បុរសរត់ម៉ូតូឌុប ត្រូវ​ជនមិន ស្គាល់មុខកាប់ ស្លាប់ នៅផ្លូវ វ៉េងស្រេង

ភ្នំពេញៈ ជនមិនស្គាល់មុខ បានធ្វើសកម្មភាព ដោយកាប់បុរសម្នាក់ ដែលជាអ្នករត់ម៉ូតូឌុប ចំក ខាងឆ្វេង បណ្តាលឲ្យដួលស្លាប់ភ្លាមៗ កាលពីវេលាម៉ោងជាង១០យប់ ថ្ងៃទី១៧ ខែមិថុនា ឆ្នាំ២០១២ នៅចំណុច ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌ ពោធិ៍សែនជ័យរាជធានីភ្នំពេញ ។ ជនរងគ្រោះមាន ឈ្មោះស៊ិម យុទ្ធ អាយុ៣៤ ឆ្នាំ មានស្រុកកំណើត ភូមិត្រោក ឃុំគោកចកស្រុកកំពង់ត្របែកខេត្តព្រៃវែង ។
ប្រភពព័ត៌មាន ពីសាក្សី នៅកន្លែងកើតហេតុ បានឲ្យដឹងថា មុនពេលកើតហេតុ គេបាន ឃើញ បុរសដែលជាជនរងគ្រោះជិះម៉ូតូ សង់កូរេពណ៌ក្រហម ពីទិសខាងលិចទៅកើត ស្រាប់តែមកដល់ កន្លែងកើតហេតុនេះក៏បានដួល ពេលនោះគេបាននាំគ្នា រត់ទៅមើល ក៏ឃើញជនរងគ្រោះ មានឈាមនឹងមានស្នាមគេកាប់នៅកខាងឆ្វេង មិនដឹងថាមានមូល ហេតុ អ្វីមកពីណានោះទេ។
 បើតាមប្រភពព័ត៌មាននៅទីនោះ អ្នកខ្លះបានលើកឡើងថា ប្រហែលជាមាន ក្រុមក្មេងស្ទាវ លួចកាប់មកលើកគាត់។ ខ្លះទៀតបាននិយាយថា មុនពេលកើតហេតុ គេឃើញ មានក្រុម ក្មេងស្ទាវមួយក្រុម ជិះម៉ូតូស្រែកឡូឡា ហើយប្រហែលជាក្រុម ស្ទាវនោះ កាប់មក លើគាត់ ហើយមើលទៅ ។ ជុំវិញការ ស្លាប់នេះមិនទាន់ ដឹងពីមូលហេតុពិត ប្រាកដនោះទេ។ ចំណែកឯខាងមន្រ្តីមានសមត្ថកិច្ចដែលបានចុះទៅ ដល់កន្លែងកើតហេតុនោះ ក៏មិន ទាន់អាចធ្វើការសន្និដ្ឋាន បានដែរ ព្រោះមិនទាន់ ទទួលបានព័ត៌មានជាក់លាក់។
 បើតាមការឱ្យដឹងពីស្រ្តីដែលជាប្រពន្ធបាននិយាយថា ប្តីរបស់គាត់មិន ដែលមានទំនាស់ ជាមួយនរណា ទេគឺជារៀងរាល់ថ្ងៃប្តីរបស់គាត់តែងតែទៅរត់ម៉ូតូឌុបជាធម្មតា ប៉ុន្តែស្រាប់យប់ថ្ងៃនេះមានគេទូរស័ព្ទប្រាប់ថា ប្តីរបស់គាត់ត្រូវគេកាប់។ ភ្លាមៗនោះ គាត់ក៏មកដល់កន្លែងកើតហេតុ ឃើញប្តីរបស់គាត់ត្រូវគេកាប់ស្លាប់។
ស្ត្រីរូបនោះគាត់បាននិយាយទៀតថា សព្វថ្ងៃនេះគាត់ពីរនាក់ប្តីប្រពន្ធបាននាំគា្ន ចេញពីស្រុកកំណើតមករកស៊ីនៅភ្នំពេញ ដោយគាត់ចូលធ្វើការរោចក្រ ចំណែកប្តីរត់ម៉ូតូឌុប ហើយជួយបន្ទប់ស្នាក់នៅភូមិត្រពាំងថ្លឹងនេះតែម្តងបាត់ទៅហើយ៕