ភ្នំពេញ:
ព្រះមហាក្សត្រ សម្តេចព្រះបរមនាថ នរោត្តម សីហមុនី
បានចេញព្រះរាជក្រឹត្យ ត្រាស់បង្គាប់
បង្កើតគណៈកមមាធិការជាតិរៀបចំព្រះរាជពិធីបុណ្យព្រះបរមសព
ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ។
គណៈកម្មាធិការនោះ ដឹកនាំដោយសម្តេច ជា ស៊ីម សម្តេច ហេង សំរិន និងសម្តេច
ហ៊ុន សែន។
តាមព្រះរាជក្រឹត្យ ចុះថ្ងៃទី១៦ ខែតុលា ឆ្នាំ២០១២
សមាសភាពគណៈកម្មាធិការជាតិរៀបចំព្រះរាជពិធីបុណ្យព្រះបរមសព
សម្តេចព្រះ នរោត្តម សីហនុ មានចំនួន ៤៩ រូប ដែលដឹកនាំដោយសម្តេចទាំងបី
និងមានសមាជិកជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី
អគ្គស្នងការនគរបាលជាតិ មេប៉េអឹម និងអភិបាលរាជធានី-ខេត្តទាំង ២៤។
តាមព្រះរាជក្រឹត្យ គណៈកម្មាធិការនោះ មានភារកិច្ច ដូចខាងក្រោយ៖
-
រៀបចំព្រះរាជពិធីបុណ្យព្រះបរមសព ឲ្យមានដំណើរការល្អ ឧត្តុង្គឧត្តម
សក្តិសមនឹងព្រះគោរមងាររបស់ព្រះអង្គ ជាព្រះមហាវីរក្សត្រ
ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ
-សម្របសម្រួលការងាររៀបចំព្រះរាជពិធីបុណ្យព្រះបរមសព នៅថ្នាក់ជាតិ និងថ្នាក់ក្រោមជាតិ
-រៀបចំព្រះរាជពិធីទទួល និងដង្ហែព្រះបរមសព
-រៀបចំតម្កល់ព្រះបរមសព គោរពព្រះវិញ្ញាណក្ខន្ធ និងកិច្ចការពាក់ព័ន្ធផ្សេងៗ
-រៀបចំព្រះរាជពិធីបូជាព្រះបរមសព ឲ្យមានដំណើរការល្អ និងឧត្តុង្គឧត្តម
ព្រះករុណា ព្រះមហាក្សត្រ ក៏បានកំណត់ថា គណៈកម្មាធិការនេះ
អាចបង្កើតអនុគណៈកម្មការ ដើម្បីបំពេញការងារ តាមការចាំបាច់។
សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា
សម្តេចអគ្គមហាពញាចក្រី ហេង សំរិន ប្រធានរដ្ឋសភា
និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី
នៃព្រះរាជាណាចក្រកម្ពុជា ត្រូវទទួលបន្ទុកអនុវត្ត
ឲ្យបានសម្រេចនូវព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។
ព្រះរាជក្រឹត្យរបស់ព្រះករុណា ព្រះមហាក្សត្រ ត្រូវបានចម្លងចែកចាយ
ដែលចុះហត្ថលេខា ដោយលោក សយ សុខា អគ្គលេខាធិកររងទី១ រាជរដ្ឋាភិបាល
នៅថ្ងៃទី១៦ ខែតុលា ឆ្នាំ២០១២។ ព្រះរាជក្រឹត្យនោះ
ត្រូវបានផ្សព្វផ្សាយដល់អ្នកកាសែត នាព្រឹកថ្ងៃទី១៧ ខែតុលា
ឆ្នាំ២០១២។
សូមរម្លឹកថា សម្តេចឪ ព្រះករុណា សម្តេចព្រះ នរោត្តម
សីហនុ បានយាងចូលព្រះទិវង្គត ក្នុងព្រះជន្មាយុ ៩០ ព្រះវស្សា
កាលពីយប់ម៉ោង ១ និង ២០ នាទី ថ្ងៃទី១៥ ខែតុលា ឆ្នាំ២០១២
ដោយព្រះជរាពាធ នៅមន្ទីរពេទ្យ ទីក្រុងប៉េកាំង ប្រទេសចិន។
រាជរដ្ឋាភិបាលកម្ពុជា ក៏បានចេញសរាចរណែនាំ
ដោយប្រកាសឲ្យមានការកាន់ទុក្ខសម្តេចព្រះ នរោត្តម សីហនុ រយៈពេល ៧ ថ្ងៃ
គិតចាប់ពីថ្ងៃទី១៧ ខែតុលា ឆ្នាំ២០១២ រហូតដល់ថ្ងៃទី២៣ ខែតុលា
ឆ្នាំ២០១២។
រាជរដ្ឋាភិបាលក៏បានប្រកាសឲ្យពលរដ្ឋកម្ពុជា
ទូទាំងប្រទេស ចូលរួមកាន់ទុក្ខថ្វាយព្រះបរមសពរបស់សម្តេចឪ នរោត្តម
សីហនុ ដែលនឹងដង្ហែពីប្រទេសចិន មកដល់ព្រលានយន្តហោះអន្តរជាតិភ្នំពេញ
នារសៀលម៉ោង ៣ ថ្ងៃទី១៧ ខែតុលា ឆ្នាំ២០១២ ដើម្បីតម្កល់ធ្វើបុណ្យ
នៅក្នុងព្រះបរមរាជវាំង ទុករយៈពេលយ៉ាងតិច ៣ ខែ មុននឹងបូជា
តាមព្រះរាជបណ្តាំរបស់ព្រះអង្គ។
ប្រសូត្រ នៅថ្ងៃទី៣១
ខែតុលា ឆ្នាំ១៩២២ ព្រះករុណា ព្រះបាទសម្ដេចព្រះ នរោត្ដម សីហនុ
ព្រះមហាវីរក្សត្រកម្ពុជា បានឡើងគ្រងរាជសម្បត្តិ ក្នុងព្រះជន្មាយុ ១៨
ព្រះវស្សា គឺនៅឆ្នាំ១៩៤១។ ព្រះអង្គ បានធ្វើបូជនីយកិច្ច
ទាមទារឯករាជ្យពេញលេញ ពីបារាំង សម្រាប់កម្ពុជា នៅថ្ងៃទី៩ ខែវិច្ឆិកា
ឆ្នាំ១៩៥៣។ ជាមួយគ្នានោះ ព្រះវីរភាពរបស់សម្តេចឪ សម្តេចព្រះ នរោត្តម
សីហនុ ក៏បានដឹកនាំប្រទេសកម្ពុជា ស្គាល់ភាពរីកចម្រើន
ពិសេសខាងឧស្សាហកម្ម ក្នុងសម័យសង្គមរាស្ត្រនិយម ( ចន្លោះពីឆ្នាំ១៩៥៣
ដល់ឆ្នាំ១៩៧០ )។
ព្រះករុណា សម្តេចឪ
ក៏បានទាមទារយកខេត្តមួយចំនួនពីប្រទេសថៃ
រួមទាំងឈ្នះក្តីលើប្រទេសថៃ នៅតុលាការយុត្តិធម៌អន្តរជាតិ
នៅទីក្រុងឡាអេ នាឆ្នាំ១៩៦២ ស្តីពីប្រាសាទព្រះវិហារ។ ព្រះអង្គ
ក៏ស្វែងរកសន្តិភាព និងផ្សះផ្សារជាតិ សម្រាប់ប្រទេសកម្ពុជា
ដែលនាំដល់ការចុះកិច្ចព្រមព្រៀងសន្តិភាព ទីក្រុងប៉ារីស នៅថ្ងៃ២៣
ខែតុលា ឆ្នាំ១៩៩១ និងការបោះឆ្នោតជាតិ ក្នុងសម័យព្រះរាជាណាចក្រកម្ពុជា
លើកទី២ នាឆ្នាំ១៩៩៣៕
