ភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ជាតំបន់ឆ្លងកាត់ព្រំដែនមួយដែលមានច្រករបៀងឆ្លងដែនជាច្រើន ហើយអ្នកស្រុកនិយមធ្វើដំណើរឆ្លងចូលដីថៃ ទៅកាប់ឈើតាមច្រករបៀងទាំងនេះ។ ឈើដែលមានតម្លៃខ្ពស់ ហើយអ្នកស្រុកនិយមឆ្លងទៅកាប់យកមកលក់ឲ្យឈ្មួញ គឺឈើគ្រញូង។
ប្រជាពលរដ្ឋមួយរូបឈ្មោះ ងួន ដែលរស់នៅភូមិអូរស្វាយ បានឲ្យដឹងថា ការឆ្លងព្រំដែនទៅកាប់ឈើគ្រញូងនៅក្នុងដីថៃនោះ វាមានគ្រោះថ្នាក់មែន តែក៏វាបានទទួលប្រាក់ចំណូលខ្ពស់ដែរ។
ប្រជាពលរដ្ឋមួយរូបទៀតឈ្មោះ សុខា ដែលមានកូនទៅកាប់ឈើគ្រញូងនៅក្នុងដីថៃ យកមកលក់ បានឲ្យដឹងបន្ថែមថា ឈើគ្រញូងដែលអ្នកស្រុកទៅកាប់នោះ មិនមែនជាប្រភេទដើមឈើធំៗនោះឡើយ គឺជាប្រភេទកូនឈើគ្រញូងតូចៗ មានទំហំចាប់ពីប៉ុនកដៃរហូតដល់ប៉ុនភ្លៅប៉ុណ្ណោះ។
ប្រជាពលរដ្ឋជាច្រើននាក់ផ្សេងទៀតបានឲ្យដឹងថា ការឆ្លងដែនទៅកាប់ឈើគ្រញូងក្នុងដីថៃ វាមានហេតុផលច្រើនយ៉ាង ជំរុញមនុស្សឲ្យទៅ បើទោះជាមានគ្រោះថ្នាក់ក៏ដោយ។
ហេតុផលទាំងនោះរួមមានជាអាទិ គឺងាយរកលុយបានច្រើន និងឆាប់រហ័ស។ ចំណាយពេលវេលាតិចក្នុងការរកលុយ បើប្រៀបធៀបជាមួយការធ្វើស្រែ។ អ្នកទៅកាប់ឈើទាំងនោះមិនចាំបាច់ចេះអក្សរក៏បានដែរ ឲ្យតែចេះកាន់រណារ ចេះកាន់ពូថៅ កាំបិត ចេះចាំងឈើទៅគឺបានហើយ។
នៅក្នុងភូមិមានមនុស្សច្រើននាក់ទៅកាប់ឈើ គឺផ្អើលតាមគ្នា ហើយអ្នកទៅកាប់ឈើមកវិញគេមានលុយទិញខ្សែក ខ្សែដៃមាសពាក់ហ៊ឺហា ទិញទូរស័ព្ទដៃម៉ាកទំនើបជាដើម។ មានអ្នកទិញទៅដល់ផ្ទះតែម្ដងឲ្យតែមានឈើគ្រញូងកាប់បាន ហើយអូសលីសែងចេញពីព្រៃមកដល់ភូមិបាន។
ប្រជាពលរដ្ឋមួយរូបឈ្មោះ វ៉ាន់ ញិន មានប្អូនបង្កើតបានស្លាប់ដោយសារការឆ្លងដែនទៅកាប់ឈើនៅក្នុងដី ថៃនោះ។ អ្នកស្រី ញិន បានឲ្យដឹងថា ក្រៅពីមានការងាយរកលុយបានដោយសារកាប់ឈើគ្រញូងយកមកលក់នោះ ការកាប់ឈើនោះក៏វាមានគ្រោះថ្នាក់ខ្លាំងណាស់ដែរ។
ប្រជាពលរដ្ឋនិយាយឲ្យដឹងថា គ្រោះថ្នាក់ដែលបណ្តាលមកពីការឆ្លងដែនទៅកាប់ឈើគ្រញូងទាំងនោះ រួមមាន ត្រូវទាហានថៃ បាញ់ឲ្យរបួស ពិការ ស្លាប់។ គេចាប់ដាក់គុក កាលណាជួបប្រទះក្រុមល្បាតរបស់ថៃ។ ត្រូវបង់លុយឲ្យទាហានខ្មែរដែលយាមនៅតំបន់ច្រករបៀង ដើម្បីបានឆ្លងដែនចូលទៅក្នុងដីថៃបាន។ ជួនកាលស៊យមិនអាចរកឈើគ្រញូងដែលមានទំហំធំបាន ជួនកាលត្រូវមេព្រៃខ្មែរចាប់ជាដើម។
ចាប់ពីថ្ងៃទី១០ ដល់ ១៣ កុម្ភៈ កន្លងទៅ មានប្រជាពលរដ្ឋរស់នៅភូមិអូរស្វាយ ឃុំអូរស្វាយ យ៉ាងតិច ៣នាក់ បានបាត់បង់ជីវិតដោយសារទាហានថៃ បាញ់ក្នុងពេលឆ្លងដែនទៅកាប់ឈើគ្រញូងក្នុងដីថៃ និងមួយចំនួនទៀតបានបាត់ខ្លួន។ នៅក្នុងស្រុកត្រពាំងប្រាសាទ ក្រៅពីឃុំអូរស្វាយ ក៏មានឃុំផ្អាវ ដែលជាច្រកឆ្លងដែនទៅកាប់ឈើក្នុងព្រៃដែរ។
ប្រភពប្រជាពលរដ្ឋបានឲ្យដឹងថា ច្រករបៀងសំខាន់ៗដែលប្រជាពលរដ្ឋឆ្លងទៅកាប់ឈើនៅក្នុងស្រុក ត្រពាំងប្រាសាទ មានច្រកអូរស្វាយ ច្រកទឹកជប់ ច្រកចំបក់កោង ច្រកព្រលានដូនពែ ជាដើម។
ប្រជាពលរដ្ឋមួយរូបសុំមិនចេញឈ្មោះ ដែលរត់រួចពីការដេញបាញ់របស់ទាហានល្បាតព្រំដែនរបស់ថៃ ក្នុងពេលឆ្លងដែនទៅកាប់ឈើនៅថៃ បាននិយាយឲ្យដឹងថា ការឆ្លងដែនទៅកាប់ឈើនោះ ពេលជួបទាហានថៃ គឺព្រលឹងចុងសក់តែម្ដង។
លោក តេ វិច ជាមេឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។ លោកបានឲ្យដឹងថា ការហាម និងប្រកាសកុំឲ្យប្រជាពលរដ្ឋឆ្លងដែនទៅកាប់ឈើគ្រញូងក្នុងដីថៃ នោះ បានធ្វើជាញឹកញយមកហើយ តែប្រជាពលរដ្ឋខ្លះគាត់មិនស្ដាប់តាម។ ប្រជាពលរដ្ឋខ្លះទៀតយល់ថា ការទៅកាប់ឈើនោះវាបានលុយច្រើន។
សកម្មភាពឆ្លងដែនចូលទៅកាប់ឈើនៅក្នុងដីថៃ មិនមែនមានតែនៅក្នុងឃុំអូរស្វាយ មួយប៉ុណ្ណោះទេ វាមានច្រើនកន្លែងទៀត តាមព្រំដែនខ្មែរ-ថៃ ក្នុងខេត្តឧត្តរមានជ័យ។ ប្រជាពលរដ្ឋឆ្លងដែនទៅកាប់ឈើក្នុងដីថៃនោះ មានទាំងអ្នកភូមិរស់នៅក្បែរព្រំដែន និងមានទាំងអ្នកមកពីខេត្តឆ្ងាយៗផងដែរ ដូចជាមកពីខេត្តព្រៃវែង ស្វាយរៀង ជាដើម។
លោកសក្តិ ៤ តូច រ៉ា ជាប្រធានគណៈកម្មការទំនាក់ទំនងខ្មែរ-ថៃ នៅច្រកអន្តរជាតិជាំសាង៉ាំ ខេត្តឧត្តរមានជ័យ។ លោកបានមានប្រសាសន៍ឲ្យដឹងថា រឿងទាហានថៃ បាញ់ និងចាប់ប្រជាពលរដ្ឋខ្មែរឆ្លងដែនទៅកាប់ឈើក្នុងដីគេនោះ កើតមានជាញឹកញយ។ លោកបានឲ្យដឹងបន្ថែមថា ជួនកាលភាគីថៃ គេមិនបញ្ជូនមនុស្សនោះមកវិញឡើយក្រោយពេលចាប់ហើយ ដោយសារអ្នកទាំងនោះមិនមានអត្តសញ្ញាណប័ណ្ណឲ្យបានច្បាស់លាស់ តែភាគីកម្ពុជា តែងតែទាមទារឲ្យថៃ បញ្ជូនមកឲ្យកម្ពុជាវិញ។
ប្រភពប្រជាពលរដ្ឋឲ្យដឹងថា ប្រជាពលរដ្ឋដែលមកពីខេត្តឆ្ងាយ ភាគច្រើនមានមេខ្យល់នាំមកដោយសន្យាឲ្យប្រាក់ឈ្នួលច្រើន។ អ្នកទាំងនោះភាគច្រើនមានគ្រោះថ្នាក់ដោយសារវង្វេងក្នុងព្រៃក្នុង ពេលទាហានថៃដេញបាញ់។ ពួកគេមិនស្គាល់ភូមិសាស្ត្រព្រៃទាំងនោះឡើយ។ មានអ្នកខ្លះស្លាប់ចោលឆ្អឹងក្នុងព្រៃ មិនមានដំណឹងផ្ដល់ដល់គ្រួសារវិញឡើយ។
ឈ្មួញលក់ទិញឈើមួយរូបសុំមិនចេញឈ្មោះ បានឲ្យដឹងថា ឈើគ្រញូងមានតម្លៃខ្ពស់។ ឈើនោះកាលណាមានមុខកាត់កាន់តែធំ កម្រាស់កាន់តែក្រាស់ តម្លៃកាន់តែកើន។ បើឈើមានទំហំធំគេទិញគិតជាម៉ែត្រគូប ប៉ុន្តែបើឈើគ្រញូងនោះមានទំហំតូចគេគិតតាមការថ្លឹងគីឡូ។
ឈើគ្រញូងគិតជាគីឡូ មានតម្លៃចាប់ពី ១គីឡូថ្លៃ ២ដុល្លារអាមេរិកឡើងទៅ។ ប្រភេទឈើគ្រញូងថ្លឹងគីឡូនេះ តាមភាសាអ្នកស្រុកគេហៅថា ឈើគ្រញូងអេតចាយ។ ចំពោះឈើគ្រញូងគិតជាម៉ែត្រគូប ប្រភពអ្នកស្រុកបានឲ្យដឹងថា អាចមានតម្លៃចាប់ពី ២.០០០ដុល្លារ ក្នុង១ម៉ែត្រគូបឡើងទៅ។
ឈើគ្រញូងគេយកទៅធ្វើតុ ទូ កៅអី គ្រែ កៅអីសាឡុង តុបាយ រូបចម្លាក់បិទជញ្ជាំងបន្ទប់ជាដើម។មិនមានប្រភពណាមួយអះអាងថា តើគេយកឈើគ្រញូងទៅប្រើប្រាស់ធ្វើអ្វីទៀតក្រៅពីគ្រឿងសង្ហារិម និងគ្រឿងប្រើប្រាស់ឡើយ។
លោក ឃុន សោភា ជានាយផ្នែកខណ្ឌរដ្ឋបាលព្រៃឈើនៅខេត្តឧត្តរមានជ័យ បានឲ្យដឹងថា ប្រៀបធៀបឆ្នាំ២០១១ ជាមួយឆ្នាំ២០១០ កន្លងទៅ បទល្មើសព្រៃឈើក្នុងខេត្តឧត្តរមានជ័យ មានការថយចុះជាងមុន តែលោកមិនបានបញ្ជាក់ថា មានការថយចុះចំនួនប៉ុន្មានទេ។
ចំណែកលោក សុង បញ្ញា ជាមន្ត្រីរដ្ឋបាលព្រៃឈើក្នុងខេត្តឧត្តរមានជ័យ បានមានប្រសាសន៍នៅថ្ងៃទី១៩ កុម្ភៈ ឲ្យដឹងថា នៅក្នុងឆ្នាំ២០១១ កន្លងទៅ រដ្ឋបាលព្រៃឈើខេត្តឧត្តរមានជ័យ បង្រ្កាបបទល្មើសព្រៃឈើបានចំនួន ៥០ករណី រឹបអូសឡានគ្រប់ប្រភេទដឹកឈើខុសច្បាប់បានចំនួន ៣២ឡាន និងមានផាកពិន័យជាប្រាក់មួយចំនួន។ ជាមួយនោះដែរ មានមនុស្សចំនួន ៣០នាក់ បានត្រូវបញ្ជូនខ្លួនទៅតុលាការធ្វើការចោទប្រកាន់ទាក់ទង ឧក្រិដ្ឋកម្មព្រៃឈើ។
ការបង្ក្រាបបទល្មើសព្រៃឈើនៅខេត្តឧត្តរមានជ័យ មិនងាយស្រួលឡើយ ពីព្រោះតំបន់នេះជាខេត្តជាយដែន ហើយកងទ័ពប្រទេសទាំង២ (កម្ពុជា-ថៃ) មានដាក់ពង្រាយដើម្បីត្រៀមប្រយុទ្ធការពារប្រទេសរៀងខ្លួន។ នៅក្នុងព្រៃជាយដែនប្រទេសទាំង២ មានទាហានដែលមានអាវុធដែលងាយបង្កឲ្យមានគ្រោះថ្នាក់ជាទីបំផុត៕(rfa)
