ភ្នំពេញ: នៅក្នុងរដូវបុណ្យភ្ជុំបិណ្ឌរយៈពេល ១៥ថ្ងៃ គឺពីបិណ្ឌទី១ ដល់បិណ្ឌទី១៥ នៃខេតុលា ឆ្នាំ២០១២នេះ មន្ត្រីនៃនាយកដ្ឋានសណ្តាប់ធ្នាប់ នៃអគ្គស្នងការនគរបាលជាតិ បានឲ្យដឹងថា បានរៀបចំពង្រឹងការពារសុវត្ថិភាពអ្នកបើកបរយានយន្ត សម្រាប់ចូលរួមទប់ស្កាត់បទល្មើសចរាចរណ៍ ដែលអាចបណ្តាលឲ្យមានមនុស្សស្លាប់ នៅពេលបើកបរនៅក្នុងរដូវភ្ជុំបិណ្យមានចំនួនច្រើនពេក។
លោក ឧត្តមសេនីយ៍ទោ ហ៊ឹម យ៉ាន ប្រធាននាយកដ្ឋានសណ្តាប់ធ្នាប់ នៃអគ្គស្នងការនគរបាលជាតិនាពេលថ្មីៗនេះ បានមានប្រសាសន៍ថា ការរឹតបន្តឹងច្បាប់ចរាចរណ៍នៅពេលនេះ មិនថាតែក្នុងកម្មវិធីភ្ជុំបិណ្ឌនោះទេ គឺគ្រប់វិធីទាំងអស់ ដែលជាវិធីបុណ្យប្រពៃណីជាតិក្តី និងបុណ្យជាតិជាលក្ខណៈសកលក្តី ដែលបានប្រារព្ធធ្វើឡើង កំណើននៃគ្រោះថ្នាក់ក៏កើនឡើងតាមហ្នឹងដែរ។
លោក ហ៊ឹម យ៉ាន បានបន្តថា នេះបើសង្កេតឃើញគ្រោះថ្នាក់ចរាចរណ៍ក្នុងថ្ងៃធម្មតា គឺមាន ៥នាក់ ហើយនៅថ្ងៃមានបុណ្យទានអាចឡើងទៅដល់ ១០នាក់ ក្នុងមួយថ្ងៃ។ ទាំងអស់នេះហើយជាបញ្ហាប្រឈមមួយ ដែលត្រូវបានអគ្គស្នងការដ្ឋាននគរបាលជាតិ ក៏ដូចជាបណ្តាក្រសួងពាក់ព័ន្ធ បានយកចិត្តទុកដាក់ និងគិតគូរលើកឡើងនៅផែនការទប់ស្កាត់ នូវបញ្ហាគ្រោះថ្នាក់ទាំងនេះឲ្យបានទាន់ពេលវេលានៅពេលនេះ។
លោក ហ៊ឹម យ៉ាន បានលើកឡើងថា វិធានការដែលអគ្គស្នងការដ្ឋាននគរបាលជាតិ បានធ្វើកន្លងមកទៅនេះ គឺមានវិធានការសំខាន់ៗចំនួនពីរ ក្នុងនោះ ទី១. ការផ្សព្វផ្សាយអប់រំ ហើយនៅពេលនេះ ចាប់ពីថ្ងៃទី១ ដល់ថ្ងៃទី១៣ ខែតុលា ឆ្នាំ២០១២នេះ កម្មវិធីទប់ស្កាត់គ្រោះថ្នាក់ចរាចរណ៍ អាចធ្វើការផ្សព្វផ្សាយឲ្យបានមុនថ្ងៃភ្ជុំបិណ្ឌ ដើម្បីចូលរួមចំណែកកាត់បន្ថយនូវគ្រោះថ្នាក់ផងដែរ ហើយជាមួយគ្នានោះដែរ អាជា្ញធរគ្រប់ជាន់ថ្នាក់ នឹងធ្វើការផ្សព្វផ្សាយអប់រំទៅដល់អាជ្ញាធរដែនដី ដើម្បីផ្សព្វផ្សាយទៅដល់ប្រជាពលរដ្ឋ នៅតាមមូលដ្ឋានឲ្យបានជ្រាបអំពីយន្តការវិធានការអ្វីខ្លះ ដែលសមត្ថកិច្ចបានធ្វើ។
បញ្ហាទី២ គឺការរឹតបន្តឹងច្បាប់ នៅពេលនេះខាងអគ្គស្នងការដ្ឋាននគរបាលជាតិ បានមានផែនការណែនាំទៅដល់មន្ត្រីនគរបាលចរាចរណ៍រាជធានី-ខេត្ត ទាំងអស់ ឲ្យមានការរឹតបណ្តឹងទៅលើច្បាប់ចរាចរណ៍ ដោយគ្មានការយោគយល់អ្វីទាំងអស់ ជាពិសេសនៅតាមគោលដៅដើមទី និងតាមដងផ្លូវ ពីព្រោះនៅក្នុងពិធីបុណ្យភ្ជុំបិណ្ឌនេះ នឹងមានកំណើនបងប្អូនប្រជាពលរដ្ឋ នាំគ្នាធ្វើដំណើរទៅកាន់ស្រុកកំណើតរបស់ខ្លួន តាមរយៈរថយន្តដឹកជញ្ជូនអ្នកដំណើរ ដែលមិនអាចទទួលយកបាននោះទេ គឺការដឹកលើសកំណត់ ដឹកលើសចំណុះ ទាំងអស់នេះគឺជាកត្តានាំឲ្យមានគ្រោះថ្នាក់ជាយថាហេតុផ្សេងៗ និងបញ្ហាកំណើនចរាចរណ៍យានយន្តដោយផ្ទាល់តែម្តង។
លោក ហ៊ឹម យ៉ាន បានបញ្ជក់ថា មួយឆ្នាំទៅមួយឆ្នាំ ដូចជាកាលពីឆ្នាំមុនៗ មានកំណើនតែ ១៥ ភាគរយ ទៅ ២០ ភាគរយនោះទេ ប៉ុន្តែក្នុងរយៈពេល ៧ខែ ដើមឆ្នាំនេះ ដោយយោងតាមតួលេខពីក្រសួងពាណិជ្ជកម្ម បានឲ្យដឹងថា កំណើនយានយន្តគ្រប់ប្រភេទ គឺមានការកើនឡើងរហូតទៅដល់ ៤៥ ភាគរយ បើប្រៀបធៀបទៅនឹងឆ្នាំ២០១១ និងម៉ូតូប្រមាណជាង ៣០០ គ្រឿង ដែលបានចុះបញ្ជីក្នុងមួយថ្ងៃៗ។ ដូច្នេះបញ្ហាដែលធ្វើឲ្យយើងមានការលំបាកនោះ គឺការពង្រីកផ្លូវមានការយឺតយ៉ាវ នៅតែមានទំហំដដែល ហើយកំណើនយានយន្តចេះតែបន្តកើនឡើងខ្ពស់ពីមួយថ្ងៃទៅមួយថ្ងៃ ដែលជាបញ្ហាប្រឈម បណ្តាលឲ្យមានគ្រោះថ្នាក់កើតឡើងដែរ។
ដូច្នេះការរឹតបន្តឹងច្បាប់ចរាចរណ៍ ត្រូវបានធ្វើឡើងនៅតាមគោលដៅដើមទី និងដងផ្លូវ អំពីបញ្ហាដឹកលើសកំណត់ អំពីល្បឿន អំពីស្រវឹង និងបញ្ហាដែលមិនបានពាក់មួកសុវត្ថិភាពជាដើមនេះ ត្រូវបានដាក់ផែនការដល់ស្នងការដ្ឋាននគរបាលរាជធានី-ខេត្តទាំងអស់ ត្រូវរឹតបន្តឹងឲ្យខ្លាំង និងអ្វីដែលជាកត្តាសំខាន់នោះ គឺការអប់រំ ដើម្បីឲ្យអ្នកធ្វើដំណើរនៅលើដងផ្លូវទាំងអស់ បានយល់ដឹងគ្រប់ៗគ្នា អំពីអ្វីដែលសុវត្ថិភាពក្នុងការបើកបរនៅតាមផ្លូវសាធារណៈ។
លោកបានបញ្ជក់ថា ក្នុងឆមាសទីមួយ ៦ខែ ឆ្នាំ២០១១ បើធ្វើការប្រៀបធៀបនឹងឆ្នាំ២០១២នេះ គ្រោះថ្នាក់ចរាចរណ៍មានការថយចុះ គឺសរុបមានចំនួន ២.៤៥៣ លើក លើ ២.៩៤៥ លើក ថយចុះ ៤៩២ លើក និងចំនួនអ្នកស្លាប់បានថយចុះមកនៅត្រឹម ៣៣ នាក់ ស្មើ ៣ ភាគរយ នេះបើប្រៀបធៀប ៦ខែដូចគ្នា។ ឥឡូវក្នុង ៦ខែ ដើមឆ្នាំ២០១២ មានអ្នកស្លាប់ ១.០៦៧ នាក់ លើ ១.១០០ នាក់ ហើយអ្នករងរបួសធ្ងន់មានចំនួនថយចុះ ៤១៨ នាក់ និងរបួសស្រាលថយ ៥២៨ នាក់ ក្នុងរយៈពេលដូចគ្នា ហើយអ្នកដែលគ្រោះថ្នាក់ដោយសារល្បឿនមានទៅដល់ ៤៨ ភាគរយ និងអ្នកបើកបរដែលមិនគោរពសិទ្ធិអាទិភាព គឺមាន ១៥ ភាគរយ និងអ្នកបើកបរក្នុងស្ថានភាពស្រវឹង ១១ ភាគរយ ប្រជែងក្នុងស្ថានភាពគ្រោះថ្នាក់មាន ៩ ភាគរយ និងបត់មិនប្រុងប្រយ័ត្ន ៩ ភាគរយ ហើយអ្នកបើកមិនប្រកាន់ស្តាំ ៣ ភាគរយ និងមានកត្តាផ្សេងៗទៀតជាច្រើន ដូចជាកត្តាយានយន្តមាន ២ ភាគរយ ដែលធ្វើឲ្យរដ្ឋខាតបង់ថវិកានៅឆ្នាំ២០១១ អស់ជាង ៣១០ លានដុល្លារ៕
