តារាចម្រៀងនាង អេដា ពាក់អាវកាន់ទុក្ខចំពោះការយាងចូលទិវង្គតរបស់សម្តេចតា។ រូបថត សហការី
ភ្នំពេញៈ ខណៈដែលប្រជាជនកម្ពុជានៅគ្រប់ទីកន្លែងទូទាំងពិភពលោកកំពុងស្រណោះ ស្រណោកសោយសោក កាន់ទុក្ខចំពោះការបាត់បង់ព្រះមហាវីរក្សត្រដែលជានិមិត្តរូប គឺព្រះបាទនរោត្តម សីហនុ នោះ បែរជាតារាចម្រៀងហ៊ីបហបដែលមានសំណល់អរិយធម៌បរទេសក្នុងខ្លួននាង ចរិយា ហៅ អេដា បានសម្តែងអារម្មណ៍ធុញទ្រាន់ និងជ្រេញចំពោះទង្វើរបស់ពលរដ្ឋកម្ពុជាមួយចំនួនដែលបានកោរសក់ ទួញយំស្រែក និងពាក់អាវរូបសម្តេចតាជាដើម។
ការសម្តែងអារម្មណ៍ មិនពេញចិត្ត និងជ្រេញចំពោះទង្វើរបស់ពលរដ្ឋកម្ពុជាទាំងមូលបែបនេះ ត្រូវបានគេដឹង និងមើលឃើញនៅពេលនាងសរសេរបង្ហោះនៅលើប្រព័ន្ធហ្វេសប៊ុករបស់នាង ក្នុងអត្ថបទមួយវែងគួរសម។ ទង្វើតារាចម្រៀងរូបនេះមិនត្រូវបានពលរដ្ឋកម្ពុជាដែលប្រើ ប្រព័ន្ធហ្វេសប៊ុកស្វាគមន៍ឡើយ។ ផ្ទុយទៅវិញ ពួកគេបានជេរប្រទេច ដោយបានចាត់ទុកអេដា និងស្វាមីមិនមែនជាកូនខ្មែរឡើយ ហើយអ្នកខ្លះទៀតបានទាមទារឲ្យពួកគេទាំងពីរដែលសុទ្ធតែជាកូន មន្ត្រីរដ្ឋាភិបាលមានឋានៈខ្ពង់ខ្ពស់នោះចេញមកលុតជង្គង់សុំខមា ទោសព្រះមហាវីរក្សត្រជាសាធារណៈទៀតផង។
នៅ ក្នុងប្រព័ន្ធហ្វេសប៊ុករបស់អេដា បាននិយាយថា៖«ខ្ញុំមិនចង់និយាយជាសាធារណៈទេ ប៉ុន្តែខ្ញុំគិតថា វាដូចជាជ្រេញពេក នៅពេលដែលឃើញមនុស្សម្នាបានបង្ហោះនូវរូបភាពផ្សេងៗជាច្រើនដែល ព្យាយាមបង្ហាញអំពីទឹកចិត្ត និងការស្រឡាញ់របស់ពួកគេចំពោះព្រះករុណាព្រះបាទសម្តេចព្រះ នរោត្តម សីហនុ រហូតដល់អ្នកខ្លះសុខចិត្តកោរសក់ ពាក់អាវដែលមានរូបសម្តេចតា លុតជង្គង់ហើយទ្រហោយំ រហូតដល់អ្នកខ្លះដេកនៅមុខព្រះបរមរាជវាំង...»។
នាងបានបន្ត ថា៖«តើពួកគេទៅណា នៅពេលដែលព្រះករុណាព្រះបាទនរោត្តម សីហនុ ទ្រង់នៅមានព្រះជន្ម? ទើបឥឡូវនេះ នៅពេលដែលទ្រង់យាងចូលទិវង្គតបាត់ទៅហើយបានអ្នកទាំងនោះបង្ហាញ អំពី ការស្រឡាញ់ចំពោះទ្រង់តាមរយៈសកម្មភាពខាងលើ ហើយទីបំផុត អ្វីទាំងអស់បានត្រឹមតែនៅក្នុងគេហទំព័រហ្វេសប៊ុក...»។
គូ ប្តីប្រពន្ធនេះបានបន្ថែមថា៖«មែនហើយ អ្នកឯងពិតជាល្បីហើយឥឡូវនេះ! ខ្ញុំស្រឡាញ់ស្តេចខ្លាំងណាស់ ហើយទ្រង់ស្ថិតនៅក្នុងបេះដូងរបស់ខ្ញុំ ជាការពិតណាស់ ខ្ញុំពាក់សញ្ញាកាន់ទុក្ខនៅលើអាវសរបស់ខ្ញុំ។ ប្រជាជនទាំងអស់គ្នា ពួកអ្នកឯងគួរឲ្យជ្រេញពេកហើយឥឡូវនេះ»។
តែ ទោះបីជានាងបានសម្តែងអារម្មណ៍ជ្រេញចំពោះទង្វើកាន់ទុក្ខរបស់ ពលរដ្ឋកម្ពុជាបែបនេះក្តីក៏ពួកគេបានសុំទោសចំពោះសម្តីរបស់ នាងខ្លះដែរ។ នាងនិយាយថា៖«សុំទោសផងដែលនិយាយបែបនេះ ប្រសិនបើវាមានការរំខាន ឬប្រសិនបើអ្នកស្អប់ គ្រាន់តែលុបខ្ញុំចោលទៅ។ វាជាលើកទី១ហើយក្នុងជីវិតរបស់ខ្ញុំ ដែលឃើញប្រជាជនខ្មែរស្រឡាញ់គ្នាតាមរយៈការចែករំលែកទឹក និងអាហារដោយឥតគិតថ្លៃនោះ»។
គួរបញ្ជាក់ថា ឆ្លងកាត់ទំនាក់ទំនងក្នុងនាមជាគូស្នេហ៍រយៈពេលមួយឆ្នាំអ្នក ចម្រៀងរ៉េប អេដា ដែលមានឈ្មោះពិតថា ចរិយាអាយុ២២ឆ្នាំក៏បានសម្រេចចិត្តចូលរោងការជាផ្លូវការជាមួយ នឹងបុរសកូនអ្នកមានស្តុកស្តម្ភម្នាក់ឈ្មោះ ឥស្សារ៉ា អាយុ២៨ឆ្នាំកាលពីថ្ងៃអាទិត្យ ទី៦ ខែវិច្ឆិកា ឆ្នាំ២០១១ នៅសណ្ឋាគារលំដាប់ផ្កាយ៥ សូហ្វីតែល ភ្នំពេញភូគត្រា ។ ចរិយា និង ឥស្សារ៉ា ត្រូវបានគេចាត់ទុកថាជាគូស្វាមីភរិយាស្ថិតក្នុងត្រកូលអ្នកមាន អំណាច និងមានទ្រព្យស្តុកស្តម្ភទាំងសងខាង។ ចរិយា ហៅ Dj អេដា ត្រូវបានគេដឹងថា នាងបានកើតនៅក្នុងត្រកូលអ្នកមានទ្រព្យ និងអំណាចដែលមានឪពុកជាមន្ត្រីផ្កាយពីរនៅទីបញ្ជាការកងទ័ពជើង ទឹក។ រីឯស្វាមីរបស់នាងក៏ស្ថិតក្នុងគ្រួសារមិនខុសឋានៈគ្នាដែរ គឺលោក ឥស្សារ៉ា មានឪពុកជាសមាជិកព្រឹទ្ធសភា។
មហាជនទាំងអស់ បានសម្តែងអារម្មណ៍ហួសចិត្ត និងមិនអាចលើកលែងទោសបានចំពោះទង្វើរបស់ Dj អេដា ដែលជាកូនមន្ត្រីរាជរដ្ឋាភិបាលនេះបានឡើយ ខណៈពលរដ្ឋកម្ពុជាគ្រប់គ្នាកំពុងកោតសរសើរចំពោះការបូជាមួយ ចំនួនរបស់ពលរដ្ឋកម្ពុជាចំពោះការកាន់ទុក្ខនេះ។
អ្នកស្រី ម៉ានីយ៉ា អ្នកលេងហ្វេកប៊ុកម្នាក់បានឆ្លើយតបនឹងការសរសេររបស់ប្តី ប្រពន្ធនេះថា៖«សូមមិត្តភក្តិទាំងអស់ជួយមើលសត្វទាំងពីរនាក់ នេះដែលសរសេរដាក់ប្រជាជនខ្មែរដែលស្រឡាញ់ និងគោរពយ៉ាងជ្រាលជ្រៅចំពោះព្រះមហាវីរក្សត្រ នរោត្តម សីហនុ។ ប្រហែលជាពួកគេមិនមែនកូនខ្មែរឡើយ។ ពួកយើងត្រូវតែនាំពួកគេឲ្យទៅសុំខមាទោសជាសាធារណៈចំពោះព្រះ ភក្ត្រព្រះអង្គផ្ទាល់ចំពោះទង្វើឆ្កួតលេលារបស់គេ»។
លោក រតនា បានសរសេរតបនឹងទង្វើអេដា ថា៖ «អ្នកឯងធ្លាប់បាត់បង់អ្នកមានគុណ ឬមនុស្សជាទីស្រឡាញ់ទេ? បើធ្លាប់ហើយ មិនចេះកាន់ទុក្ខ មិនចេះយំស្តាយ អ្នកឯងពិតជាសត្វចម្លែកដែលមកពីឋាននរកហើយ»។
រីឯ អ្នកលេងហ្វេសប៊ុកម្នាក់ទៀតឈ្មោះ វណ្ណា បាននិយាយថា៖«ចាស! ពួកគេមិនមែនជាជនជាតិកម្ពុជាទេ បើពួកគេជាជនជាតិកម្ពុជា ប្រហែលជាពួកគេមិននិយាយសម្តីបែបនេះចំពោះព្រះមហាវីរក្សត្ររបស់ យើងទេ។ អ្នកទាំងពីរត្រូវតែទៅគោរពសំពះសុំខមាទោសព្រះអង្គ។ ប្រជាជនកម្ពុជាទាំងអស់គោរពស្រឡាញ់ព្រះមហាវីរក្សត្រ ហេតុអ្វីបានជាអ្នកទាំងពីរអាចនិយាយពាក្យទាំងនេះទៅរួច?»។
នេះ គ្រាន់តែជាសម្តីអ្នកមិនពេញចិត្តនឹងគូស្វាមីភរិយាអេដា ប៉ុន្មាននាក់ប៉ុណ្ណោះ តែនៅមានពលរដ្ឋកម្ពុជារាប់ពាន់នាក់ទៀតបានសរសេរជេរប្រទេច អេដា និងប្តីនាងនៅលើហ្វេសប៊ុក។
ចំពោះភាពភ្ញាក់ផ្អើលនេះ អេដា ហាក់ដូចជាដឹងខ្លួនខុស ហើយក៏បានសូមលំឱនកាយគោរពសុំទោសចំពោះជនរួមជាតិផងដែរ ហើយនាងថា អ្វីដែលនាងបានសរសេរនៅលើហ្វេសប៊ុក នាងគ្មានបំណងប្រមាថ ឬក៏មើលងាយអ្នកណាម្នាក់ឡើយ។ នាងបានឲ្យដឹងថា នោះជាការយល់ច្រឡំតែប៉ុណ្ណោះ។
ចរិយា ហៅអេដា និយាយថា៖«បញ្ហានោះកើតឡើងដោយសារតែការបកស្រាយ និងការយល់ច្រឡំតែប៉ុណ្ណោះ។ ខ្ញុំអត់មានន័យអ៊ីចឹង ឬក៏ប្រមាថ មើលងាយអ្នកណាទេ។ អ្នកបកប្រែពាក្យខ្ញុំ គេមានចេតនាជាន់ពន្លិចខ្ញុំតែម្តង»។ នាងបានបញ្ជាក់ថា៖«ខ្ញុំសោកស្តាយ ដឹងខ្លួនខុស តែអ្វីៗបានកន្លងហួសហើយ ដូច្នេះខ្ញុំមានតែសូមអភ័យទោស និងសុំខមាទោសចំពោះរឿងដែលបានកើតឡើងនេះ។ ខ្ញុំគ្មានចេតនាទេ។ ខ្ញុំគោរព ស្រឡាញ់ព្រះមហាក្សត្រ និងប្រជាជនកម្ពុជា»៕(POSTKHMER)
