Hot News: July 2012

Tuesday, July 31, 2012

ក្រសួង-អង្គការដៃគូ រៀបចំអប់រំពលរដ្ឋបង្ការជំងឺEV៧១

ភ្នំពេញៈ រដ្ឋាភិបាលកម្ពុជា និងអង្គការជាដៃគូ កំពុងរៀបចំផលិតនូវសម្ភារអប់រំ ស្តីពីការបង្ការជំងឺពងបែកដៃជើងនិងមាត់ ជូនដល់សាធារណជន ដើម្បីត្រៀមបង្ការនិងទប់ស្កាត់ពីជំងឺដែលអាចកើតមានដល់កុមារ តូចៗ។
សេចក្ដីប្រកាសព័ត៌មានរបស់ក្រសួងសុខាភិបាលកាលពីថ្ងៃទី ២៧ ខែកក្កដា បានឲ្យដឹងថា ក្រសួងសុខាភិបាល សហការជាមួយអង្គការសុខភាពពិភពលោក និងអង្គការមូនិធិកុមាររបស់អង្គការសហប្រជាជាតិ (យូនីសេហ្វ) កំពុងរៀបចំបង្កើតនូវឧបករណ៍សម្ភារអប់រំសុខភាព សម្រាប់ជាជំនួយស្មារតីដល់ប្រជាពលរដ្ឋ និង«ផ្តល់ព័ត៌មានដល់សាធារណជនអំពីជំងឺនេះ» ដែលសម្លាប់កុមារកម្ពុជាអស់៥៦នាក់មកហើយតាំងពីខែមេសាមក។
សេចក្ដី ប្រកាសរួមគ្នារវាងក្រសួងនិងអង្គការសុខភាពពិភពលោក ក៏បានណែនាំដល់គ្រឺះស្ថានសុខាភិបាលសាធារណៈ ឲ្យរាយការណ៍ពីករណីជំងឺពងបែកដៃជើងនិងក្នុងមាត់ ទាំងស្រាល និងធ្ងន់ធ្ងរ និងមានករណីធ្ងន់ធ្ងរ ដូចជាមានគ្រុនក្តៅ សញ្ញាប្រព័ន្ធប្រសាទ ឬសញ្ញាផ្លូវដង្ហើមញាប់ ឬពិបាកដកដង្ហើម ត្រូវបញ្ជូនកុមារទៅមន្ទីរពេទ្យជាបន្ទាន់។
ប្រកាសថ្មីៗនេះ ក៏ស្របពេលដែលសារព័ត៌មាននៅប្រទេសថៃ រាយការណ៍ថា ជំងឺពងបែកដៃជើងនិងមាត់ បានបណ្តាលឲ្យកុមារកម្ពុជាអាយុ២ខួបម្នាក់ស្លាប់នៅប្រទេសថៃ កាលពីសប្តាហ៍មុន ប៉ុន្តែមន្ត្រីសុខាភិបាលនៅប្រទេសនេះ ឲ្យដឹងថា កុមាររូបនោះ មិនបាននាំជំងឺនេះពីកម្ពុជាទៅទេ គឺគេបានស្នាក់នៅប្រទេសថៃអស់មួយរយៈកាលមកហើយ និងសូមកុំឲ្យប្រជាជនថៃមានការរើសអើងពលរដ្ឋកម្ពុជា។
អ្នក ស្រី Denis Stepherd Johnson អ្នកនាំពាក្យអង្គការយូនីសែហ្វ ប្រាប់ភ្នំពេញប៉ុស្តិ៍កាលពីថ្ងៃអាទិត្យថា សម្ភារអប់រំ មានដូចជាខិតប័ណ្ណអប់រំ និងស្ប៉តលើកញ្ចក់ទូរទស្សន៍ នឹងផ្សព្វផ្សាយឲ្យពលរដ្ឋដឹងពីការអនាម័យទូទៅចំពោះខ្លួនឯង និងលើកុមារ ដូចជាការលាងដៃ ក្រោយចេញពីបង្គន់ និងចាប់កាន់ចំណីអាហារជាដើម។
លោកស្រីថា ស្ប៉តទាំងនោះ មានមួយចំនួនបានកំពុងតែចាក់តាមកញ្ចក់ទូរទស្សន៍រួចមកហើយ និងមានខ្លះកំពុងបង្កើតថ្មី។ លោក ស្រីថ្លែងថា ៖ «ខ្ញុំជឿថា ស្ប៉តពាណិជ្ជកម្មតាមទូរទស្សន៍ ជាមធ្យោបាយដ៏មានប្រជាប្រិយភាពក្នុងចំណោមពលរដ្ឋ។ ការអនុវត្តនូវការអនាម័យស្អាត ជាវិធីដ៏ល្អបំផុត»។
មន្ត្រីក្រសួងសុខាភិបាលកម្ពុជា មិនអាចទាក់ទងសុំការអធិប្បាយបានទេ កាលពីម្សិលមិញ។
ប៉ុន្តែ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍តាមសេចក្តីប្រកាសថា ៖ «ឪពុកម្តាយទាំងឡាយ ដែលកូនមានរោគសញ្ញា គ្រុនក្តៅខ្លាំង ក្អួត ប្រកាច់ រឹងដៃជើង ឬពិបាកដកដង្ហើម ត្រូវនាំយកទៅមន្ទីរពេទ្យឲ្យបានឆាប់ ដើម្បីធ្វើរោគវិនិច្ឆ័យនិងទទួលការព្យាបាល»។
ការអង្កេតលើ ករណីឈឺនិងស្លាប់ ដែលរាយការណ៍ពេលថ្មីៗនេះ បានសន្និដ្ឋានថា ទំរង់ធ្ងន់ធ្ងរនៃជំងឺពងបែកដៃ ជើងនិងក្នុងមាត់ បង្កដោយមេរោគ Enterovirus ៧១ ឬ EV ៧១ ដែលមានករណីសរុប ៧៨ ក្នុងនោះរាយការណ៍ដោយមន្ទីរពេទ្យគន្ធបុប្ផា ៦២។
ចំណែកក្នុង មួយសប្តាហ៍ចុងក្រោយនេះ មាន៥៣៣ករណីនៃជំងឺពងបែកដៃជើងនិងក្នុងមាត់ស្រាល បានរាយការណ៍មកក្រសួងសុខាភិបាលពី១៧ខេត្តក្នុងចំណោម២៤ខេត្ត និងមាន៩ករណីដែលបញ្ជាក់ថាមានមេរោគឆ្លង EV ៧១ ធ្ងន់ធ្ងរ៕

ចលនាប្រជាធិបតេយ្យសង្គ្រោះជាតិផ្សព្វផ្សាយគោលដៅរួមថ្នាក់ជាតិលើកដំបូង

ចលនាប្រជាធិបតេយ្យសង្គ្រោះជាតិដែលទើបបង្កើតដោយគណបក្ស សម រង្ស៊ី និងគណបក្សសិទ្ធិមនុស្សរួមគ្នា បានផ្សព្វផ្សាយពីគោលដៅរួមរបស់ចលនានេះទៅដល់សកម្មជនគណបក្សរបស់ ខ្លួននៅថ្នាក់ជាតិជាលើកដំបូង នៅថ្ងៃទី៣០ ខែកក្កដា។

លោក កឹម សុខា ប្រធានគណបក្សសិទ្ធិមនុស្ស ថ្លែងទៅកាន់សកម្មជនគណបក្សសិទ្ធិមនុស្ស និងគណបក្ស សម រង្ស៊ី នៅទីស្នាក់ការគណបក្សសិទ្ធិមនុស្ស នារាជធានីភ្នំពេញ នៅថ្ងៃទី៣០ កក្កដា ឆ្នាំ២០១២។

ការបង្ហាញពីគោលដៅរួមថ្នាក់ជាតិនេះ ធ្វើឡើងនៅក្នុងកិច្ចប្រជុំរួមគ្នារវាងសកម្មជនគណបក្សទាំងពីរ ប្រមាណជាង ៣០០នាក់ មកពីតាមបណ្តាខេត្តក្រុងនានា នៅស្នាក់ការកណ្តាលគណបក្សសិទ្ធិមនុស្ស ក្នុងរាជធានីភ្នំពេញ។
នៅក្នុងពិធីជួបជុំនោះ តំណាងគណបក្ស សម រង្ស៊ី មានលោក គង់ គាំ ប្រធានស្ដីទីគណបក្ស សម រង្ស៊ី អ្នកស្រី មូរ សុខហួរ អ្នកតំណាងរាស្ត្រខេត្តកំពត អ្នកស្រី កែ សុវណ្ណរតន៍ អគ្គលេខាធិការគណបក្ស សម រង្ស៊ី និងជាសមាជិកព្រឹទ្ធសភា។
លោក សម រង្ស៊ី ដែលកំពុងនិរទេសខ្លួននៅឯក្រៅប្រទេស ក៏បានបង្ហាញវត្តមានតាមរយៈ Video Conference មកកាន់កិច្ចប្រជុំផងដែរ។ចំណែកខាងគណបក្សសិទ្ធិមនុស្ស មានលោក កឹម សុខា ប្រធានគណបក្សសិទ្ធិមនុស្ស លោក យ៉ែម បុញ្ញឫទ្ធិ អគ្គលេខាធិការ និងជាសមាជិករដ្ឋសភាមណ្ឌលព្រៃវែង និងលោក ប៉ែន សុវណ្ណ ប្រធានគណៈកម្មាធិការវិន័យរបស់គណបក្សសិទ្ធិមនុស្ស។
លោក កឹម សុខា ប្រធានគណបក្សសិទ្ធិមនុស្ស បានពន្យល់ដល់សកម្មជនគណបក្សសិទ្ធិមនុស្ស និងសកម្មជនគណបក្ស សម រង្ស៊ី ពីមូលហេតុនៃការរួបរួមគ្នាបង្កើតចលនាប្រជាធិបតេយ្យសង្គ្រោះជាតិ។ លោកបានលើកឡើងថា ក្រុមប្រឹក្សាឃុំសង្កាត់របស់គណបក្សទាំងពីរនៅមូលដ្ឋានកំពុងដើរ ផ្លូវរួមគ្នាក្នុងការសង្គ្រោះជាតិ ដើម្បីទាញយកសំឡេងឆ្នោត ឬអ្នកគាំទ្រក្នុងការបោះឆ្នោតជាតិនៅថ្ងៃទី២៨ ខែកក្កដា ឆ្នាំ២០១៣។
លោកថ្លែងបន្តថា ការរួមគ្នារវាងគណបក្សទាំងពីរ នឹងមិនប៉ះពាល់អ្វីដល់អាសនៈមេឃុំ ឬចៅសង្កាត់ថ្មី និងបញ្ហាផ្នែកច្បាប់ដែលធ្វើឲ្យគណបក្សទាំងពីរមិនអាចបង្កើត គណបក្សថ្មីមួយទៀតសម្រាប់ការបោះឆ្នោតជាតិឆ្នាំ២០១៣ ទេ។
អ្វីដែលលោក កឹម សុខា សង្កត់ធ្ងន់នោះ គឺគណបក្សទាំងពីរនឹងបង្កើតគោលការណ៍រួម កម្មវិធីគោលការណ៍រួម និងសាររួមទៅសកម្មជននៅតាមមូលដ្ឋាន ដើម្បីឲ្យអនុវត្ត និងផ្សព្វផ្សាយបន្តដល់ប្រជាពលរដ្ឋ មុននឹងដំណើរការនីតិវិធីច្បាប់ ស្នើសុំបង្កើតគណបក្សថ្មី នឹងលេចជារូបរាងនៅពេលខាងមុខឆាប់ៗនេះ។
លោក កឹម សុខា៖ «គឺយើងនឹងរៀបចំជាបន្ទាន់នូវលក្ខន្តិកៈនៃ គណបក្សថ្មី បទបញ្ជានៃគណបក្សថ្មី ដើម្បីចុះឈ្មោះ។ យើងមិនល្ងង់ទេ យើងស្គាល់ច្បាប់យើងដឹងច្បាប់ យើងអត់ធ្វើឲ្យប៉ះពាល់ដល់ឆន្ទៈរបស់ប្រជាពលរដ្ឋ»។
លោក កឹម សុខា និងលោក សម រង្ស៊ី រួមគ្នាបង្កើតសម្ពន្ធភាពចលនាប្រជាធិបតេយ្យសង្គ្រោះជាតិ កាលពីថ្ងៃទី១៧ កក្កដា ឆ្នាំ២០១២ នៅទីក្រុងម៉ានីល ប្រទេសហ្វីលីពីន ដោយសង្ឃឹមថា នឹងបង្កើតគណបក្សថ្មីមួយដើម្បីរំដោះជាតិ ក្នុងការទាញយកសំឡេងឆ្នោតនៅឆ្នាំ២០១៣ ដែលគណបក្សប្រឆាំងចាត់ទុកប្រទេសកម្ពុជា បច្ចុប្បន្នកំពុងស្ថិតនៅមាត់ជ្រោះនៃរបបកុម្មុយនិស្ត និងជាអាយ៉ងយួន។
លោក សម រង្ស៊ី ប្រធានគណបក្ស សម រង្ស៊ី ក៏បានថ្លែងតាម Video Conference នៅក្នុងកិច្ចប្រជុំលើកដំបូងរវាងសកម្មជនគណបក្សទាំងពីរថា ចលនាប្រជាធិបតេយ្យសង្គ្រោះជាតិនឹងធ្វើយុទ្ធនាការផ្សព្វផ្សាយទាំង ក្នុងប្រទេស និងក្រៅប្រទេស ដើម្បីប្រមែប្រមូលអ្នកប្រជាធិបតេយ្យឲ្យរួមគ្នា។
នៅក្នុងការជួបប្រជុំគ្នានោះ លោក កឹម សុខា ប្រកាសថា នឹងធ្វើដំណើរទៅកាន់សហរដ្ឋអាមេរិកនៅថ្ងៃទី៣១ ខែកក្កដា។
លោក សម រង្ស៊ី បញ្ជាក់ថា ដំណើរទស្សនកិច្ចរបស់លោក កឹម សុខា នោះ គឺដើម្បីរួមគ្នាជាមួយលោកស្វែងរកការគាំទ្រពីប្រទេសមហាអំណាចមួយ ចំនួននៅបរទេសឲ្យដាក់សំពាធលើរដ្ឋាភិបាលកម្ពុជា ឲ្យធ្វើការផ្លាស់ប្ដូរគណៈកម្មាធិការជាតិរៀបចំការបោះឆ្នោត ដែលគណបក្សប្រឆាំងចាត់ទុកថា មិនមានអព្យាក្រឹត និងជួយឲ្យលោក សម រង្ស៊ី មានសិទ្ធិត្រឡប់មកកម្ពុជាវិញ ឲ្យទាន់ការបោះឆ្នោតជាតិឆ្នាំ២០១៣។
លោក សម រង្ស៊ី៖ «បេក្ខជននាយករដ្ឋមន្ត្រីដែលយកជាការបាន គឺមានតែ ២ទេ គឺ ហ៊ុន សែន និង សម រង្ស៊ី ដូច្នេះមិនអាចបោះឆ្នោតគ្មានវត្តមានខ្ញុំទេ។ ដូចគូប្រដាល់ឡើងលើសង្វៀន ហើយមាន ២ឡើងប្រដាល់គ្នា ហ៊ុន សែន គាត់អត់ហ៊ានទេ គាត់អត់ហ៊ានប្រដាល់ជាមួយ សម រង្ស៊ី ដាល់ជាមួយ សម រង្ស៊ី សម រង្ស៊ី ដាល់សន្លប់ឥឡូវ»។
នៅក្នុងកិច្ចប្រជុំនេះដែរ គណបក្សសិទ្ធិមនុស្សក៏បានចែកកុំព្យូទ័រ ម៉ាស៊ីនបោះពុម្ភ (Printer) ទៅដល់មេឃុំ ដែលជាប់ឆ្នោតថ្មីចំនួន ១៨រូប សម្រាប់ផ្ទុកឯកសារ។ ដោយឡែករថយន្ត ៤គ្រឿងទៀត ក៏ត្រូវបានចែកដល់មេឃុំថ្មីមកពីគណបក្សសិទ្ធិមនុស្សផងដែរ ហើយគណបក្សនេះកំពុងស្វែងរកជំនួយពីបរទេសបន្តទៀត ដើម្បីទិញរថយន្តចំនួន ១៤គ្រឿងបន្ថែម ចែកជូនមេឃុំថ្មីរបស់ខ្លួនទៅតាមការសន្យាពេលឃោសនាបោះឆ្នោតរើស សមាជិកក្រុមប្រឹក្សាឃុំសង្កាត់កន្លងទៅ។
ការផ្តល់នេះត្រូវបានគេកត់សម្គាល់ថា ជាការទទួលខុសត្រូវនូវការសន្យារបស់គណបក្សនយោបាយដែលកន្លងមកគេ មើលឃើញថា អ្នកនយោបាយមួយចំនួនតែងសន្យាចោល ដើម្បីរកសំឡេងឆ្នោតនៅមុនការបោះឆ្នោត៕(RFA)

សហជីពកម្មករប្រមូលស្នាមមេដៃគាំទ្រការដោះលែងលោក ម៉ម សូណង់ដូ

មេធាវីលោក ម៉ម សូណង់ដូ ដាក់លិខិតទៅតុលាការដើម្បីសុំធានាលោក ម៉ម សូណង់ដូ ឲ្យនៅក្រៅឃុំបណ្ដោះអាសន្ន នៅថ្ងៃទី៣០ កក្កដា នេះ។ រីឯក្រុមកម្មករក៏ធានាប្រមូលស្នាមមេដៃនៅតាមរោងចក្រ ដើម្បីដាក់ទៅរដ្ឋាភិបាលកម្ពុជា ឲ្យជួយដោះលែងលោក ម៉ម សូណង់ដូ ចេញពីពន្ធនាគារដែរ។

តំណាងអង្គការសង្គមស៊ីវិល និងសមាជិកសមាគមអ្នកប្រជាធិបតេយ្យ បួងសួងសុំឲ្យមានការដោះលែងលោក ម៉ម សូណង់ដូ នៅវត្តអង្គមេត្រី សង្កាត់ព្រៃវែង ខណ្ឌដង្កោ កាលពីថ្ងៃទី១៧ កក្កដា ឆ្នាំ២០១២។

លោក សុក សំអឿន ប្រធានក្រុមអ្នកច្បាប់ការពារសិទ្ធិកម្ពុជា និងជាមេធាវីការពារក្តីឲ្យលោក ម៉ម សូណង់ដូ ឲ្យដឹងថា នៅថ្ងៃច័ន្ទ ទី៣០ ខែកក្កដា លោកនឹងដាក់លិខិតស្នើសុំជាផ្លូវការទៅតុលាការក្រុងភ្នំពេញ ដើម្បីធានាកូនក្តីរបស់ខ្លួនឲ្យនៅក្រៅឃុំបណ្ដោះអាសន្នទៅតាម នីតិវិធីច្បាប់។
លោកបន្តថា ករណីចោទប្រកាន់លោក ម៉ម សូណង់ដូ កំពុងស្ថិតនៅក្នុងដៃចៅក្រមស៊ើបសួរធ្វើការស៊ើបអង្កេត៖ «ថ្ងៃ ច័ន្ទ (៣០ កក្កដា) នេះ ខ្ញុំដាក់ (លិខិត) សុំគាត់នៅក្រៅឃុំម្ដងទៀត។ ច្បាប់អត់មានចែងថា បើគេចោទពីបទឧក្រិដ្ឋមិនអាចឃុំខ្លួនបានទេ មិនអ៊ីចឹងណា។ យើងគិតប៉ុណ្ណេះ បើសិនជាការឃុំខ្លួន ឧទាហរណ៍រឿង ឈូក បណ្ឌិត បាញ់មនុស្សរបួសផង ហើយលោក ម៉ម សូណង់ដូ គ្រាន់មនុស្សឆ្លើយដាក់គ្មានអីធំដុំផង»។
លោក ម៉ម សូណង់ដូ ជាប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានអាជ្ញាធរចាប់ខ្លួនកាលពីថ្ងៃទី១៥ ខែកក្កដា បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសឲ្យចាប់ខ្លួន ក្រោមបទចោទប្រកាន់ថា លោកជាប់ពាក់ព័ន្ធនៅពីក្រោយខ្នងក្រុមលោក ប៊ុន រដ្ឋា ដែលអាជ្ញាធរចោទប្រកាន់ថា ប៉ុនប៉ងបង្កើតតំបន់អបគមន៍ នៅភូមិប្រម៉ា ឃុំកំពង់ដំរី ក្នុងស្រុកឆ្លូង ខេត្តក្រចេះ។
សាលាដំបូងរាជធានីភ្នំពេញ បានចោទប្រកាន់លោក ម៉ម សូណង់ដូ ចំនួន ៤បទចោទ ដោយផ្អែកលើដីការបស់តុលាការខេត្តក្រចេះ។ ក្នុងនោះរួមមាន អ្នកផ្ដើមគំនិតប្រឆាំងរាជការសាធារណៈ ធ្វើកុបកម្ម ជ្រៀតជ្រែកដោយខុសច្បាប់ក្នុងការបំពេញការងារសាធារណៈ និងញុះញង់ឲ្យប្រជាពលរដ្ឋប្រឆាំងអាជ្ញាធរស្របច្បាប់។
ស្របពេលនឹងមេធាវីប្រុងស្នើសុំឲ្យលោក ម៉ម សូណង់ដូ ស្ថិតនៅក្រៅមន្ទីរឃុំឃាំងនេះ លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា ក៏បានកៀរគរឲ្យក្រុមកម្មករប្រមូលស្នាមមេដៃនៅតាមរោងចក្រ ដើម្បីគាំទ្រជួយលោក ម៉ម សូណង់ដូ ឲ្យនៅក្រៅឃុំបណ្ដោះអាសន្ន។
ការថ្លែងរបស់លោក ជា មុនី ធ្វើឡើងក្នុងកិច្ចប្រជុំថ្នាក់ដឹកនាំសហជីពចំនួន ៧១នាក់ មកពីបណ្តារោងចក្រចំនួន ៣៥ នៅរាជធានីភ្នំពេញ ខេត្តកំពង់ស្ពឺ និងខេត្តកំពង់ឆ្នាំង នៅថ្ងៃទី២៩ ខែកក្កដា។
លោក ជា មុនី ឲ្យដឹងថា លោកមានបំណងបង្កើតយុទ្ធនាការប្រមូលស្នាមមេដៃពីកម្មករ កម្មការិនីរោងចក្រ ដើម្បីដាក់ជូនទៅរដ្ឋាភិបាល ឬសមាគមអ្នកប្រជាធិបតេយ្យ ក្នុងការជំរុញសុំឲ្យតុលាការអនុញ្ញាតឲ្យលោក ម៉ម សូណង់ដូ នៅក្រៅឃុំបណ្ដោះអាសន្ន។
លោក ជា មុនី៖ «យើងមានគោលបំណងនឹងធ្វើយុទ្ធនាការដើម្បីឲ្យមាន ការចូលរួមពីបងប្អូនកម្មករ កម្មការិនី ពីស្នាមមេដៃឲ្យមានការដោះលែងពីលោក ម៉ម សូណង់ដូ ព្រោះលោក ម៉ម សូណង់ដូ គាត់មិនខុសស្អីទេ។ មើលទៅខ្ញុំនិយាយពីហេតុផលគាត់ជាអ្នកសារព័ត៌មាន គាត់ជានាយកវិទ្យុសំបុកឃ្មុំ ហើយយើងអត់ចង់ឲ្យអ្នកសារព័ត៌មានណាត្រូវបានគេចាប់ឃុំ ឬក៏បាញ់សម្លាប់ដូចមេដឹកនាំសហជីពទៀតទេសម័យនេះហើយ ហើយទី២ គ្រាន់ជាប្រធានសមាគម វាអត់ខុសច្បាប់ទេ»។
ទោះជាយ៉ាងណា លោក ជា មុនី នៅមិនទាន់បញ្ជាក់ពីកាលបរិច្ឆេទច្បាស់លាស់នៃថ្ងៃធ្វើយុទ្ធនាការ ប្រមូលស្នាមមេដៃនៅតាមរោងចក្រនៅឡើយទេ។
ប្រធានសហជីពសេរីកម្មករប្រចាំរោងចក្រត្រាយ ប៉ុស្តិ៍ (Try Pose) ក្នុងខេត្តកំពង់ឆ្នាំង អ្នកស្រី លី ស៊ីន ឲ្យដឹងក្រោយពីកិច្ចប្រជុំដែលដឹកនាំដោយលោក ជា មុនី ថា អ្នកស្រីនឹងចាប់ផ្ដើមប្រមូលស្នាមមេដៃពីក្រុមកម្មករក្នុងរោងចក្រ នៅខែសីហា ខាងមុខ។
អ្នកស្រីសង្ឃឹមថា នឹងប្រមូលស្នាមមេដៃបានច្រើន ដើម្បីជួយលោក ម៉ម សូណង់ដូ ឲ្យមានសេរីភាពឡើងវិញ៖ «យើង ដឹងតើ! នៅក្នុងស្រុកខ្មែររបស់យើង អ្នកយកសារព័ត៌មានទាំងអស់មិនថា អ្នកសារព័ត៌មាន មិនថាអ្នកទាមទារដើម្បីផលប្រយោជន៍ប្រជាជន មិនថាអ្នកទាមទារដើម្បីផលប្រយោជន៍កម្មករទេ គឺសុទ្ធតែមានសិទ្ធិឯករាជ្យមួយដែលរដ្ឋាភិបាល ត្រូវតែគាំទ្រមិនមែនរដ្ឋាភិបាលដាក់គាត់ដាក់ទោសទេ»។
កាលពីពេលថ្មីៗនេះ មេដឹកនាំសមាគមអ្នកប្រជាធិបតេយ្យក្នុងស្រុកអង្គរបុរី ខេត្តតាកែវ ក៏បានចុះប្រមូលស្នាមមេដៃពីប្រជាពលរដ្ឋជាង ២ពាន់ស្នាមមេដៃដើម្បីជួយសុំឲ្យស្ថាប័នតុលាការ និងរដ្ឋាភិបាលដោះលែងលោក ម៉ម សូណង់ដូ។ ទោះបីមានការហាមប្រាមពីអាជ្ញាធរពីអាជ្ញាធរមូលដ្ឋានក៏ដោយ។
ក្នុងយុទ្ធនាការប្រមូលស្នាមមេដៃជួយលោក ម៉ម សូណង់ដូ ដូចគ្នានេះ កាលពីថ្ងៃទី២៦ ខែកក្កដា កន្លងទៅ សមត្ថកិច្ចខណ្ឌដូនពេញ បានឃាត់ខ្លួនបុរសម្នាក់ឈ្មោះ ជ័យ ឡាយ រស់នៅក្នុងតំបន់បឹងកក់ នៅគ្រាដែលគាត់បានចុះប្រមូលជាង ២០០ស្នាមមេដៃពីប្រជាពលរដ្ឋ។
លោក ជ័យ ឡាយ ត្រូវបានសមត្ថកិច្ចដោះលែងវិញ នៅបន្ទាប់ពីលោកបានចុះកិច្ចសន្យាបញ្ឈប់សកម្មភាពប្រមូលស្នាមមេដៃ នៅក្នុងតំបន់ដើម្បីគាំទ្រឲ្យមានការដោះលែងលោក ម៉ម សូណង់ដូ៖ «ចាប់ ខ្ញុំម៉ោង ៥ ទល់គ្នាម៉ោង ៨កន្លះ គេអោយមកផ្ទះវិញ។ អត់ធ្វើបានអីខ្ញុំដែរអត់អីទេគេគ្រាន់តែអោយខ្ញុំធ្វើកិច្ច សន្យា ជាមួយគេថា កុំអោយជួយផ្ដិតមេដៃតទៅទៀត។ គេថា លោក ម៉ម សូណង់ដូ ធ្វើអបគមន៍ទេ»។
តែសម្រាប់អ្នកស្រី លី ស៊ីន កម្មការិនីរោងចក្របញ្ជាក់ថា មិនខ្លាចពីការចាប់ខ្លួនរបស់សមត្ថកិច្ចនោះឡើយ នឹងនៅតែប្រកាន់ជំហរប្រមូលស្នាមមេដៃជួយលោក ម៉ម សូណង់ដូ ដដែល ដរាបណាលោកមិនទាន់ចេញពីក្រៅមន្ទីរឃុំឃាំង៖ «ការលះបង់ជីវិតរបស់ ខ្ញុំ គឺដើម្បីផលប្រយោជន៍រួម មិនមែនដើម្បីផលប្រយោជន៍ផ្ទាល់ខ្លួនឯងទេ ហើយក៏មិនមែនតែផលប្រយោជន៍តែខ្លួនម្នាក់ឯង និងរង្វង់ក្រុមគ្រួសារដែរ គឺធ្វើទាំងអស់ដើម្បីប្រជាជននៅក្នុងប្រទេសរបស់យើង ដើម្បីផលប្រយោជន៍រួម»។
ក្នុងនាមជាមេធាវីការពារក្តីឲ្យលោក ម៉ម សូណង់ដូ និងជាមន្ត្រីច្បាប់មួយរូបផងនោះ លោក សុក សំអឿន ឲ្យដឹងថា នៅក្នុងច្បាប់មិនមានចែងថា ស្នាមមេដៃទាំងនោះអាចជួយសម្រាលទោសទណ្ឌ ឬជួយមនុស្សជាប់ចោទឲ្យរួចខ្លួននោះទេ។ លោកពន្យល់ថា ស្នាមមេដៃដែលប្រជាពលរដ្ឋកំពុងដើរប្រមូលនៅតាមបណ្ដាខេត្តមួយចំនួន និងនៅតាមរោងចក្រ មិនមានឥទ្ធិពលអ្វីផ្នែកច្បាប់សម្រាប់ជួយលោក ម៉ម សូណង់ដូ ឲ្យរួចចេញពីពន្ធនាគារនោះឡើយ។ តែស្នាមមេដៃគាំទ្រទាំងនោះ គ្រាន់ជាសារមួយសម្រាប់រដ្ឋាភិបាល ឬតុលាការ ពិចារណា ឬគិតគូរធ្វើយ៉ាងណាឲ្យដំណើរការកាត់ក្តីប្រកបដោយយុត្តិធម៌ និងត្រឹមត្រូវតែប៉ុណ្ណោះ។
រដ្ឋាភិបាលកម្ពុជា បានចាប់ខ្លួនលោក ម៉ម សូណង់ដូ ដាក់គុកជាលើកទី៣ហើយ បន្ទាប់ពីរដ្ឋាភិបាលបានចាប់ខ្លួនលោកលើកទី១ កាលពីថ្ងៃទី៣១ មករា ឆ្នាំ២០០៣ នៅមុនពេលបោះឆ្នោតជាតិលើកទី៣។ ការចាប់ខ្លួនលោកលើកទី២ កាលពីថ្ងៃទី១១ តុលា ឆ្នាំ២០០៥ ហើយរដ្ឋាភិបាលបានដោះលែងលោកវិញនៅក្នុងឆ្នាំ២០០៦។
ក្រុមអ្នកវិភាគបានលើកឡើងថា ការសម្រេចឃុំខ្លួនលោក ម៉ម សូណង់ដូ ក្នុងពន្ធនាគារវាជារូបភាពអាក្រក់ និងជាការឆ្លុះបញ្ចាំងអំពីរដ្ឋាភិបាល ដែលព្យាយាមបង្ក្រាបអ្នកហ៊ានតស៊ូមតិ ជាទង្វើផ្ទុយពីសង្គមប្រជាធិបតេយ្យ និងជាប្រទេសនីតិរដ្ឋ៕(RFA)

ការចាប់ខ្លួនលោក ម៉ម សូណង់ដូកម្លាសង្គមស៊ីវិល

វ៉ាស៊ីនតោន៖ ការចាប់ខ្លួនលោក ម៉ម សូណង់ដូពីបទចោទប្រកាន់ថាជាប់ទាក់ទឹននឹងការធ្វើអបគមន៍នៅខេត្តក្រចេះ ឬការប៉ះបោរប្រឆាំងរដ្ឋាភិបាលរឿងដីធ្លីនោះ បានធ្វើឲ្យអង្គការសង្គមស៊ីវិលខ្លះរារែកក្នុងការបំពេញមុខនាទីជួយ ពលរដ្ឋ។

ដោយទំនងជាខ្លាចពាក់ព័ន្ធនឹងការចោទប្រកាន់ដូចលោកម៉ម សូណង់ដូប្រធានវិទ្យុសំបុកឃ្មុំ និងជាប្រធានចលនាអ្នកប្រជាធិបតេយ្យរឿងអបគមន៍នៅខេត្តក្រចេះ ឬការប៉ះបោរប្រឆាំងរដ្ឋាភិបាលលោកនាយករដ្ឋមន្ត្រីហ៊ុន សែនរឿងដីធ្លីនោះ ក្រុមមន្ត្រីសង្គមស៊ីវិលនិងអ្នកវិភាគនិយាយថា សកម្មភាពជួយពលរដ្ឋរបស់ក្រុមអង្គការសិទ្ធិមនុស្សខ្លះទទួលការគំរាម កំហែងនិងការប្រយ័ត្នប្រយែង ជាងមុនដោយសារខ្លាចមានការចាប់ខ្លួនឬចោទប្រកាន់ទោស។

លោកម៉ម សូណង់ដូត្រូវចាប់ខ្លួនកាលពីពាក់កណ្តាលខែកក្កដាឆ្នាំ២០១២ដោយសារតែការ ឆ្លើយដាក់របស់ជនសង្ស័យដែលត្រូវតុលាការចាប់ខ្លួនមកសាកសួរពីបទការ នាំពលរដ្ឋជាច្រើនរយគ្រួសារប៉ុនប៉ងកាន់កាប់ដីនៅស្រុកឆ្លូង ខេត្តក្រចេះ កាលពីខែមេសាដែលរដ្ឋាភិបាលចាត់ទុកថាជាការប៉ុនប៉ងបង្កើតអបគមន៍លើដី សម្បទានវិនិយោគ ដែលអាជ្ញាបានបាញ់សម្លាប់កុមារីអ្នកតវ៉ាម្នាក់ស្លាប់ក្នុង ពេលបាតុកម្មតវ៉ាដីធ្លីនោះ។

លោកម៉ម សូណង់ដូត្រូវគេដឹងថា បានផ្សព្វផ្សាយ និងចូលរួមពិភាក្សាក្នុងវេទិកានានាទាក់ទងនឹងបញ្ហាកើតឡើងក្នុង ប្រទេសកម្ពុជាជាមួយចលនាខ្មែរមួយក្រុមដែលមានមូលដ្ឋាននៅសរអាហៅថា ចលនាអំណាចប្រជាពលរដ្ឋរបស់លោកសួន សេរីរដ្ឋា។ ចលនានេះបានប្រកាសប៉ុនប៉ងផ្តួលរំលំរដ្ឋាភិបាលរបស់លោកហ៊ុន សែន តាមវិធីបះបោររបស់ប្រជាពលរដ្ឋ និងការប្តឹងលោកនាយករដ្ឋមន្ត្រី ហ៊ុន សែន តាមរយៈតុលាការឧក្រិដ្ឋកម្ម អន្តរជាតិ(ICC)ដែលគេគិតថា អាចជាចំណែកមួយនាំឲ្យមានការចាប់ខ្លួនលោកម៉ម សូណង់ដូដែរ។

លោក អ៊ូ វីរៈនាយកមជ្ឈមណ្ឌលសិទ្ធិមនុស្សកម្ពុជាបានអះអាងថាការចាប់ខ្លួន នេះធ្វើឲ្យក្រុមសង្គមស៊ីវិលមិនអាចធ្វើការបានដោយអស់ពីចិត្តព្រោះ ពួកគេមានការប្រយ័ត្នប្រយែងច្រើនជាងពេលមុន។ លោកអ៊ូ វីរៈចាត់ទុកថា រឿងនេះជាការផ្ញើសារទូទាំងប្រទេស។

«ហើយការគាត់បរាជ័យ ហើយគាត់ប្រុងប្រយ័ត្ន ភ័យខ្លាចនេះវានឹងប៉ះពាល់ដំណើរការប្រជាធិបតេយ្យនិងដំណើរការគោរព សិទ្ធិមនុស្សនៅក្នុងតំបន់ នៅក្នុងខេត្តក្រចេះផង។ តែតាមខ្ញុំមើល នៅទូទាំងប្រទេសតែម្តងដោយសារការចាប់ខ្លួន។ រឿងខេត្តក្រចេះនេះជាការផ្ញើរសារមួយដល់សកម្មជនដទៃនៅតាមខេត្ត ផ្សេងៗផងដែរ។ ហើយជារឿងមួយ ដែលយើងព្រួយបារម្ភនៅពេលបច្ចុប្បន្ននេះ»។

លោកអះអាងថា បរាជ័យក្នុងការដោះស្រាយបញ្ហាដីធ្លីនោះហើយដែលនាំឲ្យកើតរឿងចាប់ ខ្លួននិងគាបសង្កត់ក្រុមសង្គមស៊ីវិលដើម្បីទប់ស្កាត់អស្ថិរភាព ក្នុងសង្គម។

«បើសិនជាអត់មានដំណោះស្រាយ រដ្ឋាភិបាលនឹងចាប់ផ្តើមគាបសង្កត់ដោយធ្វើការចាប់ខ្លួនសកម្មជនច្រើន គ្នា។ ខ្ញុំជឿថា នឹងមានការចាប់ខ្លួនសកម្មជនសិទ្ធិមនុស្សបន្តបន្ទាប់នៅឆ្នាំ២០១២ និងឆ្នាំ២០១៣ ជាពិសេសនៅមុនការបោះឆ្នោត២០១៣។ ខ្ញុំមើលទៅនឹងមានការចាប់ខ្លួនច្រើនជាងមុន»។

ចំណែកលោកបណ្ឌិត ឡៅ ម៉ុងហៃអ្នកវិភាគឯករាជ្យ បានថ្លែងថា សង្គមស៊ីវិល ជាពិសេសក្រុមអង្គការសិទ្ធិមនុស្ស មិនបានចេញការពារលោកម៉ម សូណង់ដូ ដូចការទាមទារឲ្យដោះលែងអ្នកជាប់ឃុំដោយសាររឿងដីធ្លីភូមិបឹងកក់ទេ។

«ខ្ញុំថា ដូចជាមានការរអែង។ ដូច្នេះទប់ខ្លួន ហើយដូចមិនទាន់អាចហ៊ានធ្វើអី ក្ឌុងក្តាំង។ ហើយបើចេញការពាររឿងម៉ម សូណង់ដូ ដូចជាមិនទាន់ឃើញអីឲ្យមានសកម្មភាពពុះពោរ ដូចក្នុងករណីអ្នកបឹងកក់១៣រូបទេ»។

លោកបណ្ឌិត ឡៅ ម៉ុងហៃ

លោកថ្លែងថា សកម្មភាពខ្លាចរអារនេះគឺព្រោះថា ករណីលោក ម៉ម សូណង់ដូមិនដឹងជាពាក់ព័ន្ធនឹងក្រុមណាមួយច្បាស់លាស់។ ហើយរឿងនេះអាចធ្វើឲ្យដំណើរការប្រជាធិបតេយ្យនិងការគោរពសិទ្ធិមនុស្ស និងនីតិរដ្ឋនៅកម្ពុជាលែងមានន័យ ហើយមានតែឈ្មោះ។
ក្រៅពីព្រមានចាត់វិធានការក្តៅចំពោះការប៉ុនប៉ងផ្តួលរំលំរដ្ឋាភិបាល របស់លោក លោកនាយករដ្ឋមន្ត្រីហ៊ុន សែនបានអំពាវនាវជាសាធារណៈឲ្យមេក្លោងចាប់ដីអបគមន៍ចុះចូល មកធ្វើជាសាក្សីបំភ្លឺអ្នកនៅពីក្រោយនៃអបគមន៍នោះដើម្បីជាថ្នូរនឹង ការលើកលែងទោស។

ប្រភពព័ត៌មានស្និទ្ធនឹងអាជ្ញាធរប៉ូលិសបានអះអាងថា ក្រុមអង្គការសង្គមស៊ីវិលអាចជាគោលដៅនៃការស៊ើបអង្កេតផងដែរទាក់ទងនឹង បញ្ហាដីធ្លីនៅខេត្តក្រចេះនេះជាពិសេសការគាំពារដល់ប៊ុន រដ្ឋាដែលគេចាត់ទុកថាជាអ្នកដឹកនាំប្រជាពលរដ្ឋតវ៉ារឿងដីធ្លីនៅ ខេត្តក្រចេះ កាលពីខែមេសាជាបន្តបន្ទាប់នោះ។

ថ្លែងប្រាប់វីអូអេតាមទូរស័ព្ទពីកន្លែងអាថ៌កំបាំងមួយកាលពីថ្ងៃសុក្រ ម្សិល មិញ លោកប៊ុន រដ្ឋាតំណាងប្រជាពលរដ្ឋ បានអះអាងថា បញ្ហាប្រមូលផ្តុំប្រជាពលរដ្ឋតវ៉ាដីធ្លីនៅខេត្តក្រចេះនោះមិនមែនជា អបគមន៍ទេ។ លោកថ្លែងថា លោកពុំមានពាក់ព័ន្ធជាមួយអង្គការឬស្ថាប័នណាជាខ្នងបង្អែកឬជាជម្រក អីទាំងអស់។

«អត់ទេ តាំងពីដើមមកខ្ញុំធ្វើកិច្ចការដោយឆន្ទៈ ដោយឧត្តមគតិរបស់ខ្ញុំ។ ខ្ញុំអត់មានការពាក់ព័ន្ធជាមួយអង្គការឬស្ថាប័នណាដើម្បីជាខ្នងបង្អែក ឬដើម្បីជាជម្រកអីទាំងអស់។ ប៉ុន្តែខ្ញុំចូលចិត្តសហការ បើសិនជាគេមានគោលការណ៍ច្បាប់ល្អ ឆន្ទៈយុត្តិធម៌ សច្ចៈធម៌ពិតប្រាកដ្ឋ។ ខ្ញុំនឹងដាក់ទំនាក់ទំនង។ តាំងពីដើមមក ខ្ញុំចូលចិត្តអញ្ចឹង ដូចជាអង្គការសង្គមស៊ីវិលផ្សេងៗនៅក្នុងស្រុកខ្មែរ គឺខ្ញុំអត់នៅក្រោមឱវាទរបស់ពួកគាត់ទេ។ តែខ្ញុំដឹកនាំរាស្ត្រតវ៉ាដីធ្លីគឺខ្ញុំដាក់សំណើហ្នឹងជូនពួកគាត់ ឲ្យពួកគាត់ជួយពិនិត្យហើយនឹងគាំពារឃ្លាំមើលផ្សេងៗ។ ហើយដូចគ្នាដែរ ពេលដែលខ្ញុំភៀសខ្លួនមកក្រៅប្រទេសក៏ខ្ញុំអត់មាននៅក្រោមអ្នកណា ដែរ។ ប៉ុន្តែខ្ញុំមើលឃើញនិន្នាការ ស្ថាប័នណាល្អ ហើយគេចង់មកទំនាក់ទំនងខ្ញុំក្នុងនាមមួយដើម្បីយុត្តិធម៌ ដើម្បីសច្ចៈធម៌ ខ្ញុំអាចបើកភ្លើងខៀវឲ្យគេ»។

ប្រធានក្រុមស៊ើបអង្កេតនៃអង្គការសិទ្ធិមនុស្សពីរគឺលោក ចាន់ សាវ៉េតនៃអង្គការអាដហុកនិងលោកអំ សំអាតនៃអង្គការលីកាដូ បានអះអាងថាមកទល់ពេលនេះពុំឃើញអាជ្ញាធរឬតុលាការកោះហៅអង្គការលោកទៅ សាកសួរនាំទេ។

លោកចាន់ សាវ៉េតបញ្ជាក់ថា ការចាប់ខ្លួនលោកម៉ម សូណង់ដូធ្វើឲ្យលោកមានការប្រយ័ត្នប្រយែងក្នុងកិច្ចការរបស់លោក។

«ចាប់តាំងពីមានការផ្ទុះរឿងហ្នឹងមក ពួកយើងមានការរារែកក្នុងចិត្តមែនដោយសារថា ប្រភពព័ត៌មានមួយចំនួន ក្រុមសិទ្ធិមនុស្សយើងអត់បានទទួលព័ត៌មានជាក់លាក់ទេ»។
លោកថ្លែងថា អង្គការរបស់លោកធ្លាប់ជួយផ្នែកសេវាកម្មផ្លូវច្បាប់ មេធាវី និងគំនិតផ្លូវច្បាប់ផ្សេងៗដល់ជនរងគ្រោះដែលតវ៉ារឿងដីធ្លីនេះដែរ។

លោក អំ សំអាតបានអះអាងថា មន្ត្រីសង្គមស៊ីវិលគ្រាន់តែបំពេញភារកិច្ចតាមលក្ខន្តិកៈរបស់ខ្លួន ស្របតាមច្បាប់ក្នុងការជួយគាំទ្រជនរងគ្រោះដែលត្រូវគេរំលោភសិទ្ធិ។ រដ្ឋាភិបាលគួរចូលរួមសហការ ផ្តល់សេរីភាពពេញលេញ ជាជាងការធ្វើទុក្ខបុកម្នេញ ចោទប្រកាន់ លាបពណ៌អង្គការក្រៅរដ្ឋាភិបាលថា ជាគណបក្សជំទាស់និងចាប់ខ្លួនដាក់ពន្ធនាគារដូចករណីមុនៗ។

«រឿងនេះជាការគំរាមកំហែងនិងជាការបន្ទុចបង្អាក់នូវសេរីភាពក្នុង ការចូលរួមក្នុងវិស័យការពារនិងលើកស្ទួយការពារសិទ្ធិមនុស្សនៅ កម្ពុជា»។

ទោះជាយ៉ាងណាក៏ដោយលោកផៃ ស៊ីផានអ្នកនាំពាក្យរបស់រដ្ឋាភិបាលមួយរូប បានរិះគន់សកម្មភាពអង្គការក្រៅរដ្ឋាភិបាលមួយចំនួនកន្លងមកដោយអះអាង ថា ការចាប់ខ្លួននីមួយៗគឺធ្វើតាមនីតិវិធី ហើយក៏មិនមែនចាប់ខ្លួនចំពោះតែមន្ត្រី អង្គការក្រៅរដ្ឋាភិបាលទេ។ មន្ត្រីក្នុងរដ្ឋាភិបាលក៏ត្រូវចាប់ខ្លួនដូចគ្នា ប្រសិនបើប្រព្រឹត្តខុសច្បាប់។

«ក៏ប៉ុន្តែអង្គការក្រៅរដ្ឋាភិបាលខ្លះហ្នឹងមិនមែនគ្រាន់តែជា អ្នកផ្តួចផ្តើមគំនិត ផ្តួចផ្តើមអនុវត្តទេ ក៏ជាអ្នកដើរតួយ៉ាងសំខាន់ក្នុងការប្រឆាំងជាមួយរាជរដ្ឋាភិបាល។ រឿងហ្នឹងជាកំហុសហើយ ដោយសារអ្នកមានអាណត្តិប្រឆាំងជាមួយរាជរដ្ឋាភិបាលគឺគណបក្ស មិនមែនអង្គការក្រៅរដ្ឋាភិបាលទេ។ ដូច្នេះយើងត្រូវបែងចែកដាច់ដោយឡែកពីគ្នា»។

ក្រុមអ្នកវិភាគបានអះអាងថា កម្ពុជាគួរពិចារណាអំពីផលប៉ះពាល់ទៅថ្ងៃអនាគត និងគោលជំហររបស់ខ្លួនឡើងវិញ ទាក់ទងនឹងការចាប់ខ្លួន ការរិតត្បិតសេរីភាពរបស់អង្គការ សមាគមក្រោមរូបភាពថ្មីគឺអបគមន៍នេះ។ អ្នកវិភាគដដែលបានបន្ថែមថា ការចាប់ខ្លួននិងការរិតត្បិតនេះអាចនាំឲ្យខូចឈ្មោះកម្ពុជា កាន់តែខ្លាំង នៅពេលកម្ពុជាជាប្រធានអាស៊ាន ហើយទទួលរៀបចំទទួលប្រមុខរដ្ឋ ប្រមុខរដ្ឋាភិបាលមកកាន់កិច្ចប្រជុំកំពូលអាស៊ាននៅខែវិច្ឆិកា ខាងមុខ៕

សេដាក ៖ ការអភិរក្សកង្កែបក្នុងវាលស្រែនាំឲ្យកសិករទទួលបានផលស្រូវច្រើន

សត្វកង្កែប មានតួនាទីសំខាន់ណាស់ក្នុងការការពារកុំឲ្យដំណាំស្រូវទទួលរង ការបំផ្លាញពីសត្វល្អិត ជាពិសេសនៅ ដំណាក់កាលដំបូងនៃការធ្វើស្រែគឺដំណាក់កាលសំណាប និងពេលស្រូវទើបបែកគុម្ពដំបូង។ តែកន្លងមកកសិករយើងភាគ ច្រើនមិនសូវបានយកចិត្តទុកដាក់ក្នុងការអភិរក្សសត្វកង្កែប ដើម្បីឲ្យវាជួយការពារដំណាំស្រូវទេ។ នៅពេលដើមរដូវ គេគិតតែ នាំគ្នាចាប់កង្កែបធ្វើជាចំណីអាហារនិងលក់ទៅវិញ។ ការធ្វើរបៀបនេះប្រៀបដូចជាការទប់ស្កាត់មិនឲ្យកង្កែប មានឱកាស បង្កកំណើតឲ្យបានច្រើន ដើម្បីជួយការពារដំណាំស្រូវនិងផ្តល់ផលច្រើននៅពេលក្រោយ។ លើសពីនេះទៀត កសិករយើង ក៏បានធ្វើការប្រើប្រាស់សារធាតុគីមីដូចជា ជីគីមីនិងថ្នាំពុលគីមី ដែលនាំឲ្យកង្កែបពុលងាប់ជាពិសេសដោយសារស្បែកកង្កែប ងាយទទួលរងការបំផ្លាញពីសារធាតុគីមីណាស់។
ដើម្បី ឲ្យកសិករទទួលផលស្រូវច្រើននិងមិនចាំបាច់ចំណាយច្រើនលើសារធាតុ គីមីនិងបានផលកង្កែបច្រើន សេដាក សូមអំពាវនាវឲ្យកសិករងាកមកគិតគូអភិរក្ស និងចិញ្ចឹមកង្កែបតាមវាលស្រែឲ្យបានគ្រប់គ្នា ដោយអនុវត្តតាមគំនិតសំខាន់ៗ ដូចខាងក្រោម៖
១. សូមនាំគ្នាឈប់ចាប់កង្កែបនៅពេលដើមរដូវ។ បើយើងចង់ចាប់អាចចាប់បានពីពាក់កណ្តាលរដូវទៅ ជាពិសេស នៅពេលស្រូវបែកគុម្ពបានច្រើន។ (កង្កែបវាអាចជួយការពារដំណាំស្រូវពីការបំផ្លាញបាន។ កង្កែបមួយវាអាចស៊ីសត្វល្អិត បានក្នុងបរិមាណស្មើនឹងទម្ងន់ខ្លួនរបស់វា)។
២. កុំប្រើជីគីមីនិងថ្នាំពុលលើស្រូវនិងស្រែឲ្យសោះ។
៣. ប្រើជីធម្មជាតិឲ្យបានច្រើនលើដីស្រែជាពិសេសប្រើកំទេចចំបើង អង្កាម និងស្លឹកឈើ ដើម្បីគ្របដីចន្លោះគុម្ពស្រូវ ព្រោះវាផ្តល់ជាជំរកនិងចំណីបន្ថែមដល់កង្កែប។

៤. រៀបចំឲ្យមានកូនចង្អូរ ថ្លុក ឬប្រឡាយ ស្រះក្នុងស្រែ ដើម្បីផ្តល់ជាជំរកដល់កង្កែប។

៥. ផ្តល់ចំណីបន្ថែមដល់កង្កែបដូចជាកន្ទក់ ចុងអង្ករ និងកាកសំណល់ផ្ទះបាយ។ល។

៦. សហការជាមួយអ្នកជិតខាងដើម្បីការពារកុំឲ្យមានការចូលមកចាប់កង្កែបក្នុងវាលស្រែ។
បណ្ឌិត យ៉ង សាំងកុមារ ប្រធានអង្គការសេដាកមានប្រសាសន៍ថា “ការអនុវត្តន៍នូវគំនិតខាងលើបានជោគជ័យ មិនត្រឹមតែធ្វើឲ្យកសិករទទួលបានផលស្រូវច្រើនទេ គេអាចប្រមូលផលកង្កែបសំរាប់បរិភោគនិងលក់បានថែមទៀតផង នៅចុងរដូវ ឬក្រោយពេលច្រូតកាត់” ។
លោកបណ្ឌិតបន្តថា ដើម្បីទទួលបានផលកង្កែបពីស្រែគេត្រូវយកសំណាញ់ព័ទ្ធ លើដីស្រែនៅពេលចុងរដូវ ដើម្បីការពារកុំឲ្យកង្កែបរត់ចេញពីស្រែបាត់ក្រោយពេលច្រូតកាត់។
កសិករគួរចាប់ផ្តើមសាកល្បង អនុវត្តតាមគំនិតខាងលើនៅលើផ្ទៃដីដែលអាចធ្វើបាន (ឧទាហរណ៍ ៥ ទៅ ១០ អារ) ដើម្បីទទួលបាននូវលទ្ធផលនិងបទពិសោធន៍ជាក់លាក់។
សេដាក សូមធ្វើការអំពាវនាវឲ្យកសិករនិងអ្នកពាក់ព័ន្ធគ្រប់រូប ចូលរួមយ៉ាងសកម្មក្នុងការអភិរក្សសត្វកង្កែបក្នុងវាល ស្រែដើម្បីផលប្រយោជន៍វែងឆ្ងាយរបស់យើងទាំងអស់គ្នា៕
(អត្ថបទអង្គការសេដាក)

នកភូមិជិត៤០០គ្រួសារ រកអន្តរាគមន៍ ចំពោះការដកដីគ្មានសំណង

អ្នកភូមិជិត ៤០០ គ្រួសារ ស្វែងរកអន្តរាគមន៍ ចំពោះចំណាត់ការរបស់សាលារាជធានីភ្នំពេញក្នុងការដកហូតពី ប្រជាពលរដ្ឋដោយគ្មានសំណង ដើម្បីពង្រីកព្រះលានយន្តហោះអន្តរជាតិភ្នំពេញ។
អ្នកភូមិទាំងនោះ មកពីភូមិចំនួន ៣ គឺ ភូមិថ្មគោល ភូមិចំបក់ ភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដោយប្រមូលគ្នាផ្ដិតមេដៃ ដាក់ជូនស្ថាប័នរដ្ឋាភិបាល និងអង្គការក្រៅរដ្ឋាភិបាលនានា សុំឲ្យជួយធ្វើអន្តរាគមន៍ ចំពោះចំណាត់ការរបស់សាលារាជធានីភ្នំពេញនេះ។
អ្នកភូមិឲ្យដឹងថា ការទិញដូរដីរបស់គាត់ មានការទទួលស្គាល់ពីសំណាក់អាជ្ញាធរ។ ហេតុនេះពួកគាត់គួរបានសំណងត្រឡប់វិញ ជាថ្នូរទៅនឹងការដកហូតដីរបស់ពួកគាត់។
ក្រោយពីសាលារាជធានីភ្នំពេញ ប្រកាសឲ្យប្រជាពលរដ្ឋប្រមាណជិត ៤០០ គ្រួសារ រុះរើផ្ទះឲ្យបានមុនថ្ងៃទី ២ សីហា ដើម្បីរដ្ឋយកដីពង្រីកលានយន្តហោះមក ប្រជាពលរដ្ឋបានប្រមូលគ្នាផ្ដិតមេដៃ ដើម្បីធ្វើសំណើ ដាក់ជូនសាលារាជធានីភ្នំពេញ ខុទ្ទកាល័យលោកនាយករដ្ឋមន្ត្រី ហ៊ុន សែន និងអង្គការសិទ្ធិមនុស្សនានា សុំឲ្យជួយដោះស្រាយ និងផ្ដល់ជាសំណងឲ្យបានត្រឹមត្រូវ ចំពោះការដកហូតដីរបស់ពួកគាត់។
ពលរដ្ឋម្នាក់ឈ្មោះ ភួង សុភាព ជាពលរដ្ឋទើបត្រូវគេបណ្ដេញចេញមកពីតំបន់បុរីកីឡា ដែលបានទៅទិញដី នៅភូមិថ្មគោល អះអាងថា អ្នកស្រីទើបមកទិញដីនៅទីនេះ ជិតបានមួយឆ្នាំ និងទើបខ្ចីលុយធនាគារយកមកសាងសង់ផ្ទះ។ អ្នកស្រីនៅសងធនាគារមិនទាន់រួចផង ឥឡូវអាជ្ញាធរបញ្ជាឲ្យរុះរើ ដោយឥតផ្ដល់សំណង។
អ្នកស្រីឲ្យដឹងបន្តថា កាលគាត់មកទិញដីនេះ គឺទិញពីក្រុមហ៊ុនស្របច្បាប់មួយ ឈ្មោះ គឹម សុខ ហើយអាជ្ញាធរមូលដ្ឋានបានបោះត្រាទទួលស្គាល់ការទិញដូរនោះថែមទៀត ផង។ អ្នកស្រី ភួង សុភាព ថ្លែងបន្តថា បើសិនជាដីនេះ ស្ថិតក្នុងគម្រោងអភិវឌ្ឍន៍របស់រដ្ឋ ហេតុអ្វីអាជ្ញាធរមិនហាមឃាត់ពលរដ្ឋពីដំបូង លុះឥឡូវ ទើបអាជ្ញាធរមកចោទពលរដ្ឋថា មករស់នៅដោយអនាធិបតេយ្យទៅវិញ។
ពលរដ្ឋម្នាក់ទៀត ដែលសុំមិនឲ្យបញ្ចេញឈ្មោះ រិះគន់ថា អាជ្ញាធរគ្មានការទទួលខុសត្រូវចំពោះភារកិច្ចរបស់ខ្លួន ដែលបានអនុវត្តរួចហើយ។ បន្ថែមលើនេះទៀត នៅពេលពលរដ្ឋជួបបញ្ហា គេចវេះមិនហ៊ានជួបមុខពលរដ្ឋ និងព្យាយាមទម្លាក់កំហុសឲ្យគ្នាទៅវិញទៅមក។
ទាក់ទងនឹងការលើកឡើងរបស់ពលរដ្ឋនេះ ចៅសង្កាត់ចោមចៅ លោក សុទ្ធ សាធ មានប្រសាសន៍ថា ចំពោះបញ្ហានេះ មិនមែនជាតួនាទីរបស់លោកក្នុងការចាត់ចែងឡើយ គឺជាសមត្ថកិច្ចរបស់សាលាខណ្ឌ។
ប្រតិកម្មនឹងចំណាត់ការរបស់អាជ្ញាធរ ពលរដ្ឋទាំងនោះឲ្យដឹងបន្ថែមថា ពួកគាត់កំពុងប្រមូលគ្នាផ្ដិតមេដៃ ដាក់ទៅអង្គការ និងស្ថាប័នរដ្ឋាភិបាលសុំឲ្យជួយធ្វើយ៉ាងណា ដោះស្រាយ និងផ្ដល់សំណងឲ្យសមរម្យ។
ពលរដ្ឋថ្លែងបន្តថា ពួកគាត់មិនមានចេតនាធ្វើកូដកម្មណាមួយប្រឆាំងការអភិវឌ្ឍរបស់រដ្ឋ នោះឡើយ។ សកម្មភាព ដែលពួកគាត់កំពុងធ្វើ គឺដើម្បីសុំឲ្យមានសំណងសមរម្យ កុំឲ្យពួកគាត់ខាតបង់ច្រើនពេក។ ពលរដ្ឋបន្ថែមថា បើសិនជាសកម្មភាពទាំងប៉ុន្មាន ដែលពួកគេធ្វើហើយ មិនបានទទួលជោគជ័យ គាត់នឹងប្រមូលគ្នាដង្ហែជាក្បួន ទៅផ្ទះលោកនាយករដ្ឋមន្ត្រី សុំឲ្យជួយធ្វើអន្តរាគមន៍។
ភ្ជាប់ទៅនឹងករណីនេះដែរ អនុប្រធានផ្នែកអង្កេតនៃសមាគមការពារសិទ្ធិមនុស្ស អាដហុក លោក ចាន់ សុវ៉េត មានប្រសាសន៍ថា រដ្ឋាភិបាលគួររកដំណោះស្រាយសមរម្យណាមួយ ជាជាងបញ្ជាកងកម្លាំងសមត្ថកិច្ច ទៅបណ្ដេញពលរដ្ឋដោយបំពាន។
លោកបន្ថែមថា ដំណោះស្រាយរបស់រដ្ឋាភិបាលនៅពេលកន្លងមក ត្រូវក្រុមសង្គមស៊ីវិលជាតិ អង្គការអន្តរជាតិ និងមជ្ឈដ្ឋានអន្តរជាតិរិះគន់យ៉ាងខ្លាំង។ ដូច្នេះរដ្ឋាភិបាល គួរដូរវិធីសាស្ត្រដោះស្រាយជម្លោះ រវាងប្រជាពលរដ្ឋ និងអាជ្ញាធរនោះចោល។
ម្យ៉ាងទៀត លោកបញ្ជាក់ថា បើតាមការអះអាងរបស់ពលរដ្ឋទាំងនោះ មុននឹងពួកគាត់ទិញដីតំបន់នោះ ពួកគាត់សុទ្ធតែបានឆ្លងកាត់ការទទួលស្គាល់ពីសំណាក់អាជ្ញាធរ មូលដ្ឋាន។ ហេតុនេះការបណ្ដេញពលរដ្ឋ ឬដកហូតកម្មសិទ្ធិពលរដ្ឋ រដ្ឋាភិបាលគួរណាស់ផ្ដល់សំណងជូនពួកគាត់ឲ្យបានសមរម្យ។
សេចក្ដីជូនដំណឹងមួយចុះថ្ងៃទី ២៥ កក្កដា ឆ្នាំ ២០១២ ដែលចុះហត្ថលេខា ដោយអភិបាលខណ្ឌពោធិ៍សែនជ័យ បានជូនដំណឹងដល់ពលរដ្ឋទាំង ៣ ភូមិ គឺភូមិថ្មគោល ភូមិចំបក់ និងភូមិជីសាក់ ដែលនៅជាប់របងព្រះលានយន្តហោះអន្តរជាតិភ្នំពេញ ឲ្យរុះរើផ្ទះទាំងអស់នោះចេញ ដោយចាប់អនុវត្តពីថ្ងៃទី ២៧ ដល់ថ្ងៃទី ២ សីហាជាកំហិត។
សេចក្ដីជូនដំណឹងបន្តថា ក្នុងករណីពលរដ្ឋរឹងទទឹង មិនអនុវត្តតាមសេចក្ដីជូនដំណឹងនេះ អាជ្ញាធរនឹងប្រើកម្លាំងចុះរុះរើដោយផ្ទាល់។ ចំណែកការបាត់បង់ទ្រព្យរបស់ម្ចាស់នីមួយៗ ដែលរឹងទទឹងមិនព្រមរុះរើនោះ អាជ្ញាធរមិនទទួលខុសត្រូវឡើយ៕(RFA)

កូនស្រីអតីតនាយករដ្ឋមន្ត្រីថៃនឹងរៀបការជាមួយកូនប្រុសឧកញ៉ាសៀងណាំ

ភ្នំពេញ: កូនស្រីលោកស៊ុមឆាយ វង្សសាវ៉ាត់ អតីតនាយករដ្ឋមន្ត្រីថៃ និងជាក្មួយរបស់លោកថាក់ស៊ីន ស៊ីណាវ៉ាត់ ត្រូវបានគេរំពឹងថា នឹងរៀបអាពាហ៍ពិពាហ៍នៅឆ្នាំក្រោយនេះជាមួយមន្ត្រីកម្ពុជាម្នាក់ដែលជា កូនប្រុសលោកឧកញ៉ាសៀង ណាំ អ្នកតំណាងរាស្ត្រខេត្តសៀមរាប និងជាមនុស្សស្និទ្ធម្នាក់របស់សម្តេចតេជោហ៊ុន សែន ។ អ្នកទាំងពីរបានស្រឡាញ់គ្នាអស់មួយរយៈពេលយូរគួរសមមកហើយ នេះបើយោងតាមការចេញផ្សាយរបស់កាសែត ដេលីញូ របស់ថៃ កាលថ្ងៃទី២៨ខែ កក្កដាឆ្នាំ២០១២ និងតាមការបញ្ជាក់របស់ប្រភពស្និទ្ធនឹងគ្រួសារលោកសៀង ណាំ ។

   កូនប្រុសលោកឧកញ៉ាសៀង ណាំ និងលោកស្រីអ៊ុន វុនលី មានឈ្មោះណាំ លីណាល់ អាយុ៣២ឆ្នាំ គឺជាកូនទី២ក្នុងចំណោមកូនបីនាក់។ លោកជាមន្ត្រីបម្រើការនៅទីស្តីការគណៈរដ្ឋមន្ត្រីកម្ពុជា បានស្រឡាញ់កញ្ញា ឆាក់ យ៉ាផា វង្សសាវ៉ាត ហៅឈើរី អាយុ២៩ ឆ្នាំ ជាអ្នកចម្រៀងដ៏ល្បីឈ្មោះមួយរូបដែលនិយមថតចម្រៀងជាងការសម្តែងលើឆាក ហើយក៏បានបម្រើការនៅស្ថាប័នអយ្យការរបស់ថៃផងដែរ ។ ប្រភពកាសែតថៃអះអាងថា លោក ស៊ុមឆាយវង្សសាវ៉ាត បានទទួលក្នុងរឿងនេះ។

   បើតាមកាសែតថៃ អ្នកទាំងពីរបានជួបគ្នានៅទីក្រុងបាងកក ហើយបានស្រឡាញ់និងទាក់ទងគ្នាជាញឹកញាប់ ដែលរហូតចុងក្រោយនេះត្រូវបានគេជឿថានឹងឈានចូលខ្លោងទ្វារអាពាហ៍ ពិពាហ៍នៅឆ្នាំ២០១៣ខាងមុខ។

   ចំណែកប្រភពស្និទ្ធនឹងគ្រួសារលោកសៀង ណាំ និយាយថា លោកណាំ លីណាល់ បានសិក្សានៅអូស្ត្រាលី ជប៉ុន រួមទាំងថៃផងដែរ ហើយដែលទំនងជាពេលរៀននៅថៃនោះឯងដែលលោកបានស្គាល់កញ្ញា ឆាក់យ៉ាផា វង្ស សាវ៉ាត ដែលនៅថៃគេនិយមហៅឈ្មោះក្រៅថាឈើរី។

   កាសែតដេលីញូរបស់ថៃ និយាយថា អ្នកចម្រៀងល្បីឈ្មោះឈើរី ត្រូវបានគេដឹងថាមិនបានចាប់អារម្មណ៍រឿងនយោបាយក្នុងប្រទេសដូចឪពុក ម្តាយរបស់ខ្លួនទេ ។ ដោយមើលឃើញចំណុចកូនស្រីពៅរបស់ខ្លួនមានការចាប់អារម្មណ៍លើផ្នែកសិល្បៈ នោះ លោកស៊ុមឆាយ វង្សសាវ៉ាត់ ក៏បានជួយជ្រោមជ្រែងកូនស្រីរហូតក្លាយជាអ្នក ចម្រៀងល្បីឈ្មោះ ។ រហូតមកដល់ពេលនេះនាងឈើរីបានល្បីឈ្មោះតាម រយៈបទចម្រៀងក្នុងស្រទាប់យុវជនថៃជាច្រើនបទ ក្នុងនោះរួមមានដូចជា បទ”ស្រឡាញ់មនុស្សប្លែកមុខ”ជាដើម។

   ក្រៅពីនេះ អ្នកចម្រៀងល្បីឈ្មោះកូនស្រីអតីតនាយករដ្ឋមន្ត្រីរូបនេះ កាលពីឆ្នាំ២០០២ បានបង្កើតវង់តន្ត្រីមួយមានឈ្មោះថា ”ហ្វាយអ៊ីនធេន ធើមែន” ហើយបានចេញអាល់ប៊ុមចម្រៀងជាច្រើនផង ក្នុងនោះមានឈ្មោះដូចជា”ឈើរីស៊ីគ្រេតស៊ី”ដែលសុទ្ធតែជាបទពេញនិយម ។

   ទាក់ទិននឹងកូនស្រីស្រឡាញ់កូនអ្នកនយោបាយកម្ពុជានេះ លោកស៊ុម ឆាយវង្សសាវ៉ាត់ បានថ្លែងបញ្ជាក់ថា ពិតជាកើតរឿងបែបនេះមែន ហើយកូនស្រីលោកក៏បានធ្វើការពិភាក្សារឿងនេះជាមួយឪពុកម្តាយផងដែរ។ កូនស្រីលោកជាមនុស្សល្អ ស្តាប់ឪពុកម្តាយ ដោយធ្វើអ្វីមិនឱ្យហួសគន្លងធម៌ ឬប្រពៃណីល្អនោះឡើយ ។ កន្លងមកលោកក៏ធ្លាប់ ឃើញកូនស្រីបានទូរស័ព្ទទំនាក់ទំនងជាមួយកំលោះកម្ពុជារូបនេះជាញឹកញាប់ ហើយលោកក៏មិនបានហាមឃាត់អ្វីដែរ ដោយសារកូនស្រីធំពេញវ័យ និងចេះគិតគូរខ្លួនឯងហើយ ដូចនេះពួកគេមានសិទ្ធិក្នុងការស្រឡាញ់មនុស្សដែលខ្លួន ចូលចិត្ត ដែលនេះជាសិទ្ធិរបស់កំលោះ ក្រមុំ។

   ចំណែកពាក់ព័ន្ធនឹងការរៀបអាពាហ៍ពិពាហ៍វិញ លោកវង្សសាវ៉ាត់ បានគូសបញ្ជាក់ថា មិនទាន់នៅពេលនេះទេ ហើយបញ្ហាទាំងអស់អាស្រ័យលើកូនស្រីជាអ្នកសម្រេចចិត្តប៉ុណ្ណោះ។ ទោះបីយ៉ាងណា លោកបានធ្វើការច្រានចោលនូវពាក្យចោទនិយាយថា នៅពេលកូនស្រីរបស់លោករៀបអាពាហ៍ពិពាហ៍នឹងមានវត្តមានលោក ថាក់ស៊ីនចូលរួម ដោយលោកបានអះអាងថា រឿងនេះជាការចោទប្រកាន់ ហួសហេតុនិងមិនសមហេតុផល។

   ក្រៅពីនេះ លោកក៏បានសុំកុំឱ្យអ្នកនយោបាយថៃ ក៏ដូចជាមជ្ឈដ្នានទូទៅចាប់អារម្មណ៍ ឬវាយប្រហារកូនស្រីលោកឡើយ ព្រោះលោកយល់ថា នេះវាជាសិទ្ធិរវាងកំលោះក្រមុំស្រឡាញ់ គ្នាដែលជារឿងធម្មតា ។ លោកបានបញ្ជាក់ពីរឿងនេះថា ”កុំយករឿងនយោបាយមកពាក់ព័ន្ធជាមួយកូនស្រីខ្ញុំ រឿងនេះជារឿងផ្ទាល់ខ្លួន ហើយកុំយករឿងកំលោះក្រមុំស្រឡាញ់គ្នា ហើយយករឿងនយោបាយមកពាក់ព័ន្ធ”។

   រីឯប្រភពស្និទ្ធនឹងគ្រួសារលោក សៀង ណាំ ក៏បានអះអាងបញ្ជាក់ពីរឿងនេះថាពិតមែន ។ ប្រភពនិយាយថា “...មិនទាន់មានការភ្ជាប់ពាក្យទេ តែកញ្ញាឈើរី បានចេញចូលកម្ពុជាជាធម្មតា” ៕ S

Monday, July 30, 2012

ខឹងប្រពន្ធរឿងបាត់លុយ៣០ម៉ឺុនរៀលផឹកថ្នាំពុលសម្លាប់ខ្លួន

ខេត្តកំពត ៖ យុវជនម្នាក់ខឹងប្រពន្ធរឿងបាត់លុយ៣០ម៉ឺនរៀលផឹកថ្នាំសម្លាប់ សត្វល្អិតធ្វើអត្តឃាតកាលពីវេលាម៉ោង៧និង៣០នាទីយប់ថ្ងៃទី២៩ កក្កដា ២០១២ នៅផ្ទះស្ថិតក្នុងភូមិអង្គជ័យ ឃុំដំណាក់កន្ទួតខាងត្បូង ស្រុកកំពង់ត្រាច។

យុវជនដែលគិតខ្លីឈ្មោះទិត្យ សីហា អាយុ២០ឆ្នាំ រស់នៅភូមិកើតហេតុខាងលើ ។ ប្រភពព័ត៌មានឱ្យដឹងថា យុវជនរងគ្រោះទើបតែរៀបការប្រពន្ធបានជាង៣ខែប៉ុណ្ណោះ ហើយប្រពន្ធក៏មានផ្ទៃពោះផងដែរ ។ ប្រភពបន្តថា មុនពេលកើតហេតុ២ថ្ងៃគេឃើញប្តីប្រពន្ធមួយគូនេះបានឈ្លោះ ប្រកែកគ្នា គឺផ្តើមចេញពីរឿងលុយ ។

ពលរដ្ឋបឹងកក់បញ្ចេញប្រតិកម្មតបនឹងការចោទប្រកាន់របស់អភិបាលក្រុងភ្នំពេញ

អ្នកភូមិបឹងកក់ នៅក្នុងសន្និសីទកាសែត ឆ្លើយតបទៅនឹងលោកកែប ជុតិមា កាលពីម្សិលមិញ។
រូបថត ចរិយ៉ា

ភ្នំពេញៈ ពលរដ្ឋក្នុងសហគមន៍បឹងកក់ប្រមាណ ៥០ នាក់ កាលពីម្សិលមិញ បានបញ្ចេញប្រតិកម្មប្រឆាំងតបទៅនឹងលោក កែប ជុតិមា អភិបាលរាជធានី ដែលថា ពលរដ្ឋដែលអាជ្ញាធរមិនផ្តល់ប័ណ្ណកម្មសិទ្ធិដីធ្លីឲ្យ គឺជាអ្នករស់នៅលើទឹកដែលជាដីរបស់រដ្ឋ ហើយគ្មានឯកសារគ្រប់គ្រាន់។
ការបញ្ចេញប្រតិកម្មតបរបស់ប្រជាសហគមន៍នេះ បានធ្វើឡើងពីរថ្ងៃ បន្ទាប់ពីលោក កែប ជុតិមា បានថ្លែងតាមបណ្ដាញទូរទស្សន៍ក្នុងស្រុកមួយកាលពីថ្ងៃសុក្រ សប្តាហ៍មុនថា មកទល់ពេលនេះ ប្រជាពលរដ្ឋក្នុងតំបន់បឹងកក់ជាង៨០០ គ្រួសារទទួលបានប្លង់កម្មសិទ្ធិដីធ្លីពីអាជ្ញាធររាជធានីភ្នំពេញ ហើយ រីឯ៦៤ គ្រួសារទៀត ជាអ្នករស់នៅលើទឹក ដែលជាដីរបស់រដ្ឋហើយអ្នកទាំងនោះ គ្មានឯកសារគ្រប់គ្រាន់ និងបានចោទប្រកាន់ពួកគាត់ថា «យករឿងបឹងកក់ជារឿងនយោបាយ ចងជើងគាត់[កែប ជុតិមា]»។
លោកចាន់ ពុទ្ធិស័ក្តិ ប្រជាពលរដ្ឋក្នុងសហគមន៍បឹងកក់មកពីភូមិមួយ សង្កាត់ស្រះចក ខណ្ឌដូនពេញ ដែលនៅមិនទាន់ទទួលបានប្លង់កម្មសិទ្ធិដីធ្លី ពីសាលារាជធានីភ្នំពេញបានថ្លែងប្រាប់អ្នកសារព័ត៌មាន កាលពីម្សិលមិញ នៅក្នុងសន្និសីទសារព័ត៌មានមួយ ដោយច្រានចោលចំពោះការអះអាងរបស់លោកកែប ជុតិមា។
លោកបានថ្លែងថា៖«ខ្ញុំយល់ថា ការចោទប្រកាន់របស់គាត់[កែប ជុតិមា]មកលើយើងខ្ញុំបែបនេះ គឺជាលេសដោះសា ដែលមិនមានការទទួលខុសត្រូវ និងជាការព្យាយាមបិទបាំងនូវអំពើអាក្រក់របស់មន្ត្រីក្រោមឱវាទ របស់គាត់មួយចំនួន ដែលបានប៉ុនប៉ងកេងប្រវ័ញ្ចយកចំណែកដី ពីដីទំហំ ១២,៤៤ ហិកតា ពីប្រជាពលរដ្ឋក្នុងសហគមន៍បឹងកក់»។
លោកបានបន្តថា មកទល់ពេលនេះ ប្រជាពលរដ្ឋ ដែលនៅសេសសល់មិនទាន់ទទួលបានប្លង់កម្មសិទ្ធិដីធ្លី មានចំនួន ៥៨គ្រួសារ ដែលចំនួននេះ រាប់បញ្ចូលទាំងប្រជាពលរដ្ឋ ក្នុងភូមិ ១ ចំនួន ១៨ គ្រួសារ ដែលផ្ទះរបស់ពួកគេ ត្រូវបានក្រុមហ៊ុនស៊ូកាគូអ៊ីន រួមសហការជាមួយអាជ្ញាធររាជធានី បូមខ្សាច់កប់ពន្លិច និងវាយបំផ្លាញដោយខុសច្បាប់ ព្រមទាំងប្រជាពលរដ្ឋ ដែលត្រូវបានអាជ្ញាធររាជធានីភ្នំពេញ កាត់ចេញពីគម្រោងទទួលបានប្លង់កម្មសិទ្ធិ ពីចំណែកដី១២,៤៤ ហិកតា។
ខណៈនោះដែរ ក្រុមអ្នកភូមិមួយចំនួនទៀត បាននិយាយថា នេះមិនមែនជាលើកទីមួយទេ ហើយក៏មិនមែនចំពោះតែប្រជាពលរដ្ឋក្នុងសហគមន៍បឹងកក់ដែរ ដែលរងនូវការចោទប្រកាន់ និងការលាបពណ៌ឲ្យជាប់ជំពាក់ជ្រៅទៅក្នុងរឿងនយោបាយបែបនេះ ពីលោក កែប ជុតិមា។ កន្លងមកប្រជាពលរដ្ឋរាប់ពាន់គ្រួសារ ដែលរងការបណ្តេញចេញពីលំនៅដ្ឋាន ដូចជា ប្រជាពលរដ្ឋ នៅសហគមន៍ដីក្រហម សម្បុកចាបក្រុម ៧៨ សហគមន៍រីករាយ បុរីកីឡា និងសហគមន៍មួយចំនួនទៀត សុទ្ធតែរងនូវការចោទប្រកាន់ថា ជាសកម្មជនគណបក្សប្រឆាំង បម្រើមាគ៌ានយោបាយបក្សប្រឆាំង ដើម្បី «បំផ្លិចបំផ្លាញមុខមាត់រដ្ឋាភិបាលឬគណបក្សកាន់អំណាច»។
អ្នកស្រីហេង មុំ តំណាងពលរដ្ឋ ភូមិ ២២ ដែលនៅមិនទាន់ទទួលបានប័ណ្ណសម្គាល់អចលនវត្ថុ ពីសាលារាជធានីភ្នំពេញ ដែរនោះបាននិយាយថា ពួកគាត់មានឯកសារគ្រប់គ្រាន់ ដើម្បីបញ្ជាក់ថា ពួកគាត់មិនមែនរស់នៅលើទឹកទេ ហើយឯកសារទាំងនោះ មានការចុះហត្ថលេខា និងបោះត្រាទទួលស្គាល់ ពីអាជ្ញាធរ ភូមិ ឃុំ ខណ្ឌ និងសាលារាជធានីថែមទៀត។
អ្នកស្រីបានថ្លែងឲ្យដឹងថា៖ «យើងនឹងនាំយកឯកសារទាំងនេះ ទៅបង្ហាញនិងដាក់ជូនគាត់ ដើម្បីឲ្យគាត់ពិនិត្យសាជាថ្មី ហើយយើងនឹងទទូចសុំឲ្យគាត់ចាត់ក្រុមការងារ មកចុះបោះបង្គោលកំណត់ព្រំប្រទល់ដី១២,៤៤ ហិកតាឲ្យពួកយើងខ្ញុំ ព្រោះវាជាមូលដ្ឋាន ក្នុងការដោះស្រាយបញ្ចប់វិវាទដ៏រ៉ាំរ៉ៃ រវាងអាជ្ញាធរ និងប្រជាសហគមន៍យើងខ្ញុំ»។
លោកអំ សំអាត ទីប្រឹក្សាបច្ចេកទេស ជាន់ខ្ពស់នៃអង្គការការពារសិទ្ធិមនុស្ស លីកាដូ បានថ្លែងថា អ្វីដែលសំខាន់នៅពេលនេះ អាជ្ញាធររាជធានីភ្នំពេញ គួរតែពន្លឿនការងារបោះបង្គោលកំណត់ព្រំប្រទល់ដី ១២,៤៤ហិកតា ដែលលោកនាយករដ្ឋមន្ត្រីហ៊ុន សែន បានកាត់ចែកជូនប្រជាពលរដ្ឋទើបជាការប្រសើរ ។ ការលាបពណ៌ប្រជាពលរដ្ឋឲ្យជាប់ពាក់ព័ន្ធជ្រៅទៅក្នុងរឿងនយោបាយ នោះ វាគ្រាន់តែជាលេសមួយ ដែលត្រូវបានគេមើលឃើញថា គ្មានការទទួលខុសត្រូវ ក្នុងការដោះស្រាយបញ្ហាតែប៉ុណ្ណោះ។
លោកបានថ្លែងថា៖ «ខ្ញុំបារម្ភថា បញ្ហាដីធ្លី វាអាចនឹងផ្ទុះកក្រើកសាជាថ្មី ក្រោយការបោះឆ្នោតជាតិឆ្នាំ ២០១៣ ប្រសិនបើអាជ្ញាធររដ្ឋាភិបាល មិនមានការដោះស្រាយឲ្យបានចប់សព្វគ្រប់ពីឥឡូវនេះទេ»។
លោក អភិបាលរាជធានីកែប ជុតិមា មិនបានផ្ដល់ការពន្យល់ ជុំវិញការលើកឡើងរបស់អ្នកភូមិបឹងកក់ ដែលមានប្រតិកម្មប្រឆាំងតប ទៅនឹងរូបលោកនោះទេ នៅពេលដែលភ្នំពេញ ប៉ុស្តិ៍ទាក់ទងបានកាលពីម្សិលមិញ។
លោក កែប ជុតិមា បានចុចទទួលទូរស័ព្ទ និងមានប្រសាសន៍ថា «អាឡូ ជម្រាបសួរ» ប៉ុន្តែលោក មិនបានមានប្រសាសន៍អ្វីឡើយ នៅពេលដែលប្រាប់ថា ទូរស័ព្ទពីកាសែតភ្នំពេញ ប៉ុស្តិ៍។ នៅពេលទូរស័ព្ទទៅម្តងទៀតលោកក៏បានចុចទទួលម្តងទៀតដែរ ក៏ប៉ុន្តែលោក នៅតែមិនបានមានប្រសាសន៍ឆ្លើយតបទៅនឹងការចោទសួរឡើយ៕(Khmerpost)

បុរសចិន ដឹកស្រីស្នេហ៍ខ្មែរ ទំនង់លង់សម្រស់ ភ្លេចមើលមុខ បើកបុកម៉ូតូបាក់ ភ្លៅម្នាក់

ភ្នំពេញ៖ បុរសចិនដឹកស្រីខ្មែរ ត្រាច់ចរកណ្ដាលរាត្រី ទំនងលង់សម្រស់ នាងភ្លេចបានមើលផ្លូវ ក៍ទៅបុកម៉ូតូ ដែលកំពុងជិះស្របទិសគ្នា បណ្ដាលឲ្យបុរសម្ចាស់ ម៉ូតូបាក់ភ្លៅខាងឆ្វេង។ ពេលបើកបុក ជនរងគ្រោះហើយ ព្យាយាមបើករត់គេច ប៉ុន្ដែត្រូវនគរបាលប្រចាំគោលដៅដេញចាប់បាន នៅ មុខព្រលានយន្ដហោះ អន្ដរជាតិ ភ្នំពេញ។
ហេតុការណ៍គ្រោះថ្នាក់ចរាចរ នេះកើតឡើងកាលពីវេលាម៉ោង១១ និង៥០នាទីយប់ ថ្ងៃទី២៩ ខែកក្កដា ឆ្នាំ ២០១២ នៅជិតផ្សារទឹកថ្លា តាមបណ្ដោយមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ បង្ករឡើងដោយបុរសជាតិចិន មានអាយុប្រមាណ៤០ឆ្នាំ បើកបររថយន្ដម៉ាកលុច្សស៊ីស៤៧០ ដឹកស្រីក្មេងម្នាក់ ក្នុងទិសដៅពីកើតទៅលិច។
ប្រភពពីនគរបាលមូលដ្ឋានបានឲ្យដឹងទៀតថា ពេលមកដល់កន្លែងកើតហេតុរថយន្ដក៍រេចង្កូតទៅបុក ម៉ូតូម៉ាកគ្រីសអង្គរ ពណ៌ក្រហមស៊េរីចាស់ ពីក្រោយយ៉ាងពេញទំហ៊ឹង បណ្ដាលឲ្យអ្នក បើកបរម៉ូតូដួលខ្ទាត ទៅចិញ្ចើមថ្នល់ហើយត្រូវម៉ូតូគៀបបាក់ភ្លៅខាងឆ្វេងត្រូវបានសមត្ថកិច្ច ហៅរថយន្ដដឹកយក ទៅសង្គ្រោះនៅ មន្ទីរពេទ្យកាល់ម៉ែត។ចំណែកជនជាតិចិននោះមិនត្រឹម តែមិនឈប់មើលជនរងគ្រោះទេ បានព្យាយាមបើក រត់គេច ហើយត្រូវក្រុមនគរបាលខណ្ឌ សែនសុខដែលនៅចាំគោល ដៅល្បាតផ្សារដីហុយដេញ ចាប់បាន នៅព្រលានយន្ដហោះ ពោធិចិនតុង។ ក្រោយការសាកសួរបុរសជាតិចិននោះពិបាកនិយាយគ្នា សមត្ថកិច្ច ស្ទួចយក រថយន្ដលុច្សស៊ីស៤៧០ នោះទៅដោះស្រាយនៅការិយាលយ័នគរបាលចរាចរជើងគោករាជ ធានីភ្នំពេញ ព្រោះកន្លែងនោះទើបមានអ្នកបកប្រែ ឆាប់ស្ដាប់គ្នាបាន៕(dapnews)

បើករថយន្តបុក គេហើយរត់ ឡានពេទ្យមកដល់ បើកជៀសជនរងគ្រោះទៀត!

វីដេអូនេះត្រូវបានគេប្រើ DVR ដាក់ក្នុងរថយន្តថតជាប់កាលពីម្សិលមិញនេះ ជាហេតុការណ៍គ្រោះ
ថ្នាក់ចរាចរណ៍មួយដែលបានកើតឡើងនៅតៃវ៉ាន់ ដោយមានបុរសម្នាក់បានជិះរថយន្តរបស់ខ្លួន
ទៅបុកអ្នកដំណើរជិះម៉ូតូ Scooter បណ្ដាលអោយពួកគេដួល ហើយអ្នកបើករថយន្តបង្ករហេតុនេះ
ទំនងដូចជាមិនចង់ទទួលខុសត្រូវនោះទេ ស្រាប់តែបើករថយន្តគិចយក តែប្រាស់អាយុតែម្ដង។

តែអ្វីដែលគួរអោយហួសចិត្តខ្លាំងមែនទែននោះគឺថាមានរថយន្តសង្រ្គោះបានមកដល់ឃើញមាន
អ្នកដំណើររងរបួសហើយ ស្រាប់តែបើកគិចចេញទៅទៀត មិនដឹងជាគាត់មានអ្នកជំងឺជិតស្លាប់ក្នុង
រថយន្តសង្រ្គោះ ឬក៏មិនខ្វល់នឹងអ្នកដំណើរ ឬយ៉ាងណា។ មើលវីដេអូខាងក្រោមនេះហើយអ្នកទាំង
អស់គ្នាគួរចងចាំថាត្រូវបើកបរប្រកបដោយភាពទទួលខុសត្រូវ និងចេះជួយយកអាសារអ្នកដទៃផង
ព្រោះសុទ្ធតែជាខ្មែរគ្នាឯងទេ៕

AirAsia អាចបន្តការហោះហើរទៅអឺរ៉ុបជាមួយ Airbus A330 ថ្មី

យន្តហោះ Airbus A340 របស់ក្រុមហ៊ុន AirAsia X។ Reuters

ក្រុងស៊ីដនីៈ ក្រុមហ៊ុនអាកាសចរណ៍ AirAsia X Sdn ដែលជាក្រុមហ៊ុនផ្តល់សេវាហោះហើរផ្លូវឆ្ងាយរបស់ក្រុមហ៊ុនអាកាស ចរណ៍ផ្តល់សេវាហោះហើរតម្លៃទាបរបស់អាស៊ី បានឲ្យដឹងថា ផែនការបញ្ជាទិញយន្តហោះ A330 ស៊េរីថ្មី ពីក្រុមហ៊ុនផលិតយន្តហោះ Airbus អាចធ្វើឲ្យក្រុមហ៊ុនអាកាសចរណ៍របស់ខ្លួន ស្តារអាជីវកម្មផ្តល់សេវាហោះហើរនៅតំបន់អឺរ៉ុបឡើងវិញ ដែលអាជីវកម្មនេះ មិនសូវបានទទួលជោគជ័យ ដោយសារការប្រើប្រាស់យន្តហោះចាស់ៗ។
លោក Azran Osman Rani អគ្គនាយកក្រុមហ៊ុនអាកាសចរណ៍ AirAsia បានឲ្យដឹងក្នុងបទសម្ភាសមួយនៅទីក្រុងស៊ីដនីកាលពីម្សិលមិញថា៖ «យើងនឹងផ្តល់សេវាហោះហើរទៅកាន់តំបន់អឺរ៉ុបបានកាន់តែច្រើន ដោយប្រើប្រាស់យន្តហោះថ្មីៗទាំងនេះ»។ លោក បានបដិសេធមិនប្រាប់ពីចំនួនយន្តហោះ A330 ដែលក្រុមហ៊ុនអាកាសចរណ៍របស់ប្រទេសម៉ាឡេស៊ីនេះ នឹងបញ្ជាទិញ ឬពេលវេលាដែលក្រុមហ៊ុននេះ នឹងចាប់ផ្តើមផ្តល់សេវាហោះហើរទៅអឺរ៉ុបជាថ្មីនោះទេ។
លោក Azran មានប្រសាសន៍ថា៖ «យន្តហោះ A330 ថ្មី នឹងអាចផ្តល់ប្រាក់ចំណេញច្រើនសម្រាប់ការផ្តល់សេវាហោះហើរទៅ កាន់តំបន់អឺរ៉ុប ដោយសារយន្តហោះទាំងនោះ ស៊ីសាំងតិច និងមានសមត្ថភាពខ្ពស់។ ក្រុមហ៊ុន AirAsia X បានបញ្ចប់ការផ្តល់សេវាហោះហើរទៅកាន់តំបន់អឺរ៉ុបកាលពីដើម ឆ្នាំនេះ ដោយសារតម្លៃប្រេងខ្ពស់ តម្រូវការធ្លាក់ចុះ និងដោយសារការហូតពន្ធលើការបញ្ចេញកាបូន។
ក្រុមហ៊ុនផលិត យន្តហោះ Airbus បានប្រកាសពីផែនការផលិតយន្តហោះ A330 ដែលមានបំពាក់ម៉ាស៊ីនភ្លោះកាលពីដើមខែនេះ ដើម្បីប្រកួតប្រជែងជាមួយនឹងយន្តហោះម៉ូដែល 787 និងយន្តហោះម៉ូដែល 777 របស់ក្រុមហ៊ុនផលិតយន្តហោះ Boeing។ យន្តហោះម៉ូដែលថ្មីនេះ ដែលនឹងចាប់ផ្តើមផ្តល់សេវាហោះហើរនៅឆ្នាំ២០១៥ នឹងប្រើប្រាស់បច្ចេកវិទ្យាពីយន្តហោះម៉ូដែល A350 ដើម្បីបង្កើនចំណាត់ថ្នាក់ និងសមត្ថភាពរបស់យន្តហោះប្រភេទនេះ។
លោក Azran មានប្រសាសន៍បន្តថា ក្រុមហ៊ុនអាកាសចរណ៍ AirAsia X ដែលកំពុងផ្តល់សេវាហោះហើរនៅតំបន់អាស៊ី និងប្រទេសអូស្រ្តាលី ក៏មានផែនការលក់ភាគហ៊ុនប្រមាណពី ២៥ ភាគរយ ទៅ ៣០ ភាគរយផងដែរនៅក្នុងការបោះផ្សាយមូលបត្រជាសាធារណៈលើកដំបូង(IPO) របស់ខ្លួន៕ BP

ខ្ចៅចល័តត្រូវប៉ូលិសធ្វើបាប

ភ្នំពេញ: ដូចជាអ្នកក្រីក្រជាច្រើនទៀតដែរនៅតាមបណ្តាខេត្តនានា ចាន់ណា បានធ្វើដំណើរមកស្វែងរកការងារធ្វើនៅភ្នំពេញ ដោយសង្ឃឹមថា នឹងមានជីវវភាពប្រសើរជាងនៅតំបន់ជនបទ។ ជាមួយនឹងដើមទន់តិចតួច ចាន់ណា បានចាប់យកមុខរបរមួយប្រហែលជាវាមានទំនាក់ទំនងជាមួយនឹងជីវិតរបស់នាង នៅជនបទ។ នោះគឺការអូសរទេះលក់ខ្ចៅពីមួយកន្លែងទៅមួយកន្លែងនៅក្នុងទីក្រុង ភ្នំពេញ។

ចាន់ ណា ដែលមានអាយុទើបតែ ១៦ឆ្នាំ បានអូសរទេះលក់ខ្ចៅពីផ្សារសូរិយា សំដៅទៅមុខវាំង និងគោលដៅចុងក្រោយនៅមុខណាហ្គា ហើយលក់ខ្ចៅនេះជារៀងរាល់ថ្ងៃ។ នាងលក់ខ្ចៅបានពី ៨ ទៅ ១០ម៉ឺនរៀលក្នុងមួយថ្ងៃ រីឯខ្ចៅពី ១ទៅ ២តៅ។

ចាន់ណា បានប្រាប់ឲ្យដឹងថា “ខ្ញុំមានលក់ខ្ចៅពីរប្រភេទ គឺខ្ចៅទន្លេ និងខ្ចៅបឹង។ ខ្ញុំទិញចៅនេះមកគិតជាតៅមានតម្លៃពី៣ ទៅ ៤ម៉ឺនរៀល ហើយខ្ញុំលក់ចេញវិញនៅពេលវាឆ្អិនគិតកំប៉ុង ក្នុងមួយកំប៉ុងខ្ចៅ ២០០០រៀល”។

នាងបានប្រាប់ពីរបៀបស្ងោរខ្ចៅនេះ ឲ្យដឹងថា “យើងត្រូវខ្ចៅនោះទៅត្រាំទឹកឲ្យបានមួយយប់ទល់ភ្លឺសិនទើបយកវា ទៅស្ងោ។ ឯការសោ្ងវា គឺត្រូវដាំទឹកឲ្យពុះសិន រូចដាក់គល់ស្លឹកគ្រៃ ម្តេង ស្លឹកគ្រៃ និងស្លឹកក្រូច។ បន្ទាប់មកទើបផ្តើមបង់អំបិល ស្ករ និងប៊ីឆេងជាការស្រេច។ ចំពោះរយៈពេលស្ងោ គឺអាស្រ័យទៅតាមខ្ចៅតិច រឺច្រើន។ បើច្រើន គឺ៣០នាទី បើតិចវិញគិតតាមហ្នឹងដែរ”។

ចាន់ណា បានបន្តទៀតថា “ទឹកជ្រលក់ខ្ចៅនេះ វាមានពីរប្រភេទ គឺទឹកត្រីកោះកុង និងអំបិលម្រិចក្រូចឆ្មារ។ បើនិយាយពីការលក់ខ្ចៅនេះដែរ ខ្ញុំលក់ភាគច្រើនបាន ២តៅ។ នៅមានពេលខ្លះក៏សល់ទៀតផង ដោយសារមេឃភ្លៀង”។

បន្ថែមទៅលើអាកាសធាតុដែលរារាំងដល់របរ របស់ ចាន់ណា នោះ អាជ្ញាធរពេលខ្លះ ក៏បានធ្វើបាបមុខរបរចល័តរបស់នាងផងដែរ ដែលត្រូវឲ្យនាងត្រូវតែមានភ្នែករវាសរវៃ ដើម្បីគេចចេញពីការចាប់ពិន័យ។

នាងបាននិយាយថា “ដោយសារស្ថានភាពគ្រួសារមានការលំបាកខ្លាំងពេក ទើបធ្វើឲ្យខ្ញុំមកប្រកបរបរជាអ្នកលក់ខ្ចៅដូច្នេះ។ ប៉ុន្តែ ការលក់នេះ ត្រូវបានប៉ូលិសដេញ និងចាប់ទៀតផង”។

នាងបាន បញ្ជាក់ថា “ខ្ញុំត្រូវបានប៉ូលិសចាប់បានចំនួនពីរដងមកហើយ។ ចាប់បានលើកទី១ ត្រូវបង់លុយពី ១៥ ទៅ ២០ដុល្លារ ឯលើកទី២ គឺអស់ ១០ម៉ឺន។ ខ្ញុំឆ្ងល់ណាស់ហេតុអ្វីបានជាគេមកដេញខ្ញុំ? ខ្ញុំគ្រាន់តែជាអ្នកលក់ខ្ចៅប៉ុណ្ណឹងសោះ!”៕

Sunday, July 29, 2012

ក្រុមឧទ្ទាម ភាគខាងត្បូងថៃ បាញ់សម្លាប់ យោធា ៤នាក់ និង របួស២នាក់

ប៉ាតានី៖ ហេតុការណ៍បាញ់ ប្រហាររវាង ក្រុមបះបោរ ភាគខាងត្បូង ប្រទេសថៃ និង យោធាថៃ នៅក្នុងខេត្ត ប៉ាតានី រយៈពេលប្រាំនាទី បណ្តាលឲ្យ យោធាថៃ ស្លាប់៤នាក់ និង របូស ២នាក់។
យោងតាមសារព័ត៌មាន INN នៅថ្ងៃ សៅរ៍ ទី ២៨ ខែ កក្កដា នេះបានឲ្យដឹងថា មានហេតុការណ៍បើកឆាកប្រយុទ្ធ រយៈពេលប្រាំនាទីនៅថ្ងៃ សៅរ៍នេះ ដោយក្រុមបះបោរភាគខាងត្បូងថៃ មិនដឹងចំនួន បានប្រើប្រាស់អាវុធ សង្គ្រាម បាញ់ប្រហារ ទៅលើយោធាថៃ ដែលកំពុងយាមល្បាតនៅក្នុងស្រុក ម៉ាយ៉ ខេត្ត ប៉ាតានី ភាគខាត្បូង ប្រទេសថៃ បណ្តាឲ្យយោធាថៃ ៤នាក់ ស្លាប់នៅនឹងកន្លែងកើតហេតុ និង ២ នាក់របួសត្រូវបានបញ្ជួនទៅកាន់ មន្ទីរ ពេទ្យប៉ាតានីសង្គ្រោះជីវិតផងដែរ។
តាមការរៀបរាប់របស់យោធាថៃម្នាក់ ប្រចាំការ នៅតំបន់កើតហេតុខាងលើ ខណៈដែលក្រុមយោធាល្បាត បានធ្វើដំណើរត្រឡប់ទៅមូលដ្ឋានយោធា ដោយរថយន្ត ប៊ីកអាប់ បីគ្រឿង និង ផ្ទុកពលទាហាន ១៥ នាក់ ស្រាប់តែមកដល់កន្លែងកើតហេតុ ក្រុមឧទ្ទាមប្រើប្រាស់ប្រភេទអាវុធសង្គ្រាម M16 បាញ់សម្រុកមកលើយោធា ល្បាតតែម្តង ទើបបណ្តាលឲ្យទាហាន ស្លាប់ និង របួសយ៉ាងដូច្នេះ។
អាជ្ញាធរខេត្ត ប៉ាតានី បានបញ្ជាក់ នាអំឡុងបុណ្យ រ៉ាម៉ាដន ដែលជាទំនៀមទម្លាប់សាសនាមូស្លីមនោះ ជនឧទ្ទាមតែងតែឆ្លៀត ឱកាសបង្កភាពភ័យខ្លាច និង អសន្តិសុខនៅក្នុងតំបន់តែប៉ុណ្ណោះ៕

មានការជឿនលឿនតិចតួចក្នុងការរកយុត្តិធម៌សម្រាប់ករណីឃាតកម្មសកម្មជនបរិដ្ឋាន

បីខែក្រោយពីឃាតកម្មលើលោក ឈុត វុទ្ធី ដំណើរការឆ្ពោះទៅរកយុត្តិធម៌ហាក់បីដូចជានៅវែងឆ្ងាយទៀតនៅឡើយ។ ក្រុមគ្រួសារជនរងគ្រោះ ជនជាប់សង្ស័យ មន្ដ្រីសិទ្ធិមនុស្សនិងមន្ដ្រីតុលាការសុទ្ធតែមិនទាន់មានភាព ប្រាកដប្រជាអំពីពេលវេលានៃសវនាការ។

ប្រធានអង្គការការពារធនធានធម្មជាតិនិងជាសកម្មជនការពារព្រៃឈើយ៉ាង សកម្ម លោក ឈុត វុទ្ធីត្រូវបានជនប្រដាប់អាវុធបានបាញ់សម្លាប់កាលពីថ្ងៃទី២៦ ខែមេសា នៅចំណុចវាល៣ នៃស្រុកមណ្ឌលសីមា ចម្ងាយប្រមាណជាង៦០គីឡូម៉ែតពីទីរួមខេត្តកោះកុង។ ឃាតកម្មកើតឡើងខណៈដែលលោកនិងអ្នកយកព័ត៌មានពីរនាក់ផ្សេងទៀតបាន ស៊ើបអង្កេតការកាប់បំផ្លាញព្រៃឈើខុសច្បាប់នៅទីតាំងក្រុមហ៊ុន Timbergreenលើជួរភ្នំក្រវាញ។

អាជ្ញាធរបានការសន្និដ្ឋានផ្សេងៗជាច្រើនពីមូលហេតុនៃអំពើហិង្សានេះ ក៏ប៉ុន្តែការសន្និដ្ឋានចុងក្រោយគឺថា កងរាជអាវុធហត្ថម្នាក់ឈ្មោះអ៊ីន រតនា បានបាញ់សម្លាប់លោកឈុត វុទ្ធី ហើយកាំភ្លើងអាកា ៤៧ ដែលមន្រ្តីប្រដាប់អាវុធរូបនេះបានប្រើក្នុងការបាញ់សម្លាប់លោក ឈុត វុទ្ធី បានរាកៃមកសម្លាប់គាត់វិញក្នុងពេលដែលភា្នក់ងារសន្តិសុខរបស់ ក្រុមហ៊ុន Timbergreen លោក រ៉ាន់ បូរ័ត្ន ព្យាយាមដណ្ដើមកាំភ្លើងពីរូបគាត់។ លោករ៉ាន់ បូរ័ត្ន បច្ចុប្បន្នកំពុងស្ថិតក្នុងការឃុំឃាំងជាបណ្ដោះអាសន្នក្រោមការចោទ ប្រកាន់ថា បានធ្វើឃាតមន្ដ្រីកងរាជអាវុធហត្ថដោយអចេតនា។ ប៉ុន្តែគ្រួសាររបស់ជនជាប់ចោទបានច្រានចោលការចោទប្រកាន់នេះ។

គ្រួសារលោកឈុត វុទ្ធី នឹងប្រារព្ធពិធីបុណ្យគម្រប់១០០ ថ្ងៃសម្រាប់សពរបស់លោកនៅថ្ងៃសៅរ៍នេះនៅក្នុងឃុំព្រែកឯង ស្រុកកៀនស្វាយ ខេត្តកណ្តាល។ ពិធីសាសនានេះនឹងមានអ្នកចូលរួមប្រមាណជា៥០០ នាក់និងព្រះសង្ឃចំនួនប្រាំពីរអង្គក្នុងនោះភាគច្រើនគឺជា មន្ដ្រីសង្គមស៊ីវិល។

លោកឆឺយ ឧត្តមរស្មី កូនប្រុសច្បងរបស់លោកឈុត វុទ្ធី មានប្រសាសន៍ថា លោកនិងក្រុមគ្រួសារមិនបានទទួលដំណឹងអ្វីឡើយពីតុលាការខេត្ត កោះកុង។

«អត់បានទទួលដំណឹងអីពីតុលាការសោះ។ សំខាន់ធ្វើបុណ្យសិនបន្ទាប់មកចាំខ្ញុំព្យាយាមតទៅទៀត»។

កូនប្រុសច្បងរបស់លោកឈុត វុទ្ធី

ក្រុមមន្ដ្រីអង្គការឃ្លាំមើលការរំលោភសិទ្ធិមនុស្សបានឲ្យដឹងថា សក្សីចំនួនប្រាំមួយរូបត្រូវបានសាកសួរដោយតុលាការរហូតមកទល់ពេល នេះ។ ក៏ប៉ុន្តែជនដែលត្រូវគេជឿថា អាចជាសក្សីសក្ដានុពលមិនត្រូវបានកោះហៅឲ្យចូលបំភ្លឺនោះទេ។

លោក នាង បូរ៉ាទីណូ អ្នកសម្របសម្រួលអង្គការការពារសិទ្ធិមនុស្សអាដហុកប្រចាំខេត្តកោះកុង មានប្រសាសន៍ថា នៅមានសក្សីចំនួនបីនាក់ទៀតដែលអាចជាសក្សីមានសារៈសំខាន់។

«សក្សីក្នុងការសាកសួររបស់ប៉េអឹមមានដល់ទៅប្រាំបួននាក់។ ចំណែកឯតុលាការក្នុងពេលបច្ចុប្បន្នបានត្រឹមតែប្រាំមួយនាក់»។

មន្ដ្រីសិទ្ធិមនុស្សដដែលបញ្ជាក់ថា ក្នុងចំណោមសក្សីដែលនៅសេសសល់មានបុរសពីរនាក់មានតួនាទីជាទាហាន ប៉ុន្តែបានបម្រើការជាសន្ដិសុខរបស់ក្រុម Timbergreen។ ម្នាក់ក្នុងចំណោមនោះគឺជាអ្នកឃាត់រថយន្តរបស់លោកឈុត វុទ្ធីមុនគេ។

«តាមការស្រាវជ្រាវ គាត់ក៏ជាអ្នកជាប់ពាក់ព័ន្ធក្នុងរឿងបញ្ជាកងកម្លាំងដែលបណ្តាលឲ្យ មានការបាញ់សម្លាប់លោកឈុត វុទ្ធី ដែរ»។

លោកឈុត វុទ្ធី គឺជាជនការពារបរិដ្ឋានយ៉ាងសកម្មម្នាក់នៅកម្ពុជា។ លោកបានដឹកនាំការតវ៉ារបស់ក្រុមប្រជាពលរដ្ឋប្រឆាំងនឹង ការកាប់បំផ្លាញព្រៃឡង់ដែលជាព្រៃនៅសេសសល់ដ៏ធំជាងគេចុងក្រោយរបស់ កម្ពុជារួមទាំងបានព្យាយាមស៊ើបអង្កេតលើការកាប់បំផ្លាញឈើប្រណិត ក្នុងខេត្តមួយចំនួនទៀតតាមជួរភ្នំក្រវាញដូចជាខេត្តពោធិ៍សាត់និង ខេត្តកោះកុងជាដើម។

លោក អ៊ីន គង់ជិត អ្នកសម្របសម្រួលរបស់អង្គការការពារសិទ្ធិមនុស្សលីកាដូ ប្រចាំខេត្តកោះកុងបានឲ្យដឹងថា ព័ត៌មានស្ដីពីដំណើរការរបស់តុលាការលើសំណុំរឿងឃាតកម្មលោកឈុត វុទ្ធីត្រូវបានរឹតត្បិត។

«សក្សីមិនចង់និយាយប្រាប់យើងដោយសារមន្រ្តីប៉េអឹម និងមន្ដ្រីតុលាការត្រូវគេនិយាយថាមិនចង់ឲ្យសក្សីនិយាយប្រាប់ខាង សិទ្ធិមនុស្ស»។

លោកចៅក្រមស៊ើបអង្កេត មីន មករា នៃសាលាដំបូងខេត្តកោះកុងមិនអធិប្បាយអំពីដំណើរការឆ្ពោះទៅរកការបិទ បញ្ចប់ការស៊ើបអង្កេតសំណុំរឿងអាស្រូវនេះទេ។ មួយវិញទៀតលោកក៏មិនទាន់ដឹងបាននៅឡើយថា ការជំនុំជម្រះសំណុំរឿងនេះអាចធ្វើទៅរួចពេលណាដែរ។

«រឿងនេះស្ថិតនៅលើចៅក្រមជំនុំជម្រះ»។

គណៈកម្មាការចម្រុះរបស់រដ្ឋាភិបាលបានដឹកនាំការស៊ើបអង្កេតរយៈពេល ត្រឹមមួយសប្ដាហ៍លើឃាតកម្មលោកឈុត វុទ្ធី រួចក៏បានបិទបញ្ចប់ការស៊ើបអង្កេតនោះទៅវិញដែលធ្វើឲ្យមាន ការរិះគន់ពីក្រុមសង្គមស៊ីវិលចំពោះអ្វីដែលបានរកឃើញនោះ។ ការស៊ើបអង្កេតបានសង្កត់ធ្ងន់ទៅលើមន្ដ្រីកងរាជអាវុធហត្ថអ៊ីន រតនា ថា បានបាញ់សម្លាប់លោកឈុត វុទ្ធី ហើយខ្មាន់កាំភ្លើងបានស្លាប់ដោយការរាកៃកាំភ្លើងក្នុងពេលដែលមាន ការដណ្តើមកាំភ្លើងពីលោករ៉ាន់ បូរត្ន័ ភា្នក់ងារសន្តិសុខរបស់ក្រុមហ៊ុន Timbergreen។

ឪពុកលោករ៉ាន់ បូរត្ន័ គឺលោក ហ៊ុន រ៉ាន់ បានច្រានចោលការជាប់ពាក់ព័ន្ធថា កូនរបស់គាត់បានបង្កអំពើមនុស្សឃាតដោយអចេតនាដូចការចោទប្រកាន់ នោះ។ នៅពេលនេះលោក ហ៊ុន រ៉ាន់ កំពុងរង់ចាំការកាត់ទោសបន្ទាប់ពីកូនរបស់គាត់ត្រូវចាប់ឃុំខ្លួន អស់រយៈពេលបីខែមកហើយ។

«ពិបាកចិត្តដែរតែមិនដឹងធ្វើដូចម្តេច។ ចាំមើលតុលាការកាត់ទោសយ៉ាងម៉េច»។

លោករ៉ាន់ បូរត្ន័គឺជាបុគ្គលតែម្នាក់គត់ដែលត្រូវចាប់ឃាត់ខ្លួនក្នុងអំពើ ឃាតកម្មលោកឈុត វុទ្ធី។ ក្រុមមន្ដ្រីសិទ្ធិមនុស្សព្រួយបារម្ភថា សំណុំរឿងឃាតកម្មនេះអាចនឹងត្រូវបិទចោលដោយសារតែជនសង្ស័យថា បានបាញ់សម្លាប់លោកឈុត វុទ្ធី ដោយផ្ទាល់បានស្លាប់ទៅហើយៗពុំមានជនជាប់ពាក់ព័ន្ធណាផ្សេងទៀត ត្រូវបានវែកមុខនោះ។

កាលពីថ្ងៃទី ១៤ ខែកក្កដានេះ លោក ស៊ុន សាមឿន ប្រធានមន្ទីរស្រាវជ្រាវយុត្តិធម៌និងជាមេបញ្ជាការរងកងរាជអាវុធហត្ថ ខេត្តកោះកុងត្រូវបានដកចេញពីដំណែង។ លោកស៊ុន សាមឿន ត្រូវអង្គការសង្គមស៊ីវិលជឿថា បានជាប់ពាក់ព័ន្ធនឹងការបញ្ជាកងកម្លាំងរបស់ខ្លួនក្នុងពេលដែលមាន ការបាញ់ប្រហារលោក ឈុត វុទ្ធីនោះ៕

High lander បុកអាយខន ខ្ទាតចូលតូបកាហ្វេ ប្រហែល១០ម៉ែត្រ រីឯម្ចាស់ បែកក្បាលសន្លប់

ភ្នំពេញ៖ គ្រោះថ្នាក់ចរាចរណ៍មួយ បានកើតឡើងដែលបង្ក ដោយរថយន្តម៉ាក Highlander បើកបរក្នុងល្បឿនលឿន ទៅបុកបុរសម្នាក់ ដែលកំពុងជិះម៉ូតូអាយខន ក្នុងទិសដៅស្របគ្នា បណ្តាលឱ្យខ្ទាតម៉ូតូ ចេញប្រហែលជា ១០ម៉ែត្រ ចូលទៅក្នុងរោងការហ្វេ នៅក្បែរនោះចំណែកឯម្ចាស់សន្លប់។

ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង ប្រមាណជា ៨យប់ថ្ងៃទី២៧ ខែកក្កដា ឆ្នាំ២០១២ នៅលើផ្លូវលេខ ៣៧១ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
បើតាមប្រភពព័ត៌មាន ពីសាក្សីនៅកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញបុរសម្នាក់ បានធ្វើដំណើរតាមបណ្តោយផ្លូវលេខ ៣៧១ ជិះម៉ូតូខាយខន ព័ត៌ផ្កាឈូក ក្នុងល្បឿនមធ្យម នៅជាយផ្លូវម្ខាង ពីទិសខាងជើងទៅត្បូង ហើយមកដល់ចំណុចខាងត្បូងជញ្ជីងថ្លឹង រថយន្តផ្លូវសឡា ស្រាប់តែមានរយន្ត មួយគ្រឿងម៉ាក Highlander ដែលបើកក្នុងល្បឿនលឿន ជិះទៅបុកពីខាងក្រោយ បណ្តាលឱ្យបុរស ដែលជាជនរងគ្រោះ ដួលបោកក្បាលទៅនឹងថ្នល់ បែកយ៉ាងដំណំសន្លប់នៅនឹងកន្លែង កើតហេតុតែម្តង ចំណែកឯម៉ូតូជនរងគ្រោះ បានខ្ទាតចេញ ប្រហែល១០ម៉ែត្រ ចូលតូបកាហ្វេ នៅក្បែរនោះ។ ក្រោយពេលកើត ហេតុរថយន្តបង្កបានបើកគេចទៅបាត់ ដោយសុវត្ថិភាព។
ប្រភពដដែលបាននិយាយទៀតថា ក្រោយពីមានហេតុការណ៍ គ្រោះថ្នាក់ចរាចរណ៍ ប្រហែលជាមួយម៉ោងគេមិន ឃើញមានសមត្ថកិច្ច ចុះទៅធ្វើការអន្តរាគមន៍ នោះទេ។ រហូតដល់ម៉ោងប្រហែលជា ៩យប់ ទើបមានរយន្ត សង្រ្គោះ មកដឹកជនរងគ្រោះ ទៅធ្វើការសង្គ្រោះបន្ទាន់។ ចំណែកឯជនរងគ្រោះមិនត្រូវបានគេ ស្គាល់អត្តសញ្ញាណនោះទេ។
រថយន្តដែលបានបង្ករគ្រោះថ្នាក់ ត្រូវបានគេឱ្យដឹងថា ម៉ាក High lander ពណ៌ទឹកប្រាក់ ប៉ុន្តែមិនចាំស្លាកលេខ ចំណែកឯម៉ូតូជនរងគ្រោះ ម៉ាកខាយខន ពាក់ស្លាក់លេខ ភ្នំពេញ 1AR-0917 ពណ៌ផ្កាឈូក ស៊េរីឆ្នាំ២០១០ ខូចខាតផ្នែកខាងមុខ។
ខណៈនោះដែរ ក៏មានរឿងដែលហួសចិត្តមួយទៀត ដែលមិនគួរឱ្យមាននៅក្នុងសង្គមខ្មែរ នាពេលច្ចុប្បន្ននេះ គឺ ស្របពេលដែលមានរយន្តសង្គ្រោះបាន មកដឹកជនរងគ្រោះ ទៅព្យាបាលនោះ ក៏មានក្រុមក្មេងស្ទាវ ៣នាក់ ដែលមានលក្ខណៈស្រវឹងទន់ខ្លួន បានមកអះអាងថា បុរសជនរងគ្រោះ នោះជាបងប្អូនរបស់ពួកគេ ហើយនៅពេល ដែលអ្នកសារព័ត៌មាន បានកំពុងតែថយផ្តិតយករូបភាពនោះ ស្រាប់តែក្មេងស្ទាវនោះ បានស្រែកជេរប្រមាថអ្នកកាសែត និងអ្នកដែលឈរមើល យ៉ាងខ្លាំង មិនតែប៉ុណ្ណោះគេបានគំរាម យកកាមេរ៉ារបស់អ្នកកាសែត បោកចោលទៀតផង៕

ចលនាប្រជាធិបតេយ្យសង្គ្រោះជាតិគ្រោងជួបជុំគ្នានៅថ្ងៃទី៣០

ចលនាប្រជាធិបតេយ្យសង្គ្រោះជាតិ គ្រោងបង្ហាញគោលដៅរួមរបស់ចលនានេះ ទៅដល់ថ្នាក់ដឹកនាំគណបក្ស សម រង្ស៊ី និងគណបក្ស សិទ្ធិមនុស្ស ជាលើកដំបូង នៅថ្ងៃទី៣០ ខែកក្កដា។

RFA/Sok Serey

២៨-តុលា-២០០៩: លោកស្រី មូរ សុខហួរ ផ្ដល់បទសម្ភាសន៍ដល់អ្នកសារព័ត៌មាននៅតុលាការសាលាឧទ្ធរណ៍ ក្នុងរាជធានីភ្នំពេញ។

សេចក្ដីជូនដំណឹងរបស់លេខាធិការដ្ឋានចលនាប្រជាធិបតេយ្យសង្គ្រោះ ជាតិ ចេញផ្សាយនៅថ្ងៃទី២៧ ខែកក្កដា អោយដឹងថា ថ្នាក់ដឹកនាំគណបក្ស សម រង្ស៊ី និងគណបក្ស សិទ្ធិមនុស្ស នៅតាមរាជធានី-ខេត្ត ទូទាំងប្រទេសកម្ពុជា នឹងជួបជុំគ្នានៅស្នាក់ការកណ្ដាលគណបក្ស សិទ្ធិមនុស្ស នៅក្នុងខណ្ឌទួលគោក នៅថ្ងៃទី៣០ ខែកក្កដា ខាងមុខ។
ក្នុងការជួបប្រជុំនោះ គឺជាការផ្សព្វផ្សាយជាលើកដំបូងពីស្មារតី នៃចលនាអ្នកប្រជាធិបតេយ្យសង្គ្រោះជាតិ ដែលទើបបង្កើតឡើង កាលពីថ្ងៃទី១៧ ខែកក្កដា នៅទីក្រុងម៉ានីល ប្រទេសហ្វីលីពីន ទៅតាមគម្រោងនៃការច្របាច់បញ្ចូលគ្នារវាងគណបក្ស សម រង្ស៊ី និងគណបក្ស សិទ្ធិមនុស្ស។
លេខាធិការចលនាប្រជាធិបតេយ្យសង្គ្រោះជាតិ និងជាតំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ មានប្រសាសន៍បន្ថែមថា ការជួបប្រជុំគឺជាការបញ្ជូនសាររួមពីកិច្ចសហការរវាងសមាជិក គណបក្សទាំងពីរ៖ «ថ្នាក់ដឹកនាំថ្នាក់ជាតិ ថ្នាក់ឃុំ ថ្នាក់មូលដ្ឋាន ក៏ត្រូវតែយល់នូវអ្វីដែលជាសេចក្ដីសម្រេច នៃថ្នាក់ជាតិ ដើម្បីចុះធ្វើកិច្ចសហប្រតិបត្តិការរួមកម្លាំងជាអ្នកប្រជាធិបតេយ្យ រូបភាពតែមួយ សារតែមួយ គោលការណ៍តែមួយ ដើម្បីប្រជាពលរដ្ឋអោយបាននៅគ្រប់ជាន់ថ្នាក់»។
សេចក្ដីជូនដំណឹងដដែលបានអោយដឹងទៀតថា អនុប្រធានចលនាប្រជាធិបតេយ្យសង្គ្រោះជាតិ លោក កឹម សុខា នឹងចូលរួមជំនួបនោះ ចំណែកប្រធានគណបក្ស សម រង្ស៊ី នឹងចូលរួមថ្លែងពីប្រទេសបារាំង តាមរយៈ វីដេអូ ខុនហ្វើរេន (Video Conference)៕

ពលរដ្ឋព្រួយបារម្ភចំពោះគម្រោងការបណ្ដេញពីលំនៅឋាននៅពោធិ៍សាត់

បន្ទាប់ពីបានបណ្ដេញប្រជាពលរដ្ឋរាប់រយគ្រួសារនៅចំណុចស្រែយក្ស ភូមិកំពង់ក្ដី ឃុំក្រពើ២ ឥឡូវអាជ្ញាធរខេត្តមានគម្រោងបណ្ដេញប្រជាពលរដ្ឋ៣៦គ្រួសារ នៅភូមិស្រែក្ដី ទៀត។

RFA/Mondul Keo

២៦-កក្កដា-២០១២៖ ទិដ្ឋភាពនៃភូមិស្រែក្ដី ដែលជាភូមិដាច់ស្រយាលមួយស្ថិតនៅពីក្រោយភ្នំ និងនៅក្នុងព្រៃជ្រៅ។

ភូមិនេះក៏ស្ថិតក្នុងឃុំក្រពើ២ ស្រុកវាលវែង ដែរ។ អាជ្ញាធរខេត្តពន្យល់ថា ប្រជាពលរដ្ឋទាំងនេះមកតាំងទីលំនៅខុសច្បាប់លើដីគម្របព្រៃរបស់ រដ្ឋ។
ប្រជាពលរដ្ឋភូមិស្រែក្ដី ៣៦គ្រួសារកំពុងប្រឈមមុខនឹងការបណ្ដេញចេញពីដីលំនៅឋាន និងដីបង្កបង្កើនផលរបស់ពួកគាត់។
តំណាងប្រជាពលរដ្ឋភូមិស្រែក្ដី គឺលោក អ៊ិន យ៉ង់ អាយុ ៦២ឆ្នាំ គាត់បានឲ្យដឹងនៅរសៀលថ្ងៃទី២៦ កក្កដា ថា គាត់មានស្រុកកំណើតនៅឯខេត្តព្រៃវែង។ នៅឯស្រុកកំណើត គាត់អត់មានដីស្រែទេ គាត់បានមករុករានព្រៃតាំងទីលំនៅនៅភូមិស្រែក្ដី តាំងពីឆ្នាំ២០០៦ តាមរយៈការណែនាំរបស់ប្អូនគាត់ ដែលជាអតីតទាហានខ្មែរក្រហមធ្វើសមាហរណកម្ម៖ «ពេលដែលខ្ញុំទៅជួប ប្អូននៅជាយដែននោះ ប្អូនខ្ញុំក៏ថាមិនបាច់ទៅនៅស្រុកវិញទេព្រោះស្រុកយើងក្រីក្រ ចង្អៀត អស់ដីធ្លីអីហើយ។ ប្អូនខ្ញុំនោះគេថា នៅទីនេះមានដីច្រើន ខ្ញុំក៏នៅតាមប្អូនមករហូតដល់ថ្ងៃនេះទៅ»។
លោកតា ឡាញ់ ឆន អាយុ ៦៩ឆ្នាំ ជាប្រជាពលរដ្ឋនៅស្រុកគាស់ក្រឡ ខេត្តបាត់ដំបង លោកតាអះអាងថា គាត់បានមកតាំងទីលំនៅ នៅភូមិស្រែក្ដី នេះកាលពីចុងឆ្នាំ២០០៦។ លោកតាសម្ដែងការព្រួយបារម្ភចំពោះគម្រោងការបណ្ដេញចេញនេះ ដោយគាត់យល់ថា គ្រួសារគាត់ច្បាស់ជាជួបការលំបាកក្នុងជីវភាព ប្រសិនបើការបណ្ដេញនេះក្លាយជាការពិត៖ «ខ្ញុំចង់តែនៅទីនេះ ព្រោះខ្ញុំបានត្រួសត្រាយ និងដាំដំណាំបានផលទៅហើយ បើផ្លាស់ទៅនៅកន្លែងផ្សេង ទម្រាំតែបានដូចនៅទីនេះនោះ វាជួបការលំបាកច្រើនណាស់»។
ប្រភពពីប្រជាពលរដ្ឋបានឲ្យដឹងថា ពួកគាត់មកពីខេត្តនានាដូចជាខេត្តព្រៃវែង ពោធិ៍សាត់ បាត់ដំបង កំពង់ចាម តាកែវ កំពត ជាដើម។ តាមការសាកសួរបញ្ជាក់ថា ប្រជាពលរដ្ឋទាំងនោះភាគច្រើនគ្មានដីស្រែនៅឯស្រុកកំណើត និងខ្លះទៀតមានដីស្រែបន្តិចបន្តួច។ ចំណែកការមករស់នៅទីនេះ ពួកគាត់ក៏ត្រូវចំណាយប្រាក់ទៅឲ្យមេខ្យល់ និងអាជ្ញាធរដែនដីផងដែរ។
លោក អ៊ិន យ៉ង់៖ «កន្លងទៅពួកខ្ញុំមកនៅក៏ត្រូវបង់ប្លង់ឲ្យគេ ចាប់ពី៥ម៉ឺន ១០ម៉ឺន រហូតដល់ ១៥០ម៉ឺន។ ខ្ញុំត្រូវទៅលក់កេរអាករពីស្រុក យកមកបង់ឲ្យគេ»។
វិទ្យុអាស៊ីសេរី មិនអាចទាក់ទងសុំការបំភ្លឺពីអាជ្ញាធរឃុំក្រពើ២ និងអាជ្ញាធរស្រុកវាលវែង បានទេ នៅល្ងាចថ្ងៃទី២៧ កក្កដា នេះ។
យ៉ាងនេះក្ដី អភិបាលខេត្តពោធិ៍សាត់ គឺលោក ខូយ សុខា លោកពន្យល់ចំពោះគម្រោងការបណ្ដេញនេះថា ដើម្បីរៀបចំប្រជាពលរដ្ឋឲ្យមានការតាំងទីលំនៅឲ្យត្រឹមត្រូវទៅតាម គោលការណ៍របស់រាជរដ្ឋាភិបាល។ លោកថា ប្រជាពលរដ្ឋភូមិស្រែក្ដី បានមកតាំងទីលំនៅដោយខុសច្បាប់នៅលើដីគម្របព្រៃរបស់រដ្ឋ ព្រមទាំងបានបំផ្លាញព្រៃស្រល់អស់រាប់ហិកតារទៀតផង៖ «បើសិនជា គាត់មានអត្តសញ្ញាណច្បាស់លាស់ យើងនឹងឲ្យគាត់ទៅភូមិឃុំគាត់វិញ ហើយយើងនឹងឲ្យអាជ្ញាធរឃុំពិនិត្យថា តើគាត់ជាជនក្រីក្រគ្មានដីធ្លីពិតប្រាកដមែននោះ យើងនឹងផ្ដល់ដីសម្បទានសង្គមកិច្ចជូនគាត់»។
យ៉ាងណាក៏ដោយ លោកអភិបាលខេត្តមានប្រសាសន៍ថា អាជ្ញាធរខេត្តកំពុងស្រាវជ្រាវរកការពិត។ លោកថា ប្រសិនបើប្រជាពលរដ្ឋទាំងនោះពិតជាជនក្រីក្រ និងគ្មានដីបង្កបង្កើនផលមែននោះ អាជ្ញាធរនឹងរៀបចំផ្ដល់ដីសម្បទានសង្គមកិច្ចដល់ពួកគាត់។ តែប្រសិនបើរកឃើញថា នៅឯលំនៅឋានដើមរបស់ពួកគាត់មានដីស្រែរួចហើយនោះ អាជ្ញាធរនឹងបញ្ជូនពួកគាត់ត្រឡប់ទៅលំនៅឋានដើមវិញ៕

សាលាដំបូងរាជធានីចុះអនុវត្តដីកា យកត្រាពីគណបក្សនរោត្តមរណឫទ្ធិ

លោកសៅ រ៉ានីពេលផ្តល់បទសំភាសន៍នៅមុខសាលាដំបូងរាជធានីភ្នំពេញកាលពីថ្ងៃទី២២ កក្កដាឆ្នាំ២០១២។រូបថត ផា លីណា

ភ្នំពេញៈនៅ ល្ងាចថ្ងៃសុក្រទី ២៧ខែកក្កដានេះ តំណាងអយ្យការសាលាដំបូងរាជធានីភ្នំពេញលោកគង់ សំសារ៉េត ព្រះអាជ្ញារងអមសាលាដំបូងរាជធានី និងក្រឡាបញ្ជីរម្នាក់ បានចុះអនុវត្តដីកាសម្រេចការពារ០៩ញចុះថ្ងៃទី២៥ ខែកក្កដាឆ្នាំ២០១២ដើម្បីយកត្រាពីគណបក្សនរោត្តមរណឫទ្ធិដែលជា ចុងបណ្តឹង នៅទីស្នាក់ការគណបក្សនៅទីក្រុងភ្នំពេញ យកមកឲ្យលោកសៅ រ៉ានី អគ្គលេខាធិកានៃគណបក្សនរោត្តមរណឫទ្ធិដែលជាភាគីដើមបណ្តឹង។
លោក ប៉ែន សង្ហារអ្នកនាំពាក្យគណបក្សនរោត្តមរណឫទ្ធិបានមានប្រសាសន៍ថា គណបក្សនរោត្តមរណឫទ្ធិមិនបានប្រឆាំងនឹងដីការបស់តុលាការទេ ហើយបានប្រគល់ត្រាជូនតំណាងអយ្យការតាមសំណើរដោយគ្មានបញ្ហាអ្វីកើត ឡើយ។
លោកបានបញ្ជាក់ថា ដើម្បីឆ្លើយតបទៅនឹងការចុះអនុវត្តដីកាសម្រេចការពាររបស់តុលាការ នេះ គណបក្សនរោត្តមរណឫទ្ធិគ្រោងនឹងចេញសេចក្តីថ្លែងការណ៍មួយនៅថ្ងៃ ស្អែកនេះ។

នគរបាលជាតិច្រានចោលពាក្យចចាមអារ៉ាមសម្លាប់មនុស្សយកគ្រឿងក្នុង

មន្ត្រីនាំពាក្យនៃអគ្គស្នងការនគរបាលជាតិ នៅថ្ងៃទី២៨ កក្កដា បដិសេធចោលទាំងស្រុងនូវពាក្យចចាមអារ៉ាមដែលថា មានការសម្លាប់មនុស្សយកក្រលៀន ដែលធ្វើឲ្យពលរដ្ឋកម្ពុជាមានការភ័យខ្លាច។

អ្នកនាំពាក្យអគ្គស្នងការនគរបាលជាតិកម្ពុជា លោក គៀត ចន្ទ័ថារិទ្ធិ មានប្រសាសន៍ថា រយៈពេលមួយខែចុងក្រោយនេះមន្ត្រីនគរបាលជាតិ បានចាត់តាំងកម្លាំងស្រាវជ្រាវករណីចចាមអារ៉ាមនិយាយពីការសម្លាប់ មនុស្សយកក្រលៀន។ លោកបន្តថា មកដល់ពេលនេះមិនមានភស្តុតាងណាមួយបញ្ជាក់ថា មានករណីសម្លាប់មនុស្សយកក្រលៀននោះទេ។
លោកបញ្ជាក់ថា សមត្ថកិច្ចកំពុងតែតាមដានស្វែងរកប្រភពពាក្យចចាមអារ៉ាមនេះ ហើយសុំឲ្យប្រជាពលរដ្ឋកុំមានការភ័យខ្លាច៖ «យើង មិនមានរកឃើញសញ្ញាណាមួយដែលពាក់ព័ន្ធថាមានករណីខ្វេះក្រលៀនកូន ក្មេងដូចពាក្យចចាមអារ៉ាមហ្នឹងទេស្រុកយើង បានតាមដានស្រាវជ្រាវរួចហើយ គ្មានករណីអីចឹងទេ សុំប្រជាពលរដ្ឋកុំជឿតាមពាក្យចចាមអារ៉ាម»។
លោក គៀត ចន្ទ័ថារិទ្ធិ បន្តថា លោកមានការព្រួយបារម្ភពីសកម្មភាពចោរកម្ម ដែលអាចកើតមានពេលពលរដ្ឋភ័យខ្លាច។
ទោះជាយ៉ាងណាក៏ដោយ ក្រសួងមហាផ្ទៃ និងអគ្គស្នងការនគរបាលជាតិមិនទាន់ចេញសេចក្តីថ្លែងការណ៍ជា លាយលក្ខណ៍អក្សរណាមួយ ដើម្បីអត្ថាធិប្បាយករណីនេះនៅឡើយទេ។
អ្នកជំនាញវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា ករណីចចាមអារ៉ាមវះក្រលៀនអាចជាទិដ្ឋភាពបំពុលនយោបាយ និងជំនឿគ្មានហេតុផល។
លោកបន្តថា រដ្ឋាភិបាលត្រូវផ្សព្វផ្សាយតាមរយៈសារព័ត៌មាន ចេញសេចក្តីណែនាំ ជាពិសេសសមត្ថកិច្ចគ្រប់លំដាប់ថ្នាក់ហៅអ្នកដែលនិយាយពាក្យវះ ក្រលៀន មកសួរនាំរកប្រភពឲ្យបានច្បាស់លាស់ ជៀសវាងការយល់ច្រឡំ៖ «រឿង នេះ បង្កើតឲ្យមានភាពវឹកវរនៅក្នុងសង្គមកម្ពុជា បាត់បង់នូវសន្តិសុខ បើសិនរដ្ឋាភិបាលមិនទប់ស្កាត់បញ្ហាហ្នឹងទេ បង្ហាញពីភាពអសមត្ថភាពរបស់រដ្ឋាភិបាល»។
លោក សុខ ទូច បន្តថា រដ្ឋាភិបាលមិនត្រូវមើលរំលងបញ្ហានេះឡើយ ព្រោះវាជានយោបាយបំបះបំបោរធ្វើឲ្យពលរដ្ឋមានការភ័យខ្លាច។
ឆ្លើយតបនឹងបញ្ហានេះ លោក គៀត ចន្ទ័ថារិទ្ធិ មានប្រសាសន៍ថា លោកនឹងដាក់សំណើទៅថ្នាក់ដឹកនាំនគរបាលជាតិ និងពិភាក្សាពីការចេញសេចក្តីថ្លែងការណ៍ជាសាធារណៈ លាងជម្រះចចាមអារ៉ាមនេះ ដើម្បីទប់ស្កាត់អសន្តិសុខសង្គម។
វិទ្យុអាស៊ីសេរី មិនអាចទាក់ទងសុំការពន្យល់ពីមន្ត្រីជាន់ខ្ពស់នៃក្រសួងសុខាភិបាល បានទេ នៅថ្ងៃទី២៨ កក្កដា ឆ្នាំ២០១២។
ពាក្យចចាមអារ៉ាមវះយកក្រលៀន កើតឡើងអស់រយៈពេលជិតមួយខែទៅហើយ បន្ទាប់ពីមានព័ត៌មានពីប្រទេសចិន ផ្សាយថាមានករណីចិញ្ចឹមកូនក្មេងយកក្រលៀន ហើយសមត្ថកិច្ចចិនក៏បានបំបែកសម្បុកចោរទាំងនោះរួចហើយដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

សាលារាជធានីភ្នំពេញប្រារព្ធខួបទី២៥នៃស៊ីធីណេត ដោយជិះកង់ហែជាក្បួន

សាលារាជធានីភ្នំពេញនៅព្រឹកព្រលឹម ថ្ងៃទី២៨ ខែកក្កដា បានចូលរួមប្រារព្ធខួបលើកទី២៥ នៃការបង្កើតស៊ីធីណេត (CITYNET) ដោយជិះកង់ហែជាក្បួនក្នុងរាជធានីនេះ។

RFA/Mom Sophon

២៨-កក្កដា-២០១២៖ សកម្មភាពអ្នកជិះកង់ហែជាក្បួន ដើម្បីប្រារព្ធខួបទី២៥ នៃស៊ីធីណេត (CITYNET)។

ការជិះកង់ជាក្បួនពីសំណាក់មន្ត្រីសាលារាជធានីភ្នំពេញ សិស្សនិស្សិត និងអ្នកស្ម័គ្រចិត្តជិះកង់សម្អាតក្រុង សរុបប្រមាណ៣០០នាក់នោះ មានរយៈពេលប្រហែលមួយម៉ោង ដោយចេញដំណើរពីសាលារាជធានីភ្នំពេញ កាត់តាមមហាវិថីនានា ឆ្ពោះទៅវិមានឯករាជ្យ សួនច្បារសម្ដេចសង្ឃរាជ ជួន ណាត ខាងមុខព្រះបរមរាជវាំង និងរមណីយដ្ឋានវត្តភ្នំ។
អភិបាលរាជធានីភ្នំពេញ លោក កែប ជុតិមា ជំរុញអោយពលរដ្ឋនៅទីក្រុង ចាប់ផ្ដើមងាកមកជិះកង់ ដែលជាប្រភេទយានជំនិះងាយៗ ដើម្បីចូលរួមក្នុងការសម្អាតទីក្រុង និងការរក្សាបរិស្ថានល្អ។
ថ្លែងបើកកម្មវិធីជិះកង់នៅថ្ងៃរំលឹកខួប២៥ឆ្នាំ នៃការបង្កើតបណ្ដាញថ្នាក់តំបន់នៃអាជ្ញាធរថ្នាក់មូលដ្ឋាន ដើម្បីការគ្រប់គ្រងការតាំងលំនៅឋានក្នុងក្រុង នៅអាស៊ីប៉ាស៊ីហ្វិក ស៊ីធីណេត លោក កែប ជុតិមា បានអោយដឹងថា ការជិះកង់គឺរក្សាបានសុខភាព និងធ្វើបរិស្ថានបានស្អាត ដែលពលរដ្ឋកម្ពុជាគួរចាប់អារម្មណ៍ជិះកង់អោយបានកាន់តែច្រើន។
លោក កែប ជុតិមា៖ «នេះជាកីឡាប្រភេទម្យ៉ាង ដែលផ្តល់សុខមាលភាពអោយយើង។ ហើយការជិះកង់នេះ ក៏ជាការរួមចំណែកដើម្បីបណ្ដុះនូវគំនិតមួយ ក្នុងការប្រើប្រាស់កង់ក្នុងរាជធានីភ្នំពេញ ដែលយើងឃើញថា មធ្យោបាយនានាកាន់តែច្រើនទៅៗ ហើយកាន់តែស្មុគស្មាញទៅៗ»។
កម្ពុជាបានចូលជាសមាជិករបស់អង្គការ ស៊ីធីណេត កាលពីឆ្នាំ២០០២ គម្រោងដែលជាតម្រូវចាំបាច់សម្រាប់ទីក្រុងនេះគឺ ការកសាងហេដ្ឋារចនាសម្ព័ន្ធ ការកាត់បន្ថយភាពក្រីក្រ សុខុមាលភាពសាធារណៈ និងអនាម័យ។
ប្រធានគម្រោង ចាំអង្កាល់ ឬlet's do it លោក ជី សីលា ដែលបានដឹកនាំអ្នករួមការងារចូលរួមជិះកង់មានប្រសាសន៍ថា បន្ថែមពីលើការជិះកង់ ដើម្បីថែរក្សាបរិស្ថាន ក្រុមរបស់លោកបានចូលរួមសម្អាតទីក្រុង តាមរយៈការជិះកង់រើសសំរាម នៅចុងសប្ដាហ៍។ លោក ជី សីលា សាទរចំពោះការជំរុញអោយពលរដ្ឋងាកមកជិះកង់នៅក្នុងក្រុងនេះ។
លោក ជី សីលា៖ «អីចឹង ពួកខ្ញុំជិះកង់ហ្នឹង គឺប្រាប់ថា ពួកខ្ញុំឈប់ចោលសំរាម អោយយើងទទួលខុសត្រូវលើសំរាមខ្លួនឯង។ យើងគួរធ្វើការងារហ្នឹងអោយបានច្រើន យើងសង្ឃឹមថា ពលរដ្ឋយើងចាប់ផ្ដើមគិតពីសុខភាព គិតពីបរិស្ថានអីចឹងទៅ។ ជិះកង់អោយបានកាន់តែច្រើន និយាយទៅវាជួយដល់សេដ្ឋកិច្ចយើងទៀត ព្រោះយើងអត់មានចាយលុយច្រើនទេ។ ក្រោយទៀតទៅប្រហែលសាលាក្រុង ឬខាងរាជរដ្ឋាភិបាលចាប់ផ្ដើមគិតដល់សុវត្ថិភាព ប្រហែលយើងអាចធ្វើផ្លូវជិះកង់ជាមួយដើរហ្នឹង អោយកាន់តែធំ អីចឹងមនុស្សគាត់ជិះតាមអោយកាន់តែច្រើន ប្រជាជនយើងសុខភាពកាន់តែល្អ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង់ គិមអេង មានប្រសាសន៍ថា ដើម្បីអោយពលរដ្ឋកាន់តែច្រើនងាកទៅប្រើប្រាស់យានជំនិះដែលងាយៗ និងមានសារប្រយោជន៍សម្រាប់បរិស្ថាន សាលារាជធានីត្រូវគិតគូរគម្រោងប្លង់មេ សម្រាប់ទីក្រុងទាំងមូល ដោយបង្កើតអោយមានផ្លូវសម្រាប់អ្នកជិះកង់ ការអប់រំផ្លាស់ប្ដូរទម្លាប់ក្នុងការប្រើប្រាស់យានយន្តជាដើម។
លោក យ៉ង់ គិមអេង៖ «នៅតាមបណ្ដាប្រទេសអឺរ៉ុប មួយចំនួនដែលគេធ្វើបាន គេមានបែងចែកផ្លូវសម្រាប់កង់ ផ្លូវអី ត្រឹមត្រូវអីចឹងទៅ។ ហើយ១ទៀត គឺត្រូវតែចាប់ផ្ដើមចលនាអោយប្រជាពលរដ្ឋហ្នឹង ត្រូវតែធ្វើគំរូដល់ប្រជាពលរដ្ឋ ប៉ុន្តែយើងអត់ដែលឃើញមន្ត្រីរដ្ឋាភិបាលណាមួយជិះកង់មកធ្វើការ ទេ។ សូម្បីតែផ្ទះរបស់គាត់នៅជិតការិយាល័យក៏ដោយ ក៏គាត់នៅតែជិះឡានទំនើប ដើម្បីបង្ហាញប្រជាពលរដ្ឋ ដើម្បីបង្ហាញអ្នកធ្វើដំណើរតាមដងផ្លូវ ក្នុងនោះដែរក៏ត្រូវអោយចេះគោរពសិទ្ធិអ្នកជិះកង់ អ្នកថ្មើរជើងអីហ្នឹង»។
នៅក្នុងរាជធានីភ្នំពេញដែលមានពលរដ្ឋរស់នៅជិត២លាននាក់ មានយានជំនិះដែលចុះបញ្ជីផ្លូវការ គឺមានចំនួនជិត៧សែនគ្រឿង (៦៧០.០៨១គ្រឿង) ក្នុងនោះភាគច្រើនជាម៉ូតូ។ ក្រៅពីនោះមានពលរដ្ឋតិចតួចបំផុតដែលជិះកង់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អនុប្រធានសមាគមអ្នកប្រជាធិបតេយ្យថាមានគេគំរាម

រយៈពេលតែជាងមួយសប្តាហ៍ប៉ុណ្ណោះបន្ទាប់ពីលោកម៉ម សូណង់ដូនាយកស្ថានីយវិទ្យុសំបុកឃ្មុំនិងជាប្រធានសមាគមអ្នកប្រជា ធិបតេយ្យត្រូវបានតុលាការសម្រេចឃុំខ្លួនបណ្តោះអាសន្នដើម្បីរងចាំ ជំនុំជម្រះទោសពីបទបង្កើតតំបន់អបគមន៍ខុសច្បាប់ប្រឆាំងនឹង រដ្ឋាភិបាល លោកជា បំរ៉ុង អនុប្រធានសមាគមអ្នកប្រជាធិបតេយ្យបានអះអាងនៅថ្ងៃព្រហស្បតិ៍នេះ ថា លោកត្រូវបានជនមិនស្គាល់មុខផ្ញើសារគំរាមតាមទូរសព្ទពីក្រៅ ប្រទេស។

នៅក្នុងអត្ថន័យតាមទូរសព្ទជាភាសាអង់គ្លេសចូលទៅកាន់ទូរសព្ទលោកជា បំរ៉ុងដែលវីអូអេបានទទួលត្រូវបានបកប្រែក្រៅផ្លូវការណ៍ថា៖

«លោកជា បំរ៉ុង ខ្ញុំចង់ប្រាប់អ្នកថាអ្នកត្រូវតែដើរតាមផែនការណ៍របស់ខ្ញុំបើ មិនចង់ឲ្យសមាគមអ្នកប្រជាធិបតេយ្យបិទទ្វា»។

ខ្លឹមសារដដែលនោះបានបញ្ជាក់ថា៖

«លោកនឹងដូចលោកម៉ម សូណង់ដូ។ ខ្ញុំហ៊ាននិយាយ ខ្ញុំហ៊ានធ្វើពីព្រោះខ្ញុំបានដឹងពីបញ្ហាសមាគម ក៏ប៉ុន្តែប្រសិនណាបើអ្នកខ្លាចអ្នកគួរតែនៅផ្ទះកុំធ្វើអ្វី ទាំងអស់ជាមួយសមាជិកសមាគមអ្នកប្រជាធិបតេយ្យទើបអាចជួយលោកម៉ម សូណង់ដូបាន»។

លោកជា បំរ៉ុង អនុប្រធានសមាគមអ្នកប្រជាធិបតេយ្យនៅថ្ងៃព្រហស្បតិ៍នេះបាននិយាយថា លោកបានទទួលសារនេះពីជនអនាមឹកមួយរូបដែលបានផ្ញើរសារមកទូរសព្ទ របស់លោកមកពីក្រៅប្រទេសកាលពីវេលាម៉ោង១និង១៨នាទីនៅរសៀលថ្ងៃ ពុធនេះ។

លោកបានចាត់ទុក្ខថា នេះគឺជាការផ្ញើសារគំរាមកំហែងមួយមកលើរូបលោក។ ក៏ប៉ុន្តែលោកមិនទាន់ដាក់ពាក្យបណ្តឹងជាផ្លូវការណ៍ទៅកាន់ សម្ថកិច្ចនៅឡើយទេ។

«នេះជាការដូចថា ជាការគំរាមក៏ថា បានហើយក៏ជាការបំបែកបំបាក់កម្លាំងសមាគមក៏ថាបាន»។

លោកឧត្តមសេនីយឯក ខៀវ សុភ័ក្រអ្នកនាំពាក្យក្រសួងមហាផ្ទៃពុំអាចស្នើសុំសេចក្តី អត្ថាធិប្បាយបំភ្លឺបានទេនៅថ្ងៃព្រហស្បតិ៍នេះដោយទូរសព្ទរបស់លោក កំពុងជាប់រវល់។

លោកជា បំរ៉ុង កន្លងមកលោកបានចេញមុខធ្វើសន្និសីទព័ត៌មាន និងធ្វើយុទ្ឋនាការប្រមូលស្នាមផ្តិតមេដៃនៅតាមបណ្តាខេត្តមួយចំនួន ដើម្បីស្នើសុំអន្តរាគមន៍ដោះលែង
លោកម៉ម សូណង់ដូពីមន្ទីរឃុំឃាំងព្រៃស។

យុទ្ឋនាការណ៍ប្រមូលស្នាមផ្តិតមេដៃនេះបានចាប់ផ្តើមធ្វើឡើងកាលពីថ្ងៃចន្ទហើយគ្រោងនឹងបញ្ចប់ចុងសប្តាហ៍នេះ។

លោកជា បំរ៉ុងបានមានប្រសាន៍ថា រយៈពេលបួនថ្ងៃដែលសមាគមរបស់លោកបានធ្វើយុទ្ឋនាការណ៍ប្រមូលស្នាម ផ្តិតមេដៃនេះយ៉ាងតិចមានស្នាមផ្តិតមេដៃប្រមាណជាងមួយ១ម៉ឺនដែល ប្រជាពលរដ្ឋបានផ្តិតមកពីខេត្តក្រចេះ កំពង់ចាម ព្រៃវែង កណ្តាល និង ខេត្តតាកែវ ហើយលោកគ្រោងនឹងដាក់ញត្តិដែលមានស្នាមផ្តិមេដៃទាំងនេះទៅតុលាការ ក្រុងភ្នំពេញនិងទៅកាន់ស្ថានទូតនានាដើម្បីស្នើសុំអន្តរាគមន៍ដោះ លែងលោកម៉ម សូណង់ដូ ឲ្យមានសេរីភាពឡើងវិញ។

លោកផៃ ស៊ីផាន អ្នកនាំពាក្យនិងជារដ្ឋលេខាធិការទីស្តីការគណៈរដ្ឋមន្ត្រីបាន មានប្រសាសន៍ថា ករណីរបស់លោកម៉ម សូណង់ដូ គឺជារឿងតុលាការ ញត្តិនេះមិនអាចជួយលោកម៉ម សូណង់ដូបានទេ។
«ពីព្រោះរឿងនេះជារឿងតុលាការមិនមែនជារឿងឆន្ទៈទេ។ ជារឿងច្បាប់។មិនមានជាសម្ភាធណាមួយទៅបង្ខិតបង្ខំឬដាក់ផ្លួវ ចិត្តដល់តុលាការក្នុងការវិនិច្ឆ័យក្តី ខ្ញុំមិនជឿថាអញ្ចឹងទេ»។

លោកម៉ម សូណង់ដូត្រូវបានតុលាការក្រុងភ្នំពេញចេញដិកាបណ្តោះអាសន្នឃុំ ខ្លួននៅពន្ឋនាគារព្រៃសក្រោមបទចោទប្រកាន់ចំនួនបួនចំណុចធំៗដែល រួមមាន អ្នកផ្តួចផ្តើមគំនិតប្រឆាំងអ្នករាជការសារធារណៈ ធ្វើកុប្បកម្មខុសច្បាប់ប្រឆាំងការបំពេញមុខងារសារធារណៈរបស់ អាជ្ញាធរ ញុះញង់ប្រជាពលរដ្ឋឲ្យកាន់អាវុធខុសច្បាប់ និងប្រឆាំងអាជ្ញាធរស្របច្បាប់៕

ជនចែកចាយ គ្រឿងញៀន២នាក់ ម្នាក់ជាមន្រ្តីនគរបាល ត្រូវឃាត់ខ្លួន

ប្រតិភូជាន់ខ្ពស់នៃក្រុមកីឡាកម្ពុជា ដែលដឹកនាំដោយលោកថោង ខុន ប្រធានគណៈកម្មាធិការជាតិអូឡាំពិកកម្ពុជាបានទៅដល់ទីក្រុងឡុងដ៍ហើយ កាលពីថ្ងៃព្រហស្បតិ៍ម្សិលមិញ។ ថ្នាក់ដឹកនាំជាន់ខ្ពស់កីឡាកម្ពុជាបានទៅទស្សនកិច្ចដល់កន្លែង ស្នាក់នៅរបស់ក្រុមអត្តពលិកកម្ពុជានៅក្នុងភូមិកីឡាក្បែរកន្លែង ប្រកួត។ ពិធីបើកសម្ពោធការប្រកួតកីឡាអូឡាំពិកឆ្នាំ២០១២នេះនឹងត្រូវ ចាប់ផ្តើមនៅម៉ោង៨និង៣០នាទី ម៉ោងក្នុងប្រទេសអង់គ្លេសដែលត្រូវនឹងម៉ោង២ភ្លឺ ថ្ងៃសៅរ៍នៅ កម្ពុជា។

Saturday, July 28, 2012

សង្គមស៊ីវិល៖ អ្នកប្រព្រឹត្តអំពើហិង្សាជាសែស្រឡាយមន្ត្រីជាន់ខ្ពស់តែងរួចទោស

សាច់សាលោហិតរបស់លោកនាយករដ្ឋមន្ត្រី ហ៊ុន សែន ត្រូវមជ្ឈដ្ឋានជាច្រើនមើលឃើញថា តែងស្ថិតនៅក្រៅសំណាញ់ច្បាប់ ទោះជាកូនក្មួយទាំងនោះត្រូវគេចោទថាប្រព្រឹត្តអំពើបាញ់បោះ កាប់ចាក់ និងវាយធ្វើបាបទៅលើជនស្លូតត្រង់ក៏ដោយ។

YouTube

សកម្មភាពលោក ប៊ុន សុខា ជំនួយការផ្ទាល់លោកនាយករដ្ឋមន្ត្រី ហ៊ុន សែន និងបក្សពួក កំពុងវាយដំលើជនរងគ្រោះ នៅសណ្ឋាគារកោះកុង ស៊ីធី កាលពីថ្ងៃទី២២ ខែមេសា ឆ្នាំ២០១២។

មិនត្រឹមតែសាច់សាលោហិតរបស់លោក ហ៊ុន សែន នោះទេ សូម្បីតែក្រុមមនុស្សហែហមលោក ដែលភាសាសាមញ្ញហៅថាពួកអាចក់អាចែម ក៏បង្កភាពវឹកវរដល់សង្គម ដោយរួចទោស ឬទទួលទោសតិចជាងកំហុសដែលប្រព្រឹត្តនោះដែរ។
ប៉ុន្តែមន្ត្រីជាន់ខ្ពស់រដ្ឋាភិបាលអះអាងថា ច្បាប់របស់កម្ពុជាមិនដែលអនុគ្រោះដល់ជនល្មើសច្បាប់ណាមួយឡើយ។
ករណីថ្មីបំផុតទាក់ទិននឹងការប្រព្រឹត្តអំពើហិង្សា ហើយរួចខ្លួន ឬមានទោសតិចនៃអ្នកដែលជាប់សែស្រឡាយនិងលោកនាយករដ្ឋមន្ត្រី ហ៊ុន សែន គឺរឿងរ៉ាវរបស់លោក ប៊ុន សុខា ដែលជាជំនួយការរបស់លោកនាយករដ្ឋមន្ត្រី និងបក្សពួកចំនួនពីររូបទៀត។ ពួកគេប្រើអំពើហិង្សា វាយធ្វើបាបជនស្លូតត្រង់ក្នុងខេត្តកោះកុង។ ទីបំផុត ជនល្មើសត្រូវតុលាការដោះលែងដោយមានសេរីភាព។
ងាកមកក្រុមសាច់ញាតិលោក ហ៊ុន សែន វិញ គឺកាន់តែមានអំណាចលើសលុបជាងនេះទៅទៀត។
ក្រុមក្មួយប្រុសៗរបស់លោក ហ៊ុន សែន មួយចំនួនត្រូវគេដឹងថា ជាក្រុមមនុស្សដែលមានទាំងលុយ អំណាច ក្រុមអ្នកហែហមដែលអមដោយសព្វាវុធ និងរថយន្តទំនើបៗបំភ័យសង្គមតាមចិត្ត។
គេហទំព័រឈ្មោះ Topix Cambodia មួយបានចងក្រងករណីបទល្មើសព្រហ្មទណ្ឌមួយចំនួន ដែលក្រុមក្មួយៗរបស់លោកនាយករដ្ឋមន្ត្រី ហ៊ុន សែន កំពុងបំភិតបំភ័យ និងអុកឡុកប្រទេស តាមរយៈការបាញ់បោះ ការបង្ករបួសស្នាមដល់ជនស៊ីវិល អ្នកកាសែត ភ្ញៀវទេសចរ និងការសម្លាប់មនុស្សដោយគ្មានខ្លាចរអានឹងច្បាប់ប្រទេសរបស់ខ្លួន។
គេហទំព័រនេះក៏បានឲ្យដឹងផងដែរថា រង្គសាល ក្លឹបខារ៉ាអូខេ និងបនល្បែងស៊ីសងមួយចំនួន ត្រូវបង់ថ្លៃការពារ ឬចែកភាគហ៊ុនខ្លះដល់ក្រុមក្មួយៗរបស់លោក ហ៊ុន សែន។
មន្ត្រីផ្នែកស៊ើបអង្កេតរបស់សមាគមការពារសិទ្ធិមនុស្ស អាដហុក (Adhoc) លោក នី ចរិយា មានប្រសាសន៍ថា លោកតែងឭអំពីបញ្ហាបងធំបងតូចអុកឡុកសង្គម ដែលបង្កឡើងដោយសែស្រឡាយរបស់លោក ហ៊ុន សែន ដែរ តែក្រុមរបស់លោកនៅមិនដែលទទួលបានពាក្យបណ្ដឹងអំពីជនរងគ្រោះ ឬទទួលរបាយការណ៍ណាមួយពីស្ថាប័នមានសមត្ថកិច្ចនោះនៅឡើយទេ។
លោកបន្តថា ជនរងគ្រោះដែលរងការធ្វើបាប និងបំពារបំពានរូបរាងកាយដោយក្រុមបងធំទាំងនេះ គួរប្ដឹងទៅស្ថាប័នពាក់ព័ន្ធឲ្យចាត់វិធានការជាបន្ទាន់ ឬមួយអាចផ្តល់ព័ត៌មានបន្ថែមមកក្រុមសង្គមស៊ីវិល៖ «នេះជា សមត្ថកិច្ចរបស់អាជ្ញាធរ ហើយក៏ត្រូវមានភាពក្លាហានដែរក្នុងការបម្រើប្រជាពលរដ្ឋតាម វិជ្ជាជីវៈរបស់ខ្លួន ក្នុងនាមខ្លួនជាមន្ត្រីនគរបាលយុត្តិធម៌ ក៏ដូចជាស្ថាប័នយុត្តិធម៌ហ្នឹង មានភាពក្លាហានក្នុងការការពារនូវអ្វីជាសីលធម៌ វិជ្ជាជីវៈរបស់ខ្លួន បើទោះបីជាអ្នកប្រព្រឹត្តហ្នឹងជាជនប្រភេទណាក៏ដោយ»។
គេហទំព័រឈ្មោះ Topix Cambodia បានចុះផ្សាយអត្ថបទមួយ កាលពីថ្ងៃទី២២ ខែសីហា ឆ្នាំ២០០៨ សរសេរថា ក្រុមក្មួយៗរបស់លោកនាយករដ្ឋមន្ត្រី ហ៊ុន សែន គឺជាក្រុមបងធំលេខមួយនៅស្រុកខ្មែរ។
គេហទំព័រនេះបានចងក្រងសំណុំរឿងមួយចំនួនដែលប្រព្រឹត្តឡើងដោយ ក្រុមបងធំទាំងនោះ រួមមានករណីលោក ហ៊ុន ជា កូនប្រុសរបស់លោក ហ៊ុន សាន កាលពីថ្ងៃទី០៣ ខែសីហា ឆ្នាំ២០០៨ វេលាម៉ោង ១១ និង៣០នាទីយប់ បានបើករថយន្តម៉ាក Cadillac Escalade SUV ពណ៌ខ្មៅក្នុងល្បឿន១០០គីឡូម៉ែត្រក្នុងមួយម៉ោង ហើយបានបុកបុរសម្នាក់ដែលកំពុងជិះម៉ូតូ ដែលបណ្ដាលឲ្យបុរសរូបនោះដាច់ដៃ និងជើងខាងឆ្វេងរបស់គាត់ នៅលើមហាវិថីសុធារស។
នៅមុនថ្ងៃកើតហេតុ លោក ហ៊ុន ជា ក៏បានបាញ់ចំនួន ៧គ្រាប់ឡើងទៅលើក្នុងក្លឹបខារ៉ាអូខេមួយក្នុងទីក្រុងភ្នំពេញ ហើយបាញ់បីគ្រាប់ទៀត ដើម្បីគំរាមមន្ត្រីប៉ូលិសមិនឲ្យចូលទៅជិតកន្លែងកើតហេតុ។
នៅថ្ងៃទី១៩ ខែកក្កដា ឆ្នាំ២០០៨ នោះដែរ ក្មួយប្រុសរបស់លោក ហ៊ុន សែន ម្នាក់ទៀតឈ្មោះ ហ៊ុន តូ ជាកូនប្រុសរបស់លោក ហ៊ុន នេង បានបញ្ជាឲ្យអង្គរក្សរបស់ខ្លួនវាយធ្វើបាបតំណាងរាស្ត្រពីខាងបក្ស ប្រឆាំងម្នាក់ឈ្មោះ នួន វុទ្ធី និងបានគំរាមកំហែងទៅលើលោក យូ សារ៉ាវុទ្ធ អ្នកកាសែតស្រឡាញ់ខ្មែរ ដោយសារបានចុះផ្សាយអត្ថបទថា លោក ហ៊ុន តូ បានបំភិតបំភ័យវាយទាត់ធាក់ពលរដ្ឋសាមញ្ញ ឬតារាសម្ដែងណាដែលហ៊ានមើលមុខរបស់គាត់ ឬមិនធ្វើទៅតាមអ្វីដែលគាត់ចង់បាន។
ផ្លាកយីហោត្រកូល ហ៊ុន ត្រូវបានគេឆ្នៃយកទៅប្រើប្រាស់ ដើម្បីរំលេចអោយកាន់តែច្បាស់នូវទំនាក់ទំនងជាប់សែស្រឡាយជាមួយលោក ហ៊ុន សែន។ ក្មួយទាំងឡាយរបស់លោក ដែលជាកូនរបស់ប្អូនស្រីរបស់លោក គឺលោកស្រី ហ៊ុន ស៊ីណាត បានបន្ថែមពាក្យ ហ៊ុន ទៅលើឈ្មោះកំណើតរបស់ខ្លួន។
គេហទំព័រ Topic Cambodia ក៏បានចុះផ្សាយថា កូនប្រុសរបស់លោកស្រី ហ៊ុន ស៊ីណាត ឈ្មោះលោក នឹម សុភា ហៅ ភា ហ៊ុន កាលពីឆ្នាំ២០០៣ បានបើករថយន្តប្រណាំងគ្នាទាំងស្រវឹង ហើយក៏បានទៅបុកអ្នកលក់ដូងក្បែរស្តាតអូឡាំពិក។ សាក្សីនៅកន្លែងកើតហេតុនិយាយថា នឹម សុភា បានខឹងសម្បាយ៉ាងខ្លាំង ហើយក៏បាញ់រះទៅលើអ្នកធ្វើដំណើរក្បែរនោះ បណ្ដាលឲ្យមនុស្សពីរនាក់ស្លាប់ និងបួននាក់ទៀតរបួស។
ចំណែក នឹម ចាន់ថាណា ហៅ ពៅ ហ៊ុន ជាប្អូនប្រុសពៅរបស់ នឹម សុភា ធ្លាប់បានចាក់ភ្ញៀវទេសចរជប៉ុនពីរនាក់ដោយអំបែងដបទឹកម្ទេស និងដបទឹកស៊ីអ៊ីវ ឲ្យរបួសធ្ងន់ក្នុងទីក្រុងភ្នំពេញ។
រីឯ នឹម ពិសី ហៅ សី ហ៊ុន ដែលជាបងប្រុសច្បងរបស់ នឹម សុភា និងនឹម ចាន់ថាណា ឯណោះវិញធ្លាប់បានបាញ់ជាច្រើនគ្រាប់ក្នុងក្លឹបរាត្រីកណ្ដាល ទីក្រុងភ្នំពេញ បណ្ដាលឲ្យមនុស្សពីរនាក់របួស ហើយមួយសប្ដាហ៍ក្រោយមក នឹម ពិសី ត្រូវបានដោះលែងឲ្យមានសេរីភាព។
មជ្ឈដ្ឋាននានាឲ្យដឹងថា ករណីឧក្រិដ្ឋកម្មដែលបង្កឡើងដោយក្មួយៗរបស់លោកនាយករដ្ឋមន្ត្រី ហ៊ុន សែន បានកើតឡើងច្រើនជាងអ្វីដែលមានការចងក្រងទុកក្នុងគេហទំព័រ Topix Cambodia នេះទៅទៀត។
កាលពីកំឡុងឆ្នាំ២០០០ ទាំង នឹម ពិសី នឹម សុភា និងនឹម ចាន់ថាណា តែងបញ្ជាឲ្យមនុស្សជំនិតៗរបស់ខ្លួន ចេញយកម៉ូតូពីសិស្សសាលា ដើម្បីយកទៅដាក់បញ្ចាំយកលុយលេងល្បែង ស៊ីផឹក និងប្រើប្រាស់គ្រឿងញៀន ដោយយកលេសថា “ខ្ចីជិះសិន”។ ក្រុមបងធំទាំងបីនាក់នេះ ក៏ត្រូវគេដឹងផងដែរថា តែងប្រើប្រាស់អាវុធខុសច្បាប់ទំនើបៗ បាញ់ពេញទីក្រុងដោយគ្មានញញើត។
រហូតមកទល់ពេលក្មួយៗរបស់លោក ហ៊ុន សែន មាន ហ៊ុន ជា នឹម ពិសី នឹម សុភា និងនឹម ចាន់ថាណា ជាដើមនោះ ត្រូវគេដឹងថាមានភាគហ៊ុននៅតាមរង្គសាល ក្លឹបរាត្រី ក្លឹបខារ៉ាអូខេ ក្លឹបឌីស្កូ ឬកាស៊ីណូ មួយចំនួន ទាំងក្នុងក្រុងភ្នំពេញ និងតាមបណ្ដាខេត្តជាច្រើនទៀត។
រីឯក្មួយច្បងរបស់លោក ហ៊ុន សែន ម្នាក់ទៀតឈ្មោះ ហ៊ុន តូ នោះវិញ កាលពីខែមិថុនា ត្រូវបានកាសែតអូស្ត្រាលីមួយឈ្មោះ The Age រាយការណ៍ថា បានរកស៊ីលាងលុយកខ្វក់ និងជួញដូរគ្រឿងញៀនជាមួយក្រុមម៉ាហ្វីយ៉ា អូស្ត្រាលី។ ប៉ុន្តែលោក ហ៊ុន តូ បានបដិសេធចំពោះការចោទប្រកាន់នេះ ហើយក៏មានគម្រោងប្ដឹងកាសែតនោះផងដែរ។
មន្ត្រីផ្នែកស៊ើបអង្កេតរបស់អង្គការការពារសិទ្ធិមនុស្ស លីកាដូ (Licadho) លោក អំ សំអាត មានប្រសាសន៍ថា សមត្ថកិច្ចកម្ពុជាតែងសម្របសម្រួលដល់សែស្រឡាយនៃថ្នាក់ដឹកនាំ រដ្ឋាភិបាល ពីបទបង្ករបួសស្នាម ឬមនុស្សឃាតដោយចេតនា ទៅជាអចេតនា ឬទៅជាករណីរដ្ឋប្បវេណី ដែលធ្វើឲ្យជនដៃដល់រួចខ្លួនរហូតមកទល់សព្វថ្ងៃ៖ «ពាក់ព័ន្ធ នឹងកូនក្មួយមន្ត្រីជាន់ខ្ពស់របស់រដ្ឋាភិបាលកម្ពុជាហ្នឹង យើងធ្លាប់បានទទួលករណីហ្នឹងពីរបីករណីដែរ ដូចជាបាញ់បោះ បង្ករបួសស្នាម ក៏ប៉ុន្តែ យើងឃើញភាគច្រើនមានការសម្របសម្រួលជាសំណងខាងផ្នែករដ្ឋប្បវេណី ហើយអ្នកទាំងអស់ហ្នឹងមិនត្រូវបានតុលាការធ្វើការផ្ដន្ទាទោសណាមួយ ទេ»។
វិទ្យុអាស៊ីសេរី បានព្យាយាមសុំការបំភ្លឺពីលោក ហ៊ុន តូ និងហ៊ុន ជា ក្នុងចំណោមក្មួយៗទាំងប្រាំនាក់ ដែលបានឈ្មោះក្នុងគេហទំព័រ Topix Cambodia នោះដែរ តែទូរស័ព្ទរបស់អ្នកទាំងពីរនៅក្រៅតំបន់សេវា។
ជុំវិញបញ្ហានេះ មិនមានមន្ត្រីជាន់ខ្ពស់នៃស្ថាប័នមានសមត្ថកិច្ចណាមួយអាចធ្វើការ អត្ថាធិប្បាយបាននៅឡើយទេ។ អ្នកនាំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ បានបង្វែរឲ្យអ្នកនាំពាក្យរបស់រដ្ឋាភិបាលជាអ្នកឆ្លើយអំពីបញ្ហា នេះ៖ «សុំសួរទៅអ្នកនាំពាក្យរបស់រដ្ឋាភិបាលទៅ»។
ចំណែកលោក ផៃ ស៊ីផាន អ្នកនាំពាក្យនៃទីស្ដីការគណៈរដ្ឋមន្ត្រី អះអាងថា កម្ពុជា ជាប្រទេសប្រកាន់ច្បាប់ជាធំ ដូច្នេះគ្មានជនណាដែលប្រព្រឹត្តខុសច្បាប់ ហើយអាចរួចទោសនោះឡើយ សូម្បីកូនមន្ត្រីជាន់ខ្ពស់ក៏ដោយ។ ហើយម្យ៉ាងវិញទៀត បញ្ហាបងតូចបងធំក្នុងសង្គមខ្មែរ កាន់តែសាបរលាបផងដែរ តាមរយៈវិធានការហ្មត់ចត់ដ៏មានប្រសិទ្ធភាពរបស់មន្ត្រីមាន សមត្ថកិច្ច។
លោក ផៃ ស៊ីផាន មានប្រសាសន៍ថា ទោះជាកម្ពុជាមានបញ្ហាមួយចំនួនដែលបានដោះស្រាយដោយច្បាប់ហើយក៏ ដោយ ក៏គេសង្កេតឃើញករណីឃាតកម្មនៅកម្ពុជាមានកម្រិតតិចជាង សហរដ្ឋអាមេរិក៖ «ក្រុមណាមួយដែលថា ឲ្យតែសាច់ឈាមរបស់សម្ដេចនាយករដ្ឋមន្ត្រី គឺធ្វើខុសទាំងអស់ ដូច្នេះគឺវាមិនមែនការពិតទេ។ ក៏ប៉ុន្តែ ទោះជាយ៉ាងណា កម្ពុជា មិនមានអ្នកណាយកកាំភ្លើងទៅបាញ់កូនចៅងាប់អស់បួនដប់នាក់ ដូចនៅសហរដ្ឋអាមេរិកទេ»។
ឆ្លើយតបនឹងប្រសាសន៍របស់លោក ផៃ ស៊ីផាន នេះដែរ លោក គុជ ច័ន្ទលី ពលរដ្ឋខ្មែរអាមេរិកាំងពីរដ្ឋ Maryland ដែលជាអ្នកតាមដានដំណើរការនីតិរដ្ឋនៅកម្ពុជាយ៉ាងយកចិត្តទុកដាក់ នោះ មានប្រសាសន៍ថា សហរដ្ឋអាមេរិកជាប្រទេសជឿនលឿនលើគ្រប់វិស័យ រួមទាំងវិស័យយុត្តិធម៌។ លោកបញ្ជាក់ថា លោកកម្រឃើញជនល្មើសច្បាប់ក្នុងសហរដ្ឋអាមេរិក អាចរួចខ្លួនងាយស្រួលដូចនៅកម្ពុជានោះទេ៖ «មានមន្ត្រីខ្លះនៅ ក្នុងរដ្ឋាភិបាលប្រទេសខ្មែរយើង បានឆ្លើយការពារដោយសេចក្ដីងងឹតងងុង ពីព្រោះនៅសហរដ្ឋអាមេរិក កាលណាបុគ្គលណាម្នាក់ប្រព្រឹត្តអំពើឧក្រិដ្ឋកម្ម ដូចជាការបាញ់សម្លាប់ជាដើមនេះ រត់មិនរួចពីសំណាញ់យុត្តិធម៌ គេនឹងរកឃើញភ្លាម»។
អង្គការលើកលែងទោសអន្តរជាតិ Amnesty International ធ្លាប់បានរាយការណ៍ថា ការជម្រះក្តីជនប្រព្រឹត្តបទល្មើស ដែលជាក្រុមមន្ត្រីមានអំណាចជិតស្និត ឬជាសាច់ញាតិរបស់ប្រមុខរដ្ឋាភិបាល តែងធ្វើឡើងផ្ទុយពីច្បាប់របស់ប្រទេស និងកាតព្វកិច្ចច្បាប់អន្តរជាតិ។
អង្គការនេះក៏បានទាមទារផងដែរថា ការជំនុំជម្រះដោយចំហ និងជាសាធារណៈចំពោះមុខមហាជនទូទៅ គឺជានីតិវិធីមួយដ៏ចាំបាច់បំផុត និងជាមូលដ្ឋានសម្រាប់សង្គមប្រជាធិបតេយ្យ ដើម្បីធានាថា យុត្តិធម៌ត្រូវបានរកឃើញប្រកបដោយការជឿជាក់។ ហើយកត្តាទាំងនេះ មានសារសំខាន់ណាស់ដើម្បីឲ្យច្បាស់ថា និទ្ទណ្ឌភាព ឬភាពគ្មានទោសពៃនឹងមិនអាចផ្តល់ឲ្យបានទេចំពោះជនណាដែលរំលោភ សិទ្ធិមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

គ្រោះថ្នាក់ចរាចរ ស្លាប់ម្នាក់ របួសធ្ងន់៣នាក់

សៀមរាម៖ រថយន្តដឹកអ្នកដំណើរ របស់ក្រុមហ៊ុនសៀមរាប អង្គរអ៊ិច ប្រេស មួយគ្រឿងបាន បុកម៉ូតូមួយ គ្រឿងបណ្តាលឲ្យ ស្រ្តីជាម្តាយម្នាក់ស្លាប់ និងនិងកូនប្រសាម្នាក់ រួមនិងចៅប្រុសស្រី២នាក់របួសធ្ងន់ ហើយត្រូវ បានគេបញ្ជូនទៅ សង្រ្គោះបន្ទាន់នៅមន្ទីរពេទ្យ បង្អែកខេត្តទាំងយប់ កាលពីវេលាម៉ោង៧ និង១០នាទីយប់ ថ្ងៃទី២៧ ខែកក្កដា ឆ្នាំ២០១២ តាមបណ្តោយផ្លូវជាតិលេខ៦ ខាងកើតប៉ុស្តិ៍កៀនសង្កែ ដែលស្ថិតក្នុងភូមជ្រៃត្បូង ឃុំកៀនសង្កែ ស្រុកសូទ្រនិគម ខេត្តសៀមរាប។
ប្រភពព័ត៌មានបានឲ្យដឹងថា រងគ្រោះខាងលើមាន ១ឈ្មោះ លុយ បាត់ អាយុ៦៨ឆ្នាំ មុខរបរធ្វើស្រែ ជាម្តាយក្មេក ស្លាប់ភ្លាមៗនៅនឹងកន្លែងកើតហេតុ,២ឈ្មោះ សៀត កាន អាយុ២៨ឆ្នាំ មុខរបរធ្វើស្រែ ត្រូវជាកូនប្រសាឈ្មោះ និងក្មេងប្រុសស្រី២នាក់ត្រូវជាកូនរបស់សៀត កាន ពុំត្រូវបានស្គាល់ឈ្មោះ។
ជនរងគ្រោះទាំងអស់រស់នៅក្នុងភូមិ-ឃុំ កើតហេតុខាងលើ ជនរងគ្រោះបើកម៉ូតូ ម៉ាកវ៉េវ ពណ៌ខ្មៅលាយក្រហម គ្មានស្លាកលេខ ។ ចំណែករថយន្តបង្ក ហេតុម៉ាក ហ្វ័ត ពណ៌ស ពាក់ស្លាកលេខភ្នំពេញ 2N-1461 ផ្ទុកអ្នកដំណើរ ១៣ នាក់ ជារថយន្តរបស់ក្រុមហ៊ុន ដឹកអ្នកដំណើរ អង្គរអ៊ិចប្រេស ហេតុការណ៍ខាងលើ មិនបណ្តាលឲ្យអ្នក ដំណើរនៅក្នុងរថយន្តរងរបួសដល់អាយុជីវិតឡើយ។ ក្រោយ កើតហេតុជនបង្កបានបើក រថយន្តទៅ ចតទុកចោលឆ្ងាយពីកន្លែងកើតហេតុប្រហែល៥០០ម៉ែត្រ រួចរត់គេចខ្លួនបាត់ស្រមោលតែម្តង។
លោក ឈួយ ឈឿន មេប៉ុស្តិ៍កៀនសង្កែ បាននិយាយឲ្យដឹងថា មុនកើតហេតុរថយន្តដឹក អ្នកដំណើរពីភ្នំពេញ ទៅសៀមរាប និងម៉ូតូបើកស្របទិសគ្នា ពីកើតទៅលិចទាំងអស់គ្នា ដោយម៉ូតូបានបើកនៅពីមុខ រថយន្តហើយ បត់ទៅខាងឆ្វេងដៃចូលផ្ទះរបស់ខ្លួន ស្រាប់តែរថយន្តនោះ បើកក្នុងល្បឿនលឿន បានបុកម៉ូតូយ៉ាងពេញ ទំហឹងតែម្តង បណ្តាលឲ្យស្ត្រីជាម្តាយក្មេកអង្គុយពីក្រោយ ផ្លោងចេញពីម៉ូតូបោកទៅនឹងថ្នល់ស្លាប់ភ្លាម និងកូនប្រសា រួមជាមួយចៅប្រុសស្រី២នាក់ទៀតរងរបួសធ្ងន់ ហើយត្រូវបានបញ្ជូន ទៅសង្គ្រោះនៅ មន្ទីរពេទ្យខេត្ត។
បន្ទាប់ពីមានគ្រោះថ្នាក់កើតឡើងហើយ គេបានឃើញនគរបាលចរាចរណ៍ស្រុក ចុះទៅធ្វើការវាស់វែង ហើយយកម៉ូតូ និងរថយន្តបង្កទៅរក្សាទុកនៅកន្លែងដើម្បីដោះស្រាយនៅពេលក្រោយ។ ចំណែក សពជនរងគ្រោះត្រូវបានប្រគល់ ឲ្យក្រុមគ្រួសារយកទៅធ្វើបុណ្យតាមប្រពៃណី៕(dapnews)

ផលិតកម្មសាន់ដេ ក្រុងពាលីថត ខ្សែភាពយន្តថ្មី រឿង "វិញ្ញាណបិសាច ជញ្ជក់ឈាម"

ភ្នំពេញ៖ បន្ទាប់ពីទទួលបានជោគជ័យយ៉ាងសន្ធឹកសន្ធាប់ ក្នុងខែ្សភាពយន្តរឿង "ព្រាយដែកគោល" ផលិតកម្ម សាន់ដេ ចាប់ផ្តើមរៀបចំពិធីក្រុងពាលី ថតខ្សែភាពយន្តថ្មីមួយទៀតមានចំណងជើងថា " វិញ្ញាណបិសាចជញ្ជក់ ឈាម" ដែលពិធីនេះបានរៀបចំឡើង នារសៀលថ្ងៃទី២៨ ខែកក្កដាឆ្នាំ ២០១២។
ពិធីក្រុពាលី ដែលប្រារព្ធឡើង នៅក្នុងផលិកម្មសាន់ដេ គេពិនិត្យឃើញវត្តមាន តារាល្បីចម្រៀងល្បីៗ របស់ ផលិតកម្មមួយនេះ ចូលរួមយ៉ាងច្រើនកុះករ ដើម្បីបានអុជធូប អុជទៀន ទទួលពរជ័យ សុំសេចក្តីសុខ ពីអារុកអារក្ស អ្នកតា ពីទេវតាគ្រប់ទិសទី តាមថែរក្សា ពេលតារាសម្តែងទាំងអស់ ចាប់ផ្តើមដំណើរការ ថតខ្សែភាពយន្ត បែបខ្មោចព្រាយនេះ។
រឿង "វិញ្ញាណបិសាចជញ្ជក់ឈាម" គឺជាប្រភេទខ្សែភាពយន្តថ្មីមួយទៀតរបស់ផលិតកម្មសាន់ដេ ដែលសាច់ រឿងពោរពេញ ទៅដោយអភិនិហា ភ័យរន្ធត់ តក់ស្លុត លាយឡំនឹងឈុតឆាក កំប្លុកកំប្លែង និងមានឈុត សេ្នហា មនោសញ្ចេតនា ហើយខ្សែភាពយន្តនេះត្រូវបានគេដឹងថា មានសកម្មភាពថតរហូតដល់ ទីក្រុងហុងកុង ប្រទេសចិនទៀតផង។
លោក ឡាយ សុខចំរើន ប្រធានគ្រប់គ្រង ទូទៅក្នុងផលិតកម្មសាន់ដេ បានថ្លែងប្រាប់មជ្ឈមណ្ឌល ព័ត៌មានដើម អម្ពិលដឹងថា " ពីដំបូងផលិតកម្មយើងខ្ញុំ បានថតខ្សែភាពយន្តមួយមានចំណងជើងថា " អង្គុលីមាល" ហើយក្នុង រយៈកាលប៉ុន្មានឆ្នាំ ដែលយើងទទួលបានជោគជ័យបន្តបន្ទាប់នេះ យើងក៏បានថតខ្សែភាពយន្តមួយទៀត គឺ រឿង"ព្រាយដែកគោល" ក្នុងឆ្នាំ២០១១ ដោយយើងទទួលបានការគាំទ្រច្រើនខ្លាំងមែនទែន ពិសេសទូទាំង២៤ ខេត្ត-ក្រុង " ។
លោក ឡាយ សុខចំរើន ថ្លែងបន្តឲ្យដឹងទៀតថា " នៅពាក់កណ្តាលឆ្នាំ ២០១២នេះ យើងបានសម្រេចចិត្ត ផលិត ខ្សែភាពយន្ត ទី៣ មួយរឿងទៀត គឺរឿង"វិញ្ញាណបិសាចជញ្ជក់ឈាម" ។ សាច់រឿងថ្មីនេះពិតជាអាចធ្វើ ឲ្យទស្សនិកជនចាប់អារម្មណ៍ ពេលផលិតកម្មយើងខ្ញុំចាប់ផ្តើមចាក់បញ្ចាំង ព្រោះសាច់រឿងនេះ បានសហការ ថតជាមួយតួសម្តែងចិន ក្រុងហុងកុង ដែលខ្សែភាពយន្ត កន្លងមកពុំធ្លាប់មាន និងគ្រោងចេញថតក្រៅប្រទេស ចំនួនពីរ គឺថៃ និងហុងកុង " ។
លោកបញ្ជាក់ទៀតថា " តួសម្តែងក្នុងរឿង នេះមានដូចជា លោក ខេមរៈ សិរីមន្ត អ្នកនាង សុខ ស្រីនាង លោក ឆាយវីរៈយុទ្ធ លោក កែវ វាសនា កញ្ញាផាន់ ម៉ូនីកា លោក អាន គុណកូឡា លោកប៊ុន សក្តិ កញ្ញា អ៊ីវ៉ា លោក សុខ រក្សា លោក មាស សាលី លោកហេង ពិទូ កញ្ញាគង់ ច័ន្ទស្រីមុំ និយាយទៅ គឺតារាចម្រៀងទាំងអស់ក្នុង ផលិតកម្មសាន់ដេ" ។
ទោះបីជាយ៉ាងណា ក្នុងខ្សែភាពយន្តរឿងថ្មី នេះគ្មានវត្តមានកញ្ញា សុខ ពិសី ជាតួឯកនោះទេ ត្រូវបានជំនួសមក វិញដោយអ្នកនាង សុខ ស្រីនាង ហើយត្រូវបានលោក ឡាយ សុខចំរើន អះអាងថា សុខ ពិសី ជាប់រវល់រៀន ជំនាញកែសម្ផស្ស ហើយអាចទុកតំណែងជាតួឯកនេះ ក្នុងរឿងទី៤បន្តទៀត។
ខ្សែភាពយន្តដែលពោរពេញទៅដោយភាពរន្ធត់ញាប់ញ័រនេះ គឺផលិតកម្ម ផលិតឡើងទៅតាម ចំណង់ចំណូល ចិត្តរបស់អ្នកទស្សនា ដែលក្នុងសង្គមខែ្មរបច្ចុប្បន្ន មានជំនឿទៅលើខ្មោចព្រាយ បិសាចជាប់រហូតមក និងជា ខ្សែភាពយន្តមានការលាយបញ្ចូលគ្នានូវទេសភាពប្លែកៗ រវាង ប្រទេសកម្ពុជា និងប្រទេសចិន ។
មូលហេតុដែលខ្សែភាពយន្តតម្រូវឲ្យមានទីតាំងថតរហូតដល់ទីក្រុងហុងកុង គឺត្រូវបានលោក ឡាយ សុខចំរើន អះអាងថា ធ្វើឡើងដើម្បីឲ្យមានលក្ខណៈប្លែកពីគេ ដោយសារ តែកន្លងមកផលិតកម្មសាន់ដេ បាននាំមកនូវ ភាពយន្តចិន ជាច្រើនរឿងកន្លងមកហើយ មកបញ្ចាំងក្នុងប្រទេសខ្មែរ ហើយខ្សែភាពយន្តខ្មែរ កន្លងមកមាន ថតតែនៅក្នុងស្រុក ខ្មែរយើងនេះទេ ដោយសារតែផលិតកម្មសាន់ដេ ចង់ផ្លាស់ប្តូរបទពិសោធន៍ រវាងតារាខ្មែរ និងតារាចិន ក្នុងន័យលើកស្ទួយភាពយន្តខ្មែរយើងផងដែរ នៅលើឆាកអន្តរជាតិ។
រឿង "វិញ្ញាណបិសាច ជញ្ជក់ឈាម" សម្រាប់តំណែងតួឯកត្រូវបានគេដឹងថា គឺលោក ខេមរៈ សិរីមន្ត និងអ្នកនាង សុខ ស្រីនាង ហើយនឹងគ្រោងចេញថតនៅដើមខែសីហា និងត្រៀមចាក់បញ្ចាំង ក្នុងឱកាស ព្រះរាជពិធីបុណ្យ អ៊ុំទូក អកអំបុក ក្នុងអំឡុងខែវិច្ចិកា ចុងឆ្នាំ២០១២នេះ។
ខាងក្រោមនេះ គឺជាទិដ្ឋភាពខ្លះៗដែលអ្នកយកព័ត៌មានរបស់មជ្ឈមណ្ឌលព័ត៌មានដើមអម្ពិល ចុះទៅផ្តិតយក ដោយផ្ទាល់ ក្នុងកម្មវិធីក្រុងពាលី រឿង "វិញ្ញាណបិសាច ជញ្ជក់ឈាម" ៖