តារាសម្តែង សារ៉ាយ សក្ខណា បានឲ្យដឹងក្រោយត្រឡប់ពីអាមេរិកថា រូបនាងរួមនឹងតារាសម្តែងកម្ពុជា៤-៥រូបទៀតនឹងត្រូវចេញទៅសម្តែង នៅប្រទេសថៃតាមការអញ្ជើញរបស់ផលិតកម្មមួយរបស់ថៃ។ នាងបន្តថា ក្នុងអំឡុងពេលដែលនាងកំពុងសម្តែងនៅសហរដ្ឋអាមេរិក ខាងផលិតកម្មថៃបានទាក់ទងមកម្តាយនាង រួមជាមួយនឹងតារាកម្ពុជាមួយចំនួនទៀតដើម្បីថតរឿងរួមគ្នាជាមួយ នឹងតារាសម្តែងរបស់ប្រទេសថៃ។
សារ៉ាយ សក្ខណា បាននិយាយក្រោយត្រឡប់ពីអាមេរិកថា៖«ខ្ញុំត្រូវចេញទៅប្រទេសថៃនៅ ថ្ងៃទី៩ តាមការអញ្ជើញរបស់គេ ហើយពួកយើងនឹងចាប់ផ្តើមថតរឿងហ្នឹងនៅថ្ងៃទី១១»។
ទន្ទឹមនឹងភាពសប្បាយរីករាយសម្រាប់ការគ្រោងចេញទៅសម្តែងជាមួយ តារា សម្តែងថៃ ទោះបីជាមិនបានសម្តែងជាតួឯកក្តី នៅពេលនេះគម្រោងចេញថតភាពយន្តខ្នាតធំមួយនេះ ត្រូវបានពន្យារពេល ហើយភាពច្បាស់លាស់នៃការចេញទៅនៅពេលណាក៏មិនទាន់មានការបញ្ជាក់ យ៉ាងណានោះដែរ។
ខណៈថ្ងៃចេញដំណើរមកដល់ សារ៉ាយ សក្ខណា និយាយថា៖«នៅពេលនេះ ការចេញទៅថតរឿងហ្នឹងត្រូវបានគេពន្យារពេលហើយ ហើយថ្ងៃនេះគេនឹងប្រាប់យើងវិញថា ថ្ងៃណាយើងត្រូវទៅ»។
ពាក់ព័ន្ធនឹងការចេញថតរឿងរួមគ្នាជាលើកដំបូងរវាងតារាសម្តែង កម្ពុជា និងថៃនេះ ថ្វីដ្បិតតែមានការអញ្ជើញយ៉ាងត្រឹមត្រូវ និងមានអ្នកសិល្បៈកម្ពុជាចូលរួមជាច្រើននាក់ទៀតនោះ តែនៅពេលសួរថា តើរឿងនោះជារឿងអ្វី ជារឿងប្រភេទណានោះ មិនទាន់មានតារាកម្ពុជាណាម្នាក់អាចបញ្ជាក់បាននៅឡើយ។
តារាសម្តែងច្រៀង អេនឌី ដែលទទួលបានការអញ្ជើញសម្រាប់ការថតភាពយន្តម្នាក់ដែរនោះ បានឲ្យដឹងថា ចំពោះសាច់រឿងមានដំណើរដើមទង និងប្រភេទរឿងយ៉ាងណានោះ លោកមិនបានដឹងច្បាស់នៅឡើយ គ្រាន់តែដឹងថា រឿងនោះអាចជាប្រភេទរឿងសម័យទំនើបបច្ចុប្បន្ន។
អេនឌី និយាយថា៖«តាមពិតទៅរឿងហ្នឹង ខ្ញុំអត់ទាន់បានទទួលព័ត៌មានច្បាស់ដែរ តែហ្នឹងជារឿងដុំ ព្រោះពួកយើងត្រូវថតរយៈពេលតែ១សប្តាហ៍ប៉ុណ្ណោះ»។
តាមគម្រោងតារាសម្តែងច្រៀងល្បីឈ្មោះកម្ពុជាទាំង៥រូបនឹងត្រូវ ចេញ ទៅប្រទេសថៃនៅថ្ងៃនេះ ប៉ុន្តែផែនការថតរឿងក្រៅប្រទេសដ៏រីករាយមួយនេះត្រូវបានពន្យារ ពេលវិញ ដែលបណ្តាលឲ្យតារាទាំងអស់ស្ទើរតែខកជើងគ្រប់ៗគ្នា។
ទាក់ទិននឹងការពន្យារពេលនាំឲ្យរំខានដល់សកម្មភាពក្នុងស្រុកនេះ តារាចម្រៀង អេនឌី បានឲ្យដឹងថា ការចេញថតនៅប្រទេសថៃនេះ នឹងត្រូវធ្វើតាមការអញ្ជើញដដែល គ្រាន់តែនៅពេលនេះខាងភាគីប្រទេសថៃសុំលើកថ្ងៃដើម្បីសម្រួលសាច់ រឿង និងតួសម្តែងបន្តិច។
តារារមែងមានឱកាសបានថតសិចស៊ីជាមួយតារាស្រីស្អាតៗ អេនឌី និយាយថា៖«សម្រាប់ការចេញថតនៅថៃហ្នឹង ខាងថៃគេសុំពន្យារពេលដើម្បីរៀបចំសម្រួលសាច់រឿង និងតួសម្តែងខ្លះ គេចង់ដាក់តួឯកប្រុសខ្មែរជាមួយនឹងតួឯកស្រីថៃ ព្រោះខ្មែរយើងទៅហ្នឹងក៏ជាតួល្បីៗដែរ»។
សម្រាប់ពេលវេលាចេញថតជាថ្មីនៅពេលណានោះ លោកអេនឌីបានឲ្យដឹងថា ខាងភាគីថៃគេនឹងទូរស័ព្ទប្រាប់។
សារ៉ាយ សក្ខណា បានបញ្ជាក់ថា៖«នៅថ្ងៃនេះគេនឹង Call ប្រាប់»៕
