លោក ស ខេង រដ្ឋមន្រ្តីក្រសួងមហាផ្ទៃ បានឆ្លើយតបទៅនឹងការចោទសួរ របស់អ្នកកាសែត នៅខាងក្រៅសិក្ខាសាលា ស្តីពីការការពារកុមារ តំបន់អាស៊ីអាគ្នេយ៍ នៅសណ្ឋាគារកុងទីណង់តាល់ កាលពីម្សិលមិញថា ជនសង្ស័យដែលបានបាញ់លើកម្មករនៅក្រុងបាវិត «គឺលោក ឈូក បណ្ឌិត អភិបាលក្រុងបាវិត»។ លោក បានបញ្ជាក់ថា៖«ពាក់ព័ន្ធនឹងការចាប់ខ្លួនជនសង្ស័យឬអត់? វាមិនមែនជាកាតព្វកិច្ចរបស់ក្រសួងមហាផ្ទៃទេ។ វាជាកាតព្វកិច្ចតុលាការ ប៉ុន្តែវាមិនលើសពីជាងមួយសប្តាហ៍ទេ ព្រោះយើងបានស្គាល់អត្តសញ្ញាណច្បាស់ហើយ»។
កាលពីថ្ងៃទី ២៨ កុម្ភៈ ក្រសួងមហាផ្ទៃ បានដាក់ពាក្យប្តឹងទៅតុលាការខេត្តស្វាយរៀង អំពីខ្មាន់កាំភ្លើងដែលបានបាញ់កម្មករ៣ នាក់នៅក្រុងបាវិត។
លោក ប៉ិច ឈឿត ប្រធានតុលាការខេត្តស្វាយរៀង បាននិយាយថា របាយការណ៍ស៊ើបអង្កេត រឿងបាញ់កម្មករ គឺស្ថិតនៅក្នុងដៃព្រះរាជអាជ្ញា ដូច្នេះលោក មិនដឹងពីអត្តសញ្ញាណជនសង្ស័យទេ។
លោកហ៊ឹង ប៊ុនជា ព្រះរាជអាជ្ញាខេត្តស្វាយរៀង បានថ្លែងថា លោកបានទទួលរបាយការណ៍ស៊ើបអង្កេតរបស់ប៉ូលិសរួចហើយ ហើយឥឡូវនេះលោកកំពុងតែពិនិត្យមើល ហើយនឹងចាត់វិធានការនៅពេលក្រោយ។
លោកបានឲ្យដឹងបន្ថែមទៀតថា៖ «តាមរបាយការណ៍ ខ្ញុំឃើញមានឈ្មោះអ្នកដែលបានបាញ់លើកម្មករ គឺ លោក ឈូក បណ្ឌិត អភិបាលក្រុងបាវិត ដូចអ្វីដែលឯកឧត្តមឧបនាយករដ្ឋមន្រ្តី ស ខេង បានមានប្រសាសន៍»។
លោក ម៉ែន វិបុល អភិបាលរងខេត្តស្វាយរៀង មិនដឹងថា លោក ឈូក បណ្ឌិត នៅទីណាទេ ព្រោះចាប់តាំងពីកម្មករ ឈប់តវ៉ា រូបលោក មិនដែលឃើញលោក ឈូក បណ្ឌិត មកប្រជុំនៅសាលាខេត្តដូចមុនទៀតឡើយ ដោយឃើញតែអភិបាលរងក្រុងបាវិតពីររូប មកប្រជុំតែប៉ុណ្ណោះ។ លោកបន្ថែមថា៖ «ខ្ញុំភ្ញាក់ផ្អើល នៅពេលដែលខ្ញុំទទួលបានដំណឹងនេះ។ ខ្ញុំមិនដឹងថា ហេតុអ្វីបានជាគាត់ធ្វើអ៊ីចឹងលើកម្មករនៅទីនោះទេ ហើយយោងតាមច្បាប់ គេត្រូវតែដកតំណែងរបស់គាត់ ហើយបន្ទាប់មកតុលាការបន្តដំណើរការរបស់ពួកគេ»។
លោក កែវ គង់ អធិការប៉ូលិសក្រុងបាវិត បានបញ្ជាក់ថា លោក មិនបានឃើញលោកឈូក បណ្ឌិតមកធ្វើការទេ ហើយនៅពេលដែលលោកសួរ ក្រុមមន្រ្តីរបស់គាត់ ពួកគេឆ្លើយថា លោកបណ្ឌិត មកប្រជុំនៅភ្នំពេញ។ លោកបន្ថែមថា៖«ខ្ញុំមិនច្បាស់ថា គាត់នៅទីណាទេ ឥឡូវនេះ»។
លោក សំ ស៊ីណាត បងប្រុសរបស់នាង ប៊ុត ចិន្តា វ័យ ២១ ឆ្នាំ ដែលរងរបួសធ្ងន់ ដោយគ្រាប់កាំភ្លើងត្រូវធ្លុះដើមទ្រូងខាងឆ្វេង ហើយកំពុងបន្តសម្រាកព្យាបាល នៅមន្ទីរពេទ្យកាល់ម៉ែត បាននិយាយថា កាលពីថ្ងៃម្សិលមិញ មានមន្រ្តី៧នាក់ ពីក្រុងបាវិត បានមកសួរសុខទុក្ខប្អូនស្រីរបស់លោក និងបានផ្តល់ប្រាក់ ២ លានរៀល ដល់នាង ដោយបាននិយាយថា វាជាអំណោយរបស់លោកស្រីម៉ែន សំអន ឧបនាយករដ្ឋមន្រ្តី។ លោកបានថ្លែងបន្តទៀតថា៖ «ថវិកាដែលពួកគេឲ្យខ្ញុំ ខ្ញុំកំពុងសង្ស័យថា ពួកគេមិនចង់ឲ្យខ្ញុំប្តឹងពួកគេ។ ប៉ុន្តែបើទោះបីជាខ្ញុំ ទទួលយកលុយនេះក៏ដោយ ក៏ខ្ញុំ នៅតែប្តឹង ដើម្បីរកយុត្តិធម៌ឲ្យប្អូនស្រីរបស់ខ្ញុំ»។
លោកបានបញ្ជាក់ថា បីថ្ងៃទៀត លោកនឹងដាក់ពាក្យប្តឹងខ្មាន់កាំភ្លើងទៅតុលាការស្វាយរៀង។ លោកបានមានប្រសាសន៍បន្ថែមថា៖«ខ្ញុំចង់ឲ្យគេចាប់ជនដៃដល់ និងផ្តន្ទាទោសតាមច្បាប់»។
លោក ឈូក បណ្ឌិត អភិបាលក្រុងបាវិត បានបដិសេធមិនធ្វើអត្ថាធិប្បាយឡើយ នៅពេលដែលទាក់ទងបានដោយកម្រ កាលពីម្សិលមិញ ដោយលោក គ្រាន់តែឆ្លើយយ៉ាងខ្លីថា៖ «ខ្ញុំកំពុងជាប់រវល់ប្រជុំនៅវៀតណាម»។
លោក ចាន់ សុវ៉េត អ្នកស៊ើបអង្កេតជាន់ខ្ពស់អង្គការសិទ្ធិមនុស្សអាដហុក បានថ្លែងថា លោក ស្វាគមន៍ជាមួយនឹងវិធានការរបស់ក្រសួងមហាផ្ទៃ ដែលនៅទីបំផុត បានបញ្ចេញឈ្មោះជនសង្ស័យ ប៉ុន្តែលោកបារម្ភថា បញ្ហានេះ តុលាការនៅតែស៊ើបអង្កេត ហើយមិនទាន់ចាប់ខ្លួនជនសង្ស័យនៅឡើយទេ ដែលនេះ អាចប៉ះពាល់ដល់អ្នកដែលរាយការណ៍ជូនសមត្ថកិច្ចអំពីការពិត។ លោក បានបញ្ជាក់ថា៖ «ព្រះរាជអាជ្ញាខេត្តគួរតែចេញដីកាចាប់ខ្លួនជនសង្ស័យ ដើម្បីចៀសវាងការរត់គេច៕
