 |
| ត្បូង និងគ្រឿងអលង្ការមានតម្លៃដែលអាជីវករយកមកដាក់តាំងបង្ហាញក្នុង ពិព័រណ៍ត្បូង និងអលង្ការកាលពីថ្ងៃម្សិលមិញនៅមណ្ឌលកោះពេជ្រ។ រូបថត ហុង មីនា |
លោក ចម ប្រសិទ្ធ បានប្រាប់អ្នកយកព័ត៌មាននៅឯពិព័រណ៍គ្រឿងអលង្ការ និងត្បូងមានតម្លៃ កាលពីថ្ងៃម្សិលមិញថា ក្រុមហ៊ុនសហរដ្ឋអាមេរិកឈ្មោះ Tiffany & Co នឹងមកបង្កើតរោងចក្រកែច្នៃត្បូងនៅតំបន់សេដ្ឋកិច្ចភ្នំពេញ តែមិនទាន់ដឹងពេលជាក់លាក់។
លោកបន្តថា ក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុកំពុងរៀបចំនីតិវិធីដើម្បីឲ្យកម្ពុជាចូលជា សមាជិកនៃក្រុមប្រទេសដែលធ្វើអាជីវកម្មត្បូងប្រកបដោយសុចរិត ពោលគឺមិនបង្ខំមនុស្សឲ្យធ្វើការដូចជាទាសករក្នុងការរុករក ត្បូងមានតម្លៃយកមកច្នៃ។ លោកថ្លែងថា៖ «ពេលដែលបានចូលក្នុងប្រព័ន្ធនេះគេនឹងអាចមកវិនិយោគធ្វើកន្លែង កែច្នៃត្បូង ហើយនាំចេញ»។
លោកបន្តថា កម្ពុជានឹងទាក់ទាញបានវិនិយោគិនជាច្រើនពីប្រទេសជិតខាងនៅ ពេលអនាគត ស្របពេលដែលប្រទេសទាំងនោះត្រូវបានអាមេរិកបញ្ឈប់ការលើកលែង ពន្ធនាំចូល ចំណែកឯកម្ពុជានៅតែបន្តការលើកលែងពន្ធ។ លោកថ្លែងថា៖ «អនាគតកម្ពុជាជាប្រភពកែច្នៃត្បូងជាច្រើនដើម្បីនាំចេញទៅកាន់ ពិភពលោក»។
កម្ពុជាបានរៀបចំពិព័រណ៍គ្រឿងអលង្ការ និងត្បូងមានតម្លៃចាប់ពីថ្ងៃទី១៤ ដល់ថ្ងៃទី ១៧ មិថុនា ក្នុងបំណងទាក់ទាញចំណាប់អារម្មណ៍ជាលក្ខណៈអន្តរជាតិ និងបង្កើតភាពជឿជាក់ទៅលើត្បូងមានតម្លៃរបស់កម្ពុជា។
លោក ចម ប្រសិទ្ធ បន្តថា៖ «អ្វីដែលយើងធ្វើគឺការកសាងជំនឿទុកចិត្ត របស់សាធារណជនទៅលើផលិតផលរបស់យើង»។
លោក លឹម គឹមរ័ត្ន ប្រធានអភិវឌ្ឍន៍ពាណិជ្ជកម្មក្រុមហ៊ុនពិនិត្យគុណភាពត្បូង មានតម្លៃ Intertek បានឲ្យដឹងថា ការទាក់ទាញអ្នកវិនិយោគមកកាន់ទីផ្សារកម្ពុជាគឺល្អសម្រាប់ វិស័យត្បូងរបស់កម្ពុជា ព្រោះកម្ពុជាមានសក្តានុពលផ្នែកនេះច្រើន។ លោកបន្តថា៖ «ការបង្កើតរោងចក្រកែច្នៃនៅកម្ពុជា អាចធ្វើឲ្យត្បូងមានតម្លៃរបស់កម្ពុជាកាន់តែទទួលបានការចាប់ អារម្មណ៍ពីបរទេស និងបង្កើតការងារដល់ខ្មែរ»។
ទោះបីយ៉ាងនេះក្តីលោកបានអះអាងថា ឧស្សាហកម្មត្បូងរបស់កម្ពុជាប្រៀបមិនទាន់បាននឹងប្រទេសជិតខាងនៅឡើយទេ។
លោក ចម ប្រសិទ្ធ និយាយថា ការធ្លាក់ចុះតម្លៃមាសនៅលើទីផ្សារ នាពេលថ្មីៗនេះនឹងមិនប៉ះពាល់ដល់សេដ្ឋកិច្ចកម្ពុជាទេ ព្រោះប្រទេសកម្ពុជាមិនមែននាំចេញមាសនោះទេ។ លោកពុំទាន់ក្តាប់បានទិន្នន័យសរុបនៃការជួញដូរត្បូងមានតម្លៃ ទាំងអស់នៅកម្ពុជាទេ រហូតមកទល់ពេលនេះ៕
