ចំណងស្នេហ៍របស់ អ្នកចម្រៀង និងអ្នកនិពន្ធទំនុកច្រៀង ជ្រកក្រោមផលិតកម្មតែមួយនេះបានដើរដល់ផ្លូវបំបែក ហើយក៏ចែកផ្លូវគ្នាដើររៀងៗខ្លួនមិនអាចត្រឡប់ក្រោយបានកាលពី អំឡុង ខែសីហា២០១១ បន្ទាប់ពីពួកគេទាំងពីរនាក់បានសាងស្នេហ៍ផ្អែមត្រជាក់នឹងគ្នា មិនតិចជាង៨ឆ្នាំ ហើយថែមទាំងបានភ្ជាប់ពាក្យនឹងគ្នានៅសល់តែថ្ងៃដឹកដៃគ្នាចូល រោងការ។ ទស្សនិកជនលើកឡើងថា គ្មានហេតុផលណានៅសុខៗ និសា ប្រកាសផ្តាច់ស្នេហ៍ពីម្ចាស់បេះដូងកម្សត់ ក្រៅពីមានអ្នកទី៣ចូលមកជ្រែកនោះ។
ស្របគ្នានឹងក្តីមន្ទិល នេះ ប្រភពព័ត៌មានពីស្ដ្រីម្នាក់ដែលនិយមដើរតាមកូនទៅចូលរួមសិល្បៈ នោះបានបង្ហើបឲ្យដឹងថា សុគន្ធ និសា ក្រោយពីផ្តាច់ចំណងស្នេហ៍ ពីកវីកម្សត់ សុខ ជំនោរ នាងមានភាពហ៊ឺហាយ៉ាងខ្លាំង មានទាំងរថយន្ដទំនើប និងមានអ្នកហែហមឆ្វេងស្ដាំទៀតផង។ ស្រ្តីដដែលនោះក៏បានឲ្យដឹងបន្តទៀតថា ពេលនេះនាងលែងមានអ្វី ដែលនាំឲ្យនាងបារម្ភទៀតដែរ ព្រោះ នាងមានមន្ដ្រីជាន់ខ្ពស់ ពាក់ផ្កាយម្នាក់នៅក្នុងក្រសួងមហាផ្ទៃ តាមយកចិត្ដទុកដាក់ថ្នាក់ថ្នមគ្រប់ពេលវេលា សូម្បីតែពេលនាងថតចម្រៀងខារ៉ាអូខេ ក៏មន្ដ្រីរូបនោះ បើករថយន្ដដឹកនាង ដោយផ្ទាល់ទៀតផង ។
ស្របនឹងព័ត៌មាន ដែលស្រ្តីជាម្តាយសិល្បៈបង្ហើបឲ្យដឹងថា សុគន្ធ និសា មានទំនាក់ទំនងជាមួយនឹងមន្ដ្រីជាន់ខ្ពស់ នៅក្រសួងមហាផ្ទៃ និងជាដើមហេតុ នាំឲ្យស្នេហ៍ស្មោះកវី សុខ ជំនោរ ខកចិត្តនោះ ក៏ស្របគ្នានឹងកវីកម្សត់ស្នេហ៍ សុខ ជំនោរ បានបង្ហាញពីភាពឈឺចាប់គ្មានថ្ងៃល្ហែនៅក្នុងប្រព័ន្ធហ្វេសប៊ុក ដោយលោកសរសេរថា «បងគ្មានអំណាច និងទ្រព្យសម្បត្ដិដើម្បីផ្ដល់ឲ្យអូននោះទេ ហើយក៏មិនអាចប្រគល់សេចក្ដីសុខជូនអូនបានដែរ ទើបអូនជឿគេ និងទៅតាមគេ»។
តាមរយៈសំណេររបស់កវីអភ័ព្វស្នេហ៍រូបនេះត្រូវ បានមិត្តភក្តិនៅ ក្នុងហ្វេសប៊ុក ផ្ដោតអារម្មណ៍ទៅលើអតីតគូស្នេហ៍របស់ខ្លួនគឺនាង សុគន្ធ និសា ហើយសំណេរមួយឃ្លានេះត្រូវបានគេលើកឡើងផងដែរថា គឺជាការបង្ហាញនូវភាពខកចិត្ដជាខ្លាំងពេលដែលបានបាត់បង់មនុស្ស ដែលខ្លួនស្រឡាញ់បែបនេះ។
បើទោះយ៉ាងណាជុំវិញការបង្ហើប ព័ត៌មានខាងលើនេះ ភ្នំពេញ ប៉ុស្តិ៍ មិនអាចសុំការបំភ្លឺពីអតីតគូស្នេហ៍ទាំងពីនោះបានទេ ដោយសារទាក់ទងមិនបាន។ ប៉ុន្តែបើតាមការបង្ហើបឲ្យដឹងពីស្រ្តីជាម្តាយអ្នកសិល្បៈនិងតាម សំណេររៀបរាប់របស់លោក សុខ ជំនោរ នៅក្នុងប្រព័ន្ធ ហ្វេសប៊ុកនោះ ក៏សន្និដ្ឋានបានថា ជុំវិញការបែកបាក់ស្នេហ៍មួយម៉ឺនរសជាតិរយៈពេល៨ឆ្នាំ បណ្តាលមកពីអ្នកទី៣មកជ្រែកបេះដូងកម្សត់លោក សុខ ជំនោរ ព្រោះថា ពេលនេះ លោកសុខ ជំនោរ នៅតែសម្តែងការឈឺចាប់នៅក្នុងហ្វេសប៊ុកនៅឡើយ ហើយចំណែក នាងសុគន្ធ និសា នាងបានសម្តែងភាពស្រស់ស្រាយ មិនថា លើឆាកឬក្រោយឆាកតន្រ្តីនោះទេ ក្រៅពីនេះក៏ធ្វើពិធីខួបកំណើតយ៉ាងរំភើយនៅអាមេរិកទៀតផង៕
