នគរបាល ខណ្ឌពោធិសែនជ័យ បង្ក្រាបបានមុខសញ្ញា ដ៏សកម្មយកម៉ូតូចាស់ ដូរយកម៉ូតូថ្មី នៅតាមពិធីនានា

ជនសង្ស័យម្នាក់ ដែលជំនាញខាងបន្លំ យកម៉ូតូចាស់ដូរយកម៉ូតូថ្មី ពេលដែលប្រជាពលរដ្ឋ ធ្វើពិធីនានា

ត្រូវបាននគរបាលខណ្ឌពោធិសែនជ័យ បង្ក្រាបបាន ហេតុការណ៍នេះ

កើតឡើងកាលពីវេលម៉ោង ១៩និង៣០នាទី ថ្ងៃទី១៧ ខែកុម្ភៈ ឆ្នាំ២០១២ ស្ថិតនៅត្រង់ចំណុចរោងអាពាហ៍ពិពាហ៍ ភូមិប៉ប្រកខាងត្បូង សង្កាត់កាកាប ខណ្ឌពោធិសែនជ័យ រាជធានីភ្នំពេញ។

ប្រភពព័ត៌មានពី នគរបាលបានឱ្យដឹងថា ជនរងគ្រោះមានឈ្មោះ ជិន សុខុម ភេទប្រុស អាយុ៥០ ឆ្នាំរស់នៅក្នុងភូមិ-សង្កាត់កើតខាងលើ ជិះម៉ូតូម៉ាកសេ ១២៥ ពណ៌ខ្មៅ ពាក់ស្លាកលេខ ភ្នំពេញ 1AS-9630 ចំណែកឯជនសង្ស័យវិញ មានឈ្មោះ សួង វុទ្ធី ភេទប្រុស អាយុ២៦ ឆ្នាំ មានមុខរបរលក់បន្លែ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ជិះម៉ូតូ មួយគ្រឿង ម៉ាកសាន់យ៉ាន់ ពណ៌ក្រហមគ្មាន ស្លាកលេខ ។

ប្រភពព័ត៌មានបានឱ្យដឹងទៀតថា មុនពេលកើតជនសង្ស័យ បានក្លែងខ្លួនដូចជាភ្ញៀវជិះម៉ូតូ ម៉ាកសាន់យ៉ាន់ទៅចូលរួមក្នុងពិធីមង្គលការខាង លើពេលទៅដល់ អ្នកយាមកាមនៅទីនោះក៏កឹបសំបុត្រជូន ពេលនោះជនសង្ស័យអង្គុយទូរស័ព្ទ មិនទាន់ចូល បន្ដិចម៉ូតូជនរងគ្រោះចូលទៅដល់ កឹបសំបុត្ររួចបណ្ដើរទុក ពេលនោះ ជនសង្ស័យ បានបណ្ដើរចូលទៅទុកក្បែរម៉ូតូជនរងគ្រោះ រួចហើយក៏ធ្វើសកម្មភាពហែកសំបុត្រពីម៉ូតូខ្លួនឯង យកទៅកឹបលើម៉ូតូជនរងគ្រោះ អ្នកយាមកាមឃើញ ដូច្នេះក៏ដើរទៅសួរនាំ ជនសង្ស័យក៏បានអះអាងយកម៉ូតូ របស់ជនរងគ្រោះថា ជាម៉ូតូរបស់គេ លុះពេលសួរដេញដោលឆ្លើយមិនចេញ ទើបឃាត់ខ្លួនតែម្ដងទៅ ដើម្បីធ្វើការសាកសួរ បន្ទាប់ពីសាកសួររួចជនសង្ស័យ ក៏បានឆ្លើយសារភាពរូបគេ ពិតជាបានដើរបន្លំម៉ូតូនៅតាមមង្គលនានាជាច្រើន លើកមកហើយ ។

ប្រភពព័ត៌មានពីនគរបាល មួយរូបបានឱ្យដឹងថា ដោយសារតែនៅតាមពិធីមង្គលការ ឬពិធីជប់លៀង ចេះតែបាត់ម៉ូតូដោយមានជនបន្លំចូលយកម៉ូតូ លោក ប៊ន សំអាត អធិការនគរបាលខណ្ឌពោធិសែនជ័យ ក៏បានដាក់បញ្ជាយ៉ាងតឹងរ៉ឹងបំផុត ឱ្យកម្លាំងនគរបាលដែលត្រូវយាមកាម នៅតាមពិធីនានាប្រុងប្រយ័ត្នឱ្យខ្ពស់បំផុត និងតាមវែកមុខសញ្ញានេះ ឱ្យបានដើម្បីរក្សាសុវត្ថិភាពជូនពលរដ្ឋ ដែលអញ្ជើញចូលរួម ក្នុងពិធីនានាទទួលភាពកក់ក្ដៅ ដោយសារមុខសញ្ញានេះ ធ្លាប់ធ្វើសកម្ម ភាពជារ៉ើយៗ នៅក្នុងរាជធានីភ្នំពេញ ទើបនគរបាល មានការប្រុងប្រយ័ត្ន លុះពេលឃើញគេ បញ្ចេញសកម្មភាពក៏ក្របួងតែម្ដងទៅ ។

បច្ចុប្បន្នជនសង្ស័យ ត្រូវឃុំខ្លួនជាបណ្ដោះអាសន្ន នៅអធិការដ្ឋាននគរបាល ខណ្ឌពោធិសែន ជ័យដើម្បីកសាងសំណុំរឿង បញ្ជូនទៅកាន់តុលាការ ចាត់ការទៅតាមផ្លូវច្បាប់ ៕(ដក់់ស្រង់ពីដើមអំពិល)