ភ្នំពេញ ៖
រថយន្តទីកូប្រភេទឆ្នាំងអ៊ុត១គ្រឿង ធ្វើដំណើរពីលិចមកកើត
តាមបណ្តោយផ្លូវព្រះមុនីរ៉េត
បានបើកគៀរអនុប្រធានបេនឡានតាក់ស៊ីផ្សារដើមគរ
បណ្តាលឲ្យដួលច្រងាប់ច្រងិល បែកមុខហូរឈាមកក្លាក់
ហើយរថយន្តបង្កហេតុបានគេចខ្លួន ដោយសុវត្ថិភាព។
ហេតុការណ៏គ្រោះថា្នក់ចរាចរនេះ បានកើតឡើងនៅវេលាម៉ោង៦និង២៥នាទីព្រឹក ថ្ងៃទី០២ខែតុលា ឆ្នាំ២០១២ នៅខាងលិចសណ្ឋាគារកុងទីណង់តាល់ ផ្លូវព្រះមុនីរ៉េត សង្កាត់ទំនប់ទឹក ខណ្ឌចំការមនរាជធានីភ្នំពេញ។
ប្រភពពីកន្លែងកើតហេតុបានឲ្យដឹង ថា ជនរងគ្រោះមានឈ្មោះទីនសារឿន ភេទប្រុសអាយុជាង៥០ឆ្នាំជាមន្ត្រីសាធារណការរាជធានីភ្នំពេញ និងជាអនុប្រធានគ្រប់គ្រងបេនឡានតាក់ស៊ីផ្សារដើមគរ។ ជនរងគ្រោះជិះម៉ូតូម៉ាក់ឆាលីព៍ណស ពាក់ស្លាកលេខភ្នំពេញ1N-2727 ធ្វើដំណើរពីលិចទៅកើតតាមផ្លូវព្រះមុនីរ៉េត ក្នុងគោលបំណងទៅបេនឡានផ្សារដើមគរ ។
ប្រភពដដែលបន្តថា នៅពេលដែលជនរងគ្រោះកំពុងធ្វើដំណើរ ក៏មានរថយន្ត១គ្រឿងម៉ាកតីកូ ពណ៌ប្រផេះ ក្នុងទិសដៅស្របគ្នា មិនគេបើកយ៉ាងម៉េចក៏ជ្រុលគៀរជនរងគ្រោះដួលតែម្តង។ ក្រោយមករថយន្តបង្កហេតុក៏បានបើកគេច ឆ្ពោះទៅកើតសំដៅទៅរង្វង់មូលអាងទឹកស្តាតអូឡាំពិកបាត់ស្រមោល ដោយសុវត្ថិភាព ។ ក្រោយកើតហេតុជនរងគ្រោះត្រូវបានរថយន្តសង្គ្រោះដឹកយកទៅ មន្ទីរពេទ្យ។
