ឱសថក្លែងក្លាយនិងហួសកំណត់ប្រើប្រាស់ ដែលប៉ូលិសសេដ្ឋកិច្ចចុះបង្ក្រាប។ រូបថត សហការី
ភ្នំពេញៈ នគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ កាលពីព្រឹកថ្ងៃទី៣០ ខែកញ្ញា បានចុះបង្ក្រាបទីតាំងស្ដុកឱសថក្លែងក្លាយនិងហួសកំណត់កាលបរិច្ឆេទ ចំនួន២កន្លែង នៅក្នុងខណ្ឌចំការមន រាជធានីភ្នំពេញ ហើយរឹបអូសឱសថក្លែងក្លាយនិងហួសកំណត់ប្រើប្រាស់ជាច្រើនប្រភេទប្រមាណ ជិត ៣ តោន។
លោក ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានឱ្យដឹងថា ការចុះបង្ក្រាបនេះមានកិច្ចសហការរវាងមន្ត្រីនាយកដ្ឋាននគរបាល ប្រឆាំងបទល្មើសសេដ្ឋកិច្ចក្រសួងមហាផ្ទៃ តំណាងអយ្យការអមសាលាដំបូងភ្នំពេញនិងមន្ដ្រីមន្ទីរសុខាភិបាល ដែលបានចុះឆែកឆេរកន្លែងស្ដុកឱសថចំនួន២កន្លែង ទី១ ស្ថិតនៅជាន់ទី៣ ផ្ទះលេខ៤១១ ផ្លូវ១៩៣ កែងផ្លូវ៣១០ សង្កាត់ទួលស្វាយព្រៃ១ ខណ្ឌចំការមន រឹបអូសបានថ្នាំពេទ្យជាច្រើនប្រភេទចំនួន២៥កេស ស្មើនឹងជាង១ តោនកន្លះ និងទីតាំងទី២ ស្ថិតនៅបន្ទប់ជួល ផ្លូវលំ ដែលមានចម្ងាយប្រមាណជា ២០០ម៉ែត្រពី ទីតាំងទី១ ជាបន្ទប់ជួលរបស់ ឈ្មោះ ហ៊ា ឆាយ ថៅកែប្ដូរប្រាក់ ផ្ទះលេខ ៣១ ផ្សារ អូឡាំពិក សមត្ថកិច្ចរឹបអូសបានឱសថក្លែងក្លាយជាង ២០ កេស ប្រមាណ១តោន។លោក បន្តថា កម្លាំងជំនាញបានប្រើគ្រប់មធ្យោបាយ ក្នុងការស៊ើបអង្កេត ហើយនិងប្រើប្រាស់កម្លាំងមហាជន និងកម្លាំងបង្កប់សម្ងាត់ទើបអាចឈានដល់ការបង្ក្រាបបានលើកនេះ។
លោក បានបញ្ជាក់ថា៖ «ឱសថក្លែងក្លាយនិងហួសកំណត់កាលបរិច្ឆេទដែលបានរឹបអូសទាំងនោះ ឥឡូវកំពុងរក្សាទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃដើម្បីស៊ើបអង្កេតបន្ថែមទៀត»។
លោក ឡុង ស្រេង បានឲ្យដឹងថា មុននឹងចុះបង្ក្រាបទីតាំងទាំង២នេះ លោកបានប្រើកម្លាំងតាមដាន ២ យប់ អំពីសកម្មភាពឈ្មួញដែលបានដឹកឱសថក្លែងក្លាយទាំងនោះយកមកលាក់ទុក ចាប់ពីម៉ោង៣ទៅ៤ទៀបភ្លឺ។ លោកបន្តថា៖ «ក្នុងការបង្ក្រាបនេះ យើងមិនអាចឃាត់ខ្លួនជនណាម្នាក់បានទេ ព្រោះថា ជនសង្ស័យបានរត់គេចខ្លួនបាត់អស់»។
កញ្ញា វ៉ា សក្តា ព្រះរាជអាជ្ញារងអមសាលាដំបូងរាជធានី ដែលចុះបង្ក្រាបករណីនេះដែរបានប្រាប់ថា ឱសថទាំងនោះនៅត្រូវនាំយកទៅពិសោធន៍មើលបន្ថែមទៀត ដើម្បីបញ្ជាក់ថា ជាប្រភេទឱសថក្លែងក្លាយខុសច្បាប់? ហើយសមត្ថកិច្ចកំពុងធ្វើការងារនេះ។ ពាក់ព័ន្ធនឹងចាប់ខ្លួនក្រុមរកស៊ីល្មើសច្បាប់នេះកញ្ញាបញ្ជាក់ថា៖ «សំណុំរឿងនេះ កំពុងស្ថិតនៅក្នុងដំណាក់ការស៊ើបអង្កេត ដូច្នេះ ពេលណាសមត្ថកិច្ចបញ្ជូនសំណុំរឿងមក ទើបយើងចេញដីកាចាប់ខ្លួនជនពាក់ព័ន្ធបាន»។
គួរបញ្ជាក់ដែរថា កាលពីព្រឹកថ្ងៃទី២២ ខែកញ្ញា កម្លាំងសមត្ថកិច្ចប៉ូលិសសេដ្ឋកិច្ចក៏បានធ្វើការចុះបង្ក្រាបឃ្លាំង ស្តុកទុកឱសថខុសច្បាប់មួយកន្លែង ស្ថិតនៅផ្ទះលេខ១៥ ផ្លូវ ៣១០ សង្កាត់ទួលស្វាយព្រៃទី១ ខណ្ឌ ចំការមន ដោយធ្វើការឃាត់ខ្លួនម្ចាស់ឃ្លាំង ឈ្មោះ ហៀង ចំរើន និងរឹបអូសបានឱសថ ៤២មុខ មានទម្ងន់ជិត ២ តោន ផងដែរ។
លោក ស៊ិន មនី នាយកប្រតិបត្តិ អង្គការ MEDiCAM មានប្រសាសន៍ថា ឱសថក្លែងក្លាយ ឬខូចគុណភាព វាមិនជាប៉ះពាល់ដល់សុខភាពដល់អ្នកប្រើប្រាស់ប៉ុន្មានទេ តែវាគ្មានប្រយោជន៍អីក្នុងការព្យាបាល ដើម្បីសម្លាប់មេរោគ។ លោកបញ្ជាក់ថា ៖ «ពលរដ្ឋទិញថ្នាំដើម្បីព្យាបាលជំងឺ ចុះបើថ្នាំនោះ គ្មានប្រសិទ្ធភាពគឺគ្មានសារធាតុសកម្មកម្ចាត់មេរោគផងតើមាន ប្រយោជន៍អី?»។
លោកបន្តថា មានកត្តាជាច្រើន ក្នុងការនាំចូលនៅឱសថខូចគុណភាព ជាពិសេស ប្រទេសនៅក្នុងតំបន់ត្រូវតែចូលរួមទប់ស្កាត់ទាំងអស់គ្នា ព្រោះជាបញ្ហាក្នុងតំបន់។ ប្រទេសយើងគ្មានផលិតឱសថក្លែងក្លាយទេ តែឱសថទាំងនេះវានាំចូលពីក្រៅ។
លោកបន្លែមថា ដើម្បីកុំឲ្យពលរដ្ឋប្រើប្រាស់ថ្នាំខូចគុណភាព រដ្ឋាភិបាលនិងអង្គការត្រូវបង្កើនចំណេះដឹងទៅពលរដ្ឋ ឲ្យគាត់ចេះពិនិត្យមើលថាថ្នាំនេះខូចគុណភាពឬហួសកំណត់ នោះទើបអាចចៀសវាងបានខ្លះ៕
