ទីតាំងចំណុចប្រសព្វរវាងផ្លូវ២៧១ និងផ្លូវមុនីរ៉េត ដែលត្រូវសង់ស្ពានអាកាសនាពេលខាងមុខ ។ រូបថត ផា លីណា
ភ្នំពេញៈ ស្ពានអាកាសស្ទឹងមានជ័យដែលមានរាងដូចមេអំបៅ ដោយគ្រោងចំណាយថវិកាចំនួន១៧លានដុល្លារនោះ គ្រោងនឹងបើកការដ្ឋានសាងសង់នៅក្នុងខែកញ្ញានេះហើយ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មានប្រសាសន៍ថា ស្ពានអាកាសស្ទឹងមានជ័យ នឹងចាប់ផ្តើមបើកការដ្ឋានសាងសង់នៅដើមខែកញ្ញានេះ ដោយពេលនេះសាលារាជធានីភ្នំពេញកំពុងដោះស្រាយផលប៉ះពាល់ផ្សេងៗជា មួយប្រជាជនដែលមានលំនៅដ្ឋានប៉ះពាល់ជាមួយនឹងគម្រោងនេះ។ លោកប្រាប់ទៀតថា លោកមិនដឹងច្បាស់ថាមានប្រជាជនប៉ុន្មានគ្រួសាររងផលប៉ះពាល់ដោយ សារគម្រោងនេះនៅឡើយទេ។
លោកថ្លែងថា៖«ទឹកប្រាក់ចំនួន១៧ លានដុល្លារសហរដ្ឋអាមេរិកដែលគ្រោងចំណាយសម្រាប់ការសាងសង់ស្ពាននេះ ជាថវិការបស់សាលារាជធានីភ្នំពេញដែលទទួលបានមកពីការជួលដីនៅ តំបន់ជ្រោយចង្វារឲ្យក្រុមហ៊ុន OCIC»។
យោងតាមរបាយការណ៍របស់ មន្រ្តីជំនាញដែលបានចុះពិនិត្យដោះស្រាយផលប៉ះពាល់ជាមួយ ប្រជាជននៅទីតាំងដែលត្រូវសង់ស្ពានខាងលើកាលពីព្រឹកថ្ងៃអង្គារ ទី២៨ ខែសីហាកន្លងមក បានបង្ហាញថា ទីតាំងស្ពាននេះស្ថិតនៅចំណុចប្រសព្វខណ្ឌចំនួនបីរួមមានខណ្ឌចំការ មនខណ្ឌមានជ័យ និងខណ្ឌទួលគោក។ ការសាងសង់ស្ពាននេះគ្រោងចំណាយពេលចំនួន២៦ខែ គិតចាប់ពីថ្ងៃបើកការដ្ឋានរហូតដល់បញ្ចប់។ គម្រោងនេះបានកាត់បន្ថយផលប៉ះពាល់លំនៅដ្ឋានប្រជាជនពីជាង១០០ គ្រួសារមកនៅត្រឹមចំនួន៣៧គ្រួសារ ប៉ះដើមឈើចំនួន២៥ដើម បង្គោលអគ្គិសនី និងបង្គោលភ្លើងបំភ្លឺផ្លូវជាង២០ដើម ហើយមកដល់ពេលនេះការដោះស្រាយផលប៉ះពាល់ជាមួយប្រជាពលរដ្ឋ សម្រេចបានជាង៩០ភាគរយហើយ។
លោក ម៉េង ចំរើន វិស្វករទទួលបន្ទុកសាងសង់ស្ពានអាកាសស្ទឹងមានជ័យមកពីក្រុមហ៊ុន OCIC បាននិយាយថា តាមរយៈការចុះពិនិត្យដោះស្រាយផលប៉ះពាល់របស់គម្រោងនេះលោកអភិបាល រាជធានីភ្នំពេញ កែប ជុតិម៉ា មានបំណងបើកការដ្ឋានសាងសង់ស្ពានអាកាសនេះនៅក្នុងខែកញ្ញានេះ ព្រោះរហូតមកដល់ពេលនេះការដោះស្រាយផលប៉ះពាល់ជាមួយប្រជាជនជិត បញ្ចប់ហើយ។ លោកបន្តថា គម្រោងនេះប៉ះពាល់សំយ៉ាបផ្ទះប្រជាពលរដ្ឋជាច្រើន និងប៉ះជញ្ជាំងផ្ទះប្រជាជនបួនខ្នងប៉ុណ្ណោះ ហើយប្រជាជនភាគច្រើនរីករាយសហការ ជាមួយសាលារាជធានី និងក្រុមហ៊ុនដើម្បីបើកដំណើរការសាងសង់ស្ពានអាកាសនេះ។
លោក បញ្ជាក់ថា៖«តាមគំរូប្លង់ដែលក្រុមហ៊ុនដាក់ជូនសាលារាជធានី ភ្នំពេញ ការសង់ស្ពាននេះគ្រោងបញ្ចប់ក្នុងរយៈពេល១៨ខែដោយប្រើប្រាស់ វិស្វករទាំងក្នុងប្រទេស និងមកពីក្រៅប្រទេស»។
នេះគឺជាស្ពាន អាកាសទី៣ហើយនៅក្នុងរាជធានីភ្នំពេញដែលស្ពានអាកាសទី១ បានបើកការដ្ឋានសាងសង់កាលពីថ្ងៃទី២៧ ខែឧសភា ឆ្នាំ២០០៩ និងសម្ពោធដាក់ឲ្យប្រើប្រាស់នាថ្ងៃទី២៧ ខែឧសភា ឆ្នាំ២០១០ ដោយចំណាយថវិកាចំនួនជាង៦លានដុល្លារ។
រីឯស្ពានអាកាស៧មករា ដែលនៅជិតពេទ្យព្រះកុសុមៈ បានបើកការដ្ឋានសាងសង់កាលពីថ្ងៃទី២៩ ខែតុលា ឆ្នាំ២០១០ ហើយបានសម្ពោធដាក់ឲ្យប្រើប្រាស់ជាផ្លូវការនៅថ្ងៃទី៦ ខែមករា ឆ្នាំ២០១២ ដោយចំណាយថវិកាសាងសង់អស់ចំនួនជាង៨,៧លានដុល្លារអាមេរិក៕
