លោក
អូន
ព័ន្ធមុនីរ័ត្នចូលរួមក្នុងសិក្ខាសាលាស្តីពីការលើកម្ពស់ការយល់ដឹងពីការ
ធានារ៉ាប់រងអាយុជីវិត។
ក្នុងសិក្ខាសាលានោះមន្ត្រីអះអាងពីផែនការសហការជាមួយធនាគារ។ រូបថត ហុង
មិនា
កម្ពុជា ឡៃហ្វ ជាក្រុមហ៊ុនដំបូងបំផុតដែលបានទទួលអាជ្ញាប័ណ្ណពីក្រសួង សេដ្ឋកិច្ច និងហិរញ្ញវត្ថុ ដើម្បីបើកដំណើរការជាផ្លូវការ កាលពីខែឧសភា ឆ្នាំនេះ។ ក្រុមហ៊ុននេះជាការបណ្តាក់ទុនរួមគ្នារវាងក្រសួងសេដ្ឋកិច្ច និងហិរញ្ញវត្ថុ ជាមួយក្រុមហ៊ុនឯកជនចំនួន៤ ដែលក្នុងនោះរដ្ឋាភិបាលមានភាគហ៊ុន៥១ភាគរយ។
លោក អ៊ិន មាត្រា អគ្គនាយកក្រុមហ៊ុននេះ បានឲ្យដឹងនៅខាងក្រៅសិក្ខាសាលាស្តីពីការធានារ៉ាប់រងជីវិតនៅ ភ្នំពេញថា៖ «បច្ចុប្បន្ន យើងកំពុងចរចាជាមួយធនាគារពាណិជ្ជកម្ម២០ ដើម្បីចុះហត្ថលេខាលើកិច្ចព្រមព្រៀងជាមួយយើង ពីការផ្តល់សេវាធានារ៉ាប់រងដល់អតិថិជនដែលបានខ្ចីប្រាក់ពី ធនាគារទាំងនោះ»។
លោកបានបន្ថែមថា៖ «យើងកំពុងធ្វើការងារនេះ ដើម្បីផ្លាស់ប្តូរគោលនយោបាយជាមួយពួកគេ។ យើងសង្ឃឹមថានឹងសម្រេចបានកិច្ចព្រមព្រៀងខ្លះៗជាមួយធនាគារ មួយចំនួន ដោយសារយើងនិងកំពុងធ្វើការជាមួយពួកគេ»។
លោកស្រី សូផន ណារី អគ្គនាយករងធនាគារអេស៊ីលីដា បានឲ្យដឹងថា ធនាគារនេះបានផ្តល់កម្ចីទិញផ្ទះរយៈពេលប្រហែល៥ឆ្នាំមកហើយ។ លោកស្រីបានបញ្ជាក់ថា ក្រុមហ៊ុនធានារ៉ាប់រងអាយុជីវិត បានផ្លាស់ប្តូរទស្សនកិច្ចជាមួយក្រុមហ៊ុនយើង។ លោកស្រីបានលើកឡើងថា៖ «កម្ចីរបស់យើង នៅតែតិចតួចដដែល ហើយយើងតែងតែទទួលបានវត្ថុបញ្ចាំពីអតិថិជន ប្រសិនបើពួកគេខ្ចីពីយើង ដើម្បីយកទៅទិញផ្ទះ។ ប៉ុន្តែយើងមិនតម្រូវឲ្យពួកគេមានសេវាធានារ៉ាប់រងលើផ្ទះនោះ ឡើយ។ ពេលនេះយើងមិនមានទំនាក់ទំនងណាមួយជាមួយករណីទាំងនោះទេ ព្រោះវាអាចបន្ថែមថ្លៃដល់អ្នកខ្ចី»។
ទោះបីជាយ៉ាងនេះក្តី លោកស្រី បានឲ្យដឹងថាធនាគារទាំងនោះ នឹងពិចារណាបន្ថែមទៀតលើសំណើក្នុងការសហការជាមួយក្រុមហ៊ុនធានា រ៉ាប់រង។ លោកស្រីបន្ថែមថា ធនាគារបានផ្តល់កម្ចីទិញផ្ទះប្រហែល៨៥លានដុល្លារមកហើយ។
លោក អ៊ិន មាត្រា ឲ្យដឹងថា សម្រាប់បុគ្គលដែលបានទទួលកម្ចីទិញផ្ទះពីធនាគារសម្រាប់រយៈពេល យូរអាចទិញសេវាធានារ៉ាប់រង ដើម្បីឲ្យពួកគេមានផាសុកភាពជាមួយផ្ទះរបស់ពួកគេ ទោះបីជាពួកគេមានបញ្ហានឹងប្រាក់កម្ចីក៏ដោយ។
លោកបន្ថែមទៀត ថា៖ «កម្ចីទិញផ្ទះដែលមានរយៈពេលយូរ មានហានិភ័យច្រើន ដូច្នេះអតិថិ-ជន ត្រូវពិចារណាថាតើពួកគេគួរទិញធានារ៉ាប់រង ឬអត់ ដោយសារ វាអាចរួមបញ្ចូលទាំងកម្ចីមិនទាន់សងពេលពួកគេមានបញ្ហា»។
លោក អ៊ិន មាត្រា លើកឡើងថា៖ «យើងនឹងដោះស្រាយការទូទាត់កម្ចីមិនទាន់សង ដូច្នេះអត្ថប្រយោជន៍របស់ពួកគេ គឺថា ផ្ទះរបស់ពួកគេនឹងមិនត្រូវបានរឹបអូសដោយធនាគារឡើយ នៅពេលធនាគារបានទទួលការទូទាត់ពីក្រុមហ៊ុនធានារ៉ាប់រងជីវិត និងបានទទួលប្រយោជន៍ពីអតិថិជនរបស់ខ្លួន»។
លោកបានបញ្ជាក់ថា អតិថិជនម្នាក់ដែលបានទិញសេវាធានារ៉ាប់រងសម្រាប់កម្ចីទិញផ្ទះ ពួកគេត្រូវបង់ប្រាក់ធានារ៉ាប់រងដែលផ្សេងពីការធានារ៉ាប់រងមាន ពេលកំណត់ និងការធានារ៉ាប់រងពេញមួយជីវិត ដែលត្រូវបានបង់ប្រចាំឆ្នាំ។ ពួកគេមិនខ្វល់ច្រើនអំពីហានិភ័យណាមួយឡើយ ដូច្នេះពួកគេអាចស្ងប់អារម្មណ៍ក្នុងការធ្វើពាណិជ្ជកម្មនិង ប្រើប្រាស់ផ្ទះនោះ។
ទិន្នន័យរបស់សមាគមធានារ៉ាប់រងទូទៅនៅ កម្ពុជា (GIAC) ដែលបានចេញផ្សាយ កាលពីថ្ងៃព្រហស្បតិ៍ បានបង្ហាញថា ប្រាក់ចំណូលធានារ៉ាប់រងរបស់ក្រុមហ៊ុនធានារ៉ាប់រងចំនួន៦ នៅកម្ពុជាក្នុងឆមាសទី១ ឆ្នាំនេះ មានចំនួន១៨,៩លានដុល្លារអាមេរិក ដោយបានកើនឡើង ៤០ភាគរយ បើធៀបនឹងរយៈពេលដូចគ្នា កាលពីឆ្នាំមុន ដែលមានតែ១៣,៥លានដុល្លារប៉ុណ្ណោះ។
ទិន្នន័យនោះ បានបង្ហាញទៀតថា ការធានារ៉ាប់រងអគ្គិភ័យ នៅតែខ្ពស់ដែលធ្វើឲ្យឧស្សាហកម្មនេះ រកប្រាក់ចំណូលបានប្រហែល២៩ភាគរយនៃប្រាក់ចំណូលសរុបនៅលើទី ផ្សារ ប៉ុន្តែវិស័យពីរផ្សេងទៀត ដែលកើនឡើងខាងខ្លាំងនោះ គឺការធានារ៉ាប់រងលើសុខភាព ដែលស្មើនឹង១៦ភាគរយ និងម៉ូតូ២០ភាគរយនៃប្រាក់ធានារ៉ាប់រងសរុបនៅលើទីផ្សារ។
លោក អឿន ចាន់វិសុទ្ធឲ្យដឹងថាឧស្សាហកម្មធានារ៉ាប់រងកំពុងបោះជំហានទៅមុខ ហើយថាក្រុមហ៊ុនធានារ៉ាប់រងជីវិត មិនប៉ះពាល់ដល់ទីផ្សារសេវាធានារ៉ាប់រងទូទៅទេ៕ CS
