ខេត្តមណ្ឌលគិរី ៖ «ព្យាយាមគង់បានសម្រេច
»ជាពាក្យចាស់បុរាណបានបន្សល់ទុកដើម្បីដាស់តើនដល់ក្មេងៗជំនាន់
ក្រោយឱ្យចេះតស៊ូក្នុងឆាកជីវិតរស់នៅដោយភាពថ្លៃថ្លូរមិនថា
មុខរបរអ្វីឡើយកុំឱ្យតែលួចទ្រព្យរបស់អ្នកដទៃ
វាសុទ្ធតែមានតម្លៃទាំងអស់ ។ ជាក់ស្តែងរបរដឹកកញ្ជើ
ល្អី...ដើរលក់តាមទីប្រជុំជន
ត្រូវបងប្អូនដែលមានដើមទុនសមល្មម
ជ្រើសរើសយកមកធ្វើជាមុខរបរបន្ថែមក្រោយពីសម្រាកពីការងារធ្វើ
ស្រែចម្ការ ដើម្បីដោះស្រាយជីវភាព ។
ស្ថិតនៅក្រោមពន្លឺព្រះអាទិត្យនាពេលរសៀល
និងកំពុងជួសជុលម៉ូតូដែលខូចតាមផ្លូវលោកអ៊ំុ ឈឿន អាយុ៣៣ឆ្នាំ
មានស្រុកកំណើតនៅខេត្តស្វាយរៀង
រួមទាំងមិត្តភក្តិរួមដំណើរ៣-៤នាក់ទៀតបានរៀបរាប់ឱ្យដឹងថា
ក្រោយសម្រាកពីការងារធ្វើស្រែចម្ការ
គាត់ព្រមទាំងអ្នកជិតខាងបានបបួលគ្នា ទិញល្អី ចង្អេរ
ជើងឆ្នាំង ឈ្នាង កញ្ជើ អង្រុត កន្ត្រងប្រហុកជាដើម
ដោយចំណាយទុនប្រមាណពីមួយលានប្រាំសែនរៀល ទៅ២លានរៀល។
បន្ទាប់ពីដើរប្រមូលទិញបានច្រើនហើយ
ក៏រៀបចំចងភ្ជាប់ជាមួយម៉ូតូដឹកដើរលក់តាមខេត្តឆ្ងាយៗ
គ្រប់ច្រកល្ហកដោយចំណាយពេលចាប់ពី១០ទៅ១៥ថ្ងៃទើបលក់អស់ ។
ចំពោះការដើរលក់តាមម៉ូតូនេះ
ក៏បានបង្កជាផលវិបាកខ្លះៗសម្រាប់ពួកគាត់ផងដែរ
គឺមានពេលខ្លះម៉ូតូខូចចំកន្លែងគ្មានជាង
និងថ្ងៃខ្លះប៉ះចំមេឃភ្លៀងពុំមានទីស្នាក់នៅ
ហើយមិនអាចលក់ដូរបាន។ ទោះជាយ៉ាងណាពួកគាត់មិនបានរាថយឡើយ
បន្តដើរលក់រហូតទាល់តែអស់ ។
លោកអ៊ុំ ឈឿន បានបញ្ជាក់ថា
ចំណាយពេលជាង១០ថ្ងៃក្នុងការដើរលក់ហើយយប់ទីណាសម្រាកនៅទីនោះ
មានពេលខ្លះត្រូវសុំព្រះសង្ឃស្នាក់នៅក្នុងវត្តអារាមក៏មាន ។
គាត់បន្តថា របរនេះ
អាចរកប្រាក់ចំណេញចាប់ពី៧០មឺុនរៀលទៅ៨០ម៉ឺនរៀល
បើមិនមានឧបសគ្គតាមផ្លូវទេនោះ ៕
