លោក ថៃ ថន អាយុ ៣៣ឆ្នាំ រស់នៅភូមិរាជានុកូល សង្កាត់ស្ទឹងត្រែង បាននិយាយថា គាត់នឹងប្តឹងលោក សែ ម៉េងជា ប្រធានផ្សារខេត្តស្ទឹងត្រែង ទៅអាជ្ញាធរក្រុង ឱ្យជួយដោះស្រាយ បន្ទាប់ពីលោកសុំឱ្យខាងសមាគមអាដហុកខេត្ត ជួយអន្តរាគមន៍។
លោកបញ្ជាក់ថា ការប៉ះទង្គិចគ្នាជាមួយប្រធានផ្សារខេត្តស្ទឹងត្រែង កាលពីព្រឹកថ្ងៃទី២៥ ខែមិថុនា គឺដោយសារសន្តិសុខផ្សារ ចង់រឹបអូស យកធុងទឹកអំពៅទុក និងបណ្តេញរូបគាត់ មិនឱ្យលក់ ក្នុងបរិវេណជុំវិញផ្សារតទៅទៀតបាន។
លោក ថៃ ថន បញ្ជាក់ថា កន្លងមក រូបគាត់ មានធុងទឹកអំពៅមួយនេះ សម្រាប់ដើរ លក់ជុំវិញផ្សារស្ទឹងត្រែង។ ក្នុងមួយខែ គាត់បង់លុយចំនួន ៥០.០០០ រៀល និង ៥០០ រៀល ជាប្រចាំថ្ងៃ ថ្លៃអានាម័យ ៥០០ រៀល ទៀតថ្លៃ ផាស៊ី ក្នុងមួយថ្ងៃ ទៅឱ្យប្រធានផ្សារ។ ចំពោះការបង់ថ្លៃទាំងអស់នេះ គេមិនដែលឃើញមានចេញវិក្កយបត្រ ឱ្យគាត់ម្តងណាទេ។
លោក ថៃ ថន បានបន្តថា ថ្លៃបង់សេវាទាំងអស់នេះ កាលពីមុន លោកមិនជំទាស់ទេ។ ប៉ុន្តែក្នុងខែធ្លាក់ភ្លៀង រូបគាត់សុំថ្លៃបង់សេវាប្រចាំខែចំនួន ៥០.០០០ រៀលនេះ ធ្លាក់មកត្រឹម ២០.០០០ រៀលវិញ ព្រោះលក់មិនសូវដាច់។
ក្រោយរូបគាត់លើកហេតុផលនេះឡើង ខាងប្រធានផ្សារ មិនយល់ព្រម ទើបឈានដល់ការប៉ះសម្តីដាក់គ្នាបែបនេះ។
ចំណែកលោក សែ ម៉េងជា ប្រធានផ្សារខេត្តស្ទឹងត្រែង បាននិយាយថា ថ្លៃសេវាដឹកជញ្ជូនសំរាមចេញពីក្រុង ក្នុងមួយខែ ៥០.០០០ រៀល គេមិនបង់ ទើបគាត់មិនអនុញ្ញាត ឱ្យអ្នកអូសធុងទឹកអំពៅ បន្តលក់នៅជុំវិញផ្សារស្ទឹងត្រែង៕
