឆ្នោតនេះត្រូវបានធ្វើឡើងចំពេលមានភាពវឹកវរដែលនាំអោយក្រុម យោធាដែលបានចូលកាន់អំណាចនៅពេលអតីតប្រធានាធិបតីមូបារ៉ាក់បាលា ឈប់ពីតំណែងកាលពីខែកុម្ភៈឆ្នាំមុន នៅតែរក្សាការក្តោបក្តាប់អំណាចដដែល។
កាលពីថ្ងៃព្រហស្បតិ៍ តុលាការធម្មនុញ្ញកំពូលបានសំរេចថាមាត្រាខ្លះនៅក្នុងច្បាប់ គ្រប់គ្រងការបោះឆ្នោតសភាត្រូវចាត់ទុកថាគ្មានសុពលភាព ដូច្នេះសភាដែលដឹកនាំដោយក្រុមអ៊ិស្លាមត្រូវទុកជាមោឃៈ។
តុលាការកំពូលក៏បានសំរេចថាអធម្មនុញ្ញនូវច្បាប់ដែលហាមឃាត់ សមាជិកជាន់ខ្ពស់នៃរបបរបស់លោកមូបារ៉ាក់និងសមាជិកកំពូលនៃគណបក្សដែល បានរំលាយទៅហើយមិនអោយឈរឈ្មោះសំរាប់តំណែងសាធារណៈរយៈពេល១០ឆ្នាំ។
បណ្តាគណបក្សនិងពួកសកម្មជនអេហ្ស៊ីបចោទប្រកាន់ក្រុមប្រឹក្សា ជាន់ខ្ពស់នៃកងកម្លាំងប្រដាប់អាវុធដែលកំពុងគ្រប់គ្រងអំណាចថាធ្វើ" ការប្រឆាំងបដិវត្តន៍"បន្ទាប់ពីដាក់ចេញវិធានការជាបន្តបន្ទាប់ដើម្បី ពង្រឹងអំណាចនៅមុនការបោះឆ្នោត។
ការសំរេចរបស់តុលាការកាលពីថ្ងៃព្រហស្បតិ៍បានកើតឡើងមួយថ្ងៃ បន្ទាប់ពីក្រសួងយុត្តិធម៌សំរេចអោយបុគ្គលិកយោធាមានសិទ្ធិចាប់ ខ្លួនជនស៊ីវិលក្រោយពីសិទ្ធិដូច្នេះត្រូវបានលុបចោលនៅពេលស្ថានភាព គ្រាអាសន្នចំណាស់មួយទសវត្សរ៍បានផុតអាណត្តិកាលពីថ្ងៃ៣១ឧសភា៕
