សិស្សានុសិស្សមកពីវិទ្យាល័យចំនួន៨
ក្នុងរាជធានីភ្នំពេញ និងចំនួន៤ វិទ្យាល័យផ្សេងទៀត មកពីខេត្ត
ពោធិ៍សាត់ បាត់ដំបង កំពង់ចាម និង ព្រៃវែង ប្រមាណជាង១៧០០នាក់
ត្រូវបានសមាគមអតីតនិស្សិតអាហារូបករណ៍ហ៊្វូលប្រាយ និង
និស្សិតមកពីអាមេរិក អញ្ជើញឲ្យមកចូលរួម សិក្ខាសាលាស្ដីពី
“ពិព័រណ៍មុខជំនាញនិងការងារ” នៅវិទ្យាស្ថានជាតិអប់រំ កាលពីម្សិលមិញ
។
សិក្ខាសាលាមួយនេះ ធ្វើឡើងក្នុងគោលបំណង៣ធំ គឺ ទី១ផ្ដល់ជូនដល់សិស្សានុសិស្សនូវព័ត៌មានគ្រប់គ្រាន់ ក្នុងការជ្រើសរើស ជំនាញសិក្សាទៅតាមសាកលវិទ្យាល័យនានា។ ទី២ ជួយបំភ្លឺផ្លូវនៅលើទីផ្សារការងារ ដូចជាតើការងារអ្វីខ្លះ ដែលមានឱកាសច្រើនសម្រាប់សិស្សានុសិស្សនៅថ្ងៃអនាគត។ ឯទី៣ អាចឲ្យសិស្សានុសិស្សត្រៀមខ្លួនរួចជាស្រេច និងដើម្បីអភិវឌ្ឍន៍ជំនាញជាក់លាក់មួយដែលត្រូវនិងចំណង់ចំណូលចិត្ត របស់ខ្លួន ហើយត្រូវនិងតម្រូវការរបស់និយោជកនៅតាមស្ថាប័ន និង ក្រុមហ៊ុននានា។
វាគ្មិនដែលចូលរួមនៅក្នុងសិក្ខាសាលានេះ មានទាំងជាតិ និងអន្តរជាតិ ដែលសុទ្ធតែជាអតីតនិស្សិតធ្លាប់ទទួលបានអាហារូបករណ៍ពីសហរដ្ឋ អាមេរិក ហើយបច្ចុប្បន្ន គឺថ្នាក់ដឹងនាំនៅក្នុងក្រុមហ៊ុន សាកលវិទ្យាល័យ អង្គការក្រៅរដ្ឋាភិបាល ក៏ដូចជាស្ថាប័នផ្សេងៗ។ សិស្សានុសិស្សដែលបានចោទសួរសំណួរជាច្រើនទៅកាន់វាគ្មិន ភាគច្រើន គឺជាក្ដីបារម្ភ និងការចង់ដឹងពីចំណុច វិជ្ជមាននិងចំណុច អវិជ្ជមាន នៃជ្រើសរើសមុខជំនាញរបស់ពួកគេ សម្រាប់សិក្សាថ្នាក់មហាវិទ្យាល័យនៅថ្ងៃអនាគត។
បច្ចុប្បន្ននៅក្នុងប្រទេសកម្ពុជា នៅមិនទាន់មានរបាយការណាមួយច្បាស់លាស់ ដែលអាចបញ្ជាក់បានថា និស្សិតគួរតែរៀនមុខជំនាញណាមួយ ត្រូវនឹងទីផ្សាឥតខ្ចោះនៅឡើយទេ ប៉ុន្តែនិស្សិតគួរតែ ចេះថ្លឹងថ្លែងដោយខ្លួនឯងពីតម្រូវការទីផ្សារបច្ចុប្បន្ន និង ចំណង់ចំណូលចិត្តរបស់ខ្លួន នេះគឺចម្លើយភាគច្រើនដែលវាគ្មិន បានផ្ដល់ដល់សិស្សានុសិស្សដែលបានចូលរួម។ វាគ្មិនភាគច្រើនបានលើកឡើងថា និស្សិតកម្ពុជាភាគច្រើនតែងមានគំនិតចង់រៀនធ្វើជាអ្នកគ្រប់គ្រងគេ មិនសូវមានអ្នករៀនឲ្យគេគ្រប់គ្រងនោះទេ ហេតុនេះហើយដែលជាហេតុធ្វើឲ្យនិស្សិតដែលរៀនចប់ទៅមិនសូវមាន ការងារធ្វើ ដោយសារតែចំនួនអ្នករៀនជំនាញនេះច្រើនពេក។
ជាមួយគ្នានេះ វាគ្មិន ក៏បានលើកឡើង ពីបទពិសោធន៍នៃការសិក្សា នៅប្រទេសអភិវឌ្ឍន៍មួយចំនួន ក៏ដូចជាលើកពីជំនាញអាទិភាពដែលប្រទេសកម្ពុជាកំពុងតែត្រូវការជា ចាំបាច់ ដូចជា កសិកម្ម ទេសចរណ៍ សំណង់ស៊ីវិល អគ្គិសនី ព័ត៌មានវិទ្យា ជាដើម ។
ឆ្នាំសិក្សា២០១០-២០១១ ចំនួនសិស្សទូទាំងប្រទេស ពីថ្នាក់មត្តេយ្យ រហូតដល់ មធ្យមសិក្សាទុតិយភូមិមានចំនួន ៣.៣២០.៧២៦នាក់ ។ ចំណែកនៅឧត្ដមសិក្សាវិញ ចំនួននិស្សិតពីថ្នាក់បរិញ្ញាបត្ររង រហូតដល់ ថ្នាក់បណ្ឌិតមានចំនួន ២០៧.៨៥១នាក់ ។ ចំពោះគ្រឹះស្ថានឧត្ដមសិក្សាវិញមានចំនួន៩១ ក្នុងនោះ៣៤ គឺជាគ្រឹះស្ថានរបស់រដ្ឋ និង ៥៧ គឺជាគ្រឹះស្ថានរបស់ឯកជន ។ ចាប់តាំងពីឆ្នាំ១៩៩៤ រដ្ឋាភិបាលអាមេរិក បានផ្ដល់អាហារូបករណ៍ហ៊្វូលប្រាយ ក៏ដូចជាកម្មវិធីសិក្សាផ្សេងទៀត មានចំនួន ១៣៨ នាក់ និង មានចំនួនជិត១០០នាក់ផ្សេងទៀត សម្រាប់កម្មវិធីផ្លាស់ប្ដូរផ្សេងៗ៕
