ពិធីបង្ហាញកីឡាករកីឡាការិនីដែលត្រូវទៅចូលរួមព្រឹត្តិការណ៍
កីឡាអូឡាំពិក២០១២ ជាផ្លូវការបានធ្វើឡើងថ្ងៃទី១១ មិថុនា ២០១២
ព្រឹកមិញនេះនៅទីស្នាក់ការ NOCC ។បេក្ខភាពអត្តពលិកដែលត្រូវទៅប្រជែងព្រឹត្តិការណ៍កីឡានៅ អង់គ្លេសខែក្រោយ មានកីឡាការិនីតេក្វាន់ដូ ស៊ន ដាវីន កីឡាករអត្តពលកម្មរត់ចម្ងាយ កៀង សាម៉ន កីឡាការិនីរត់ចម្ងាយ ចាន់ សីហា កីឡាករហែលទឹក ហែន ថុនពន្លឺ និង កីឡាការិនីហែលទឹក ហែម ថុនវិទីនី។
ពាក់ព័ន្ធនឹងដំណើរទៅ ឡុងដុងនេះលោក វ៉ាត់ ចំរើន ថា ពិបាកសង្ឃឹមនឹងបានមេដាយណាស់ តែជាការចាំបាច់ត្រូវចូលរួមព្រោះជាសកម្មភាពអូឡាំពិក។ លោកថាកីឡា ជាសកម្មភាពដ៏បរិសុទ្ធ មិនជាប់ពាក់ព័ន្ធនឹងនយោបាយ ឬគំនាបសង្កត់ណាមួយនោះទេ។ កីឡាគឺដើរតួសំខាន់ក្នុងការបង្កើតមោទនភាពលើឆាកអន្តរជាតិ ដល់ប្រទេសជាតិ និងធ្វើឲ្យមនុស្សស្គាល់ និង គោរពតម្លៃគ្នាទៅវិញមក។ ”ថ្វីបើពិបាកសង្ឃឹមថាបានមេដាយ តែយើងត្រៀមហ្មត់ចត់ណាស់។ អត្តពលិកទាំងអស់នឹងបញ្ជូនទៅហ្វឹកហាត់មុនការប្រកួតចូលដល់។ បួននាក់ទៅហាត់នៅចិន និង ម្នាក់ទៀតទៅអង់គ្លេស”។ លោក វ៉ាត់ ចំរើនបន្ថែមបែបនេះ។
ប្រភពដដែលឲ្យដឹងទៀតថា ក្រុមហ៊ុនឯកជនធំៗក្នុងស្រុកចំនួន៥ បានចាប់ដៃជាមួយស្ថាប័នកីឡាកំពូលកម្ពុជាដើម្បី បើកយុទ្ធនាការដែលមានឈ្មោះថា Myolympicheroes ដើម្បីផ្សព្វផ្សាយដំណើរទៅកាន់ ក្រុងឡុងដុង ខែក្រោយ។ Myolympicheroes នឹងពង្រីកព័ត៌មាននៃដំណើរឆ្លងទ្វីបមួយនេះ ទៅកាន់បណ្ដាខេត្តនានានៅកម្ពុជា ដើម្បីទាញយកប្រជាប្រិយភាពមកឲ្យកីឡាជាតិ។ យុទ្ធនាការដដែលនេះ ក៏នឹងធ្វើការប្រគំតន្ត្រីដ៏ធំមួយ ដើម្បីបង្ហាញមុខអត្តពលិកទាំង៥រូបទៅកាន់ពលរដ្ឋនៅភ្នំពេញ មុនថ្ងៃចេញដំណើរចូលដល់។
កៀង សាម៉ន
ហែម ថុនពន្លឺ
ពីឆ្វេង ស៊ន ដាវីន ចាន់ សីហា និង ហែម ថុនវិទីនី
បេក្ខភាពដែលត្រូវទៅ អង់គ្លេស ខែក្រោយនេះមានអត្តពលិក៥នាក់ គ្រូបង្វឹក២នាក់ រួមនឹងមន្ត្រីប្រតិភូ៤នាក់ផ្សេងទៀត សរុប១១នាក់។ ការចេញដំណើរជាផ្លូវការនឹងធ្វើថ្ងៃទី២២ កក្កដា ២០១២៕(sabay)
