ស្ត្រីជាពលការិនីបម្រើតាមផ្ទះនៅប្រទេសម៉ាឡេស៊ីម្នាក់
បានចាប់ផ្ដើមធ្វើសកម្មភាពអុកឡុកពេញផ្ទះ និងលែងស្គាល់សាច់ញាតិ
បន្ទាប់ពីនាងត្រឡប់មកដល់ផ្ទះបានប្រមាណ ៣ថ្ងៃ។
បងប្រុស និងប្អូនប្រុស កំពុងជួយចាប់
ពលការិនី ផាត គន្ធា ដើម្បីឲ្យគ្រូពេទ្យចាក់ថ្នាំ
នៅក្នុងបន្ទប់សម្រាកព្យាបាលសម្រាប់អ្នកជំងឺវិកលចរិតធ្ងន់ស្នាក់
នៅព្យាបាល នៅមន្ទីរពេទ្យខេត្តកំពង់ឆ្នាំង។
បុរសវ័យ ៥៧ឆ្នាំ ឈ្មោះ សុខ សាត មានទីលំនៅនៅភូមិទួលសំរោង ឃុំក្រាំងស្គារ ស្រុកទឹកផុស ខេត្តកំពង់ឆ្នាំង គាត់បានឲ្យដឹងនៅព្រឹកថ្ងៃ២៥ ឧសភា ឆ្នាំ២០១២ ថា ក្មួយស្រីគាត់ ឈ្មោះ ផាត គន្ធា អាយុ ២៣ឆ្នាំ ទើបតែវិលត្រឡប់មកពីធ្វើការនៅប្រទេសម៉ាឡេស៊ីវិញ អុកឡុកគេឯងពេញផ្ទះ មិនអាចដេកពួន ឬធ្វើអ្វីកើតទេ។ ជាពិសេស គឺនាងលែងស្គាល់ឪពុកម្ដាយខ្លួនឯងទៀតផង។
លោក សុខ សាត៖ «វានិយាយ ពាសវាល ពាសកាល ស្ដាប់គ្នាលែងបាន។ វាមកដល់ថ្ងៃ ២៣ ស្អែកឡើងថ្ងៃ ២៤ ចាប់ពីពេលព្រលប់ទៅ វាអុកឡុក វាឲ្យគេនាំទៅនេះ នាំទៅនោះ គ្មានដឹងគោលដៅ។ វានិយាយ តែពិស តែពាស រកជាការអីមិនបាន ហើយវាលែងស្គាល់ខ្លួនវាជានរណាទៀតផង...»។
ប្រភពពីគ្រួសារពលការិនី ផាត គន្ធា បានឲ្យដឹងថា ពលការិនីរូបនេះចេញទៅធ្វើការនៅប្រទេសម៉ាឡេស៊ី កាលពីថ្ងៃទី១៨ ខែឧសភា ឆ្នាំ២០១០ តាមរយៈក្រុមហ៊ុន អ៊ិន.ស៊ី.អ៊ិន (NCN) ដែលមានទីស្នាក់ការនៅខណ្ឌឬស្សីកែវ រាជធានីភ្នំពេញ ហើយនាងបានបញ្ចប់កិច្ចសន្យាការងារតាមពេលកំណត់ និងបានវិលមកដល់លំនៅដ្ឋានវិញ នៅថ្ងៃទី២៣ ខែឧសភា ឆ្នាំ២០១២។ ថ្ងៃមកដល់ដំបូង នាងមិនមានអាការៈអ្វីប្លែកទេ តែលុះរំលងបានមួយថ្ងៃ ស្រាប់តែនាងកើតមានបញ្ហាសរសៃប្រសាទយ៉ាងដូច្នេះតែម្ដង។
គ្រូពេទ្យផ្នែកជំងឺសរសៃប្រសាទនៃមន្ទីរពេទ្យខេត្តកំពង់ឆ្នាំង វេជ្ជបណ្ឌិត គង់ ចាន់ធា ដែលបានពិនិត្យ និងព្យាបាលឲ្យពលការិនី ផាត គន្ធា មានប្រសាសន៍ថា លោកមិនទាន់អាចសន្និដ្ឋានបានថា ជំងឺរបស់ពលការិនីរូបនេះ បណ្ដាលមកពីមូលហេតុអ្វីនោះទេ លោកគ្រាន់តែបញ្ជាក់ថា មានកត្តាមួយចំនួន ដែលបណ្ដាលឲ្យកើតមានជំងឺនេះ។
វេជ្ជបណ្ឌិត គង់ ចាន់ធា៖ «ជាដំបូងយើងសន្និដ្ឋានថា ជំងឺវិកលចរិតអញ្ចឹង ហើយជងឺនេះវាបណ្ដាលមកពីមូលហេតុច្រើនយ៉ាង ដូចជាការប្រើគ្រឿងញៀន ជួនកាលមកពីជំងឺបាក់ស្បាត ជួនកាលមកពីវាជួបនឹងហេតុការអីមួយធ្វើឲ្យភ័យរន្ធត់ខ្លាំង ឧទាហរណ៍វាទទួលរងការចាប់រំលោភជាដើម...ពេលនោះវាភ័យពេក ក៏អាចចេញរោគសញ្ញានេះដែរ។ខ្ញុំមិនទាន់ហ៊ានសន្និដ្ឋានថា ក្មេងនេះកើតជំងឺនេះបណ្ដាលមកពីអ្វីទេ...»។
លោក សំ ច័ន្ទគា ជាមន្ត្រីសម្របសម្រួលសមាគម អាដហុក (ADHOC) ការពារសិទ្ធិមនុស្សប្រចាំខេត្តកំពង់ឆ្នាំង លោកមានប្រសាសន៍ថា លោកពុំទាន់បានធ្វើការស៊ើបអង្កេតករណីនេះនៅឡើយ។ យ៉ាងនេះក្ដីលោកថា បញ្ហានេះ គឺជាការទទួលខុសត្រូវរួមរវាងក្រុមហ៊ុន ជាមួយក្រសួងការងារក្នុងការជួយព្យាបាលពលការិនីរូបនេះ។
លោក សំ ច័ន្ទគា៖ «សំណូមពរឲ្យនាយកដ្ឋានទទួលបន្ទុកបញ្ហាពលករ នៃក្រសួងការងារធ្វើការស៊ើបអង្កេតពីបញ្ហានេះ ដើម្បីរកហេតុផលច្បាស់លាស់ និងរកអ្នកទទួលខុសត្រូវពីបញ្ហានេះ...»។
បច្ចុប្បន្ន ករណីស្រដៀងនឹងពលការិនី ផាត គន្ធា បានកើតមានយ៉ាងច្រើន បន្ទាប់ពីពលការិនីខ្មែរមួយចំនួនបានវិលត្រឡប់មកដល់លំនៅដ្ឋាន វិញ តែគេពុំឃើញមានស្ថាប័នពាក់ព័ន្ធណាមួយចេញមុខជួយទទួលខុសត្រូវ ចំពោះបញ្ហានេះឡើយ៕
