ចៅក្រម បានសម្រេចឃុំខ្លួនយុវជនជាប់ចោទ ដើម្បីរង់ចាំការស៊ើបអង្កេតជាបន្តទៀត ដោយសារធាតុផ្សំបទល្មើសក្នុងអង្គហេតុនេះ ពុំស៊ីសង្វាក់នឹងខ្លឹមសារនៃមាត្រា ២៣៩ នៃក្រមព្រហ្មទណ្ឌ។
មាត្រា ២៣៩ នៃក្រមព្រហ្មទណ្ឌបានចែងថា “ គ្រប់អំពើបញ្ចូលអង្គជាតិ តាមបែបណាក៏ដោយ ឬអំពើបញ្ចូលឧបករណ៍ណាមួយ ទៅក្នុងអង្គជាតិ ដែលប្រព្រឹត្តទៅលើអ្នកដទៃ ទោះបីមានភេទដូចគ្នា ឬមិនដូចគ្នាក៏ដោយ ដោយការប្រើហិង្សា ការបង្ខិតបង្ខំ ការគំរាមកំហែង ឬដោយការឆ្មក់ឱកាស គឺជាបទ រំលោភសេពសន្ថវៈ។ បទរំលោភសេពសន្ថវៈ ត្រូវផ្តន្ទាទោស ដាក់ពន្ធនាគារពី ៥ ឆ្នាំ ទៅ ១០ឆ្នាំ ហើយនិតិភាព នៃការរួមភេទ ត្រូវបានកំណត់ ចាប់ពីអាយុ ១៥ឆ្នាំ ឡើងទៅ។
យុវជនជាប់ចោទនោះ ឈ្មោះ លុយ នឿន ហៅ និត អាយុ ២៣ឆ្នាំ ជាកម្មកររោងចក្រកាត់ដេរ មានទីលំនៅភូមិវែង ឃុំម្កាក់ ស្រុកអង្គស្នួល ខេត្តកណ្តាល។ រីឯជនរងគ្រោះអាយុ ២១ឆ្នាំ ជាកម្មការិនីរោងចក្រកាត់ដេរ ស្នាក់នៅផ្ទះបងប្រុស ក្នុងសង្កាត់ចោមចៅ ខណ្ឌពោធិ៍សែនជ័យ។
សមត្ថកិច្ចប៉ូលិសខណ្ឌពោធិ៍សែនជ័យ បានឃាត់ខ្លួនយុវជនរូបនេះ កាលពីព្រឹកថ្ងៃទី២២ ខែតុលា ឆ្នាំ២០១២ នៅមុខរោងចក្រកាត់ដេរ ធី អាយ ធី ស្ថិតក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ដោយយោងតាមពាក្យបណ្តឹងរបស់ជនរងគ្រោះ ដែលប្តឹងពីបទ រំលោភសេពសន្ថវៈ។
នៅចំពោះមុខសមត្ថកិច្ច យុវជនរូបនេះ បានបញ្ជាក់ថា ខ្លួន និងជនរងគ្រោះ បានស្រឡាញ់គ្នាអស់រយៈពេល ៤ខែមកហើយ លុះដល់ល្ងាចថ្ងៃទី២១ ខែតុលា ឆ្នាំ២០១២ ពួកយើងបាននាំគ្នាដើរលេង រហូតមកដល់ព្រលប់ថ្ងៃដដែល ទើបខ្លួនបានឌុបនាងចូលផ្ទះសំណាក់មួយកន្លែងយីហោ ស្រីនាង ដែលមានទីតាំងស្ថិតនៅភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ។
យុវជនរូបនេះ បានបន្តទៀតថា ពេលដែលពួកខ្លួន បានចូលទៅក្នុងផ្ទះសំណាក់នោះ ខ្លួនបានសុំនាងរួមរ័ក តែនាងបានប្រាប់វិញថា ចាំក្រោយពេលស្តីដណ្តឹងរួច ចង់ធ្វើអីក៏បានដែរ ហើយខ្លួនក៏បានសន្យាថា នឹងឱ្យឪពុកម្តាយ ចូលស្តីរៀបការជាប្តីប្រពន្ធ។ បន្ទាប់មក ពួកខ្លួនបានរួមរ័កជាមួយគ្នា រហូតដល់ទៅ ៥ ដង ក្នុងមួយយប់។
លុះព្រឹកឡើង ខ្លួនបានជិះម៉ូតូឌុបនាងទៅមុខរោងចក្រកាត់ដេរ ធី អាយ ធី វិញ តែចៃដន្យបងប្រុសរបស់នាង ស្ថិតនៅទីនោះដែរ បានឃើញ ហើយសួរនាំនារីរងគ្រោះ ទើបដឹងថា ខ្លួននិងប្អូនស្រីរបស់គាត់ បានរួមរ័កជាមួយគ្នា ហើយបងប្រុសរបស់នាងក៏ឃាត់ខ្លួនតែម្តង។ ចំណែកនាងវិញ ក៏បានដាក់ពាក្យបណ្តឹង នៅសមត្ថកិច្ចប៉ូលិសថា ខ្លួនបានចាប់រំលោភសេពសន្ថវៈនាង រហូតបានសម្រេច៕
