ថ្វីដ្បិតតែជីវិតសិល្បៈរបស់តារាល្បីៗពោរពេញដោយភាពមមាញឹកឥត ឈប់ឈរ ប៉ុន្តែកំពូលតារាចម្រៀងលោក ព្រាប សុវត្ថិ តារាចម្រៀងក្នុងដួងចិត្តយុវវ័យលោក ឆាយ វីរៈយុទ្ធ និងតារាបង្ហាញម៉ូដ និងតារាសម្ដែង ទឹម រដ្ឋា ឆ្លៀតពេលបង្ហើបពី
គម្រោងចុងសប្ដាហ៍ និងតំបន់ទេសចរណ៍ដែលខ្លួននិយមចូលចិត្តទៅកម្សាន្តនាពេលទំនេរផង ដែរ។
ជាមួយនឹងគម្រោងទៅច្រៀងសម្ដែងឲ្យក្រុមហ៊ុនស្រាឈីវ៉ាស់ រីហ្គែល (Chivas Regal) នៅទឹកដីខេត្តសៀមរាប នាចុងសប្ដាហ៍នេះ តារាដែលនៅតែបន្តចែងចាំងក្នុងពិភពសិល្បៈរូបនេះ បានឲ្យដឹងថា លោកនៅមិនទាន់អាចដកឃ្លារៀបចំដំណើរកម្សាន្តដើម្បីឲ្យស្រាកស្រាន្ត អារម្មណ៍ពីភាពមមាញឹកឡើយ ខណៈដែលរដូវប្រាំងគ្មានភ្លៀងនេះ គឺជាវេលាដ៏កាក់កបខ្លាំងបំផុតសម្រាប់តារាចម្រៀងមានឈ្មោះល្បីដូច ជារូបលោក។
នៅពេលដែលសួរថា ចុះបើអាចឆ្លៀតបាន តើលោកចូលចិត្តទៅកម្សាន្តនៅទីណាដែរ? តារាចម្រៀងវ័យជាងសាម តែពូកែលេងស្ទីលរូបនេះបានបង្ហើបឲ្យដឹងថា៖ «ខ្ញុំចូលចិត្តទៅតំបន់រមណីយដ្ឋានជាច្រើនដូចជានៅរតនគិរី និងកំពង់សោមជាដើម ពីព្រោះថា ទីនោះសម្បូរដោយធម្មជាតិ ហើយមានផាសុកភាពល្អ»។
លោកបានបន្តទៀតថា៖ «និយាយរួមទៅកន្លែងកម្សាន្តនៅប្រទេសយើងគឺមានច្រើនណាស់ ហើយខ្ញុំចូលចិត្តដើរលេងតាមរដូវកាល ពីព្រោះថា តំបន់នីមួយៗមានកន្លែងលេងកម្សាន្តខុសៗគ្នា»។
ចំណែកឯម្ចាស់បទ «នឹកបង ឬនឹកគេ» លោក ឆាយ វីរៈយុទ្ធ ក៏ទំនងជាមិនអាចឆ្លៀតពេលដើរកម្សាន្តទៅទីណាដែរ ដោយចុងសប្ដាហ៍នេះ លោកត្រូវសម្ងំនៅផ្ទះ ហាត់ពត់សំឡេងឲ្យកាន់តែពីរោះ។
តារាចម្រៀងលេចធ្លោប្រចាំផលិតកម្មប៊ីកមែនរូបនេះក៏បាននិយាយទៀត ថា៖ «ប្រសិនបើមានពេលទំនេរ ខ្ញុំចូលចិត្តទៅដើរលេងនៅមាត់សមុទ្រកំពង់សោម ព្រោះមានខ្យល់អាកាសបរិសុទ្ធ និងមានទេសភាពស្រស់ស្អាតផងដែរ»។
ដោយឡែកតារាស្រីរាងស្រឡូន ខ្ពស់ស្រឡះ ទឹម រដ្ឋា វិញ នាងបានឲ្យដឹងថា ចុងសប្ដាហ៍នេះ នាង និងក្រុមគ្រួសារត្រូវទៅចូលរួមពិធីមង្គលការបងប្អូនជីដូនមួយនៅ ខេត្តបាត់ដំបង ប៉ុន្តែបើអាច នាងនឹងឆ្លៀតទៅលេងខេត្តប៉ៃលិន។
ជាទូទៅប្រសិនបើមានពេលទំនេរពីការដើរម៉ូដ និងសម្ដែង ទឹម រដ្ឋា បាននិយាយថា៖ «ខ្ញុំចូលចិត្តទៅលេងកៀនស្វាយ ព្រោះទីនោះសម្បូររបស់ញ៉ាំ ហើយវាមិនសូវឆ្ងាយពីភ្នំពេញ»៕
