ភ្នំពេញ: មេខ្លោងចោរប្លន់ម្នាក់ ត្រូវបានសមត្ថកិច្ចនគរបាលខណ្ឌមានជ័យ ចាប់ខ្លួនបានភ្លាមៗ កាលពីព្រឹកថ្ងៃទី១ ខែតុលា ឆ្នាំ២០១២ បន្ទាប់ពីបក្ខពួករបស់ខ្លួនពីរនាក់ ប្លន់រថយន្តមួយគ្រឿងមិនបានសម្រេច ហើយបានឆ្លើយសារភាព ទើបសមត្ថកិច្ចឈានទៅរកចាប់ខ្លួនមេខ្លោងបានតែម្តង នៅចំណុចផ្ទះជួល ក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ។
សមត្ថកិច្ច ខណ្ឌមានជ័យបានឲ្យដឹងថា មេខ្លោងដែលត្រូវសមត្ថកិច្ចឃាត់ខ្លួននេះ ឈ្មោះ បៅ ធុយ អាយុ ៥២ឆ្នាំ រស់នៅផ្ទះជួល ក្នុងភូមិសង្កាត់ខាងលើ ហើយសមត្ថកិច្ចអះអាងថា ជាមន្ត្រីយោធាថ្នាក់វរសេនីយ៍ទោ (ស័ក្តិ៤កន្លះ)។
សមត្ថកិច្ចបានបន្តឲ្យដឹងថា ជនសង្ស័យទាំងពីរនាក់នេះ ទី១-ឈ្មោះ វីរ: អាយុ ២៨ឆ្នាំ ស្នាក់នៅម្តុំផ្សារទួលរកា សង្កាត់ចាក់អង្រែក្រោម និងទី២-ឈ្មោះ ឡុង សុឆេង ភេទប្រុស អាយុ ២៦ឆ្នាំ ជាអតីតសន្តិសុខឯកជន និងជាគ្រូបង្រៀនភាសាអង់គ្លេស នៅសាកលវិទ្យាល័យឯកជនមួយ។
រីឯ ជនរងគ្រោះ ឈ្មោះ នួន ស៊ុយ អាយុ ៥០ឆ្នាំ ស្នាក់នៅភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ ជាអ្នករត់តាក់ស៊ី ភ្នំពេញ-បាវិត បើកបររថយន្តម៉ាកកាមរី (ឆ្លាម) ពណ៌ស្ករ ពាក់ស្លាក ភ្នំពេញ 2N-0319។
សមត្ថកិច្ចបន្តថា នៅវេលាម៉ោង ៧ យប់ថ្ងៃទី៣០ ខែកញ្ញា ឆ្នាំ២០១២ កម្លាំងនគរបាលប៉ុស្តិ៍រដ្ឋបាលបឹងទំពុន ខណ្ឌមានជ័យ ដឹកនាំដោយលោក អនុសេនីយ៍ទោ ឡូ ភារម្យ នាយប៉ុស្តិ៍ បានចាប់ខ្លួនក្រុមចោរប្លន់រថយន្តពីរនាក់ភ្លាមៗ ក្រោយធ្វើសកម្មភាពប្លន់មិនបានសម្រេច នៅចំណុចភូមិចំរើនផល សង្កាត់បឹងទំពុន ខណ្ឌមានជ័យ។ ជនរងគ្រោះត្រូវបានក្រុមចោរប្លន់ ចាប់ដាក់ខ្នោះជាប់ដៃម្ខាង តែត្រូវជនរងគ្រោះរើបម្រះ ភ្លាមៗនោះ ជនល្មើសឈ្មោះ ឡុង សុឆេង បានដកកាំភ្លើងមួយដើម ម៉ាកកា៥៩ គ្រាប់ពេញ បាញ់សំដៅលើជនរងគ្រោះ។ ប៉ុន្តែសំណាងល្អ គ្រាប់កាំភ្លើងមិនផ្ទុះ ឆ្លៀតពេលដែលក្រុមជនល្មើសរវល់តែមើលកាំភ្លើងនោះ ជនរងគ្រោះបានស្ទុះបើកទ្វាររត់ចេញ និងស្រែកឆោឡោផ្អើលដល់ពលរដ្ឋ រួចបានរត់ទៅប្រាប់សមត្ថកិច្ចភ្លាមៗ ទើបកម្លាំងនគរបាលប៉ុស្តិ៍បឹងទំពុន បានជួយអន្តរាគមន៍ ចាប់ខ្លួនជនសង្ស័យបានភ្លាមៗតែម្តង។
បច្ចុប្បន្ន ជនសង្ស័យទាំងបីនាក់ ត្រូវសមត្ថកិច្ចឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿង បញ្ជូនទៅតុលាការ ចាត់ការតាមផ្លូវច្បាប់៕ K
