ស្ថិត ក្នុងវ័យ ២៨ អ្នកនាង លក្ខិណា គឺជាអ្នករចនាម៉ូតឡាន ហើយក៏ជាកូនស្រីរបស់ស្ថាបនិកឡានម៉ាកអង្គរល្បីម្នាក់ និងដំបូងបំផុតក្នុងប្រទសកម្ពុជា ដែលប្រជាជនក្នុងស្រុក ក៏ដូចជាក្រៅស្រុកស្គាល់ថាជា លោក ញ្ញាណ ផល្លឹក។
យុវនារីឆ្នើម របស់យើង បានបញ្ចប់បរិញ្ញាបត្រជំនាញរចនាផ្នែកខាងក្នុង (ដេគ័រ) នៅសាកលវិទ្យាល័យភូមិន្ទវិចិត្រសិល្បៈ អស់រយៈពេល៤ឆ្នាំមកហើយ។ ទាក់ទិននឹងបទពិសោធនៃការរចនាម៉ូដឡាននេះ អ្នកនាងនិយាយថា គាត់បានចាប់ផ្តើមរចនាម៉ូដឡានទីមួយរបស់គាត់នៅក្នុងឆ្នាំ២០០២ ដែលនៅពេលនោះគាត់គឺជាសិស្សវិទ្យាល័យនៅឡើយ។ ក្រៅពីការងារនេះ អ្នកនាងក៏ជាអ្នករចនាផ្ទាំងផ្សព្វផ្សាយពាណិជ្ជកម្មផងដែរ។
គំនូរ ដៃដែលធ្លាប់តែស្ថិតនៅលើសន្លឹកក្រដាស រហូតបានក្លាយទៅជារូបរាងឡានពិតប្រាកដ និងការចង់ជួយចែករំលែកការងារឪពុករបស់គាត់ បានក្លាយទៅជាកត្តាជំរុញឲ្យអ្នកនាង លក្ខិណាបន្តការរចនានេះបន្ថែមទៀត ដែលមកទល់ពេលនេះ អ្នកនាងបានរចនាម៉ូដរថយន្ដម៉ាកអង្គរបានចំនួន៧គ្រឿងហើយ។
យុវនារី ដុងខាងរចនាម៉ូដរូបនេះ បានបញ្ជាក់ថា៖ «ការគូរម៉ូដឡាននោះគឺគ្រាន់តែជាលក្ខណៈគ្រួសារតែប៉ុណ្ណោះ ប៉ុន្តែខ្ញុំមិនបាននឹកស្មានថា វាត្រូវបានគេទទួលស្គាល់បែបនេះទេ។ ដូច្នេះវាមិនមែនជារឿងអត់ប្រយោជន៍ឡើយ»។
អ្នកនាងបានបង្ហើប ប្រាប់ថា ការរចនាឡានលើដំបូងគឺធ្វើឡើងដោយមានការពិភាក្សាយ៉ាងច្រើនជា មួយឪពុកមុននឹងសម្រេចចិត្តចេញម៉ូដនីមួយៗ ពីព្រោះអ្នកនាងត្រូវគិតគូរទៅដល់សម្ភារក្នុងស្រុកណាដែលអាច យកមកប្រើបាន និងសមត្ថភាពដែលឪពុកអាចធ្វើទៅបានទាក់ទងនឹងបច្ចេកវិទ្យាជា ដើម។
មក ដល់ឆ្នាំ២០០៤ អ្នកនាង លក្ខិណាចាប់ផ្តើមរចនាម៉ូដឡានមួយទៀត ដែលលើកនេះអ្នកនាងប្រើបច្ចេកវិទ្យាកុំព្យូទ័រក្នុងការរចនាម៉ូដ ដែលកាលពីមុនវាត្រូវបានធ្វើឡើងដោយដៃសុទ្ធសាធ។ អ្នកនាង លក្ខិណា បានអះអាងថា៖ «ខ្ញុំចំណាយពេលតែកន្លះថ្ងៃប៉ុណ្ណោះ ខ្ញុំអាចគូរម៉ូដឡានមួយបាន ប៉ុន្តែក៏ត្រូវការពេលវេលាបន្ថែមដើម្បីកែកុនសាចុះសាឡើងរហូត ដល់រយៈពេល១ខែឬនៅពេលដែលឡាននោះត្រូវបានផលិតរួចរាល់»។
ចំពោះ បំណងប្រាថ្នាទៅថ្ងៃអនាគតវិញ អ្នកនាង លក្ខិណា មានគោលបំណងចង់បើកក្រុមហ៊ុនផ្ទាល់ខ្លួនមួយ ដែលទាក់ទងនឹងការរចនាម៉ូដតែម្ដង។
យ៉ាងណាមិញ រថយន្ដម៉ាកអង្គរនេះគឺជាប្រភេទរថយន្ដមីនី ដែលមានលក្ខណៈពិសេស អាចប្រើដោយអារម្មណ៍ ហើយជារថយន្ដផលិតដោយដៃផ្ទាល់។ អ្នកនាង ប្រាប់ឲ្យដឹងទៀតថា ឡានដែលផលិតចុងក្រោយនេះ អាចដំណើរការបានដោយប្រើអាគុយ ហើយវាផ្តោតសំខាន់មិនត្រឹមតែលើភាពស្អាតទាន់សម័យនោះទេ ប៉ុន្ដែបច្ចេកវិទ្យាផងដែរ គឺវាមិនចាញ់ឡានបរទេសទេ។
អ្នកនាង បានលើកឡើងថា បច្ចុប្បន្ននេះ លោកឪពុក និង រូបអ្នកនាងផ្ទាល់ កំពុងតែសហការជាមួយក្រុមហ៊ុនហេងអភិវឌ្ឍន៍ក្នុងការផលិតរថយន្ដ សម្រាប់តម្រូវការទាំងក្នុងស្រុក និងក្រៅស្រុក។
អ្នកនាង លក្ខិណា រំពឹងទុកថា៖ «វានឹងអាចជួយកាត់បន្ថយលើការចំណាយថ្លៃសាំងរបស់ប្រជាពលរដ្ឋ ខ្មែរមួយចំនួន ដោយគ្រាន់តែជួយគាំទ្រផលិតផលក្នុងស្រុក នោះសេដ្ឋកិច្ចយើងក៏មានភាពរីកចម្រើនលឿនផងដែរ»៕
