ខេត្តកំពង់ឆ្នាំង
៖ជុំវិញករណីកូនអកតញ្ញូដាច់ចិត្តលើកដៃបាញ់ប្រហារសម្លាប់ឪពុក
បង្កើត
បណ្តាលឱ្យស្លាប់យ៉ាងអាណោចអាធ័មក្នុងថ្លុកឈាមក្នុងឱកាសកាន់បិណ្ឌ
វេនទី៩នោះ ត្រូវបានមន្រ្តីប៉ូលិសស្រាវជ្រាវឃើញថា
គឺផ្តើមចេញពីការផឹកស្រវឹងមិនមែនជារឿងគំនុំ
ឬរឿងអ្វីទៀតឡើយ ។
ការដែលហ៊ានលើកដៃបាញ់សម្លាប់ឪពុកបង្កើតព្រោះគ្រាន់តែគាត់
ស្តីឱ្យបន្តិចបន្តួច
«ថាអាមិនបានការនេះ»ក៏ព្រោះតែមោហ៍បាំង ជញ្ជាំងបិទ
ស្រវឹងខ្លាំងបណ្តាលឱ្យភ្លេចគិតពីបាបបុណ្យភ្លេចគិតពីអ្នក
មានគុណដែលបានផ្តល់កំណើត
និងបានបីបាច់ថែរក្សារហូតធំពេញវ័យនិងបានរៀនចេះដឹងជ្រៅជ្រះ
នេះ មិនគួរឱ្យជាតិសុរាទាញមួយពេលធ្លាក់ចូលរណ្តៅនរកអវិចី
បើទោះបីព្រះប្រោសក៏មិនរួចឡើយ ។
បើតាមលោកមេភូមិអណ្តូងឫស្សី ឃុំស្រែថ្មី
ស្រុករលាប្អៀរ
ដែលជាភូមិរបស់ឃាតករអវជាតបុត្រនេះរស់នៅនិយាយថា
ជនដៃដល់ឈ្មោះរិន សារ៉េន អាយុ២៧ឆ្នាំ
ជាកូនទី២ក្នុងចំណោមបងប្អូន៤នាក់(ស្រី៣)។
ជននេះកាលនៅពីកុមារភាពជាមនុស្សស្លូតបូត
និងពេលធំពេញវ័យឪពុកម្តាយឱ្យបួសរៀនបាន៣ព្រះវស្សា
ធ្លាប់ធ្វើជាគ្រូបង្ហាត់ព្រះសង្ឃទៀតផងពេលនៅជាភិក្ខុក្នុង
វត្តអណ្តូងឫស្សី ។ ក្រោយលាចាកសិក្ខាបទក៏មកនៅផ្ទះ
ប៉ុន្តែមិនមានការងារធ្វើទេ ។ លុះក្រោយមកក្នុងអំឡុងឆ្នាំ២០១០
ក៏ចេញពីភូមិបាត់ហើយឮថា ទៅធ្វើជាទាហាននៅតំបន់ព្រះវិហារ
លុះពេលត្រឡប់មកវិញបាន៣ថ្ងៃក៏កើតរឿងបែបនេះ ។
មន្ត្រីប៉ូលិសដែលបានស្រាវជ្រាវក្នុងករណីនេះ
និយាយថា ក្នុងអំឡុងឆ្នាំ២០១០ឈ្មោរិន សារ៉េន
បានចាកចេញពីផ្ទះទៅរកស៊ីនៅខេត្តព្រះវិហារដោយប្រកបមុខរបរ
ជាអ្នករត់ម៉ូតូឌុប ។
លុះរត់ម៉ូតូយូៗទៅបានស្គាល់គ្នាជាមួយទាហាន
ហើយដោយសារការអាណិតអាសូរព្រោះឃើញឈ្មោះនេះស្លូតបូត
មានអត្តចរិតល្អក៏នាំចូលធ្វើទាហាន ។
ឈ្មោះនេះបានចូលធ្វើទាហាននៅថ្ងៃទី៥ ខែមិថុនា ឆ្នាំ២០១១
ហើយបានឋានន្តរស័ក្តិថ្នាក់អនុសេនីយ៍ទោ ។ ពេលសួរថា
ឈ្មោះនេះទើបបានចូលធ្វើទាហានសោះហេតុអ្វីបានស័ក្តិ២ ?
ត្រូវបានប្រភពបញ្ជាក់ថា
គឺឈ្មោះនេះស៊ីឈ្មោះគេ(ស៊ីឈ្មោះអ្នករត់ចោលជួរ) ។
លុះក្រោយមកបានដូរដាក់ឈ្មោះពិតវិញតែនៅពាក់ស័ក្តិ២
និងអត្តលេខដដែល ។ ប្រភពដដែលបានបន្តទៀតថា
ក្រោយមកដោយឃើញឈ្មោះនេះមានចរិតស្លូតបូតទៀងត្រង់
លោកមេបញ្ជាការកងពលក៏បានឱ្យទៅនៅជាមួយនឹងអ្នកដាំបាយឈ្មោះតុក
ហេង មានឋានៈអនុសេនីយ៍ឯកក្នុងការិយាល័យទី៥ ។
ប្រភពដដែលបានបន្តថា នៅថ្ងៃទី០៦ តុលា
ខណៈលោកមេបញ្ជាការកងពលត្រឡប់ពីដាក់បិណ្ឌវេនទី៦នៅឯវត្តវិញ
បានជួបនឹងឈ្មោះរិន សារ៉េន នៅកន្លែងដាំបាយជាធម្មតា
ហើយបានទាំងនិយាយលេងស្និទ្ធស្នាលក្នុងនាមជាមេ និងកូនចៅ
ដែលមានក្តីស្រឡាញ់ និងទុកចិត្តទៀតផង ។ ប៉ុន្តែនៅថ្ងៃទី៧តុលា
គឺក្រោយពីជួបមេបញ្ជាការកងពលមួយថ្ងៃ ស្រាប់តែបាត់ឈ្មោះរិន
សារ៉េន នេះពីអង្គភាពមិនដឹងថា ទៅណា ហើយមិនត្រឹមតែប៉ុណ្ណឹង
ឈ្មោះរិន សារ៉េន បានលួចយកកាំភ្លើងអាកាបត់របស់ឈ្មោះតុក
ហេង ដែលជាអ្នកដាំបាយជាមួយគ្នាទៅបាត់ទៀតផង ។
តាមចម្លើយសារភាពរបស់ឈ្មោះ រិន
សារ៉េនបានឱ្យដឹងថា នៅថ្ងៃទី៧ តុលា
ខ្លួនបានរត់ចេញពីអង្គភាពដោយលួចយកកាំភ្លើងរបស់ឈ្មោះ តុក ហេង
ហើយច្រកចូលក្នុងបាឡូរួចដាក់ខោអាវពីលើមិនឱ្យនរណាដឹងទេ
សូម្បីតែឈ្មោះឡុច សុវណ្ណា
ធ្វើទាហានជាមួយគ្នាមកជាមួយក៏មិនបានដឹងដែរ។ រូបគេ
និងមិត្តភក្ដិឈ្មោះឡុច សុវណ្ណា
បានជិះរថយន្តក្រុងពីខេត្តព្រះវិហារមកចុះនៅព្រែកក្តាមក្នុង
ម្នាក់ថ្លៃ៣ម៉ឺនរៀល
និងបានជិះតាក់ស៊ីពីព្រែកក្តាមមកចុះនៅខេត្តកំពង់ឆ្នាំងម្នាក់
អស់១ម៉ឺនរៀលទៀត ដោយរូបគេជាអ្នកចេញទាំងអស់
ព្រោះឈ្មោះឡុច សុវណ្ណា គ្មានលុយទេ ។
រូបគេមានលុយមកពីខេត្តព្រះវិហារចំនួន៤០ម៉ឺនរៀល ។
ប្រភពដដែលបានបន្តថា
នៅពេលមកដល់ផ្ទះនៅម៉ោងប្រហែល៧យប់ក៏បានជួបជុំមិត្តភក្ដិ
បងប្អូនផឹកស៊ីរហូតដល់យប់ជ្រៅក៏នាំគ្នាដេកទៅ ។ នៅថ្ងៃទី ៨
និងទី៩តុលា ក៏បាននាំគ្នាផឹកស៊ីបន្តរហូតមានបញ្ហាតែម្តង ។
តាមប្រភពដដែលបានបញ្ជាក់ថា
នៅថ្ងៃកើតហេតុពួកគេនាំគ្នាផឹកស៊ីរហូតស្រវឹងរៀងៗខ្លួន
ហើយឈ្មោះរិន សារ៉េន បានជិះម៉ូតូចេញក្រៅ
លុះមួយសន្ទុះចូលមកផឹកស៊ីវិញ ។ មួយស្របក់ក្រោយមកឪពុកឈ្មោះរិន
រ៉េតបានស្តីបន្ទោសកូនថា «អ្ហែងរវល់ទៅណាពួកម៉ាកមក
លេងទុកឱ្យគ្នានៅម្នាក់ឯង»ហើយក៏មានការប្រកែកគ្នាទៅមកៗដោយឪពុក
បានស្តីបន្ទោសកូនថា«អ្ហែងនេះអាមិនបានការ»ថាហើយថាទៀត។
ពេលនោះកូនខឹងក៏ស្ទុះទៅយកកាំភ្លើងពីលើផ្ទះមកដី
ពេលឃើញដូច្នេះអ្នកផឹកស៊ីជាមួយបានរត់គេចអស់នៅសល់តែឪពុក និងកូន
នៅតមាត់គ្នានៅឡើយ ។ ភ្លាមនោះដែរ
កូនប្រុសក៏បានបាញ់ជាច្រើនគ្រាប់សំដៅឪពុកបណ្ដាលឱ្យ
ត្រូវចំនួន២គ្រាប់គឺចំជិតគល់ដោះខាងស្តាំមួយគ្រាប់
និងភ្លៅស្តាំ១គ្រាប់
បណ្តាលឱ្យប្រកាច់ស្លាប់ក្នុងថ្លុកឈាមតែម្តង ។
ប្រភពពីមន្ត្រីប៉ូលិសដដែលបន្តថា
ក្រោយពេលកើតហេតុដោយមានការពង្រឹងសុវត្ថិភាពភូមិ-ឃុំបានល្អ
និងដោយលោកស្នងការនគរបាលខេត្តគឺលោកឧត្តមសេនីយ៍ត្រី អាត់ ខែម
ដែលលោកទើបបានផ្តល់វិទ្យុទាក់ទងថ្មីៗឱ្យដល់មេភូមិផងនោះ
លោកមេភូមិក៏បានទាក់ទងមកមន្រ្តីប៉ូលិសឱ្យទៅកន្លែងកើតហេតុ
និងចាប់ជនដៃដល់ជាកូនភ្លាមៗដែរ ។ ប៉ូលិសនិយាយថា
បើយឺតតែបន្តិច
ជនដៃដល់រត់គេចខ្លួនបាត់ពិតជាពិបាកបង្រ្កាបជាពុំខាន ។
ដោយឡែកឈ្មោះឡុច សុវណ្ណា ដែលប៉ូលិសសង្ស័យថា
ជាម្ចាស់កាំភ្លើង
ហើយបានចាប់ខ្លួនជាមួយគ្នានោះគឺមិនពាក់ពន័្ធឡើយនិងបានឱ្យ
រួចខ្លួនទៅវិញហើយ ។ ក្រោយពីកើតហេតុ
ប៉ូលិសបានរកឃើញសំបកគ្រាប់ចំនួន
១១គឺជនដៃដល់បាញ់ចំនួន១១គ្រាប់នៅសល់គ្រាប់នៅក្នុងបង់ចំនួ
ន១៩គ្រាប់(មិនមែន១០គ្រាប់ទេ)
ហើយបានរកឃើញគ្រាប់លាក់ទុកលើផ្ទះចំនួន៦២គ្រាប់ទៀត ។
គួររំព្ញកថា កាលពីវេលាម៉ោង៨
និង៣០នាទីយប់ថ្ងៃទី៩ តុលា នៅភូមិអណ្តូងឫស្សី ឃុំស្រែថ្មី
ស្រុករលាប្អៀរ
មានករណីបាញ់សម្លាប់ឪពុកបង្កើតរបស់ខ្លួនជាច្រើនគ្រាប់បណ្តាល
ឱ្យស្លាប់ក្នុងថ្លុកឈាមយ៉ាងអាណោចអាធ័មជាទីបំផុត
ខណៈមានទំនាស់ជាមួយគ្នាក្នុងពេលផឹកស៊ីនៅក្រោមផ្ទះ ។
ឪពុករងគ្រោះដែលស្លាប់នោះឈ្មោះ រិន រ៉េត អាយុ៤៧ឆ្នាំ
ចំណែកកូនប្រុសដែលបាញ់ប្រហារឪពុកឯងមិនញញើតនោះឈ្មោះរិន
សារ៉េន អាយុ២៧ឆ្នាំ ។ ជនឈ្មោះរិន សារ៉េន
ត្រូវបានប៉ូលិសចាប់ខ្លួន និងកសាងសំណុំរឿងបញ្ជូនទៅតុលាការ
ហើយត្រូវបានតុលាការឃុំខ្លួនបណ្តោះអាសន្ននៅវេលាម៉ោង១០
និង៣០នាទីព្រឹកថ្ងៃទី១១ តុលា ដើម្បីបើកការស៊ើបអង្កេត
និងឈានដល់ការកាត់ក្តីតាមផ្លូវច្បាប់នៅថ្ងៃក្រោយ ៕
