ភ្នំពេញ:
យុវនិស្សិតនៃសាកលវិទ្យាល័យជាតិគ្រប់គ្រង
រៀនផ្នែកច្បាប់ឆ្នាំទី១ បានសម្រេចចិត្តលោតទឹកធ្វើអត្តឃាត
កាលពីវេលាម៉ោង ៨ និង ៤០នាទី ព្រឹកថ្ងៃទី១០ ខែមិថុនា ឆ្នាំ២០១២
នៅចំណុចស្ពានជ្រោយចង្វារ
ហើយត្រូវបានក្រុមគ្រួសារជួលឲ្យអ្នកនេសាទរាវរកឃើញសព នៅវេលាម៉ោង ៩
និង ៣០នាទី ព្រឹកថ្ងៃដដែល។លោក ជ័យ រ៉ាឌី អាយុ ២៣ឆ្នាំ ត្រូវជាបងប្អូនជីដូនមួយរបស់យុវជនរងគ្រោះ បានឲ្យដឹងថា យុវជនដែលលោតទឹកនេះឈ្មោះ សុង ច័ន្ទគីរី អាយុជាង ២០ឆ្នាំ ជានិស្សិតផ្នែកច្បាប់ ឆ្នាំទី១ នៅសាកលវិទ្យាល័យជាតិគ្រប់គ្រង ស្នាក់នៅផ្ទះ១០០ល្វែង ភូមិទួលគោក សង្កាត់ទួលសង្កែ ខណ្ឌឫស្សីកែវ។
លោកបន្តថា មុនកើតហេតុ រូបលោកបានឃើញយុវជនខាងលើ ជិះម៉ូតូម៉ាកស្កូពីពណ៌សលាយឈាមជ្រូក ពាក់ស្លាក ភ្នំពេញ 1AT-9244 ចេញពីផ្ទះយ៉ាងលឿន រូបគេក៏ជិះម៉ូតូតាមរហូតដល់លើស្ពានជ្រោយចង្វារ។ យុវជនខាងលើក៏បានចុះពីលើម៉ូតូបម្រុងនឹងលោត ក៏ត្រូវបងប្អូនបីនាក់ ក្នុងនោះមានស្រីម្នាក់ ជួយចាប់ តែចាប់មិនឈ្នះ ក៏បណ្តាលឲ្យយុវជននោះលោតទឹកសម្លាប់ខ្លួនបានសម្រេចតែម្តង។
សពជនរងគ្រោះត្រូវបានក្រុមគ្រួសារយកទៅតម្កល់ធ្វើបុណ្យ នៅវត្តទួលអស់លោក។ ចំពោះមូលហេតុដែលនាំឲ្យយុវជនរូបនោះ សម្រេចចិត្តលោតទឹកសម្លាប់ខ្លួន មិនទាន់មានអ្នកដឹងនៅឡើយទេ៕
