សៀមរាប: មជ្ឈមណ្ឌលកសាងអនាគត របស់អ្នកថ្ងៃនេះ (Build Your Future Today Center) គឺជាអង្គការមនុស្សធម៌ នៅខេត្តសៀមរាប ធ្វើការដើម្បីកសាងនូវក្ដី សង្ឃឹម និងអនាគតល្អប្រសើរ សម្រាប់កូនចៅជំនាន់ក្រោយៗ របស់កម្ពុជា។
នៅព្រឹកថ្ងៃទី១៩ មិថុនា ឆ្នាំ២០១២នេះ BFT បានទទួលកង់ថ្មីៗ ចំនួន ១០២គ្រឿង នៃចំនួនកង់សរុប ១៥៦គ្រឿង ពីសមាគម LION CLUB និង ROTARY CLUB អន្តរជាតិ ជាពិសេសេសពីមាជិកសមាគម នៃប្រទេសសឹង្ហបូរី សម្រាប់ ចែកជូនសិស្សសាលាក្រីក្រ នៅតាមជនបទ និងកុមារកំព្រា នៅខេត្តសៀមរាប។
លោក ឡុង សេដ្ឋា ស្ថាបនិក និងជានាយក អង្គការ BFT បានមានប្រសាសន៍ នៅក្នុងពិធីចែកកង់ ដល់សិស្សក្រីក្រ និងសិស្សកំព្រា ថា អង្គការនេះ មានឆន្ទ:ខ្ពស់ក្នុង ការផ្ដល់ឱកាសសម្រាប់មនុស្ស ពិសេសកុមារ ដែលរស់នៅក្នុងស្ថានភាពលំបាក និងក្រីក្រ ដើម្បីឲ្យពួកគាត់ មានលទ្ធភាពក្នុងការកសាងអនាគតភ្លឺស្វាង តាមរយ: កសាងនូវក្ដីសង្ឃឹង ខាងចំណេះដឹង និងបន្ទាប់មកគឺការកសាងនូវសន្តិភាព រួមទាំងការឈានឆ្ពោះ ទៅរកការអភិវឌ្ឍន៍សេដ្ឋកិច្ច សម្រាប់កុមារ និងក្រុមគ្រួសារ របស់ពួកគាត់ ក៏ដូចសង្គមជាតិទាំងមូលផងដែរ។ ចំពោះកង់ ១០២គ្រឿង ក្នុងចំណោមកង់ប្រមាណ ៥០០គ្រឿងដែលបានផ្ដល់កន្លងទៅនេះ គឺសម្រាប់ សិស្ស សាលាបឋមសិក្សា គោកចំរេះ ជប់ស្មាច់ (សូទ្រនិគម) ល្អក់ (ជីក្រែង) ស្រែរបង (បឹងមាលា/ស្វាយលើ) នគរធំ និងកុមារកំព្រានៅមជ្ឈមណ្ឌល BFT ក្រុងសៀមរាប។
អង្គការ BFT បច្ចុប្បន្នមានដៃគូរ និងអ្នកគាំទ្រពី សហរដ្ឋអាមេរិក អូស្ត្រាលី សឹង្ហបូរី ជប៉ុន រួមទាំងសមាជិកសមាគម សប្បុរសជននៃប្រទេសមួយចំនួនទៀត។ ហើយ បច្ចុប្បន្នអង្គការ មានគម្រោងសកម្មភាព អភិវឌ្ឍន៍វិស័យអប់រំនៅតាមសហគមន៍ មជ្ឈមណ្ឌលគាំទ្រកុមារ សុខភាពនិងអាហាររូបឋមសម្រាប់កុមារតាមសហគមន៍ កសាងសន្តិភាព គម្រោងកសាងសមត្ថភាព និងលើកស្ទួយជីវភាពសហគមន៍ ក្នុងនោះក៏មានការកសាងថ្នាក់រៀន ផ្លូវថ្នល់ អណ្ឌូងទឹក ផ្ដល់ដើមទុនបង្កើតមុខរបរ ផ្ដល់សំលៀកបំពាក់ និងសម្ភារ:សិក្សាដល់កុមារ។ ហើយតំបន់គោលដៅនាបច្ចុប្បន្នគឺ នៅតាមសហគមន៍ ជនបទមួយចំនួន ក្នុង៥ក្រុង/ស្រុក គឺ ក្រុងសៀមរាប ស្រុកសូទ្រនិគម ជីក្រែង ស្វាយលើ និងស្រុកប្រាសាទបាគង។
អ្នកស្រី ម៉ារីយ៉ា ប៊យ យ៉ិត ម៉ី (Maria Boey Yuet Mei) តំណាងសមាគម ឡាអិន (LION CLUB និង ROTARY CLUB)អន្តរជាតិ នៃប្រទេសសិង្ហបុរី ដែលបានដឹកនាំក្រុម មកផ្ដល់កង់ជូនសិស្សក្រីក្រ និងកំព្រា ដោយផ្ទាល់នៅ ថា យើងបានមកពីប្រទេសដទៃ ក្នុងការនាំយកអំណោយមកជូនកុមារកម្ពុជា ពិសេសនៅតាមសហគមន៍ជនបទ ហើយយើងសង្ឃឹមថា សមាគម LION CLUB និងបន្តការគាំទ្រក្នុងអំពើមនុស្សធម៌បន្តទៀត។ យើងសង្ឃឹមផងដែរថា កង់ ១គ្រឿង សម្រាប់កុមារម្នាក់នាពេលនេះ ប្រាកដជាបានចូលរួមចំណែក ក្នុងការកសាងអនាគត់របស់ពួកគាត់ ពិសេសសម្រាប់ការធ្វើដំណើរ មកទទួលការសិក្សាអប់រំ។
អ្នកស្រីមានប្រសាសន៍ផងដែរ ថា ចំពោះអ្នកស្រីបានមកប្រទេសកម្ពុជា ជាលើកទី៣ហើយ ពិសេសការមកដល់ជនបទ ដូចនៅទីនេះដំបូង គឺមិនទាន់មានសាលារៀន គ្រូបង្រៀន ទឹក ស្អាត អនាម័យ ផ្លូវថ្នល់ ជាដើម តែឥឡូវយើងមានការអភិវឌ្ឍន៍ជាបណ្ដើរៗ អ្វីដែលសំខាន់ គឺកុមារបានមកសិក្សាជាទៀងទាត់។ អ្នកស្រី រួមជាមួយ អង្គការ BFT និងបន្តផ្សព្វផ្សាយ ដល់សមាជិក សមាគម និងសប្បុរសជន ក្នុងការបន្តគាំទ្រ ចំពោះកុមារកម្ពុជា ដើម្បីឲ្យពួកគាត់មានលទ្ធភាព ក្នុងការកសាង អនាគត ដ៏ភ្លឺស្វាង និងសមជាអ្នកស្នងអនាគត របស់ប្រទេសជាតិ និងសង្គមទាំងមូល៕
