ហេតុការណ៍បង្កគ្រោះថ្នាក់ចរាចរណ៍បុករះដូចគេបាញ់គ្រាប់កាំភ្លើង យន្តនេះ បានកើតឡើងនៅយប់ថ្ងៃទី២០ ខែមិថុនា នៅមុខហាងលក់ទំនិញយីហោ Smile ស្ថិតនៅតាមផ្លូវលេខ១៣ សង្កាត់ផ្សារកណ្តាលទី១ ខណ្ឌដូនពេញ។
ហេតុការណ៍នេះ ត្រូវបានគេហទំព័រក្នុងស្រុក សរសេរថា សមត្ថកិច្ចកិច្ចមូលដ្ឋានបានឲ្យដឹងថា រថយន្តបង្កម៉ាក កាមរី ហាយប្រ៊ីដ ពណ៌ស ពាក់ស្លាកលេខបណ្តោះអាសន្ន ៥៧០៣ បើកបរដោយនារីម្នាក់ ដែលគេស្គាល់ថា កញ្ញា ជីជី ។ ចំណែកឯ រថយន្តដែលត្រូវរថយន្តនាង ជីជីបើកដេញបុកនោះ ម៉ាក Lexus ពណ៌ទឹកប្រាក់ពាក់ស្លាកលេខ2L -២០៣៩ បើកបរដោយនារីម្នាក់វ័យប្រហែលជា២០ឆ្នាំ។
សម្ថកិច្ចដដែលបន្តថា មុនកើតហេតុ គេបានឃើញរថយន្តបង្កបើកដេញបុកគ្នាយ៉ាងលឿន តាមបណ្តោយផ្លូវត្រសក់ផ្អែម ក្នុងទិសដៅពីត្បូងទៅជើង លុះមកដល់ចំណុះកើតហេតុ ក៏បានបត់តាមផ្លូវលេខ១៣ ដោយបើកលឿនពេក បួងចង្កូតមិនទាន់ជ្រុលទៅរថយន្តម៉ាក CRV និងម៉ូតូកង់បីដែលចតស្ងៀម និងបានបុកខ្ទើយពីរនាក់ ប៉ើងទៅផ្ទប់នឹងជញ្ជាំងកញ្ចក់ starmart យ៉ីហោ smile បណ្តាលឲ្យបែកកញ្ចក់ទៀតផង។ ចំណែកអ្នកបើកបររថយន្ត Lexus ក៏ទទួលរងរបួសផងដែរ។
ប៉ុន្តែជុំវិញហេតុការណ៍គួរឲ្យភ្ញាក់ផ្អើល ដែលភ្លាមៗសមត្ថកិច្ចបញ្ចេញព័ត៌មានថា អ្នកបង្កជាពិធីការិនី CTNនាង ជីជីនោះ មិនត្រូវបានជីជីទទួលស្គាល់ថាជារូបនាងជាអ្នកបង្កឡើយ ដោយនាង ប្រកែកយ៉ាងញ៉័រថា៖«ខ្ញុំឯណាទៅចិត្តសឿងហ៊ានបើកឡានដល់ថ្នាក់ ដេញបុកគេនោះ បើទោះជាខឹងដល់ថ្នាក់ណាក៏មិនហ៊ានដែរ។ នៅយប់ដែលគេល្បីថា ខ្ញុំបើករថយន្តដេញបុករថយន្តម៉ាក Lexus នោះទៀត ខ្ញុំមិនបានចេញទៅណាទេមួយយប់ទល់ភ្លឺគឺខ្ញុំនៅដេកផ្ទះរហូត»។
ពិធីការិនីដែលកំពុងឡើងកូដនៅ CTNរូបនេះក៏បានសម្តែងការភ្ញាក់ផ្អើលដែរ ដោយនាងនិយាយថា៖«ហេតុការណ៍បង្កគ្រោះថ្នាក់ចរាចរណ៍បែបអនាធិបតេយ្យ នេះ ខ្ញុំបានដឹងតាំងពីព្រលឹមយប់កើតហេតុនោះម្ល៉េះខណៈខ្ញុំមិនទាន់ ក្រោកពីដំណេកផងក៏មានមិត្តភក្កិខលមកសួរថា ជីជីឯងយប់មិញបើកឡានបុកគេនោះ»។ នាងក៏បានបញ្ជាក់ថា រថយន្តបង្កក្នុងគ្រោះថ្នាក់ចរាចរណ៍នៅយប់ថ្ងៃទី២០ខែមិថុនាជា រថយន្តម៉ាក កាមរីហាយប្រ៊ីដពណ៌ស ពាក់ស្លាកលេខបណ្តោះអាសន្ន៥៧០៣ ផ្ទុយពីរយន្តដែលខ្ញុំប្រើនោះគឺម៉ាក កូរ៉ូឡា ពាក់ស្លាកលេខ ៤០៨៧។
ជីជី បានតបថា ខ្ញុំសឹងស្បថក៏បានគឺខ្ញុំមិនបានទៅបង្កហេតុនោះទេ។ ទោះយ៉ាងណាពិធីការិនីនិយាយត្រដិតគល់អណ្តាត ដែលកំពុងត្រូវបានCTNលើកស្ទួយរូបនេះ បានបង្វែរព័ត៌មាននោះ ថា ជាការបង្កាច់បង្ខូចកិត្តិយសនាងទៅវិញ ដោយនាងនិយាយថា មួយរយៈចុងក្រោយនេះព័ត៌មានបង្កាច់បង្ខូចកេរ្តិ៍នាងច្រើនណាស់ ម្តងថានាងមានសង្សារជាឧកញ៉ា ម្តងថានាងជិតចូលរោងការជាដើម ហើយការសរសេរទាំងនោះពុំដែលបានសម្ភាសជាមួយនាងទេ។
ស្របគ្នានឹងការអះអាងផ្ទាល់មាត់ថា នាងមិនមែនជាអ្នកបង្កគ្រោះថា្នក់ចរាចរណ៍កាលពីយប់ថ្ងៃទី២០ ខាងទូរទស្សន៍ CTN ដែលជាស្ថាប័ននាងជីជីធ្វើការនោះ នៅរសៀលថ្ងៃទី២១នេះក៏បានធ្វើសន្និសីទកាសែត ដើម្បីបញ្ជាក់ថា ជីជីមិនជាអ្នកបង្កហេតុនៅក្នុងករណីនៅយប់ថ្ងៃទី២០នោះទេ៕
