ការព្រមព្រៀងគ្នានេះប្រហែលជាជំហាន សំខាន់បំផុតដែលធ្វើឡើង ដោយប្រទេសជិតខាងទាំងពីរនៅក្នុងការអនុវត្តតាមសេចក្តីសម្រេច របស់តុលាការយុត្តិធម៌អន្តរជាតិ (ICJ) កាលពីថ្ងៃទី ១៨ កក្កដា ឆ្នាំមុន ដែលបានបញ្ជាឲ្យប្រទេសភាគីទាំងពីរធ្វើការដកទ័ពចេញពីតំបន់ គ្មានយោធាបណ្តោះអាសន្ន«ភ្លាមៗ»។
បន្ទាប់ពីកិច្ចប្រជុំរយៈ ពេលរហូតដល់២០ម៉ោង របស់ក្រុមការងាររួមដែលឃើញថា ក្រុមប្រតិភូទាំងពីរបានចរចារហូតដល់ម៉ោង១២:៣០ យប់ថ្ងៃពុធ។
សេចក្តីសម្រេចនេះ ត្រូវបានប្រកាសឡើងកាលពីម្សិលមិញដោយសមភាគីថៃ និងកម្ពុជា។
លោក នាង ផាត ប្រធានគណៈប្រតិភូក្រុមការងាររួមរបស់កម្ពុជា បានថ្លែងថា ៖ «ការដកទ័ពនឹងធ្វើឡើង៣០ថ្ងៃ បន្ទាប់ពីក្រុមដោះមីនប្រទេសទាំងពីរឯកភាពអះអាងថា តំបន់នោះលែងមានមីន»។
កម្ពុជានិងថៃបានព្រមព្រៀងថា ក្រុមដោះមីនរបស់ប្រទេសទាំងពីរនឹងជួបប្រជុំគ្នានៅសប្តាហ៍ទី បីនៃខែក្រោយដើម្បីចាប់ផ្តើមពិភាក្សាឲ្យមានផែនការដោះមីនរួម គ្នា ដើម្បីឲ្យតំបន់នោះមានសុវត្ថិភាពសម្រាប់ក្រុមសង្កេតការណ៍រួម ចូលទៅតំបន់នោះ នៅពេលកងទ័ពត្រូវបានដកចេញ។
លោក Worapong Sanganetra ប្រធានក្រុមការងាររួមរបស់ភាគីថៃ បានថ្លែងថា កិច្ចប្រជុំនេះបានសម្រេចនូវ«លទ្ធផលល្អ» ហើយបានឆ្លុះបញ្ចាំងពី«កិច្ចសហប្រតិបត្តិការល្អរវាងភាគីយោធា ទាំងពីរ»។
លោកថ្លែងបន្តថា ៖ «ផ្ទៃមុខរបស់ខ្ញុំកំពុងមានស្នាមញញឹម វាមានន័យថា កិច្ចប្រជុំនេះបានធ្វើឡើងក្នុងបរិយាកាសល្អ រលូន និងមិត្តភាព ហើយទទួលបានលទ្ធផលល្អ ហើយសមភាគីកម្ពុជារបស់ខ្ញុំ បានផ្តល់ឲ្យខ្ញុំនូវពិធីលៀងអាហារពេលល្ងាចស្វាគមន៍យ៉ាង កក់ក្តៅ»។
លោកបន្តថា៖ «ទោះបីជាកិច្ចប្រជុំនេះចំណាយអស់រយៈពេលយូរក៏ដោយ ប៉ុន្តែលទ្ធផលល្អ»។
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា បានថ្លែងថា លោកមិនទាន់អាចនិយាយនៅបានឡើយទេ ថា វានឹងត្រូវការពេលយូរប៉ុនណាដើម្បីដោះមីនពីតំបន់នោះ ពីព្រោះវាអាស្រ័យទៅលើចំនួនក្រុមការងារ និងកត្តាដទៃទៀត។
លោក បន្តថា៖ «ប្រភេទមីនកប់ក្នុងដីផ្សេងៗគ្នាត្រូវបានប្រើនៅក្នុងតំបន់ ហើយដីតំបន់នោះក៏ពិបាកដែរ ហើយព្រៃឈើនៅទីនោះក្រាស់ ប៉ុន្តែយើងអាចធ្វើវាបាន»។
សេចក្តីសម្រេចរបស់តុលាការ យុត្តិធម៌អន្តរជាតិ (ICJ) ថ្ងៃទី១៨ កក្កដា ២០១១ បានបង្កើតឲ្យមានតំបន់គ្មានយោធាជាង ១៧ គីឡូម៉ែត្រការ៉េ និងធ្វើឡើងបន្ទាប់ពីមានការប្រយុទ្ធបង្ហូរឈាមគ្នាពាក់ព័ន្ធ នឹងតំបន់ ៤,៦ គីឡូម៉ែត្រការ៉េ ជុំវិញប្រាសាទព្រះវិហារ៕
