អ្នកបឹងកក់ និងកុមារតូចៗជាកូន និងជាចៅរបស់តំណាងអ្នកភូមិ ១៣នាក់ អង្គុយច្រៀងចម្រៀងជាច្រើនបទដែលតាក់តែងពីការឈឺចាប់នៃការ ព្រាត់ប្រាសម្ដាយ និងបាត់បង់ផ្ទះសម្បែងនៅខាងមុខខ្លោងទ្វារនៃក្រសួងយុត្តិធម៌។ អ្នកបឹងកក់ក៏បានលើកបដាទាមទារឲ្យតុលាការដោះលែងតំណាងអ្នកភូមិ ទាំង ១៣នាក់ពីពន្ធនាគារ និងមានបាច់ផ្កាឈូកគ្រប់គ្នា ជាតំណាងឲ្យព្រះពុទ្ធ ព្រះធម៌ ព្រះសង្ឃ ដែលប្រជាពលរដ្ឋខ្មែរមានជំនឿទៅលើព្រះពុទ្ធសាសនា។
អ្នកស្រី ខែក ចាន់រស្មី អ្នកបឹងកក់ម្នាក់ដែលចូលរួមទាមទារនៅមុខក្រសួងយុត្តិធម៌ ឲ្យដឹងថា ការជួបជុំគ្នានេះ ដើម្បីជំរុញឲ្យក្រសួងយុត្តិធម៌ជួយអន្តរាគមន៍ដល់សាលាឧទ្ធរណ៍ ដែលនឹងបើកសវនាការជំនុំជម្រះក្ដីលើករណីអ្នកភូមិ ១៣នាក់ នៅថ្ងៃទី២៧ មិថុនា ឆ្នាំ២០១២ ខាងមុខនេះ ជួយផ្ដល់យុត្តិធម៌ និងលើកលែងការចោទប្រកាន់ដល់ពួកគាត់ដោយគ្មានលក្ខខណ្ឌ។
អ្នកស្រី ខែក ចាន់រស្មី៖ «ឲ្យគាត់កាត់ក្ដីប្រជាពលរដ្ឋនៅតំបន់ បឹងកក់ ១៣នាក់ ជាស្រ្តី ឲ្យបានចេញនៅថ្ងៃទី២៧ ដោយគ្មានលក្ខខណ្ឌ ព្រោះគាត់គ្រាន់តែជាស្ត្រីទាមទារនូវសិទ្ធិលំនៅឋានរបស់ពួកគាត់ តែប៉ុណ្ណោះ ពួកគាត់មិនត្រូវមានទោសដាក់ពន្ធនាគារបែបនោះទេ។ នេះជារឿងអយុត្តិធម៌ណាស់សម្រាប់ប្រជាពលរដ្ឋពួកខ្ញុំ»។
ក្រោយពីអង្គុយទាមទារនៅខាងមុខក្រសួងរួចមក អ្នកភូមិបឹងកក់នាំគ្នាដង្ហែក្បួនមកខាងមុខសាលាឧទ្ទរណ៍ ដើម្បីលែងចាបចំនួន ១៣ក្បាល ជានិមិត្តរូប ដោយមានប្រលេះស្រទាប់ផ្កាឈូកបាចទៅលើជាមួយចាបនោះផង ជាការបង្ហាញពីសេរីសួស្ដី សេរីភាព និងបួងសួងសុំឲ្យអ្នកភូមិទាំង ១៣នាក់ មានវាសនាមានសេរីលែងជាប់ទ្រុងដូចចាបនោះដែរ។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ (Licadho) លោក អំ សំអាត ឲ្យដឹងថា សង្គមស៊ីវិលជាតិ និងអន្តរជាតិ ស្នើសុំឲ្យរដ្ឋាភិបាលលើកលែងការចោទប្រកាន់អ្នកបឹងកក់ ដែលកំពុងជាប់ឃុំ ដើម្បីបង្ហាញពីឆន្ទៈនៃការស្វែងរកដំណោះស្រាយរឿងវិវាទដីធ្លី និងគួរតែពិនិត្យឡើងវិញរាល់ការអភិវឌ្ឍ ដើម្បីកាត់បន្ថយវិវាទដីធ្លីរវាងអ្នកភូមិជាមួយក្រុមហ៊ុនឯកជន។
លោក អំ សំអាត៖ «បញ្ហានេះជាបញ្ហាដីធ្លី រឿងដែលសំខាន់គឺរួមគ្នាដើម្បីដោះស្រាយបញ្ហាដីធ្លីនេះឲ្យបានចប់ ហើយមួយទៀត ចំពោះប្រទេសជាដៃគូអភិវឌ្ឍន៍ គឺសុំឲ្យរដ្ឋាភិបាលកម្ពុជាយើង ពិនិត្យឡើងវិញរាល់ការអភិវឌ្ឍន៍ ធ្វើយ៉ាងណាកុំកាត់បន្ថយកុំឲ្យប៉ះពាល់ ឬការរំលោភដីធ្លីដល់ប្រជាពលរដ្ឋ»។
កាលពីថ្ងៃទី២២ ឧសភា ឆ្នាំ២០១២ កម្លាំងសមត្ថកិច្ចបានចាប់ខ្លួនតំណាងអ្នកភូមិបឹងកក់ ១៣នាក់ ហើយនៅថ្ងៃទី២៤ ឧសភា សាលាដំបូងបានបើកសវនាការកាត់ទោសអ្នកទាំង ១៣នាក់ ឲ្យជាប់ទោសម្នាក់ៗពី១ឆ្នាំ ទៅ២ឆ្នាំកន្លះ ក្រោមបទកាន់កាប់ដីខុសច្បាប់ និងបំផ្លាញទ្រព្យសម្បត្តិអ្នកដទៃ។ នៅថ្ងៃដដែលនោះ កម្លាំងសមត្ថកិច្ចក៏បានចាប់អ្នកបឹងកក់ ២នាក់ទៀត បញ្ជូនទៅពន្ធនាគារព្រៃសដែរ ខណៈដែលពួកគេកំពុងតវ៉ានៅខាងមុខតុលាការ។ ក៏ប៉ុន្តែអ្នកទាំង ២នាក់នេះ ត្រូវបានដោះលែងឲ្យនៅក្រៅឃុំបណ្ដោះអាសន្នវិញ កាលពីថ្ងៃទី១៥ មិថុនា ឆ្នាំ២០១២៕
