 |
| ចោរប្លន់ទូមាសនៅផ្សារតាខ្មៅថ្មី យកមាសសុទ្ធមួយតម្លឹង និងគ្រឿងអលង្ការ៧២តម្លឹង |
កណ្តាល: អំពើប្លន់យ៉ាងសាហាវនៅផ្សារតាខ្មៅថ្មី ត្រូវពួកចោរបានប្រមូលយកមាសអស់មួយទូតាំង ក្នុងនោះរួមមានមាសសុទ្ធដុំមួយតម្លឹង (មិនទាន់កែច្នៃ) គ្រឿងអលង្ការដូចជា ខ្សែក ខ្សែដៃ ក្រវិលធ្វើពីមាស ផ្លាកទីនចំនួនសរុប៧២តម្លឹង និងចិញ្ចៀនមានដាំត្បូងពេជ្រមួយចំនួនទៀត ដែលមិនទាន់គណនាប្រមាណតម្លៃបាន និងលុយ១០០ដុល្លារ។
លោកគីម តិច ម្ចាស់ផ្ទះរងគ្រោះបានឲ្យដឹងថា នៅក្នុងផ្ទះមានដាក់ទូតាំងចំនួន៣ ដែលទូនីមួយៗដាក់ទៅដោយគ្រឿងអលង្ការសម្រាប់លក់ជារៀងរាល់ថ្ងៃ ត្រូវចោរប្លន់អស់មួយទូ នៅសល់ពីរទូ។
សូមបញ្ជាក់ថា កាលពីវេលាម៉ោង ១ និង ១០នាទី រសៀលថ្ងៃទី២៧ ខែមិថុនា ឆ្នាំ២០១២ នៅផ្សារតាខ្មៅថ្មី ក្នុងទីរួមខេត្តកណ្តាល មានករណីអំពើប្លន់ទូមាសបានកើតឡើងនៅផ្ទះយីហោ “គីមតិច៩៩”។
សេចក្ដីរាយការណ៍ពីកន្លែងកើតហេតុ បានឲ្យដឹងថា ម្ចាស់ផ្ទះឈ្មោះ គីម តិច ភេទប្រុស អាយុ ៤០ឆ្នាំ ជាអាជីវករលក់នៅផ្សារតាខ្មៅថ្មី ត្រូវបានក្រុមចោរ ៤នាក់ ចូលមកប្លន់ ដោយបក្ខពួកវាម្នាក់ បានដកកាំភ្លើងភ្ជង់ម្ចាស់ផ្ទះ និងគំរាមបាញ់សម្លាប់ចោល ហើយគ្នីគ្នារបស់វា ៣នាក់ទៀត មិនបានវាយកម្ទេចទូមាស់ទេ ដោយបានបើកទូប្រមូលយកលុយ និងគ្រឿងអលង្ការអស់មួយចំនួនធំ។ ដោយឡែក នៅក្នុងផ្ទះនោះដែរ ក៏មានកាមេរ៉ាថត តែត្រូវបានពួកចោរដោះយកខ្សែអាត់ចេញ បន្សល់តែកាមេរ៉ា។
តាម ការបញ្ជាក់ពីសាក្សីនៅជិតផ្ទះកើតហេតុ បានឲ្យដឹងថា ជនល្មើសទាំង៤នាក់ជិះម៉ូតម៉ាកសេ១២៥ ពីរគ្រឿង មានបិតស្លាកលេខមិនឲ្យមើលដឹង។ ពួកគេមានវ័យមិនច្រើនជាង៣០ឆ្នាំ មានរូបរាងស្អាតបាតខ្ពស់ស ពាក់អាវរងារពណ៌ខ្មៅ នៅពីលើអាវរងារមានបិតស្លាកឡូហ្គូសជាប៉ូលិសពាក់មួកសុវត្ថិភាព និងមានពាក់ម៉ាសបិទមុខពីក្នុងទៀត បានឆ្មក់ចូលក្នុងផ្ទះជនរងគ្រោះតែម្តង។
គេជឿថា ពួកចោរបានឃ្លាំមើលជាច្រើនថ្ងៃមកហើយ ទើបចូលទៅប្លន់ជនរងគ្រោះ ដែលនៅជុំវិញនោះមានមនុស្សច្រើនពាសពេញ។
អំពើប្លន់នេះ សមត្ថកិច្ចប៉ូលិស ប៉េអឹម កំពុងស្រាវជ្រាវយ៉ាងយកចិត្តទុកដាក់។ ជាមួយករណីនេះ អាជីវករលក់គ្រឿងអលង្កការនៅផ្សារតាខ្មៅថ្មី បានសម្តែងការព្រួយបារម្ភយ៉ាងខ្លាំងនឹងសកម្មភាពអំពើប្លន់យ៉ាងសាហាវ នេះ។
គួរកត់សម្គាល់ផងដែរ នៅវេលាម៉ោងប្រមាណជាង៧ព្រឹកថ្ងៃទី៦វិច្ឆិកា ឆ្នាំ២០១១ អាជីវករលក់មាសនៅផ្សារតាខ្មៅចាស់ ត្រូវបានចោរប្លន់ប្រដាប់អាវុធមានគ្នា២នាក់ កាំភ្លើងខ្លី១ដើម បានធ្វើសកម្មភាពប្លន់បានសម្រេចយកគ្រឿងអលង្ការ មាស និងផ្លាកទីន អស់ចំនួនប្រមាណជាង ៥០ តម្លឹង នៅចំណុចខាងលិចផ្សារតាខ្មៅចាស់ ក្រុងតាខ្មៅ ខេត្តកណ្តាល។ អំពើប្លន់នេះ រហូតមកដល់ពេលនេះសមត្ថកិច្ចមិនទាន់ចាប់បានជនល្មើសយកមកផ្តន្ទាទោសនៅ ចំពោះមុខច្បាប់នៅឡើយ៕
