ក្រុមមន្ត្រីអះអាងថា កត្តាដែលធ្វើឲ្យតម្លៃអង្កររបស់កម្ពុជាមានតម្លៃខ្ពស់បណ្តាលមកពី ការកែច្នៃអង្ករនៅកម្ពុជាត្រូវចំណាយថ្លៃដើមខ្ពស់ និងកង្វះខាតបច្ចេកទេស ដែលក្នុងនោះរួមបញ្ចូលទាំងទុនផងដែរ។
លោក ម៉ី កល្យាណ ទីប្រឹក្សានៃឧត្តមក្រុមប្រឹក្សាសេដ្ឋកិច្ចកម្ពុជាបានថ្លែង ក្នុងសិក្ខាសាលាក្រៅផ្លូវការ ស្តីពីគោលការណ៍ផ្តល់ឥណទានសម្រាប់វិស័យស្រូវ-អង្កររបស់ធនាគារ អភិវឌ្ឍន៍ជនបទក្រោមមូលនិធិទ្រទ្រង់ និងអភិវឌ្ឍន៍វិស័យកសិកម្មកាលពីម្សិលមិញថា បច្ចុប្បន្នតម្លៃ អង្កររបស់កម្ពុជាកំពុងតែបង្កការលំបាកដល់ការប្រកួតប្រជែងនៅ លើទីផ្សារអន្តរជាតិយ៉ាងខ្លាំង ខណៈតម្លៃអង្ករកម្ពុជាមានតម្លៃខ្ពស់ជាងប្រទេសជិតខាង និងប្រទេសឥណ្ឌា។
លោកបញ្ជាក់ថា៖ «ស្រូវ-អង្ករស្រុកខ្មែរយើងអត់ទាន់មានការប្រណាំងប្រជែងបាន ត្រឹមត្រូវទេ បើយើងប្រកួតជាមួយគេយើងអត់ឈ្នះគេទេ ព្រោះបើយើងគិតពីតម្លៃនៅត្រឹមកំពង់ផែធៀបជាមួយថៃ និងវៀតណាមគឺយើងថ្លៃខ្ពស់ជាងគេពី៥០ទៅ៩០ដុល្លារក្នុងមួយតោន»។ លោកថ្លែងថា៖«តម្លៃខ្ពស់ជាងគេតែ៥ដុល្លារក៏គេមិនទិញពីយើងដែរ »។
ការនាំចេញអង្កររបស់កម្ពុជាកាលពីឆ្នាំ២០១១ កើនឡើងច្រើនបើធៀបនឹងឆ្នាំ២០១០។
លោកម៉ី កល្យាណ បន្តថា អង្ករកម្ពុជាភាគច្រើននាំទៅអឺរ៉ុបដោយសារតែមានការលើកលែងពន្ធ៖ «យើងនាំចេញបានទៅអឺរ៉ុបដោយសារគេអាណិតអាសូរយើងដោយគេអត់យកពន្ធ បើគេចាប់ផ្តើមយកពន្ធយើងយ៉ាប់ហើយ»។
តម្លៃអង្ករកម្ពុជាខ្ពស់ ដោយសារថ្លៃផលិតខ្ពស់ ជាពិសេសតម្លៃថាមពល។
លោក ភូ ពុយ ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជាបានថ្លែងថា អង្កររបស់កម្ពុជាមានតម្លៃខ្ពស់ ជាងប្រទេសជិតខាង ដោយសារត្រូវចំណាយថ្លៃដើមខ្ពស់ និងខ្វះបច្ចេកទេស។ លោកបន្តថា៖ «សព្វថ្ងៃអង្ករកំពុងតែមានការប្រកួតប្រជែងយ៉ាងខ្លាំងក្លាទៅលើ ផ្នែកគុណភាព បរិមាណ និងតម្លៃ»។
បច្ចុប្បន្នតម្លៃអង្ករប្រភេទលេខមួយក្នុងមួយតោនថ្លៃ៩៣០ដុល្លារ និងអង្ករធម្មតាប្រភេទបាក់១០ ភាគរយថ្លៃ៤៩០ដុល្លារ ដែលតម្លៃនេះគឺគិតត្រឹមកំពង់ផែព្រះសីហនុ។
ទោះបីជាយ៉ាងនេះក្តី លោកបានលើកឡើងថា រោងម៉ាស៊ីនកិនស្រូវស្ទើរតែទាំងអស់នៅកម្ពុជាសុទ្ធតែជួបការ កង្វះ ខាតទុន ដែលប្រការនេះបានធ្វើឲ្យការកែច្នៃអង្ករនៅមានកម្រិត និងចំណាយថ្លៃដើមអស់ច្រើន។
លោក សុន គន្ធរ ប្រធានអគ្គនាយកធនាគារអភិវឌ្ឍន៍ជនបទមានប្រសាសន៍ថា ដើម្បីកែច្នៃអង្ករឲ្យបាន១លានតោនសម្រាប់នាំចេញលុះត្រាតែ ឧស្សាហកម្មនេះមានទុនប្រមាណ៦០០លានដុល្លារអាមេរិក។
លោកបានបន្តទៀតថា កាលពីឆ្នាំ២០១០-២០១១ ធនាគារអភិវឌ្ឍន៍ជនបទបានផ្តល់កម្ចីប្រមាណ ៣៦លានដុល្លារ ដល់ទៅក្រុមហ៊ុននាំចេញអង្ករចំនួន៨ និងរោងម៉ាស៊ីនកិនស្រូវ ១១០នៅទូទាំងប្រទេស។
លោកបញ្ជាក់ថា៖ «ឥឡូវនេះយើងនៅសល់ទុនមួយចំនួនទៀតសម្រាប់ផ្តល់ឲ្យពួកគាត់ ប្រសិនបើពួកគាត់ត្រូវការ ប៉ុន្តែទាល់តែពួកគាត់អាចបំពេញតាមលក្ខខណ្ឌរបស់យើងបានដែរ»។
ថ្មីៗនេះរដ្ឋាភិបាលប្រទេសឥណ្ឌាបានពិចារណាកាត់បន្ថយ តម្លៃអង្កររបស់ខ្លួន ដើម្បីបង្កើនការនាំចេញឲ្យបានច្រើន។
លោក Tim Purcell ប្រធាន អង្គការអភិវឌ្ឍន៍កសិកម្មអន្តរជាតិ បានអះអាងថា ការបញ្ជាទិញអង្ករពីកម្ពុជា កាលពីខែមុនបានធ្លាក់ចុះ។ លោកបន្តថា៖ «បើធៀបនឹងត្រីមាសចុងក្រោយកាលពីឆ្នាំមុន ការបញ្ជាទិញនៅខែមករាដើមឆ្នាំនេះបានធ្លាក់ចុះយ៉ាងខ្លាំង»។
លោកលើកឡើងកាលពីថ្ងៃចន្ទថា ការកើនឡើងស្តុកនៅឥណ្ឌា បានធ្វើឲ្យតម្លៃអង្ករក្នុងតំបន់ធ្លាក់ចុះ។ លោក បន្តថា ការធ្លាក់ចុះនៃការនាំចេញកាលពីខែមករា ជាហេតុផលមួយបញ្ជាក់ពីបញ្ហានេះរួចទៅហើយ។ លោក Purcellអះអាងថា ការផ្គត់ផ្គង់កំពុងមានកម្រិតខ្ពស់ ខណៈនៅក្នុងតំបន់កំពុងបញ្ចប់រដូវប្រមូលផល។
លោកបន្តថា ការនាំចេញអង្កររបស់កម្ពុជាបានកើនឡើងខ្លាំងគឺ ពី១២ ៤៤០តោន នៅឆ្នាំ២០០៩ ដល់១៧០ ០០០ តោនកាលពីឆ្នាំទៅ។ លោកថ្លែងថា៖ «សមិទ្ធផលនៅក្នុងរយៈពេល១៥ឆ្នាំចុងក្រោយនេះមានការភ្ញាក់ផ្អើល យ៉ាងខ្លាំង»៕
