Hot News: October 2012

Wednesday, October 31, 2012

ចោរមួយសំបុក មានគ្នា៧នាក់ ត្រូវបាន ប៉ូលិស ក្រុងខេមរភូមិន្ទ ចាប់ខ្លួន

ខេត្តកោះកុង: ប៉ូលិសក្រុងខេមរភូមិន្ទ ខេត្តកោះកុង កាលពីព្រឹក ថៃ្ងទី៣១ តុលា ឆ្នាំ២០១២ បានតាមប្រមាញ់ ចាប់ចោរអំបុក ចោរអំបែង បានមួយសំបុក មាន គ្នា៧នាក់ ក្នុងនោះមានស្រ្តីពីរនាក់ បន្ទាប់ពីធើ្វសកម្មភាព គាស់បង្អួចផ្ទះសំណាក់ចូលលួចកុំព្យូទ័របានចំនួន៣គ្រឿង រួចមក។

មន្ត្រីប៉ូលិសក្រុងខេមរភូមិន្ទមួយរូបបានឲ្យដឹងថា ជនសង្ស័យទាំង៧នាក់ដែលត្រូវចាប់ខ្លួនបាននោះ គឺ១- ឈ្មោះសេង ឆៃ អាយុ២០ឆ្នាំ ទីលំនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង។ ២- ឈ្មោះប៉ែន សុគ្រី អាយុ២០ឆ្នាំ។៣- ឈ្មោះអ៊ុច អាន អាយុ២៧ឆ្នាំ ពួកគេទាំងពីរ មានទីលំនៅស្រុកស្រែអំបិល ខេត្តកោះកុង។ ៤- ឈ្មោះ ហេង ស៊ូយ អាយុ២០ឆ្នាំ ទីលំនៅខេត្តសៀមរាប។ ៥- ឈ្មោះ ហេង ប៊ុនធឿន អាយុ២១ឆ្នាំ ទីលំនៅភូមិចាំយាម ឃុំប៉ាក់ខ្លង ស្រុកមណ្ឌលសីមា។ ៦- ឈ្មោះវ៉ន ចន្ថា ភេទស្រី អាយុ៣១ឆ្នាំ ទីលំនៅស្រុកកៀនស្វាយ ខេត្តកណ្តាលនិង ៧- ឈ្មោះខ្លង រ៉ា ភេទស្រី អាយុ២៦ឆ្នាំ ទីលំនៅ ខេត្តតាកែវ។

មន្រី្តប៉ូលិសខាងលើបានឲ្យដឹងបនែ្ថមថា ក្រុមចោរអំបុកអំបែងទាំងនេះ បានចេញធ្វើសកម្មភាពលួច កាលពីវេលាម៉ោង៤និង១០នាទី ព្រឹក ថៃ្ងទី៣១ ខែតុលា ឆ្នាំ២០១២ នៅចំណុចផ្ទះសំណាក់កោះកុងនិងសណ្ឋាគារអាស៊ាន ដោយគាស់បង្អួចចូលលួចយកកុំព្យូទ័របាន៣គ្រឿង រួចគេចខ្លួនបាត់ ប៉ុនែ្តដោយសារកម៉ារ៉ាសុវត្ថិភាពនៅតាមផ្ទះសំណាក់និងសណ្ឋាគារខាងលើ ថតជាប់ រូបភាព បានច្បាស់ ប៉ូលិសក៏បានធ្វើការស្រាវជ្រាវ ជំហានដំបូងគឺចាប់បានបក្ខពួកវាម្នាក់។ក្រោយពីទទួលបានចម្លើយសារភាព ប៉ូលិសក៏ឈានទៅចាប់បានបក្ខ
ពួកវាចំនួន៦នាក់បនែ្ថមទៀតព្រមទាំងរឹបអូសយកបានវត្ថុតាងផងដែរ។

បើតាមមន្ត្រីប៉ូលិសរូបនោះបានឲ្យដឹងបនែ្ថមទៀតថា ក្រុមចោរអំបុកអំបែងទាំងនេះនឹងត្រូវកសាងសំណុំរឿង បញ្ជូនទៅកាន់ ស្នងការដ្ឋាន ប៉ូលិសខេត្ត ដើម្បីចាត់ការបន្តទៅតាមផ្លូវច្បាប់៕

Tuesday, October 30, 2012

"Gwen Sterfani" ដូចជាមានភាពស៊ិចស៊ីជាងមុន ជាមួយមិត្រភ័ក្រ

តារា៖ តាមការអោយដឹងពីគេហទំព័រដេលីមែល កាលពីពេលថ្មីៗនេះថា តារាចម្រៀងជើង
ចាស់អាមេរិក Stefani ពេលនេះហាក់បីដូចជា បានបង្ហាញនូវភាពស៊ិចស៊ីរបស់ខ្លូនគ្រាន់បើ
ជាងមុន ខណៈដែលខ្លួនមានវ័យចំណាស់បន្ដិច។

ការជួបជុំក្នុងកម្មវិធីជប់លាងរបស់មិត្រភ័ក្រនាងនៅឯរដ្ឋ Los Angeles ជាមួយម៉ូតសម្លៀក
បំពាក់ស៊ិចស៊ី លេចលើលេចក្រោមនោះ បានអោយមនុស្សភាគច្រើននិយាយថា នាងកាន់
តែចាស់ កាន់តែមានភាពស៊ិចស៊ី ដូចគេថា "ខ្ញីកាន់តែចាស់ គឺកាន់តែហិរមែន"។ នេះរូបថត
ដែលនាងបានថតជាមួយមិត្ររបស់នាង ក្នុងកម្មវិធីជប់លាង។

មិត្រភ័ក្ររបស់ Stefani

បរិស័ទទាមទារបណ្តេញចៅអធិការនិងសង្ឃទំនើងបង្កអធិករណ៍ក្នុងវត្តគោកខ្សាច់

(រូប ស្ដាំ) ស្នាមរបួសខាងក្រោយ និង (រូបឆ្វេង) ព្រះសង្ឃរងគ្រោះ ព្រះតេជគុណ ជាង វណ្ណរ៉ា ដែលត្រូវបានសង្ឃទំនើងវាយ ហើយត្រូវព្រះសង្ឃនិងពុទ្ធបរិស័ទនាំទៅមន្ទីរពេទ្យ។ រូប សហការី

ភ្នំពេញៈ ប្រជាពលរដ្ឋជាពុទ្ធបរិស័ទចំណុះជើងវត្តគោកខ្សាច់ ចំនួន៩ភូមិ ប្រមាណជា១ពាន់នាក់ នៅក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ បានដាក់ញត្តិទាមទារឲ្យក្រសួងធម្មការនិងសាសនា និងអាជ្ញាធរមូលដ្ឋាន បណ្តេញលោកចៅអធិការវត្តគោកខ្សាច់ និងឲ្យចាប់ផ្សឹកនិងផ្តន្ទាទោសព្រះសង្ឃទំនើងជាប្អូនលោកចៅអធិការ អង្គនេះផង បន្ទាប់ពីផ្ទុះនូវអធិករណ៍រវាងព្រះសង្ឃនិងព្រះសង្ឃដេញវាយតប់គ្នា ពេញវត្ត បង្ករបួសស្នាមដល់លោកគ្រូសូត្រឆ្វេង ក្រោយពីចប់បុណ្យភ្ជុំបានប៉ុន្មានថ្ងៃ។
គ្រូសូត្រស្តាំវត្ត គោកខ្សាច់ ព្រះតេជគុណ ថោង សំណាង មានថេរដីកាឲ្យភ្នំពេញ ប៉ុស្តិ៍ ដឹងថា អ្នកភូមិប្រហែល១ពាន់នាក់តំណាងឲ្យពលរដ្ឋជាពុទ្ធបរិស័ទ ចំនួន៩ភូមិ នៅក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ បានចុះឈ្មោះផ្តិតមេដៃលើញត្តិមួយដាក់ស្នើទៅក្រសួងធម្មការនិង សាសនា និងអាជ្ញាធម៌សុំឲ្យបណ្តេញលោកចៅអធិការវត្តគោកខ្សាច់ ព្រះនាម ជឹង អេងស៊ ព្រះជន្ម ២៩ វស្សា ចេញពីវត្ត ព្រមទាំងសុំឲ្យចាប់ផ្សឹកនិងផ្តន្ទាទោសព្រះសង្ឃនាម ជឹង អេងធិ ព្រះជន្ម២៦វស្សា ដែលត្រូវជាប្អូនបង្កើតចៅអធិការ ដោយបានចោទព្រះសង្ឃទាំងពីរនេះ ថា បានប្រព្រឹត្តប្រាសចាកវិន័យជាសង្ឃ និងធ្វើឲ្យប៉ះពាល់ដល់ព្រះពុទ្ធសាសនា និង ជំនឿរបស់ពុទ្ធបរិស័ទ។
ព្រះ តេជគុណ ថោង សំណាង មានថេរដីកាថា៖ «តាមវិន័យព្រះសមា្មសម្ពុទ្ធ ទង្វើនិងសកម្មភាពរបស់សង្ឃទាំងពីរអង្គនេះ គឺប្រាសចាក ដាច់ភាវៈជាព្រះសង្ឃហើយ។ ដូច្នេះ តាមសំណូមពរពុទ្ធបរិស័ទ គឺសុំឲ្យផ្សឹក និងបណ្តេញចៅអធិការអង្គនេះពីវត្ត និងសុំឲ្យផ្សឹកនិងផ្តន្ទាទោសសង្ឃទំនើង ដែលត្រូវជាប្អូនរបស់ចៅអធិការ»។
លោកគ្រូសូត្រស្តាំបញ្ជាក់ពី មូលហេតុថា កាលពីថ្ងៃទី១៧ តុលា កន្លងទៅនេះមានអំពើហិង្សាឃោរឃៅមួយកើតឡើងក្នុងវត្ត បង្កដោយ សង្ឃនាម ជឹង អេងធិ ទៅលើលោកគ្រូសូត្រឆ្វេង នាម ជាង វណ្ណរ៉ា ព្រះជន្ម៣១វស្សាធ្វើឲ្យបែកព្រះកេសរបួសធ្ងន់ធ្ងរ រហូតប្រេះលលាដ៍ផង។

ព្រះអង្គបន្តថា មុនកើតហេតុសង្ឃនេនៗបានឡើងទីឆាន់លើកុដិរួមគ្នា។ ពេលឆាន់រួចគ្រូសូត្រឆ្វេងសួរថា «ឆាន់រួចហើយឬនៅ?» នេនៗឆ្លើយថា៖ «ឆាន់រួចហើយ!» គ្រូសូត្រឆ្វេងក៏តបថា«បើឆាន់ហើយ ចុះទៅ!» ពេលនោះកូននេនមួយអង្គតបថា ៖ «មិនហ៊ានចុះទេ ! ចុះខ្លាចបែកក្បាល»។ លោកគ្រូសូត្រឆ្វេង ជាង វណ្ណរ៉ា បន្តថា៖ «ខា្លចអីចុះទៅ»។ តែសង្ឃនាម ជឹង អេងធិជាប្អូនចៅអធិការគំហកថា ៖ «បើនរណាហ៊ានចុះបែកក្បាល!»។ លោកគ្រូសូត្រឆ្វេងមិនតប ងើបដើរចុះមក ក៏ត្រូវសង្ឃទំនើងអង្គនេះ គប់នឹងកំប៉ុងទឹកក្រូចកូកាកូឡានៅទឹកពេញ ចំសៀតផ្ការងរបួសជាទម្ងន់។ ភ្លាមនោះសង្ឃ ជឹង អេងធិ ក៏យកបាត្រមានបាយពេញវាយទៅលើព្រះកេសគ្រូសូត្ររងរបួសថែមទៀតនិង ស្ទុះមកបោក ព្រះតេជគុណ ជាង វណ្ណរ៉ា ផ្ងារក្រោយ បោកទៅនឹងឥដ្ឋការ៉ូ បែកព្រះកេសហូរឈាមកក្លាក់។ មិនអស់ចិត្តសង្ឃទំនើងអង្គនេះ ក៏ទាញបានប៉ែល ដេញតាមកាប់លោកពេញវត្តថែមទៀត។ មិនតែប៉ុណ្ណោះ សង្ឃ ជឹង អេងធិ បានគំរាមវាយទាំងព្រះអង្គផង។ លោកគ្រូសូត្រឆ្វេង វណ្ណរ៉ា ត្រូវព្រះសង្ឃនិងពុទ្ធបរិស័ទ បញ្ជូនទៅសង្គ្រោះនៅមន្ទីរពេទ្យកាល់ម៉ែត នៅភ្លាមៗនោះ។
លោក គ្រូសូត្រស្តាំបានបញ្ជាក់ថា ពេលហេតុការណ៍កើតឡើង លោកចៅអធិការវត្ត ដែលនៅក្នុងហេតុការណ៍នោះពុំបានឃាត់ទេ ប៉ុន្តែ បែរជាពន្យុះឲ្យសង្ឃចាប់ដៃគូវាយគ្នាឲ្យដឹងឈ្នះចាញ់ម្តងទៅមើល មិនគិតបង្រួបបង្រួមភាគីទាំងពីរបញ្ចប់អធិករណ៍ឡើយ រួចហើយលោកចៅអធិការវត្ត បានយករថយន្តទំនើបលិចស៊ីស ៤៧០ របស់លោក ដឹកសង្ឃទំនើងជាប្អូនគេចចេញពីវត្តភ្លាមៗ និងពុំបានធ្វើការដោះស្រាយអ្វីទាំងអស់។
តេជគុណ ថោង សំណាង មានថេរដីកាថា សង្ឃដៃដល់ ជឹង អេងធិ នេះមិនមែនជាសង្ឃគង់នៅវត្តគោកខ្សាច់នេះទេ គឺគង់ចាំព្រះវស្សានៅវត្តសារ៉ាវ័នតេជោ ប៉ុន្តែ ចាប់ពីថ្ងៃបិណ្ឌ១ រហូតមកដល់ថ្ងៃបញ្ចប់ បុណ្យភ្ជំបិណ្ឌ លោកបាននិមន្តមកគង់នៅក្នុងវត្តនេះរហូត ហើយមកកាងនិងទទួលលាភសក្ការៈ ជាមួយបងជាចៅអធិការ។
លោកតា អាចារ្យ ស្វាយ ណែម អាយុ៧៧ឆ្នាំ ជាគណៈកម្មការវត្តគោកខ្សាច់ផង បានប្រាប់ភ្នំពេញ ប៉ុស្តិ៍ថា៖ ចាប់ពីចៅអធិការមកគ្រប់គ្រងវត្តគោកខ្សាច់ តេជគុណ ជឹង អេងស៊ បានបង្កើតអំពើពុករលួយ បក្ខពួកនិយម ការរើសអើងរវាងអាចារ្យ និងអាចារ្យ និងព្រះសង្ឃនៅក្នុងវត្តទាំងមូល។ មិនតែប៉ុណ្ណោះ បច្ច័យ លុយកាក់ទាំងអស់ ដែលទទួលបានពីពុទ្ធបរិស័ទ ឬ សប្បុរសជន នៅក្នុងពិធីបុណ្យទាននៅក្នុងវត្តនិងការចំណាយផ្សេងៗ លោកចៅអធិការវត្ត មិនដែលឲ្យព្រះសង្ឃ និងគណៈកម្មការអាចារ្យក្នុងវត្ត បានដឹងឡើយ។ តេជគុណអង្គនេះ ឃុបឃិតគ្នា តែជាមួយអាចារ្យ ធំនាម សាយ សូរ ម្នាក់តែប៉ុណ្ណោះ។
លោក តា ស្វាយ ណែម និយាយដែរថា៖ «ទង្វើរបស់ចៅអធិការអង្គនេះ ធ្វើឲ្យប៉ះពាល់ដល់ជំនឿរបស់ពុទ្ធបរិស័ទ និង ប្រជាជននៅក្នុងភូមិ និងសង្កាត់ភ្លើងឆេះរទេះ ក្នុងការធ្វើបុណ្យទាន និងខូចដល់ព្រះពុទ្ធសាសនា នៅក្នុងប្រទេសកម្ពុជា»។
លោក នូ សុភ័ណ អាយុ៤៦ ឆ្នាំ រស់នៅភូមិគោកខ្សាច់ ជាតំណាងអ្នកតវ៉ាក្នុងញត្តិម្នាក់ដែរនិយាយថា ចាប់តាំងពីកើតហេតុនៅថ្ងៃទី១៧ ខែតុលា មកទល់ពេលនេះ លោកចៅអធិការវត្តគោកខ្សាច់ជាប់រឿងអាស្រូវនេះ ក៏មិនបានប្រារព្ធពិធីបុណ្យកាន់ទុក្ខដល់ព្រះបរមសព សម្តេចព្រះវររាជបិតាឯករាជ្យជាតិទេ។ ទង្វើរបស់ចៅអធិការអង្គនេះធ្វើឲ្យបរិស័ទចំណុះជើងវត្តមិនពេញ ចិត្ត និងខកចិត្តយ៉ាងខ្លាំង។
លោក នូ សុភ័ណ និយាយថា ៖ «នេះ គឺជាការប្រមាថមួយយ៉ាងធ្ងន់ធ្ងរ ចំពោះ ព្រះមហាវីរក្សត្រ ដែលយើងជាពុទ្ធបរិស័ទមិនអាចទទួលយកបានឡើយ»។ «ជាសំណូមពររបស់ពុទ្ធបរិស័ទ គឺសុំឲ្យបណ្តេញចៅអធិការនាម ជឹង អេងស៊ នេះចេញពីវត្ត និងសុំឲ្យចាប់ផ្សឹកនិងផ្តន្ទាទោស សង្ឃនាម ជឹង អេងធិ តាមច្បាប់ ដើម្បីកុំឲ្យខូចនិងប៉ះពាល់ដល់ព្រះពុទ្ធសាសនា»។
ព្រះ តេជគុណជាង វណ្ណរ៉ា គ្រូសូត្រឆ្វេងដែលរងរបួសមានថេរដីកាថា សង្ឃល្មើសនិងចៅអធិការវត្តជាបង មិនបានចេញថ្លៃព្យាបាលព្រះអង្គទេ។ ការចំណាយទាំងអស់លោកត្រូវរ៉ាប់រងដោយបច្ច័យផ្ទាល់ព្រះអង្គអស់យ៉ាង ច្រើន។ ព្រះតេជគុណ បានទាមទារជំងឺចិត្តចំនួនបីពាន់ដុល្លារ និងសំណូមពរដូចប្រជាពុទ្ធបរិស័ទដែរ។
លោក អេ ស្រ៊ុន មេប៉ុស្តិ៍នគរបាលសង្កាត់ភ្លើងឆេះរទេះបានឲ្យដឹងថា មកដល់ពេលនេះ សង្ឃនាម ជឹង អេងធិ ត្រូវសាលាដំបូងរាជធានីចោទប្រកាន់ពីបទ«បង្ករបួសស្នាមដោយចេតនា» រួចហើយ គឺរង់ចាំតែការនាំខ្លួនបញ្ជូនទៅពន្ធនាគា រង់ ចាំការកាត់ទោសតាមច្បាប់តែប៉ុណ្ណោះ។ លោកថា មូលហេតុដែលសមត្ថកិច្ចប៉ូលិស មិនទាន់ចាត់ការទៅលើព្រះសង្ឃល្មើសអង្គនេះ គឺនៅរង់ចាំខាងអនុគណខណ្ឌនិង មន្ទីរធម្មការរាជធានីប្រជុំដោះស្រាយនិងផ្សឹកជាមុន។ លោកបន្តថា ព្រះអនុគណខណ្ឌ និងមន្ទីរធម្មការរាជធានីនឹងជួបប្រជុំដោះស្រាយវិវាទនេះនៅថ្ងៃ ចន្ទ។
ព្រះញាណវង្ស ឃឹម សន មេគណរាជធានីភ្នំពេញមានថេរដីកាពីថ្ងៃម្សិលមិញថា ព្រះអង្គបានទទួលព័ត៌មានអំពីអធិករណ៍នៅវត្តគោកខ្សាច់នេះដែរ ហើយថា ឥឡូវនេះមេគណរាជធានីនិងអនុគណខណ្ឌពោធិ៍សែនជ័យ កំពុងស្រាវជ្រាវមូលហេតុដែលព្រះសង្ឃ ជឹង អេងធិ បានប្រព្រឹត្ត។ ព្រះតេជគុណបន្តសង្ឃដីកាថា៖«តាមវិន័យព្រះសង្ឃ បើសង្ឃជាប់សង្ស័យ ពិតជាមានចេតនានិងប្រព្រឹត្តបទល្មើសជាក់ស្តែង និងមានការចោទប្រកាន់ពីតុលាការ អនុគណនឹងផ្សឹកភ្លាម ដើម្បីឲ្យតុលាការចាត់ការតាមច្បាប់។ លោកអាចបួសវិញបាន បន្ទាប់ពីបញ្ចប់រឿងរ៉ាវទៅតាមផ្លូវតុលាការ»។
លោក ជ័យ សារិន អាយុ៦៩ឆ្នាំ អតីតគ្រូបង្រៀនផ្នែកសុភាវធម៌ នៃវិទ្យាល័យចតុមុខលើកឡើងថា៖ «ជម្លោះភាគច្រើន ដែលកើតមាននៅតាមវត្តអារាមនានា គឺបណ្តាលមកពីអំពើពុករលួយនិងបក្ខពួកនិយមរវាងអាចារ្យ ព្រះសង្ឃ និងចៅអធិការវត្ត ទាក់ទងនឹងការចាត់ចែង គ្រប់គ្រងបច្ច័យ លុយកាក់នៅក្នុងវត្ត។ លោកបន្តថា ៖ «ការទាស់ទែង ខ្វែងគំនិតគ្នា ឬ ការដែលព្រះសង្ឃប្រើអំពើហិង្សា វាយតប់គ្នា នៅក្នុងវត្តបែបនេះ បានធ្វើឲ្យប៉ះពាល់ ដល់ព្រះពុទ្ធសាសនា កិត្តិយស និងកេរ្តិ៍ឈ្មោះរបស់វត្ត និងធ្វើឲ្យពុទ្ធបរិស័ទបាត់បង់ជំនឿ និងការគោរពប្រណិប័តន៍ចំពោះព្រះសង្ឃ និងពុទ្ធសាសនាទៅអនាគត»។
ចៅអធិការវត្តគោកខ្សាច់នាម ជឹង អេងស៊ បដិសេធមិនមានថេរដីកាពន្យល់រឿងហេតុទេពេលសាកសួរជុំវិញករណីនេះ។
ចំណែក សង្ឃនាម ជឹង អេងធិ មិនអាចទាក់ទងសុំការបំភ្លឺចំពោះការចោទប្រកាន់ខាងលើនេះបានដែរ កាលពីម្សិលមិញ៕

Monday, October 29, 2012

ដើរកាត់មុខផ្ទះ ខឹងឆ្កែដេញខាំ ដេញវាយ ឆ្កែនិងគំរាម សម្លាប់ម្ចាស់ឆ្កែ

កំពង់ស្ពឺ ៖ បុរសម្នាក់ ត្រូវបានកម្លាំង សមត្ថកិច្ចមូលដ្ឋាន ឃាត់ខ្លួន បន្ទាប់ពីជនរង គ្រោះបានប្ដឹងថា បុរសរូបនេះបានគំរាម កំហែងប្រមាថជីវិតរបស់ខ្លួន និងបានវាយ បំផ្លាញទ្រព្យសម្បត្ដិនៅក្នុងផ្ទះ នៅពេលដែល បុរសរូបនេះ ខឹងឆ្កែម្ចាស់ផ្ទះព្រុសនិងដេញ ខាំ ខណៈខ្លួនកំពុងធ្វើដំណើរតែម្នាក់ឯងនិង មានកាន់ចបកាប់នៅនឹងខ្លួន។
ករណីប្រមាថជីវិតនិងបំផ្លាញទ្រព្យសម្បត្ដិ នៅក្នុងផ្ទះ ដោយសារតែខឹងឆ្កែព្រុសនិង ដេញខាំនោះ បានកើតឡើងកាលពីវេលា ម៉ោង២និង១៥នាទីរសៀលថ្ងៃទី២៨ ខែតុលា ឆ្នាំ២០១២ ស្ថិតនៅក្នុងភូមិស្វាយដង្គំ ឃុំ ស្គូស ស្រុកសំរោងទង ខេត្ដកំពង់ស្ពឺ។
ប្រភពព័ត៌មានពីប្រជាពលរដ្ឋនៅក្នុង មូលដ្ឋានបានឱ្យដឹងថា នៅក្នុងភូមិស្វាយដង្គំ នេះ ភាគច្រើនសំបូរទៅដោយក្រុមក្មេង ទំនើង និងតែងតែបង្កជម្លោះ ជា ពិសេសនៅ ពេលមានពិធីរាំធុងបាស់ម្ដងៗ ហើយសមត្ថ កិច្ចមូលដ្ឋាន ហាក់បីដូចជាមិនមានការ បង្ក្រាបនោះទេ ។
យោងតាមមន្ដ្រីនគរបាលមូលដ្ឋានបាន ឱ្យដឹងថា ជនដែលត្រូវសមត្ថកិច្ចឃាត់ខ្លួន បន្ទាប់ពីមានពាក្យបណ្ដឹងពីសំណាក់ភាគីជន រងគ្រោះនោះ មានឈ្មោះគឹម ចក់ ភេទប្រុស អាយុ៣៤ឆ្នាំ រីឯជនរងគ្រោះដែលរងការ ប្រមាថដល់អាយុជីវិតមានឈ្មោះសយ សុផាន ហៅម៉ុន អាយុ៥៥ឆ្នាំ ។
បើយោងតាមសមត្ថកិច្ចមូលដ្ឋានករណី នេះបានកើតឡើងនៅពេលដែលជនសង្ស័យ គឹម ចក់ បានដើរកាត់មុខផ្ទះស្ដ្រីឈ្មោះសយ សុផាន ដោយមានកាន់ចប កាប់ផងនោះ ស្រាប់តែត្រូវឆ្កែរបស់ម្ចាស់ផ្ទះដេញព្រុស និងដេញខាំ រួចហើយធ្វើឱ្យឈ្មោះគឹម ចក់ ខឹងសម្បារយ៉ាងខ្លាំងរហូតដល់ដេញវាយឆ្កែ ទៅដល់ក្នុងផ្ទះ ហើយបាននិយាយគំរាមថា ឆ្កែចេញសម្លាប់ ម្ចាស់ចេញសម្លាប់ម្ចាស់។ ពេលនោះជនសង្ស័យមិនទាន់អស់ចិត្ដក៏បាន រត់ទៅផ្ទះយកកណ្ដៀវមកថែមទៀត ហើយ កាប់ដើមឈើនិងរបងផ្ទះ របស់ជនរងគ្រោះ បណ្ដាលឱ្យខូចខាតអស់ជាច្រើន។ ពេលនោះ ជនរងគ្រោះ ដែលមានសុទ្ធតែស្រីៗនៅផ្ទះ ក៏បានទាក់ទង ទៅសមត្ថកិច្ចមូលដ្ឋាន ដើម្បី ជួយអន្ដរាគមន៍ រួចហើយកម្លាំងសមត្ថកិច្ចក៏ បានចុះមកឃាត់ខ្លួនជនសង្ស័យរូបនេះតែម្ដង ទៅ ។
គួរបញ្ជាក់ថា ប្រជាពលរដ្ឋនៅក្នុងភូមិ ស្វាយដង្គំ ឃុំស្គូស បានលើកឡើងពីបញ្ហា អសន្ដិសុខជាច្រើន ដែលបាននឹងកំពុងកើត មានឡើង ក្នុងនោះក្រៅពីបញ្ហា ក្មេងទំនើង ដើរអុកឡុកភូមិនិងវាយតប់គ្នា នៅពេលមាន ពិធីរាំធុងបាស់នោះ ក៏មានករណីចោរកម្មជា ច្រើនផងដែរ រាប់ទាំងការលួចច្រូតស្រូវនិង ដុតបំផ្លាញ ចំបើងរបស់អ្នកភូមិកាលពីពេល កន្លងទៅផងដែរ។ ដូច្នេះប្រជាពលរដ្ឋសុំ អំពាវនាវដល់អាជ្ញាធរនិងសមត្ថកិច្ចមូលដ្ឋាន ត្រូវមានវិធានការ រឹតបន្ដឹងសន្ដិសុខនៅក្នុង ស្រុក ភូមិផង ដើម្បីអនុវត្ដគោលនយោបាយ ភូមិ ឃុំមានសុវត្ថិភាពរបស់រាជរដ្ឋាភិបាល៕

ចាប់បានមេចោរ ឈ្មោះ តុង ហួន ជាមួយបក្ខពួកម្នាក់ទៀត ល្បីក្នុងអំពើប្លន់លួច និងចាប់ជំរិត ខេត្តកំពង់ធំ

កំពង់ធំ៖ ជនសង្ស័យជាមេចោរមានឈ្មោះ តុង ហួន ដែលជាមេចោរល្បីជិត១០ឆ្នាំ មានស្រុកកំណើត នៅស្រុក បារាយណ៍ ខេត្តកំពង់ធំ ត្រូវបានកម្លាំងសមត្ថកិច្ច នគរបាលខេត្តកំពង់ធំ ធ្វើការឃាត់ខ្លួនកាល ពីវេលាម៉ោង ១៤:៣០នាទី រសៀលថ្ងៃទី២៩ ខែតុលា ឆ្នាំ២០១២។

លោកអនុសេនីយ៍ឯក ស្រី ច័ន្ទស៊ីណា អធិការរងទទួលផែនការយុត្តិធម៌ ស្រុកបារាយណ៍ បានឲ្យដឹងថា ជន សង្ស័យមានឈ្មោះ តុង ហួន និងជនសង្ស័យម្នាក់ទៀតមានឈ្មោះ សូត្រ សឿន ត្រូវសមត្ថកិច្ចចាប់ឃាត់ខ្លួន ស្ថិតក្នុងចំណុច ភូមិធម្មនាថ ឃុំតាំងក្រសាំង ស្រុកសន្ទុក ដែលកំពុងបើកបរម៉ូតូ លើកំណាត់ផ្លូវជាតិលេខ៦។
លោកអនុសេនីយ៍ឯក ស្រី ច័ន្ទស៊ីណា បានបញ្ជាក់ថា ជនសង្ស័យទាំង២នាក់ ត្រូវបាន សមត្ថកិច្ចតាមប្រម៉ាញ់ ចាប់តាំងពី ខេត្តសៀមរាប ដោយមានការបញ្ជាពីឧត្តមសេនីយ៍ត្រី ផាន់ សុផេង ស្នងការនគរបាល ខេត្តកំពង់ធំ ។
បន្ទាប់ពីឃាត់ខ្លួនសមត្ថកិច្ចបានរឹបអូសវត្ថុតាង បានលើខ្លួនជនសង្ស័យ មានអាវុធខ្លី KA 54 ចំនួន១ដើម និងមានគ្រាប់ចំនួន១៣គ្រាប់ ព្រមទាំងម៉ូតូម៉ាក់C125 ពណ៍ខ្មៅស៊េរី ២០០៧ ចំនួន១គ្រឿង ។
គួររំលឹកថាជនសង្ស័យឈ្មោះ តុង ហួន ភេទប្រុស អាយុ ៤៤ឆ្នាំ ស្រុកកំណើត ភូមិត្រពាំងជ្រៃ ឃុំបាល្លង្គ ស្រុកបារាយណ៍ ខេត្តកំពង់ធំ ត្រូវបានប្រភពអះអាងថា ជាមេចោរ យ៉ាងសកម្មក្នុងករណី លួច ប្លន់ និងចាប់ជំរិត ក្នុងមុខសញ្ញានៅ ខេត្តកំពង់ធំ និងបណ្តាខេត្ត មួយចំនួនទៀត ។
យោងតាមប្រភពពីសមត្ថកិច្ចបានបញ្ជាក់ថា ជនសង្ស័យមានដីការចាប់ខ្លួន ចំនួន៦ករណីផងដែរ។ ក្រោយពី ដឹងថា សមត្ថកិច្ចចាប់បានជនសង្ស័យជាមេចោរឈ្មោះ តុង ហួន នេះប្រជាពលរដ្ឋ និងមហាជនបានកោត សរសើរ ចំពោះវិធានការ និងចុះអនុវត្តន៍ច្បាប់ និងស្របតាមគោលការណ៍ ភូមិ-ឃុំមានសុវត្ថិភាពរបស់ រាជរដ្ឋាភិបាលកម្ពុជាបានល្អប្រសើរ ។
គួរបញ្ជាក់ទៀតថា មេចោរល្បីប្លន់ ប្រដាប់អាវុធ ឈ្មោះ តុង ហួន ត្រូវជាបងមេចោរចាប់ជំរិត ឈ្មោះតុងហ៊ីម ដែលសមត្ថកិច្ច ឡោមព័ន្ធចាប់ខ្លួន កាលពីឆ្នាំ២០០៦ នៅភូមិត្រពាំងជ្រៃ ស្រុកបារាយណ៍ ខេត្តកំពង់ធំ។ ប៉ុន្តែជនសង្ស័យឈ្មោះតុង ហ៊ីម ត្រូវជាប្អូនឈ្មោះ តុង ហួន នេះ មិនបានប្រគល់ខ្លួនឲ្យសមត្ថកិច្ច ហើយបាន បាញ់មកលើសមត្ថកិច្ច រំដោះខ្លួន ពេលសមត្ថកំពុងឡោមព័ន្ធ ហើយត្រូវបានសមត្ថកិច្ចបាញ់តបនិងគប់គ្រាប់ ចូលក្នុងផ្ទះដើម្បីការពារខ្លួន ហើយជនសង្ស័យ តុង ហ៊ីម ក៏ត្រូវបានស្លាប់ ក្នុងពេលប្រតិបត្តិការ បង្រ្កាបនោះ ទៅ ។
ប្រជាពលរដ្ឋ ដែលបានឃើញហេតុការណ៍ បង្ក្រាបយ៉ាងក្តៅគគុក របស់សមត្ថកិច្ចខាងលើនេះ ប្រជាពលរដ្ឋ រស់នៅខាងលើ បានសម្តែងការ អរគុណ និងកោតសរសើរ ចំពោះសមត្ថកិច្ចនគរបាល។ ហើយប្រជាពលរដ្ឋ មានជំនឿថា តទៅពេលខាងមុខ ពួកគេ និងទទួលបាននូវសុវត្ថិភាពរហូត ៕

ខ្សែភាពយន្តទួរគី៥រឿងដាក់ញ្ចាំងដោយឥតគិតថ្លៃនៅរោងកុនកម្ពុជា

រាជធានីភ្នំពេញ ៖ ក្រសួងវប្បធម៌ និងទេសចរណ៍នៃប្រទេសទួរគី បានរៀបចំកម្មវិធី Turkish Film Festival លើកទី២របស់ខ្លួននៅទីក្រុងភ្នំពេញ ប្រទេសកម្ពុជា ក្នុងនោះបាននាំយកនូវខ្សែភាពយន្តចំនួន៥រឿងមកចាក់ផ្សាយនៅ ក្នុងរោងកុននាទីក្រុងភ្នំពេញចាប់ពីថ្ងៃទី២៦-២៩ តុលា ២០១២ ។

លោក UgurYildiz តំណាងរបស់ក្រសួងវប្បធម៌ និងទេសចរណ៍នៃប្រទេសទួរគីបានមានប្រសាសន៍ថា ខ្សែភាពយន្តទាំង៥រឿងដែលត្រូវយកមកចាក់បញ្ចាំងនាពេលនេះមាន ដូចជា រឿង Conquest 1453 , Romantic Comedy , Labyrinth , Fig Jam , និងរឿង Love Like Coincidences ។ លោកបន្តថា ខ្សែភាពយន្តទាំងអស់នេះសុទ្ធតែជារឿងដែលទទួលបានពានរង្វាន់ និងទទួលការចាប់អារម្មណ៍ច្រើនបំផុតនៅក្នុងប្រទេសទួរគីក្នុងឆ្នាំ ២០១២នេះ ។ រឿងទាំងនោះមានទាំងរឿងលក្ខណៈវាយប្រហារ ស្នេហារ៉ូមេទិក កំប្លែង ដែលដឹកនាំដោយអ្នកដឹកនាំរឿងល្បីៗរបស់ទួរគី ជាពិសេសគឺអ្នកដឹកនាំរឿងទួរគីដ៏ល្បីល្បាញបំផុតគឺលោក FarukAksoy ក្នុងរឿង Conquest 1453 ។

លោកបញ្ជាក់ថា កម្មវិធីនេះរៀបចំឡើងក្នុងគោលបំណងធ្វើការទំនាក់ទំនងតាមរយៈ វប្បធម៌ដែលជាមធ្យោបាយដ៏ល្អបំផុតដើម្បីឱ្យប្រទេស និងប្រជាជននៃប្រទេសទាំង២កាន់តែមានភាពជិតស្និទ ។ លោកបន្ថែមថា តាមរយៈកម្មវិធីនេះនឹងរឹតចំណងមិត្តភាពនៃប្រទេសទាំងពីរ ហើយក៏អាចចែករំលែកវប្បធម៌ បច្ចេកទេស និងរបៀបរស់នៅតាមរយៈវិស័យភាពយន្តនេះផងដែរ ។

Sunday, October 28, 2012

នគរបាលកំណត់មុខសញ្ញាឃាតកប្លន់អារ.កសម្លាប់យកម៉ូតូសិស្សវិទ្យាល័យកន្ទឺ២បាន៧០ភាគរយនិងសន្យារកឃើញ

ខេត្តបាត់ដំបងៈក្រោយពីសមត្ថកិច្ចចុះធ្វើកោសលវិច័យលើសពយុវសិស្ស រៀនថ្នាក់ទី១២កនៅវិទ្យាល័យកន្ទឺ២ក្នុងស្រុកបាណន់ដែលឃាតកវាយ ប្លន់អារ.កសម្លាប់យកម៉ូតូហើយត្រូវបានប្រជាពលរដ្ឋប្រទះឃើញសាកសព កាលពីវេលាម៉ោង១១និង៣០នាទីព្រឹកថ្ងៃទី២៧ខែតុលាឆ្នាំ២០១២ ស្ថិតនៅក្នុងស្រែចំណុចខ្នងគួរខាងជើងខាងក្រោយភូមិច្រនៀងឃុំ បាយដំរាំស្រុកបាណន់ខេត្ដបាត់ដំបងរួចមកនៅល្ងាចថ្ងៃទី២៨ខែតុលា ឆ្នាំ២០១២នគរបាលកំណត់មុខសញ្ញាឃាតកបាន៧០ភាគរយ។

លោកថោ ងថិនអធិការរងស្រុកបាណន់និយាយថាជនរងគ្រោះស្លាប់មានឈ្មោះម៉េ តមករាភេទប្រុសអាយុ១៨ឆ្នាំជាសិស្សរៀនថ្នាក់ទី១២កនៃវិទ្យាល័យ កន្ទឺ២ក្នុងស្រុកបាណន់រស់នៅភូមិថ្កូវ ឃុំឈើទាល ស្រុកបាណន់ ខេត្ដបាត់ដំបង ។ វត្ថុតាងដែលបាត់បង់គឺម៉ូតូ ម៉ាកC125 ស៊េរី២០១២ពណ៌ខ្មៅពាក់ស្លាកលេខបាត់ដំបង1N1863មួយគ្រឿងនិងភស្តុ តាងបន្សល់ទុកនៅកន្លែងកើតហេតុមានមួកសុវត្ថិភាពផ្លែកាំបិត។

ស្ដ្រី ឈ្មោះប៉ាចពុនអាយុ៤១ឆ្នាំជាម្ដាយរបស់សពបានឱ្យដឹងថាកាលពីវេលា ២រសៀលថ្ងៃទី២៦ខែតុលាឆ្នាំ២០១២កូនប្រុសឈ្មោះម៉េតមករាបានជិះ ម៉ូតូចេញពីផ្ទះទៅសាលារៀនជាធម្មតាដូចរាល់ថ្ងៃ។ លុះនៅវេលាម៉ោង៥ល្ងាចថ្ងៃដដែលមិនឃើញកូនត្រឡប់មកផ្ទះខ្លួនជា ម្តាយក៏ទូរស័ព្ទទៅកូនប្រុសតែនៅពេលទូរស័ព្ទចូលគ្មានអ្នកលើកទទួល ។ រហូតដល់យប់ជ្រៅក្រុមគ្រួសារនាំគ្នាដើររកកូនប្រុសឈ្មោះម៉េតម ករាមិនឃើញ ទើបព្រឹកថ្ងៃទី២៧ខែតុលាឆ្នាំ២០១២បានសម្រេចចិត្តទៅដាក់ ពាក្យបណ្តឹងនៅអធិការស្រុកបាណន់ឲ្យជួយរក។ ក្រោយមកស្រាប់តែប្រជាពលរដ្ឋប្រទះឃើញសាកសពកូនប្រុសកាលពីវេលាម៉ោង១១ និង៣០នាទីព្រឹកថ្ងៃទី២៧ខែតុលាឆ្នាំ២០១២ស្ថិតនៅក្នុងស្រែ ចំណុចខ្នងគួរខាងជើងខាងក្រោយភូមិច្រនៀងឃុំបាយដំរាំស្រុកបាណន់តែ ម្ដង។

តាម ប្រភពពីសិស្សនិងគ្រូបង្រៀនបានប្រាប់សមត្ថកិច្ចថាយុវសិស្សឈ្មោះ ម៉េតមករាកាលពីវេលាម៉ោង៥ដល់ម៉ោង៦ល្ងាច ថ្ងៃទី២៦ខែតុលាឆ្នាំ២០១២នៅរៀនគួរកំព្យូទ័រមុខប្រសាទបាណន់។ កាលពីវេលាម៉ោង១១និង៣០នាទីព្រឹកថ្ងៃទី២៧ខែតុលាឆ្នាំ២០១២ត្រូវ បានប្រជាពលរដ្ឋប្រទះឃើញសាកសពស្ថិតនៅក្នុងស្រែចំណុចខ្នងគួរ ខាងជើងខាងក្រោយភូមិច្រនៀងឃុំបាយដំរាំស្រុកបាណន់គឺសង្ស័យមាន ក្រុមជនដៃដល់ល្បួងយកទៅវាយសម្លាប់រួចប្លន់យកម៉ូតូនៅវេលាម៉ោង ប្រហែល៧យប់ក្រោយពេលចេញពីរៀនកំព្យូទ័រទេ។

លោកជា ឆេងនាយការិយាល័យបច្ចេកទេសវិទ្យាសាស្ត្របានឲ្យដឹងថាសមត្ថកិច្ចបាន ធ្វើកោសលវិច័យលើសពឈ្មោះម៉េតមករាត្រូវឃាតកសម្លាប់ឃើញមានស្នាម អារកផ្នែកខាងមុខចំនួន២ភាគ៣ដោយកាំបិតតូច។ ស្នាមវាយលើមួកសុវត្ថិភាព(វាយសំដៅលើក្បាល)ដោយវត្ថុរឹង។ ស្នាមមុតប្រវែងប្រហែល១តឹកផ្នែកដើមដៃខាងស្តាំ។ ស្នាមចាក់មុតចង្កេះខាងក្រោយដោយវត្ថុរឹងចំនួន៤កន្លែង។ ចំណែកសាកសពត្រូវបានឃាតកអូសប្រហែលចំងាយ៥០ម៉ែត្រពីកន្លែងកើតហេតុ ដំបូងនិងបន្សល់វត្ថុតាងកាំបិតចិត្តបន្លែអត់ដងចំនួន១ទំហំទទឹង២០ សង់ទីម៉ែត្រនិងបណ្តោយប្រហែល២តឹក។ ការសនិដ្ឋានឃាតកមានគ្នាចាប់ពីចំនួន២នាក់ទៅចំនួន៣នាក់ដោយមាន អ្នកជិះម៉ូតូជាមួយជនរងគ្រោះនិងមានអ្នករង់ចាំស្ទាក់ផ្លូវនៅ កន្លែងណាត់ជាមុន។

ពាក់ព័ន្ធករណីឃាតកម្មសំលាប់យុវសិស្សនេះលោកជេតវណ្ណនីស្នងការរង កណ្តាលយុត្តិធម៌ខេត្តបាត់ដំបងបានឲ្យដឹងកាលល្ងាចថ្ងៃទី២៨ខែតុលា ឆ្នាំ២០១២ថា សមត្ថកិច្ចនគរបាលកំណត់មុខសញ្ញាឃាតកវាយប្លន់សម្លាប់យុវសិស្សឈ្មោះ ម៉េតមករាបាន៧០ភាគរយ បន្ទាប់ពីធ្វើកោសល្យវិច័យនិងកិច្ចខិតខំស្រាវជ្រាវជំនាញ។ ដូច្នេះសមត្ថកិច្ចកំពង់ដុតដៃជើងទាំងថ្ងៃទាំងយប់មិនថាសៅអាទិត្យឬ ថ្ងៃបុណ្យទេ គឺប្រឹងប្រែងវែកមុខឃាតកឲ្យបានក្នុងពេលឆាប់ៗនេះ៕

ការរញ្ជួញដី ដែលមាន កំរិត៧.៧ រ៉ិចទ័រ ក្បែរឆ្នេរសមុទ្រ ភាគលិចប្រទេស កាណាដា បង្កឲ្យមានការ គំរាមជារលក យក្សសូណាមី

វេនខូវើ/វ៉ាស៊ីនតោន៖ ការគំរាមថានឹងកើត មាននូវរលកយក្សសូណាមី បានកើតឡើងនៅឆ្នេរសមុទ្រ ភាគខាងលិចនៃ ប្រទេសកាណាដា ក្រោយពេលដែលការរញ្ជួយដី ដែលមានកំរិត៧,៧រ៉ិចទ័រ បានវាយប្រហារទៅលើកោះ Queen Charlotte កាលពីយប់ថ្ងៃសៅរ៍មុន។
ការរញ្ជួយដីនៅក្នុង ប្រទេសកាណាដា ដែលត្រូវបានគេនិយាយថា ជាការព្រមានថា មានរលកយក្សសូណាមី ដែលត្រូវបានចេញផ្សាយ ដោយក្រសួងបរិស្ថានរបស់ប្រទេសកាណាដា បានចូលធរមានសំរាប់ តំបន់ឆ្នេរសមុទ្រជាច្រើន នៅភាគខាងជើងនៃកោះ Vancouver ហើយនិងតំបន់ដទៃទៀតនៅខេត្ត British Columbia ថែមទាំងទីក្រុង Alaska។
តាមអ្នកស្ទង់មើលភូគព្ភសាស្រ្ត របស់សហរដ្ឋអាមេរិកបាននិយាយថា ចំនុចកណ្តាលនៃការរញ្ជួយដីនោះ មានជំរៅដល់ទៅ១៧,៥គីឡូម៉ែត ហើយចំនុចកណ្តាលនៃ ការរញ្ជួយដីនោះ គឺ២០២គីឡូម៉ែត ភាគខាងត្បូងឈៀងខាងលិចពីទីក្រុងកំពង់ផែ Prince Repert នៅក្នុងខេត្ត British Columbia គឺជាទីក្រុងឆ្នេរសមុទ្រដែល មានចំងាយ៧៤៥គីឡូម៉ែត ភាគខាងជើងនៃ Vancouver.
យោងតាមទីភ្នាក់ងារធនធានធម្មជាតិ របស់រដ្ឋាភិបាលប្រទេសកាណាដា បានឲ្យដឹងថា ការរញ្ជួយ បានវាយប្រហារតំបន់ភាគខាងលិច នៃភាគខាងត្បូងឈៀង ខាងលិចនៃទីក្រុង Queen Charlotte នៅម៉ោង០៨:០៤ PM ម៉ោងនៅក្នុងស្រុក។
លោក Sharon Schultz ដែលជាអ្នកចែកសំបុត្រ សំរាប់ការិយាល័យពន្លត់អគ្គីភ័យទីក្រុង Queen Charlotte បានប្រាប់សារព័ត៌មាន ចិនស៊ិនហួ ថា មនុស្សដែលរស់នៅ តំបន់ដែលនៅក្បែរសមុទ្រ និងតំបន់ឆ្នេរ ត្រូវបានជំលៀសចេញពី សហគមជាង១០០០នាក់ ហើយគ្មានការខូចខាតនោះទេ ដែលត្រូវបានរាយការណ៍នោះ។
លោក Brent Ward ដែលជាអនុសាស្រ្តាចារ្យ នៃនាយកដ្ឋានវិទ្យាសាស្រ្តផែនដី នៅឯសាកលវិទ្យាល័យ Vancouver’s Simon Fraser បានប្រាប់សារព័ត៌មាន ចិនស៊ិនហួថា ប្រសិនបើការរញ្ជួយដីនេះ នៅតែមានកំរិត៧.៧រ៉ិចទ័រនោះ វានឹងក្លាយជាការរញ្ជួយដីមួយក្នុង ចំណោមការរញ្ជួយដីដែលធំបំផុត ចាប់ពីរញ្ជួយដីដែលមាន កំរិត៨,១រ៉ិចទ័រ ដែលបានរញ្ជួនៅឆ្នេរសមុទ្រ នៅភាគខាងជើងឈៀងខាងលិចនៃកោះ Queen Charlotte កាលពីឆ្នាំ១៩៤៩៕

រថយន្តដឹក ស្រាបៀរ ANCHOR បើកបុករបាំងថ្ម ចែកទ្រូងផ្លូវ បាក់អស់ ៣កំណាត់

ភ្នំពេញ ៖

របាំងថ្មចែកទ្រូងផ្លូវ ចំនួនបីកំណាត់ ត្រូវបែកបាក់ខ្ទេចខ្ទី ពេញផ្លូវក្នុងខណៈដែល បុរសម្នាក់ ស្រវឹង ស្រាហើយបើករថយន្ត ដឹកស្រាបៀរ ANCHOR បុកពេញទំហឹង កាលពីវេលាម៉ោង ២១ និង៣០នាទី យប់ថ្ងៃទី ២៧ ខែតុលា ឆ្នាំ ២០១២ នៅចំណុចមុខរោងចក្រ អ៊ីខាង តាមបណ្តោយផ្លូវវេងស្រេង ក្នុងសង្កាត់ស្ទឹងមានជ័យ ខណ្ឌមានជ័យ។
សាក្សីដែលបានឃើញហេតុការណ៍ ខាងលើនេះបានឲ្យដឹងថា មុនពេលកើតហេតុគេ សង្កេតឃើញ រថយន្តបង្កហេតុ ជាប្រភេទរថយន្តតួរីស របស់ក្រុមហ៊ុន ស្រាបៀ ANCHOR ដែលបើកបរ ដោយបុរសម្នាក់ ស្ថិតក្នុង ស្ថានភាពស្រវឹងស្រាធ្លាក់ភ្នែក បានបើករថយន្តនេះក្នុងល្បឿនយ៉ាងលឿន ពេលមកដល់កន្លែង កើតហេតុ ក៏បានរេចង្កូតទៅបុករះរបាំងថ្មចែកទ្រូងបណ្តាលឲ្យបាក់បែកខ្ទាតខ្ទេចខ្ទី រាយបាយពេញផ្លូវតែម្តង ហើយរថយន្តបានហោះផ្លោងទៅធើរលើទ្រូងផ្លូវ ចំណែកអ្នកបើកបររថយន្តក្រោយពីកើតហេតុបានរត់គេចខ្លួន បាត់ស្រមោសតែម្តង។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុនិងបានទំនាក់ទំនងទៅភាគី រថយន្តបង្កហេតុឲ្យ តំណាងក្រុមហ៊ុនមកដោះស្រាយសំណងថ្លៃខូចខាត របាំងថ្មចែកទ្រូង ទៅដល់ ម្ចាស់ក្រុមហ៊ុនដែលគ្រប់គ្រងផ្លូវឯកជនមួយនេះ ៕

ស្ដ្រីសម្លាប់កញ្ញាឯកស្រាស្ប៉ាកំពុងស៊ើបសួរបឋមរបស់តុលាការ

នៅព្រឹកថ្ងៃទី២៧ ខែតុលា ឆ្នាំ២០១២ តំណាងអយ្យការសាលាដំបូងរាជធានីភ្នំពេញ លោកលី សុផាណា បានចោទប្រកាន់ទៅលើស្ដ្រីដែលជាឃាតកសម្លាប់កញ្ញាឯកស្រាស្បាពី បទឃាតកម្មគិតទុកជាមុនដោយ យោងតាមមាត្រា២០០នៃក្រមព្រហ្ម ទណ្ឌដើម្បីបន្ដនីតិវិធីបញ្ជូនសំណុំរឿង ទៅចៅក្រមស៊ើបសួរដើម្បីបើកការ ស៊ើបអង្កេតបឋមជុំវិញបញ្ហាដែល ពាក់ព័ន្ធទៅនឹងករណីនេះ ។
យោងតាមមាត្រាខាងលើ ស្ដ្រីត្រូវ ចោទរូបនេះអាចប្រឈមមុខនឹងការជាប់ ពន្ធនាគារអស់មួយជីវិតបើសិនជារក ឃើញថា មានភិរុទ្ធភាពដូចការចោទ ប្រកាន់នោះ ។ ស្ដ្រីជាជនជាប់ចោទ ដែលជាឃាតកសម្លាប់ជនរងគ្រោះ ឈ្មោះ ស៊ុន គឹមហេង អាយុ២៣ឆ្នាំ ជា អ្នកលក់ខោអាវដោយផ្សព្វផ្សាយតាម ប្រព័ន្ធអ៊ីនធឺណេត ស្នាក់នៅផ្ទះជួលលេខ ១១៤A1 ផ្លូវ៩៥ សង្កាត់បឹងត្របែក ខណ្ឌ ចំការមន រាជធានីភ្នំពេញ ។
ស្ដ្រីជនសង្ស័យរូបនេះត្រូវ សមត្ថកិច្ច ឃាត់ខ្លួនកាលពីថ្ងៃទី២៤ ខែតុលា ឆ្នាំ ២០១២ បន្ទាប់ពីជម្រិតទារប្រាក់ពីក្រុម គ្រួសារស្ដ្រីរងគ្រោះ លុះដល់ថ្ងៃទី២៥ ខែ ឆ្នាំ ដដែល សមត្ថកិច្ចបានចុះឆែកឆេរ ក្នុងលំនៅឋានរបស់ជនត្រូវចោទខាង លើឃាត់ខ្លួនបានជនសង្ស័យ៣នាក់ផ្សេង ទៀតយកមកសាកសួរ ប៉ុន្ដែត្រូវដោះ លែងទៅវិញបន្ទាប់ពីរកឃើញថាមិន ជាប់ពាក់ព័ន្ធ ។
លោកជួន ណារិន ស្នងការរងនៃស្នង ការរាជធានីភ្នំពេញនិយាយថា កាលពី វេលាម៉ោង១២ថ្ងៃត្រង់ ថ្ងៃទី២៣ ខែតុលា ឆ្នាំ២០១២ ជនសង្ស័យបានទូរស័ព្ទទំនាក់ ទំនងមកនារីរងគ្រោះក្នុងគោលបំណង ពិគ្រោះការរកស៊ីជាមួយគ្នា ខណៈនោះ នារីរងគ្រោះក៏បានឱ្យប្ដីរបស់ខ្លួនឈ្មោះ ម៉េន ឌីយ៉ាម៉ឺន អាយុ២៦ឆ្នាំដែលទើបរៀប ការជាមួយគ្នាបានជាង១ឆ្នាំ បើករថយន្ដ ជូនមកជួបនៅម្ដុំផ្សារសុវណ្ណា រួចហើយ ប្ដីក៏ត្រឡប់ទៅផ្ទះវិញ។ មួយម៉ោងក្រោយ មក ប្ដីរបស់នារីរងគ្រោះក៏បានទូរស័ព្ទទៅ ប្រពន្ធ ហើយក៏លើកនិយាយជាលក្ខណៈ ធម្មតា ប៉ុន្ដែដោយរង់ចាំយកប្រពន្ធមក វិញយូរពេក ប្រហែលជាជិត២ម៉ោង ក្រោយមកក៏បានទូរស័ព្ទទៅកាន់ភរិយា ម្ដងទៀត ប៉ុន្ដែទូរស័ព្ទត្រូវបានបិទ កាន់ តែធ្វើឱ្យប្ដី រួមទាំងគ្រួសារនារីរងគ្រោះ មានការភ័យស្លន់ស្លោ និងនាំគ្នាទៅរក ប្រពន្ធនៅកន្លែងដែលខ្លួនបានដឹកយកទៅ ជួបជនសង្ស័យ ប៉ុន្ដែរកមិនឃើញ ទើប បន្ដទៅកន្លែងផ្សេងទៀតដែលនារីរងគ្រោះ ធ្លាប់ទៅកន្លងមក ។ ប៉ុន្ដែនៅតែមិនដឹង ដំណឹងទើបក្រុមគ្រួសារអស់សង្ឃឹមមិន ដឹងថានារីរងគ្រោះកំពុងតែនៅទីណាពិត ប្រាកដ ។
ក្រុមគ្រួសារជនរងគ្រោះបាន បញ្ជាក់ ឱ្យដឹងផងដែរថា នៅវេលាម៉ោងប្រហែល ជា៧ទៅ៩យប់ ស្រាប់តែស្ដ្រីជាជនសង្ស័យ បានផ្ញើសារតាមប្រព័ន្ធទូរស័ព្ទមកកាន់ ប្ដីនារីរងគ្រោះ ក្នុងនោះគឺជំរិតទារប្រាក់ ៥ម៉ឺនដុល្លារដែលគំរាមសម្លាប់ ប្រសិន បើមិនបានប្រគល់ប្រាក់ដូចការទាមទារ ខាងលើ ហើយជនសង្ស័យបានបង្ខំឱ្យ យកប្រាក់នោះទៅដាក់នៅធនាគារ ប៉ុន្ដែ យប់ទៅហើយ ខាងក្រុមគ្រួសាររបស់ នារីរងគ្រោះបានអង្វរទៅកាន់ជនសង្ស័យ ថា មិនអាចបើកលេខកុងបានទេនៅពេល យប់ រួចចាប់ពីពេលនោះមកក៏ដាច់ការ ទំនាក់ទំនងគ្នារហូត ។
ក្រុមគ្រួសារនារីរងគ្រោះបន្ដថា លុះ ដល់វេលាម៉ោង៧និង៣០នាទីព្រឹក មាន ការភ្ញាក់ផ្អើលឡើងនៅពេលដែលឮ ដំណឹងថា មានឃាតកសម្លាប់ស្ដ្រីរង គ្រោះរួចហើយយកទៅទម្លាក់ចោលនៅ ផ្លូវជាតិលេខ៣ ត្រង់ចំណុចភូមិ-ឃុំអង្គ ពពេល ស្រុកគងពិសី ខេត្ដកំពង់ស្ពឺ ។ បើទោះជាក្រុមគ្រួសារនារីរងគ្រោះបាន ទៅមើលសាកសព ព្រមទាំងបានដឹក មកកាន់លំនៅឋានដើម្បីធ្វើបុណ្យតាម ប្រពៃណីហើយនោះក្ដី ជនសង្ស័យនៅតែ ព្យាយាមផ្ញើសារតាមប្រព័ន្ធទូរស័ព្ទមក កាន់ក្រុមគ្រួសារស្ដ្រីរងគ្រោះបន្ដទៀត ក្នុងចន្លោះពីម៉ោង៨ទៅម៉ោង៩ព្រឹក ថ្ងៃទី២៤ ខែតុលា ឆ្នាំ២០១២ ដែលជំរិត ទារប្រាក់៥ម៉ឺនដុល្លារ បើមិនឱ្យគំរាម សម្លាប់។ ដូច្នេះក្រុមគ្រួសាររបស់នារីរង គ្រោះក៏បានសហការជាមួយនឹងសមត្ថ កិច្ចផង និងធ្វើបុណ្យសពនារីរងគ្រោះផង រួចហើយជនសង្ស័យបានបញ្ចុះតម្លៃមក នៅត្រឹម១៩.០០០ដុល្លារ ដោយតម្រូវ ឱ្យខាងក្រុមគ្រួសារនារីរងគ្រោះបើកលេខ កុងនៅធនាគារ ហើយខ្លួននឹងទៅបើក ពេលនោះក៏ត្រូវបានសមត្ថកិច្ចនគរបាល ព្រហ្មទណ្ឌនៃស្នងការដ្ឋាននគរបាលរាជ ធានីភ្នំពេញក្របួចបានតែម្ដង ។
នៅក្នុងសកម្មភាពមួយដែលសមត្ថ កិច្ចឱ្យជនសង្ស័យធ្វើតម្រាប់តាមក្នុង ករណីសម្លាប់ជនរងគ្រោះជំរិតយកលុយ នេះ គឺដំបូងជនសង្ស័យបានល្បួងស្ដ្រីរង គ្រោះទៅផ្ទះរបស់ខ្លួនក្បែរបឹងត្របែក ដើម្បីជជែកគ្នារឿងរកស៊ី រួចក៏បានយក សម្លៀកបំពាក់ថ្មីៗមួយកេសធំមកឱ្យជន រងគ្រោះពិនិត្យមើលប៉ាន់មុននឹងហ៊ុនគ្នា រកស៊ី ។ ខណៈដែលជនរងគ្រោះកំពុង អង្គុយលើសាឡុងពិនិត្យមើលខោអាវ ភ្លេចខ្លួន ស្រាប់តែជនសង្ស័យយកខ្សែ ហ្វ្រាំងកង់មករឹត.កពីក្រោយបណ្ដាលឱ្យ សន្លប់ រួចទើបយកស្កុតមករុំមាត់ជា ច្រើនជាន់រហូតដល់ជនរងគ្រោះបាត់បង់ ជីវិត ទើបគ្រាហ៍ជនរងគ្រោះដាក់លើ រថយន្ដម៉ាកហាយឡេនឌ័រ ពណ៌ប្រផេះ ពាក់ស្លាកលេខភ្នំពេញ 2N-8566 ជា រថយន្ដផ្ទាល់ខ្លួនរបស់ជនសង្ស័យ ហើយបាន ដឹកយកទៅទម្លាក់ចោលនៅភូមិ-ឃុំអង្គ ពពេល ស្រុកគងពិសី ខេត្ដកំពង់ស្ពឺ តែម្ដង ។
ជនសង្ស័យបានសារភាពទៀតថា ក្នុង សកម្មភាពចាប់ជំរិតជនរងគ្រោះយក លុយនេះ គឺខ្លួនគេធ្វើឡើងតែម្នាក់ឯង ដោយគ្មានបក្ខពួក៣នាក់ដែលសមត្ថ កិច្ចឃាត់ខ្លួនបានចូលរួមឡើយ ៕

Saturday, October 27, 2012

សម្តេច ហ៊ុន សែន ប្រកាសកុំឲ្យប្រើឈ្មោះរបស់សម្តេច និងលោកជំទាវ ទៅចាប់ដី

ភ្នំពេញ: សម្តេចនាយករដ្ឋមន្ត្រី ហ៊ុន សែន បានប្រកាសលុបចោលនូវការស្នើសុំដី ៥០០ ហិកតា នៅខេត្តកំពង់ធំ សម្រាប់កាកបាទក្រហមកម្ពុជា ដែលត្រូវបានគេប្រើឈ្មោះ ថាជាដីរបស់លោកជំទាវធំ។ ក្នុងពេលដំណាលគ្នានោះ សម្តេចក៏បានប្រកាស កុំឲ្យមានការប្រើឈ្មោះរបស់សម្តេច និងលោកជំទាវ ទៅចាប់ដី ហើយអាជ្ញាធរ និងក្រុមយុវជន ត្រូវវាស់វែង ដកហូតដីទាំងនោះ យកទៅចែកជូនប្រជាពលរដ្ឋ។

ក្នុងពិធីចែកប័ណ្ណកម្មសិទ្ធិ ដីធ្លី ដល់ប្រជាពលរដ្ឋ នៅឃុំក្រាំងលាវ ស្រុករលាប្អៀ ខេត្តកំពង់ឆ្នាំង នៅព្រឹកថ្ងៃសៅរ៍ ទី២៧ ខែតុលា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "ឮថានៅកំពង់ធំ គេថាមានដីលោកជំទាវធំ ( លោកជំទាវ ប៊ុនរ៉ានី )។ បងឈន់ ( លោក ឈុន ឈន់ អភិបាលខេត្តកំពង់ធំ ) មកទេ។ ខ្ញុំនិយាយដាក់ក្បាលមេក្រូតែម្តង។ គេថា មានដីលោកជំទាវ ប៊ុន រ៉ានី ហ៊ុន សែន មាន ៥០០ ហិកតា នៅខេត្តកំពង់ធំ។ ដីកាកបាទក្រហម ហើយដីរបស់ជំទាវធំទៅទៀត។ អីចឹងទេ ប្រពន្ធខ្ញុំ ខ្ញុំប្រាប់ថា បើអីចឹងឲ្យកូននិត ( ហ៊ុន ម៉ានិត ) ទៅមើលទៅ។ ប៉ុន្តែសុំផ្តាំទៅយុវជនទាំងអស់នោះ កន្លែងណាដែលថា ដីរបស់លោកជំទាវធំ ត្រូវវាស់ឲ្យលឿនមុនគេ ឲ្យប្រជាពលរដ្ឋ។ វាស់ឲ្យលឿងតែម្តង កុំឲ្យខូចពេក។ ឮថា នៅពេលភ្ជុំនឹង ទៅហ៊ុំព័ទ្ធរបងឯណាទៀត"។

ជាមួយនឹងប្រសាសន៍របស់សម្តេច ហ៊ុន សែន ដូច្នេះ លោក ឈុន ឈន់ អភិបាលខេត្តកំពង់ធំ បានជម្រាបជូនសម្តេចភ្លាមថា ការពិត ដីនោះ ជាការស្នើសុំរបស់កាកបាទក្រហម ខេត្ត។

ក៏ប៉ុន្តែសម្តេចនាយក រដ្ឋមន្ត្រី ហ៊ុន សែន បានមានប្រសាសន៍ភ្លាមតបវិញថា "កាកបាទក្រហមខេត្ត ស្នើសុំ ប៉ុន្តែ លោកឯង គិតមើល ដីប្រជាពលរដ្ឋ គេកំពុងតែធើ!។ រួចហើយ ប្រើពាក្យ ដីលោកជំទាវធំ!"។

មកដល់ត្រង់នេះ លោក ឈុន ឈន់ ក៏បានបន្ថែមថា កាលពីពេល ស្នើសុំនោះ គឺអត់មានប្រជាពលរដ្ឋកាន់កាប់ទេ។ តែនៅពេលលោក បានចេញសេចក្តីសម្រេច ប្រគល់ឲ្យកាកបាទក្រហមខេត្តហើយ ស្រាប់តែប្រជាពលរដ្ឋ លើកគ្នា ចូលទៅកាន់កាប់លើដីនោះ។

ភ្លាមៗនោះ សម្តេចនាយករដ្ឋមន្ត្រី ហ៊ុន សែន បានចោទសួរទៅកាន់លោកអភិបាល ខេត្តកំពង់ធំ ថា "រួចចុះ លោកឯង ធ្វើកាកបាទក្រហម ចាំបាច់មានដី? វាខុសគេ ខុសឯង? ឥឡូវដីនោះ យកទៅធ្វើអីហើយ? លក់ឲ្យគេអស់ឬនៅ?។

លោក ឈុន ឈន់ បានឆ្លើយតបទៅសម្តេចថា ឥឡូវ ដីនោះ មិនទាន់ធ្វើអីទេ។ ការពន្យល់បន្ថែមក៏បានផ្តល់ជូនសម្តេចនាយករដ្ឋមន្ត្រី អំពីដីកាកបាទក្រហមនោះ ដោយថា ដីជាក់ស្តែង គឺ ៥០០ ហិកតា ដែលគេថា ជាដីកាកបាទក្រហម ហើយដីដែលប្រជាពលរដ្ឋកាន់កាប់ ៣០០ ហិកតា ស្មើនឹងប្រជាពលរដ្ឋជាង ២៥០ គ្រួសារ។ ប្រជាពលរដ្ឋ ចូលមកក្រោយៗនឹង។

យ៉ាងណាក៏ដោយ ចុងក្រោយ សម្តេចនាយករដ្ឋមន្ត្រី ហ៊ុន សែន បានប្រកាសសម្រេច ដោយបញ្ជាផ្ទាល់មាត់ និងទល់មុខ ទៅកាន់អភិបាលខេត្តកំពង់ធំ លោក ឈុន ឈន់ យ៉ាងដូច្នេះថា "ឥឡូវក្រោយក៏ដោយ មុនក៏ដោយ ទៅវាស់ឲ្យប្រជាជនទៅ បង ឈន់។ ត្រលប់ទៅវិញ ចុះទៅ កុំឲ្យពិបាកសាំញ៉ាំ ហើយអីចេះ យល់ល្អណា៎! កន្លែងណា គេថា ដីលោក ហ៊ុន សែន កន្លែងណាគេថា ដីប្រពន្ធលោក ហ៊ុន សែន តែពីរនាក់បានហើយ រឿងកូនរបស់ខ្ញុំ ចាំចាត់ចែង ក្រែងវាទៅទិញដីនេះនោះ តែរវាងខ្ញុំ និងប្រពន្ធខ្ញុំ គឺឲ្យតែឮថា ដីលោកហ៊ុនសែន ឬដីប្រពន្ធលោកហ៊ុនសែន គឺទៅយកតែម្តងទៅ។ វាស់ភ្លាម កុំឲ្យខូច។ អាចូលចិត្តប្រើ! ឲ្យតែឮថា ដីរបស់សម្តេច ហ៊ុន សែន ឬដីរបស់ប្រពន្ធ ដែលជាប់ពាក់ព័ន្ធនឹងប្រជាពលរដ្ឋ គឺយកតែម្តងទៅ។ តែកុំទៅយកដីផ្ទះរបស់ខ្ញុំនៅវិមានឯករាជ្យ និងនៅតាខ្មៅ"។

ជាមួយនឹងប្រសាសន៍ដូច្នេះ សម្តេចនាយករដ្ឋមន្ត្រី ហ៊ុន សែន ក៏បានបន្ថែមថា "ខ្ញុំដូចជាមិនយល់ កាកបាទក្រហមអី ត្រូវការដី។ ធើឲ្យខូចកិត្តិនាមកាកបាទក្រហមទៅទៀត។ ត្រូវការដីយកមកធ្វើអីណុង?។ គិតប្រុងធ្វើខ្លួនឯង?។ ខ្ញុំថា គ្មានធើខ្លួនឯងទេ។ យូរៗទៅ លួចលក់អស់។ ជឿខ្ញុំទៅ!"។

សម្តេចនាយករដ្ឋមន្ត្រី ហ៊ុន សែន ក៏បានរម្លឹកជាថ្មី ដាក់បញ្ជាទៅកាន់អភិបាល ខេត្តកំពង់ធំ ឲ្យចុះទៅវាស់វែងដី ដែលថា ជាដីរបស់កាកបាទក្រហម ដើម្បីចែកជូនប្រជាជន។ បើប្រជាជនកាន់កាប់ប៉ុន្មាន ឲ្យគាត់ទៅ ហើយបើសល់ប៉ុន្មាន ទុកសម្រាប់ដីសង្គមកិច្ច ជូនប្រជាពលរដ្ឋ តែកុំទុកសម្រាប់កាកបាទក្រហម។

សម្តេចនាយករដ្ឋមន្ត្រី ហ៊ុន សែន ក៏បានផ្តាំថា កុំឲ្យយកកាកបាទក្រហម យកទៅលូកឡំ នឹងបញ្ហាដីធ្លីតទៅទៀត។ សម្តេចក៏បានបញ្ជាក់ថា លោកជំទាវធំ មិនត្រូវការដីទេ។ បើខេត្តណា កាកបាទក្រហម មានបញ្ហាដីដូច្នេះ ក៏សុំដកខ្លួនចេញឲ្យរហ័ស៕

ស្រវឹងស្រាបើក រថយន្តទៅបុក រថយន្តចតស្ងៀម រួចហើយសុំធ្វើសង

ភ្នំពេញ៖ គ្រោះថ្នាក់ ចរាចរមួយ ដែលបង្កឡើង ដោយ បុរសម្នាក់ បើករថយន្ដម៉ាក ហាយលេនឌ័រ ក្នុងស្ថានភាព ស្រវឹង យ៉ាងលឿន បានទៅ បុក រថយន្ដ ស៊ីអវី មួយគ្រឿងទៀត ដែល ចតស្ងៀមទាំងកំរោល បណ្ដាលឱ្យ រថយន្ដទាំង២ រងការខូចខាត ស្ទើរទាំងស្រុង កាលពីវេលាម៉ោង ៩និង ៤០នាទីយប់ ថ្ងៃទី២៦ ខែតុលា ឆ្នាំ២០១២ តាមបណ្ដោយ ផ្លូវលេខ១៧៨ កែងផ្លូវព្រះ នរោត្ដម ក្នុងសង្កាត់ជ័យជំនះ ខណ្ឌដូនពេញ ។
សាក្សីឃើញហេតុការណ៍បាននិយាយថា រថយន្ដបង្កហេតុម៉ាកហាយលេនឌ័រ ពណ៌ស្ករ ពាក់ស្លាកលេខ ភ្នំពេញ 2S- 3733 បើកបរដោយបុរស ម្នាក់ ស្រវឹងជោគ មានអាយុខ្ទង់២០ឆ្នាំ បានទៅបុក រថយន្ដ CRV ពណ៌ខៀវ ពាក់ស្លាកលេខ ភ្នំពេញ 2A-2702 ដែលចតស្ងៀមនៅ តាមបណ្តោយផ្លូវ លេខ១៧៨ ។
ប្រភពព័ត៌មាន បានបន្តឱ្យដឹងថា មុនពេលកើតហេតុ គេ ឃើញរថយន្ដបង្ក បើកបរដោយបុរស ម្នាក់តាមបណ្ដោយ ផ្លូវលេខ១៧៨ ក្នុងទិសដៅ ពី កើតទៅលិច លុះមកដល់ចំណុច កើតហេតុខាងលើ ក៏ជ្រុលទៅបុករថយន្ដ រងគ្រោះទាំងកំរោល ដែលចតស្ងៀម បណ្ដាលឱ្យរថយន្ដ បង្កផ្ទុះពោង រីឯរថយន្ដ រងគ្រោះរងការ ខូចខាតតែម្តង។
ក្រោយកើតហេតុ ភាគីរថយន្ដ បង្កបានដោះស្រាយ ដោយចេញសំណងថ្លៃ ខូចខាតទាំងស្រុង ដល់ភាគីរថយន្ដ រងគ្រោះ ៕

បញ្ជូនស្ត្រីដៃដល់ឡើងតុលាការ ខណៈសពត្រូវដង្ហែទៅបញ្ចុះនៅអង្គស្នួល

រាជធានីភ្នំពេញ ៖ នៅរសៀលថ្ងៃទី២៦ តុលា សពស្ត្រីរងគ្រោះដោយការចាប់ជំរិត និងសម្លាប់ដោយរឹតកយ៉ាងព្រៃផ្សៃ នាង លីម ស្រីពេជ្រ ដែលជាកញ្ញាឯករបស់ក្រុមហ៊ុនស្ប៉ាយត្រូវបានដង្ហែយកទៅបញ្ចុះ នៅក្នុងស្រុកអង្គស្នួល ជាយរាជធានីភ្នំពេញ ។ ការដង្ហែសពរបស់នាងមានសភាពអធិកអធមដោយមានកងកម្លាំងប៉េអឹម និងប៉ូលិសជួយបើកផ្លូវផងដែរ ។ ជាមួយគ្នានឹងការហែសពអ្នកស្លាប់ទៅបញ្ចុះ ស្ត្រីឧក្រិដ្ឋជនក៏ត្រូវបានសមត្ថកិច្ចនាំខ្លួនទៅកាន់សាលា ដំបូងផងដែរ ។

មន្ត្រីប៉ូលិសឱ្យដឹងថា យោងតាមចម្លើយ និងភស្តុតាងគ្រប់គ្រាន់សម្រាប់ដាក់បន្ទុកជនត្រូវចោទ សមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ បានបញ្ជូនខ្លួនឧក្រិដ្ឋជនសម្លាប់ជំរិតទារប្រាក់ទៅសាលាដំបូង ដើម្បីចោទប្រកាន់ជាផ្លូវការ ។ ឧក្រិដ្ឋជនដែលសមត្ថកិច្ច បញ្ជូនខ្លួនទៅសាលាដំបូងរាជធានីភ្នំពេញ ឈ្មោះ ស៊ឹម គឹមហេង ហៅស៊ុន ជីងស៊ីង អាយុ២៣ឆ្នាំ ជាមេការឱ្យក្រុមហ៊ុនចិន មួយលក់គ្រឿងអេឡិចត្រូនិក ស្នាក់នៅផ្ទះជួលលេខ១១៤A ផ្លូវលេខ៩៥ សង្កាត់បឹងត្របែក ខណ្ឌចំការមន ។

លោកវរសេនីយ៍ត្រី អេង សោភា ប្រធានស្តីទីការិយាល័យនគរបាលព្រហ្មទណ្ឌកម្រិតធ្ងន់ រាជធានីឱ្យដឹងថា ករណីសម្លាប់ជនរងគ្រោះ ឈ្មោះលីម ស្រីពេជ្រ ជំរិតទារប្រាក់នេះឃាតករប្រព្រឹត្តតែម្នាក់ឯងទេ ដូចចម្លើយដែលបានសារភាព ដូច្នេះសមត្ថកិច្ចនឹងបញ្ជូនជនសង្ស័យម្នាក់នោះទៅកាន់សាលាដំបូង រាជធានី ។

ទោះបីជាករណីនេះជនត្រូវចោទសារភាពថា ជាការប្រព្រឹត្តតែម្នាក់ឯងក៏ដោយក៏ការស៊ើបអង្កេតរបស់សមត្ថ កិច្ចនៅធ្វើបន្ត ពោលគឺស្រាវជ្រាវឱ្យល្អិតល្អន់ថែមទៀត ។
ស្រប ពេលការរៀបចំបញ្ជូនជនល្មើសទៅតុលាការនោះ នៅព្រឹកថ្ងៃទី២៦ តុលា សមត្ថកិច្ចនគរបាលព្រហ្មទណ្ឌកម្រិតធ្ងន់ បាននាំខ្លួនស្ត្រីជាប់ចោទទៅបើកយកប្រាក់ពីធនាគារ ដែលជាប្រាក់របស់គ្រួសារជនរងគ្រោះដាក់ចូលគណនីតម្រូវតាមការ ជំរិតទារប្រាក់ពីឧក្រិដ្ឋជន ។

សមត្ថកិច្ចអះអាងថា ប្រាក់ដែលបានដកពីធនាគារមានចំនួន១៥.០០០ដុល្លារ ហើយសមត្ថកិច្ចបានប្រគល់គ្រប់ចំនួនឱ្យទៅជនរងគ្រោះ វិញ ។ នៅពេលនាំឧក្រិដ្ឋជនទៅបើកប្រាក់ពីធនាគារនោះនាង ស៊ឹម គឹមហេង នៅតែនិយាយថា ការចាប់នាង លីម ស្រីពេជ្រ សម្លាប់ជំរិតទារប្រាក់នេះ ដោយសារត្រូវការប្រាក់យកទៅបង់ធនាគារដែលគេបានខ្ចីរាប់ម៉ឺន ដុល្លារយកទៅចាយ និងលេងល្បែងស៊ីសង ។

លោក អេង សោភា បន្តថា ចំពោះប្តីរបស់ឧក្រិដ្ឋជនឈ្មោះហូ ពីមសៀង និងស្ត្រីម្នាក់ទៀតដែលរស់នៅផ្ទះជាមួយឈ្មោះ ឃ្លោក ចាន់ណា ឱ្យវិលទៅផ្ទះវិញនៅពេលការងារបច្ចេកទេសបញ្ជាក់លើរបាយការណ៍ ច្បាស់លាស់ថា មិនពាក់ព័ន្ធបទល្មើសនោះទេ ៕

ខឹងគេឌឺដង បាញ់មួយគ្រាប់ បណ្ដាលឱ្យ ស្ដ្រីម្នាក់រងរបួសធ្ងន់

-ជនសង្ស័យម្នាក់ ជាមន្ដ្រីនគរបាលនៅ នាយកដ្ឋានបំភ័ន្ដអក្ខរៈពាក់ស័ក្ដិ៣
ភ្នំពេញ ៖ ដោយសារតែខឹងគេឌឺដងថា ឱ្យខ្លួន ស្រាប់តែដកកាំភ្លើងចេញពីចង្កេះ បាញ់មួយគ្រាប់ បណ្ដាលឱ្យផ្លាតទៅចំស្ដ្រី ម្នាក់ រងរបួសធ្ងន់ ត្រូវបានដឹកបញ្ជូនទៅ សង្គ្រោះបន្ទាន់នៅមន្ទីរពេទ្យព្រះកុសុមៈ ដោយឡែកជនសង្ស័យ ចំនួន២នាក់ ដែល ម្នាក់ត្រូវបានសមត្ថកិច្ច អះអាងថា ជាមន្ដ្រី នគរបាលនៅ នាយកដ្ឋាន បំភ័ន្ដអក្ខរៈក្រសួង មហាផ្ទៃ ពាក់ស័ក្ដិ៣។
ហេតុការណ៍បាញ់ប្រហារដោយសារអាង ខ្លួនជាមន្ដ្រីនគរបាលនិងធ្វើផ្គើនបទបញ្ជា របស់សម្ដេចនាយករដ្ឋមន្ដ្រីនោះ បានកើត ឡើងកាលពីវេលាម៉ោង១១និង៥៥នាទី យប់ថ្ងៃទី២៦ ខែតុលា ឆ្នាំ២០១២ ស្ថិតនៅមុខផ្ទះលេខ៤១អា ផ្លូវលេខ៣៣៦ កែងផ្លូវលេខ២៦១ ក្រុមទី១៣ ភូមិ៤ សង្កាត់បឹងសាឡាង ខណ្ឌទួលគោក ។
យោងតាមប្រភពព័ត៌មានពីសមត្ថកិច្ច មូលដ្ឋានដែលចុះទៅត្រួតពិនិត្យ នៅកន្លែង កើតហេតុនោះបានឱ្យដឹងថា ក្រោយពីការ ស្រាវជ្រាវនិងសាកសួរទៅលើសាក្សី ព្រម ទាំងសាច់ញាតិជនរងគ្រោះ សមត្ថកិច្ចបាន កំណត់អត្ដសញ្ញាណជនសង្ស័យទាំងពីរនាក់ នេះហើយ គឺទី១ ឈ្មោះតេង សុផុន ហៅ ណាក់ ភេទប្រុស អាយុប្រមាណ៤០ឆ្នាំ មុខ របរជាមន្ដ្រីនគរបាលពាក់ស័ក្ដិ៣ នៅនាយក ដ្ឋានបំភ័ន្ដអក្ខរៈក្រសួងមហាផ្ទៃ ស្នាក់នៅ ផ្ទះលេខ៤៧R ផ្លូវលេខ៣៣៦ ក្រុមទី១៣ ភូមិ៤ សង្កាត់បឹងសាឡាង ខណ្ឌទួលគោក ដែលជាជនដៃដល់ ក្នុងការបាញ់ប្រហារ។ ជនសង្ស័យទី២ឈ្មោះ ឈ្មោះចំ សុធារ៉ា ហៅ ឆៃ ភេទប្រុស អាយុ២៣ឆ្នាំ ស្នាក់នៅផ្ទះលេខ ៧៤ ផ្លូវលេខ៣៣៦ ក្រុមទី១៣ ភូមិ៤ សង្កាត់បឹងសាឡាង ខណ្ឌទួលគោក មុខរបរជានិស្សិត និងជាអ្នកបើកម៉ូតូ។ ដោយឡែកជនរងគ្រោះមានឈ្មោះសុខ ចាន់ណា ភេទស្រី អាយុ២៤ឆ្នាំមុខរបរអ៊ុតសក់ ស្នាក់នៅផ្ទះកើតហេតុខាងលើ ។
ប្រភពព័ត៌មានពីសមត្ថកិច្ចបានឱ្យដឹងថា នៅវេលាម៉ោងកើតហេតុ ប្ដូីរបស់ស្ដ្រីរងគ្រោះ ឈ្មោះសាម ឡងអាយុ៣០ឆ្នាំ បានអង្គុយផឹកស៊ីជា មួយបងថ្លៃរបស់ខ្លួន ឈ្មោះសុខ ឧត្ដម អាយុ២៨ឆ្នាំ ដែលមានផ្ទះជាប់ គ្នា ហើយពេលកំពុងផឹកស៊ីនោះ ស្រាប់តែ ជនសង្ស័យទាំងពីរ បានជិះម៉ូតូរបស់ខ្លួន ម៉ាកស្កុបពី ពណ៌ផ្កាឈូក មក ឈប់នៅមុខ ផ្ទះជនរងគ្រោះ រួចហើយស្រែកសួរថា ពួកហ្អែងនាំគ្នាស្រែស្អី ពេលនោះស្ដ្រីរងគ្រោះ បានបើកទ្វារមកមើល ដោយដឹងថា ប្ដីរបស់ខ្លួនមាន ជម្លោះជា មួយគេ ។ ខណៈដែលស្ដ្រីរងគ្រោះបើកទ្វារចេញមកនោះ គាប់ជួននឹងជនសង្ស័យបានដកកាំភ្លើងបាញ់ ភ្ជុចដីមួយគ្រាប់ រួចហើយក៏ផ្លាតចំស្ដ្រីរងគ្រោះតែម្ដង ។
ក្រោយកើតហេតុ ជនសង្ស័យទាំងពីរ បានជិះម៉ូតូគេចខ្លួនបាត់ទៅ ។
យ៉ាងណាក៏ដោយ អធិការនគរបាលខណ្ឌ ទួលគោក លោកហួត ចាន់យ៉ារ៉ាន់ ដែលមិន ចង់និយាយច្រើនតាមទូរស័ព្ទ នោះ នៅរសៀលថ្ងៃទី២៧ ខែតុលានេះ បានបញ្ជាក់ថា សមត្ថកិច្ចរបស់លោកកំពុងធ្វើការស្រាវ ជ្រាវ ។
យោងតាមប្រភពព័ត៌មានពីមន្ដ្រីនគរបាល ដែលស្គាល់ជនដៃដល់រូបនេះ បានលួច បង្ហើបថា ជនដៃដល់នឹងមិនអាចចាប់ខ្លួនបាន នោះទេ ដោយសារតែរូបគេជា កូនអ្នកមាន និងឪពុករបស់គេ ជាមន្ដ្រីជាន់ខ្ពស់ទៀតផង។
គួរបញ្ជាក់ថា កាលពីពេលកន្លងទៅ សម្ដេចនាយករដ្ឋមន្ដ្រី បានព្រមាននិងបញ្ជា ឱ្យចាប់ខ្លួនជនបាញ់បោះទាំងឡាយណា ពីព្រោះវាជាការប៉ះពាល់យ៉ាងធ្ងន់ធ្ងរ ដល់ភ្ញៀវទេសចរ ដូច្នេះប្រជាពលរដ្ឋនិងសាច់ញាតិជនរងគ្រោះ ដែលជាប់សែស្រឡាយជនបង្កផងនោះ សង្ឃឹមថា សមត្ថកិច្ចដែលមានតួនាទីរក្សា សន្ដិសុខជូនប្រជាពលរដ្ឋក្នុងមូលដ្ឋាន និងតាមចាប់ជនបង្កនេះឱ្យបាន ពីព្រោះស្គាល់តែ ឈ្មោះនិងកន្លែងស្នាក់នៅទៀត៕

សិស្សថ្នាក់ទី១២ នៃវិទ្យាល័យកន្ទឺ២ ស្រុកបាណន់ ត្រូវចោរប្លន់ សម្លាប់យកម៉ូតូ

បាត់ដំបង ៖ សិស្សរៀនថ្នាក់ទី១២ នៅ វិទ្យាល័យកន្ទឺ២ ក្នុងស្រុកបាណន់ខេត្ដបាត់ ដំបង ត្រូវបានប្រជាពលរដ្ឋ ប្រទះឃើញ សាកសពកាលពីវេលាម៉ោង១១ព្រឹកថ្ងៃទី ២៧ ខែតុលា ឆ្នាំ២០១២នេះ ស្ថិតនៅក្នុងភូមិជួរច្រនាង ឃុំបាយដំរ៉ាំ ស្រុកបាណន់ ដែលតាមសេចក្ដីរាយការណ៍ ជា ជំហានដំបូងពីសមត្ថកិច្ចបានឱ្យដឹងថា ជនរងគ្រោះ ត្រូវបានចោរប្លន់រួចហើយសម្លាប់យកម៉ូតូរបស់ខ្លួនតែម្ដងទៅ ។
ប្រភពព័ត៌មានពីសមត្ថកិច្ចបានឱ្យដឹងថា ជនរងគ្រោះមានឈ្មោះម៉េត មករា អាយុ ២០ឆ្នាំ រស់នៅភូមិថ្កូវ ឃុំឈើទាល ស្រុកបាណន់ ខេត្ដបាត់ដំបង ។
ស្ដ្រីជាម្ដាយរបស់សពបានឱ្យដឹងថា កូន ប្រុសរបស់គាត់បានចេញពីផ្ទះ ដោយជិះម៉ូតូ ទៅរៀនម៉ាកC125 ស៊េរី២០១២ ពណ៌ ខ្មៅ ពាក់ស្លាកលេខ បាត់ដំបង 1N-1863 កាលពីវេលាម៉ោង២រសៀលថ្ងៃទី២៦ ខែតុលា លុះនៅវេលាម៉ោង៥ល្ងាចមិនឃើញ ជនរងគ្រោះត្រឡប់មកផ្ទះ ក៏ទូរស័ព្ទទៅតែគ្មានអ្នកទទួល ដូច្នេះក្រុមគ្រួសារ បន្ទាប់ពីរកមិនឃើញក៏ប្ដឹងទៅសមត្ថកិច្ច ហើយនៅព្រឹកថ្ងៃទី២៧ ខែតុលានេះ ស្រាប់តែប្រទះឃើញសពជនរងគ្រោះតែម្ដង។
យ៉ាងណាក៏ដោយសមត្ថកិច្ចមិនទាន់អាច កំណត់អត្ដសញ្ញាណជនសង្ស័យជាក្រុមចោរប្លន់នៅឡើយទេ ខណៈកំពុងធ្វើការស៊ើបអង្កេតនិងស្វែងរកចាប់ខ្លួន។

លោក ហេង ប៊ុនហៀង នាំអំណោយជូន កុមារីពិការ និងគ្រួសារ នៅស្រុកសំឡូត

បាត់ដំបងៈ កាលពីព្រឹកថ្ងៃទី២៦ ខែតុលា ឆ្នាំ២០១២ លោក ហេង ប៊ុនហៀង ប្រធានក្រុមការងារគណ បក្សប្រជាជនកម្ពុជា ចុះជួយឃុំស៊ុង ស្រុកសំឡូត ខេត្តបាត់ដំបង និងសហការី បាននាំយកអំណោយ និង ថវិកាមួយចំនួនចែកជូនដល់កុមារីពិការដៃ និងជើងទាំងសងខាង អាយុ ១០ឆ្នាំម្នាក់ និងគ្រួសារ ដែល កំពុងរស់នៅក្នុងភូមិស៊ុង១ ឃុំស៊ុង ស្រុកសំឡូត។
លោក ហេង ប៊ុនហៀង បានបញ្ជាក់ថា ក្រោយពីលោកបានឃើញព័ត៌មានអំពាវនាវស្វែងរកជំនួយពីសប្បុ រសជន ហើយលោក និងសហការី បាននាំអំណោយយកទៅប្រគល់ឲ្យកុមារីពិការដ៏កម្សត់តាំងពីកំណើត និងក្រុមគ្រួសារ ដែលកំពុងជួបការលំបាក និងជួយកុមារីពិការមានលទ្ធភាពរៀនបន្តទៀត។ អំណោយ
ដែលផ្តល់ជូននាឱកាសនោះ រួមមានអង្ករចំនួន២ការ៉ុង ទឹកត្រី១យួរ ទឹកស៊ីអ៊ីវ១យួរ ឆៃប៉ូវ៣គីឡូក្រាម សៀង៣គីឡូក្រាម និងថវិកាចំនួន ២០០.០០០រៀលផងដែរ។
លោក ហេង ប៊ុនហៀង ក៏បានផ្តាំផ្ញើដល់កុមារីពិការថា ក្មួយត្រូវបន្តការសិក្សា និងខិតខំរៀនសូត្របន្ត ទៀត ឲ្យបានជាប់និទេសល្អប្រសើររហូតដល់ចប់ បើក្មួយចង់រៀនបន្ត គឺមានអាហារូបករណ៍បន្ថែមរបស់ សម្តេចតេជោ ហ៊ុន សែន គឺសម្តេចតែងតែផ្តល់អាហារូបករណ៍ជាច្រើនដល់ជនក្រីក្រ និងជនពិការទូទាំង ប្រទេស។
លោក ហេង ប៊ុនហៀង បានបន្តទៀតថា បើខែក្រោយៗទៀត មានការខ្វះខាត ដូចជាអង្ករ លោកនឹងជួយ ឧបត្ថម្ភរៀងរាល់ខែ ដែលជាគោលគំនិតផ្តួចផ្តើមរបស់លោក ប៊ុន សេង ប្រធានក្រុមការងារចុះជួយស្រុក សំឡូត ជាពិសេសសម្តេចតេជោ ហ៊ុន សែន នាយករដ្ឋមន្រ្តីកម្ពុជា ធ្លាប់បានថ្លែងថា មិនអាចទុកឲ្យប្រជា ពលរដ្ឋណាម្នាក់ស្លាប់ដោយសារតែអត់បាយឡើយ ដរាបណាគណបក្សប្រជាជននៅតែកាន់អំណាច នោះ។
សូមបញ្ជាក់ថា ក្មេងស្រីពិការដៃជើងទាំងសងខាង អាយុ១០ឆ្នាំម្នាក់ និងគ្រួសារ ក្នុងត្រកូលក្រីក្រកំពុង ស្វែងរកជំនួយពីសប្បុរសជននានា ដែលអាចជួយនាង និងក្រុមគ្រួសារ ជាពិសេស ឲ្យនាង បានរៀនបន្ត ទៀត ដើម្បីមានចំណេះ និងអាចចិញ្ចឹមជីវិតខ្លួនឯងបានទៅថ្ងៃអនាគត។
អ្នកស្រី ឈឺន ឈុនលី ជាម្តាយ បានរៀបរាប់ប្រាប់មជ្ឈមណ្ឌលព័ត៌មានដើមអម្ពិលថា កូនស្រីរបស់គាត់ មានឈ្មោះ ស៊ីន ស្រីហុង អាយុ១០ឆ្នាំ រៀនថ្នាក់ទី៥ នៅសាលាបឋមសិក្សា ស៊ុង១ មានទីលំនៅភូមិ ឃុំ ស៊ុងស្រុកសំឡូត មានបងស្រីម្នាក់ឈ្មោះ ស៊ីន សីហា អាយុ១៣ឆ្នាំ រៀនថ្នាក់ ទី៧ នៅអនុវិទ្យាល័យសាម គ្គី ឃុំស៊ុងស្រុកសំឡូត។
អ្នកស្រី ឈឺន ឈុនលី បានរៀបរាប់បន្តថា កូនស្រីរបស់គាត់មានពិការភាពតាំងពីកំណើត លុះពេលគ្រប់ អាយុ ក៏បានចូលរៀនតាំងពីថ្នាក់ទី១ រហូតដល់បច្ចុប្បន្នរៀនថ្នាក់ទី៥ ដោយលទ្ធផលក្នុងការសិក្សារបស់ នាង គឺរៀនពូកែទទួលបានចំណាត់លេខ១, ២ និងលេខ៣យ៉ាងតិច ។ ពេលទៅរៀនរាល់ថ្ងៃអ្នកស្រីតែង តែឌុបកូនទៅរៀនជាប្រចាំ ។ ទោះជាក្រុមគ្រួសារជួបការលំបាក យ៉ាងណាក៏ដោយ ពេលកូនរបស់គាត់ពិការ ហើយរៀនពូកែដូច្នេះ ដូចជាការលើកទឹកចិត្តដល់ឪពុកម្តាយ ជំរុញឲ្យពួកគាត់ខិតខំប្រឹងប្រែងរកស៊ីធ្វើការទាំងលំបាកលំបិន ដើម្បីរកប្រាក់សម្រាប់ឲ្យកូនរៀនបន្តទៀត ដើម្បីអនាគតកូននៅពេលអត់ពីឪពុកម្តាយទៅថ្ងៃក្រោយ ទោះជាបច្ចុប្បន្នពួកគាត់ជួបការលំបាកក្នុងជីវ ភាពក៏ដោយ។
អ្នកស្រីបានបញ្ជាក់ទៀតថា កូនស្រីរបស់គាត់ក្រៅពីរៀនពូកែ នៅមាននិស្ស័យសិល្បៈមួយទៀត នាងចេះ ច្រៀងបានពិរោះតាមរបៀប និងវ័យរបស់នាងផងដែរ។ ម្យ៉ាងទៀត ដោយសារតែជីវភាពក្នុងគ្រួសារជួប ការលំបាក និងចង់ឲ្យកូនរៀនបន្តឲ្យបានចេះដឹងខ្ពស់សម្រាប់ចិញ្ចឹមខ្លួនទៅថ្ងៃក្រោយផងនោះ អ្នកស្រី និងក្រុមគ្រួសារ សូមលើកដៃ សំពះ សំណូម ពរដល់ សប្បុរសជនជិតឆ្ងាយ មេត្តាជួយឧបត្ថម្ភតាមសទ្ធា ដល់ក្រុមគ្រួសារអ្នកស្រី ជាពិសេស គឺកូនស្រី ដែលមានពិការភាពនេះផង៕(DAPNEW)

ករណីគំរាមកំហែង និងចែកចាយរូបភាពអាសអាភាស ៖ ឃុំខ្លួនបុរសបារាំង

តុលាការឃុំបុរសជនជាតិបារាំងម្នាក់ គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ និង ចែកចាយរូបភាពអាសអាភាស

ភ្នំពេញ: បុរសជនជាតិបារាំងម្នាក់ បានត្រូវចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីរសៀលថ្ងៃទី២៦ ខែតុលា ឆ្នាំ២០១២ ឃុំខ្លួនដាក់ពន្ធនាគារក្រោមការចោទប្រកាន់ពីបទ គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ និង ចែកចាយរូបភាពអាសអាភាស។

ឈ្មោះ GONZALES FRED ERIC ភេទប្រុស អាយុ៣៣ឆ្នាំ ជនជាតិបារាំង មុខរបរគ្រូបង្រៀនភាសាអង់គ្លេស ស្នាក់នៅផ្ទះជួលលេខ៤០E1 ផ្លូវលេខ៤២៦ សង្កាត់ទួលទំពូង ខណ្ឌចំការមន បានត្រូវសមត្ថកិច្ចនគរបាលការិយាល័យប្រឆាំងការជួញដូរមនុស្ស និង ការពារអនីតិជន រាជធានីភ្នំពេញ កាលពីថ្ងៃទី២៣ ខែតុលា ឆ្នាំ២០១២ ដោយយោងតាមពាក្យបណ្តឹងរបស់ជនរងគ្រោះ ជាជនជាតិវៀតណាម អាយុ២០ឆ្នាំ ជាស្រីរកស៊ីផ្លូវភេទ ស្នាក់នៅផ្ទះជួលសង្កាត់ច្បារអំពៅ១ ខណ្ឌមានជ័យ។

ប្រភពពីសមត្ថកិច្ចបានឱ្យដឹងថា ថ្ងៃមួយជនជាតិបារាំងរូបនេះ បាននាំជនរងគ្រោះទៅរួមភេទ ដោយបានបង្ខំថតរូបអាក្រាតតាមទូរស័ព្ទ។ បន្ទាប់ពីមានរូបថតនោះហើយ ជនជាតិបារាំងតែងតែទូរស័ព្ទទាក់ទងនាងទៅដេកទៀត តែជនរងគ្រោះមិនព្រមទៅនោះទេ ទើបបុរសបារាំងរូបនេះគំរាមថា បើមិនទៅដេកជាមួយគេទេ គេនឹងយករូបអាក្រាតរបស់នាងទៅបង្ហាញជាសាធារណៈ៕

រូបសំណាកព្រះមហាវិរក្សត្រ នឹងត្រូវតម្កល់ជិត វិមានឯករាជ្យ

ប្រមុខរដ្ឋាភិបាល នៅថ្ងៃសុក្រនេះ បានបញ្ជាឲ្យសាលារាជធានីភ្នំពេញ និងក្រសួងពាក់ព័ន្ធ
មួយចំនួន សិក្សាទីតាំងនៅជិតវិមានឯករាជ្យ ដើម្បីតម្កល់រូបសំណាកព្រះមហាវីរក្សត្រ ទុក
ឲ្យប្រជាជនគោរពបូជា បន្ទាប់ពីសម្តេចព្រះនរោត្តម សីហនុ យាងចូលទិវង្គត។

សេចក្តីប្រកាសព័ត៌មាន ស្តីពីលទ្ធផលនៃសម័យប្រជុំពេញអង្គ គណៈរដ្ឋមន្ត្រី នៅថ្ងៃសុក្រ ទី
២៦ខែតុលានេះ បានឲ្យដឹងថា នាយករដ្ឋមន្ត្រី លោក ហ៊ុន សែន បានបញ្ជាឲ្យមន្ត្រីទាំងនោះ
រកទីតាំង ចាប់ពីវិមានឯករាជ្យ រហូតដល់នាគបាញ់ទឹក នៅសួនច្បារជិតមាត់ទន្លេ ក្នុងសង្កាត់
ទន្លេបាសាក់ រាជធានីភ្នំពេញ ដើម្បីសង់រូបសំណាកព្រះមហាវីរក្សត្រ តម្កល់នៅទីនោះ ទុកជូន
ប្រជាពលរដ្ឋ និងប្រតិភូអន្តរជាតិគោរព។
សេចក្តីប្រកាសព័ត៌មានដដែលនេះ ឲ្យដឹងទៀតថា ការរៀបចំប្រារព្ធពិធីបូជាព្រះបរមសពព្រះ
ករុណាសម្តេចព្រះនរោត្តម សីហនុ អាចនឹងធ្វើនៅក្រោយពិធីបុណ្យចូលឆ្នាំចិន គឺរហូតដល់
ដើមឆ្នាំ២០១៣ ។
សូមរំលឹកថា ព្រះមហាវីរក្សត្រខ្មែរ បានយាងចូលទិវង្គតនៅថ្ងៃទី១៥ ខែតុលា នៅមន្ទីរពេទ្យមួយ
នៅក្រុងប៉េកាំងប្រទេសចិន ក្នុងជន្មាយុ ៩០ព្រះវស្សា ដោយរោគជរាពាធ ហើយគាំងបេះដូង៕

ខ្មាន់កាំភ្លើង ប្រល័យជីវិតម្តាយ និងកូន ពេលបាញ់ប្រហារជិតក្រុង Los Angeles

ព័ត៌មានអន្តរជាតិ ៖ មនុស្សយ៉ាងតិច ២ នាក់ ត្រូវបានស្លាប់បាត់បង់ជីវិត ហើយ ៣ នាក់ផ្សេង
ទៀតត្រូវរបួស កាលពីថ្ងៃទី២៤ តុលា ក្នុងការបាញ់ប្រហារមួយនៅតំបន់ Downey ជិតក្រុង Los
Angeles រដ្ឋCalifornia សហរដ្ឋអាមេរិក នេះបើតាមការអោយដឹងពីប្រព័ន្ធផ្សព្វផ្សាយក្នុងស្រុក។

លើសពីនេះទៅទៀត ប្រភពសារព័ត៌មានដដែល ក៏បានបញ្ជាក់បន្ថែមអោយដឹងផងដែរថា មនុ
ស្ស ៥ នាក់ត្រូវគ្រាប់កាំភ្លើង ពេលខ្មាន់កាំភ្លើងជាបុរស អាហ្វ្រិក-អាមេរិក ម្នាក់អាយុប្រមាណ
ជា ៣០ ឆ្នាំ បានបើការបាញ់ប្រហារ ក្នុងសហគ្រាសតស៊ូប្រឆាំងគ្រោះអគ្គិភ័យមានឈ្មោះ ថា
US Fire Protection Company ស្ថិតនៅចម្ងាយប្រមាណជាង ២០ គីឡូម៉ែត្រ ភាគអាគ្នេយ៍ពីទី
ក្រុង Los Angeles ។

គួររំឭកផងដែរថា ភ្នាក់ងារសារព័ត៌មាន NBC4 ក៏បានរាយការណ៍អោយដឹងថា មនុស្ស ២ នាក់
ដែលបានស្លាប់បាត់បង់ជីវិតនោះ គឺជាម្តាយ និងកូនស្រី។ គេសន្និដ្ឋានថា ជនសង្ស័យអាចជា
អ្នកបើករថយន្តឱ្យជនរងគ្រោះម្នាក់ ស្របពេលដែលករណីបាញ់បោះមួយនេះ កំពុងតែស្ថិតនៅ
ក្រោមការតាមដានស៊ើបអង្កេតរបស់ក្រុមមន្រ្តីប៉ូលីសនៅឡើយ៕

មហាជន រអ៊ូរទាំចំពោះតម្លៃផ្ញើម៉ូតូ ឡាន

ភ្នំពេញ: ប្រជាពលរដ្ឋបាននាំគ្នារអ៊ូរទាំ ចំពោះការយកថ្លៃខ្ពស់លើសការកំណត់ នៃការផ្ញើម៉ូតូ ឡាន នៅផ្សារទួលទំពូង ផ្សារអូឡាំពិក និងផ្សាររាត្រី នៅរាជធានីភ្នំពេញ។

ប្រជាពលរដ្ឋបានបញ្ចេញប្រតិកម្ម ចំពោះអ្នកយកឈ្នួលផ្ញើយានជំនិះ នៅជុំវិញផ្សារដែលទារថ្លៃហួសប្រមាណ។ ការផ្ញើម៉ូតូពីថ្ងៃចន្ទ ដល់ថ្ងៃអាទិត្យ តម្លៃ ១.០០០ រៀល ក្នុងមួយគ្រឿង ឯឡានតម្លៃ ២.០០០ រៀល ក្នុងមួយគ្រឿង នៅផ្សារអូឡាំពិក។

ចំពោះផ្សារទួលទំ ពូង នៅថ្ងៃសៅរ៍ និងថ្ងៃអាទិត្យ បានឡើងដល់ ១.០០០ រៀល សម្រាប់ម៉ូតូ តែពីថ្ងៃចន្ទ ដល់ថ្ងៃសុក្រ យកតម្លៃ ៥០០ រៀល។ ឯឡានវិញយកតម្លៃ ២.០០០ រៀល ក្នុងមួយគ្រឿង។

រីឯផ្សារ រាត្រីវិញ យកតម្លៃផ្ញើម៉ូតូ ១.០០០ រៀល ក្នុងមួយគ្រឿង នេះសម្រាប់ថ្ងៃធម្មតា។ ដោយឡែក ពេលមានបុណ្យទាន ឬមានកម្មវិធីបុណ្យធំៗ តម្លៃឡើងដល់ ១.៥០០ ទៅ ២.០០០ រៀល នៅមានពេលខ្លះអាចដល់ ៤.០០០ រៀល ក៏មាន។ ចំណែកតម្លៃឡានថ្ងៃធម្មតា យក ២.០០០ រៀល ក្នុងមួយគ្រឿង។

កញ្ញា សុភ័ក្ត ដែលជានិស្សិតមួយរូប បានយកម៉ូតូទៅផ្ញើនៅផ្សាររាត្រី ដើម្បីទៅគោរព្រះវិញ្ញាណក្ខន្ធព្រះមហាវីរក្សត្រនោះ បានប្រាប់ថា អ្នកយកឈ្នួលផ្ញើយានជំនិះបានយកលើសតម្លៃ ដែលបានសរសេរក្នុងប័ណ្ណផ្ញើ គឺសរសេរផ្សេង យកតម្លៃផ្សេងទៅវិញ។

សុភ័ក្ត បាននិយាយថា “គេយកថ្លៃផ្ញើ ២.០០០ រៀល តែខ្ញុំឃើញគេសរសេរក្នុងក្រដាសផ្ញើ ៣០០ រៀលទេ។ ម៉េចក៏យកដល់លើសអ៊ីចឹង។ ខ្ញុំសុំឲ្យសរសេរយ៉ាងម៉េច យកតម្លៃអ៊ីចឹងទៅ”។

រីឯលោក យុទ្ធ បានចតឡាននៅផ្សារអូឡាំពិក បាននិយាយថា “គេយកតម្លៃ ២.០០០ រៀល។ តែថ្ងៃណាទៅលើសហ្នឹងក៏មានដែរ”។

ចំណែក កញ្ញា វួចលីម បានផ្ញើម៉ូតូនៅផ្សារទួលទំពូង ដើម្បីចូលទិញសម្លៀកបំពាក់នោះ បាននិយាយថា “កំណត់តែ ៣០០ រៀល តែយកតម្លៃលើស។ សរសេរផ្សេង យកផ្សេង។ ខ្ញុំខិ្ជលសៅហ្មង ឲ្យគេទៅ”។

ចំពោះអ្នកយកឈ្នួលផ្ញើយានជំនិះទាំងនោះ ពុំអាចនិយាយប្រាប់ពីបញ្ហាដែលនាំឲ្យយកតម្លៃលើសកំណត់នេះបានទេ។ ពួកគាត់បាននិយាយថា “សុំអធ្យាស្រ័យផងអាអូន! មិនអាចនិយាយអីបានទេ នេះអាស្រ័យលើថ្នាក់លើ បងក៏ជាកូនចៅគេដែរ”។

រីឯ គណៈកម្មការផ្សារទួលទំពូង បានឲ្យដឹងថា គណៈកម្មការបានដាក់ស្លាកសម្រាប់ទាក់ទង បើមានករណីល្មើស យកតម្លៃលើសកំណត់ខុសពីសៀវភៅបន្ទុកនោះ គឺខាងគណៈកម្មការនឹងរង់ចាំធ្វើការដោះស្រាយជូនជានិច្ច ព្រោះវាជារឿងសង្គម។

គណៈកម្មការផ្សារទួលទំពូង បាននិយាយថា “បើមានយកលើសតម្លៃដែលខុសពីសៀវភៅបន្ទុក ទាក់ទងទៅ គឺយើងមកដោះស្រាយជូនភ្លាមៗ ទៅតាមផ្លូវច្បាប់។ ពួកយើងក៏មិនបានមើលខុសត្រូវទាំងអស់ដែរ សូមឲ្យអ្នកទាំងអស់គ្នាចូលរួមទាំងអស់គ្នា”។

សូមបញ្ជាក់ថា មន្ទីរសេដ្ឋកិច្ច និងហិរញ្ញវត្ថុរាជធានី បានបញ្ចេញបង្កាន់ដៃប្រើប្រាស់ផ្ញើយានយន្ត ដោយកំណត់ឲ្យយកសម្រាប់ការផ្ញើកង់ថ្លៃ ២០០ រៀល ម៉ូតូ ៣០០ រៀល និងផ្ញើឡានថ្លៃតែ ៥០០ រៀលប៉ុណ្ណោះ៕ SK

សាន ផានិត តារាលេងម៉ូតសក់ និងពុកមាត់ អួតពីមន្តស្នេហ៍

ភ្នំពេញ: តារាចម្រៀង សាន ផានិត បានអួតប្រាប់សារព័ត៌មានថា គាត់គឺជាមនុស្សប្រុសដែលមានស្ត្រីជាច្រើនតាមសុំស្នេហា ខណ:ដែលមានលេចឮពាក្យខ្លះថា គាត់ធ្លាប់មានបញ្ហាលុយកាក់ទៅវិញ។

លោកត្រូវបានសារព័ត៌មានដកស្រង់សម្តីដែលនិយាយថា មានស្រីៗចាប់អារម្មណ៍លើរូបលោកច្រើនណាស់ លើទំព័រហ្វេសប៊ុក ដែលជាទំនាក់ទំនងសង្គមពេញនិយមបំផុតនោះ។

ក្រោមក្តីអំនួតនេះ លោក សាន ផានិត បានប្រាប់ថា មានអ្នកខ្លះហៅគេថា ជាព្រាននារីផង ព្រោះតែឃើញស្រីៗចូលចិត្ត និងចាប់អារម្មណ៍លើគេជាច្រើន។ មូលហេតុដែលនាំឲ្យស្រីៗចាប់អារម្មណ៍ និងចូលចិត្តនោះ ក៏ព្រោះតែដឹងថា គេមានតែម្នាក់ឯង ជាមនុស្សចេះចាយ ចេះរក នៅពេលដួលខ្លួនឯងក៏ចេះក្រោកខ្លួនឯង ធ្វើឲ្យស្រីៗដែលមានការរៀនសូត្រចេះដឹងតាម និងមានការពិចារណាវែងឆ្ងាយនោះ ពេញចិត្ត និងអាណិតគេ។

សូម រំឭកថា នាពេលកន្លងមក មានពាក្យចចាមអារ៉ាមថា តារាចម្រៀងលេងសក់ខ្លី និងទុកពុកមាត់-ពុកចង្កានេះ ជិះម៉ូតូឌុបមិនឲ្យប្រាក់គេ និងល្បីថា សូម្បីតែញ៉ាំបាយក៏ជំពាក់ប្រាក់គេទៀត ហើយរឿងនេះបានកើតឡើងជាបន្តបន្ទាប់។ តែលោក សាន ផានិត បានបដិសេដថា រឿងទាំងអស់នេះមិនពិតទេ៕ S

Friday, October 26, 2012

ប្រពន្ធលោកផ្កាយ២ ចាន់ ឫទ្ធីឌី រកស៊ីគ្រឿងញៀនសន្លប់ពេលចៅក្រមសួរចម្លើយ

ភ្នំពេញ ៖ នៅព្រឹកថ្ងៃទី២៣ ខែតុលា ឆ្នាំ២០១២ ប្រពន្ធរបស់អតីតផ្កាយ២ ចាន់ ឫទ្ធីឌី ដែលត្រូវបានឃុំខ្លួនពីបទជួញដូរគ្រឿងញៀន បានចូលខ្លួនមកបំភ្លឺតាមដីកា កោះហៅរបស់ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ ។ ប៉ុន្ដែការសាកសួរនេះមិនមានផ្ដល់លទ្ធផលអ្វីឡើយ ព្រោះនៅពេល សាកសួរស្ដ្រីរូបនេះមានបញ្ហាសុខភាព ថែមទាំងសន្លប់ទៀតផង ទើបចៅក្រម សម្រេចឱ្យទៅផ្ទះវិញ ប៉ុន្ដែរង់ចាំដីកាកោះហៅឱ្យចូលខ្លួនម្ដងទៀត ពាក់ព័ន្ធនឹងករណីជួញដូរគ្រឿងញៀនទ្រង់ ទ្រាយធំដែលមានប្ដីរបស់ខ្លួនជាមេខ្លោង។
តាមប្រភពព័ត៌មានពីមន្ដ្រី តុលាការ បានឱ្យដឹងថា ប្រពន្ធរបស់អតីតផ្កាយពីរ រូបនេះឈ្មោះ ឯក សុគន្ធ មិនត្រូវបាន សមត្ថកិច្ចឃាត់ខ្លួននោះទេ ព្រោះនៅ ថ្ងៃឃាត់ខ្លួនលោក ចាន់ ឫទ្ធីឌី ឈ្មោះ ឯក សុគន្ធ បានរត់គេចខ្លួនពីភូមិគ្រឹះ មិនដឹង ទៅទីណា ដោយបន្សល់ទុកកូនខ្ចីអាយុ១ខែ នៅក្នុងភូមិគ្រឹះទៀតផង ។
តាមប្រភពដដែលបានបន្ដឱ្យដឹងទៀត ថា ថ្មីៗនេះខាងតុលាការទើបតែទៅបិទ ប្រកាសហាមឃាត់មិនឱ្យប្រើប្រាស់និង ចូលទៅក្នុងភូមិគ្រឹះរបស់លោកផ្កាយ២ នោះឡើយបន្ទាប់ពីមានអ្នកហែកប្រកាស បិទហាមឃាត់ ព្រមទាំងចាក់សោចូល ទៅក្នុងភូមិគ្រឹះលួចយកសម្ភារចេញពី ក្នុងផ្ទះ និងចាក់សោទ្វារបិទឱ្យវិញទៀត ផង ដោយមិនមានការគាស់ទម្លុះទ្វារ និងកាច់សោចូលនោះទេ ។
គួរបញ្ជាក់ថា កាលពីថ្ងៃទី២៤ខែសីហា កម្លាំងសមត្ថកិច្ចចម្រុះនិងកម្លាំងមន្ទីរ ប្រឆាំងគ្រឿងញៀនក្រសួងមហាផ្ទៃ ដឹក នាំដោយលោក គឺ ប៊ុណ្ណារ៉ា ព្រះរាជអាជ្ញា រងអមសាលាដំបូងរាជធានីភ្នំពេញ បាន ចុះឆែកឆេរភូមិគ្រឹះមួយកន្លែងឋិតនៅ ផ្ទះលេខ៤៤ ផ្លូវលំ ភូមិអូរអណ្ដូង១ សង្កាត់ ព្រែកប្រា ខណ្ឌមានជ័យ ដែលជាភូមិគ្រឹះ លោក ចាន់ ឫទ្ធីឌី ហើយការឆែកឆេរ នោះសមត្ថកិច្ចរកឃើញថ្នាំញៀនប្រភេទ យ៉ាម៉ាប្រមាណជិត៤០.០០០គ្រាប់ស្មើ នឹង២០សុង ។
ក្រោយឃាត់ខ្លួននិងសាកសួររួចមក លោក ចាន់ ឫទ្ធីឌី បានសារភាពថា ខ្លួន នៅមានបក្ខពួកផ្សេងទៀត ហេតុនេះ ហើយទើបនៅថ្ងៃទី២៦ខែសីហាឆ្នាំ២០១២ លោក សាន សុធី នាយការិយាល័យមន្ទីរ ប្រឆាំងគ្រឿងញៀនក្រសួងមហាផ្ទៃ ដឹក នាំកម្លាំងចម្រុះនាំខ្លួនលោក ចាន់ ឫទ្ធីឌី ទៅចង្អុលបង្ហាញដល់លំនៅឋានបក្ខពួក ឋិតនៅភូមិត្រញំងល្វា សង្កាត់កាកាប ខណ្ឌពោធិ៍សែនជ័យ ។
ការចុះឆែកឆេរនេះ ធ្វើឡើងនៅវេលា ម៉ោង៤និង១០នាទី ដោយបានឃាត់ខ្លួន ឈ្មោះ ឌៀប ស៊ុយឡាយ និងឈ្មោះ ញ៉ែម សុខា មុខរបរសំអាងការ រតនា ពេជ្រ ដែលសមត្ថកិច្ចបានរកឃើញថ្នាំ ញៀនប្រភេទយ៉ាម៉ាទម្ងន់៣.៧១៩,៤ក្រាម ប្រភេទម៉ាកទឹក៩៨៩,៩ក្រាម ព្រមទាំង ដកហូតរថយន្ដកាមរីបាឡែន១គ្រឿង ពណ៌ទឹកប្រាក់ និងជញ្ជីងសម្រាប់ថ្លឹងថ្នាំ ញៀន១ផងដែរ ៕

តុលាការខេត្តកណ្តាល ផ្តន្ទាទោសដាក់ពន្ធនាគារលើស្ត្រីចិនម្នាក់ទៀត ៣ ខែ តែព្យួរទោស

ភ្នំពេញ: ស្ត្រីចិនម្នាក់ទៀត ត្រូវបានចៅក្រមតុលាការខេត្តកណ្តាល នៅរសៀលថ្ងៃព្រហស្បតិ៍ ទី២៥ ខែតុលា ឆ្នាំ២០១២ សម្រេចផ្តន្ទាទោស ដាក់ពន្ធនាគារ ៣ ខែ ក្នុងរឿងហែករូបថតសម្តេចព្រះមហាវីរក្សត្រ សម្តេចព្រះមហាវីរក្សត្រ។ ក៏ប៉ុន្តែទោសទាំងនោះ ត្រូវបានព្យួរ។ មានន័យថា ស្ត្រីចិននោះ ត្រូវបានដោះលែងចាប់ពីថ្ងៃនេះផងដែរ។

សាលក្រមនោះ ត្រូវបានប្រកាសដោយលោកចៅក្រម លឹម សុគន្ថា ប្រធានក្រុមប្រឹក្សាជំនុំជម្រះ របស់តុលាការខេត្តកណ្តាល ដែលបានបើកសវនាការជំនុំជម្រះ ដោយផ្ទាល់ លើករណីស្ត្រីចិន ជាអ្នកគ្រប់គ្រងរោងចក្រ ដែលបានហែករូបថត ព្រះឆាយាលក្ខណ៍របស់ព្រះមហាវីរក្សត្រ សម្តេចព្រះ នរោត្តម សីហនុ។

លោកចៅក្រម លឹម សុគន្ថា បានប្រកាសសាលក្រមផ្តន្ទាទោស ស្ត្រីចិន ឲ្យជាប់ពន្ធនាគាររយៈពេល ៣ ខែ តែត្រូវព្យួរទោស និងពិន័យជាប្រាក់ ២ លានរៀល។ ស្ត្រីចិននោះ ត្រូវបានចោទប្រកាន់ពីបទ ធ្វើឲ្យខូចដោយចេតនា តាមច្បាប់ក្រមព្រហ្មទណ្ឌ មាត្រា ៤១០ មាត្រា ៩៣ និងមាត្រា ៩៤។

សូមរម្លឹកថា ស្ត្រីជនជាតិចិន ដែលត្រូវបានតុលាការខេត្តកណ្តាលផ្តន្ទាទោស នៅថ្ងៃនេះ មានឈ្មោះ លាវ គុយឈាង អាយុ ៤៥ ឆ្នាំ ជាអ្នកគ្រប់គ្រងរោងចក្រកាត់ដេរ ញូវ អាតធីស ( New Artist ) ស្ថិតនៅស្រុកអង្គស្នួល ខេត្តកណ្តាល ត្រូវបានសមត្ថកិច្ច ចាប់ខ្លួនកាលពីថ្ងៃទី២៣ ខែតុលា ឆ្នាំ២០១២។

ស្ត្រីចិននោះ ត្រូវបានកម្មករ អះអាងថា គាត់បានចាប់យករូបថត ដែលកម្មករទិញមកមើល ដែលជារូបចំណិតព្រះចន្ទ មានរូបរបស់ព្រះមហាក្សត្រ។ ស្ត្រីចិននោះ បានច្របាច់គ្រញិចរូបថតនោះ ដែលកម្មករ ចាត់ទុកថា ជាការប្រមាថដល់ព្រះមហាវីរក្សត្រ។

សូមបន្ថែមថា ស្ត្រីចិននេះ ជាជនជាតិចិនទី៣ហើយ ដែលបានធ្វើឲ្យប៉ះពាល់ដល់ទឹកចិត្តរបស់កម្មកររោងចក្រកាត់ដេរ ក្នុងរឿងរូបថតរបស់សម្តេចព្រះមហាវីរក្សត្រ។

កាលពីថ្ងៃទី២៣ ខែតុលា ឆ្នាំ២០១២ តុលាការសាលាដំបូងរាជធានីភ្នំពេញ បានផ្តន្ទាទោស ដាក់ពន្ធនាគារលើស្ត្រីចិនម្នាក់ ដែលជាអ្នកគ្រប់គ្រងរោងចក្រកាត់ដេរ នៅកៀនស្វាយ ឲ្យជាប់ពន្ធនាគារ ១ ឆ្នាំ តែត្រូវព្យួរទោស និងបណ្ថេញចេញពីកម្ពុជា ដោយសារតែស្ត្រីចិននោះ បានហែក និងយកកន្ត្រៃកាត់រូបថតរបស់ព្រះមហាវីរក្សត្រ សម្តេចព្រះ នរោត្តម សីហនុ។

នៅថ្ងៃទី២៣ ខែតុលា ឆ្នាំ២០១២ ប៉ូលិសរាជធានីភ្នំពេញ ក៏បានចាប់ខ្លួនស្ត្រីមេការរោងចក្រកាត់ដេរ ជនជាតិចិន ម្នាក់ទៀត ក្នុងរឿងហែករូបថត ដែលជាចំណិតព្រះចន្ទ ហើយត្រូវបានគេសន្មត់ថា មានរូបថត ព្រះភក្ត្រព្រះមហាវីរក្សត្រនោះ។ ប៉ុន្តែស្ត្រីចិនទី២នោះ ត្រូវបានប៉ូលិសរាជធានីភ្នំពេញ គ្រាន់តែអប់រំ ហើយក៏ដោះលែងទៅវិញ ដោយមិនបញ្ជូនទៅកាន់តុលាការឡើយ៕

ការពិនិត្យបញ្ជីឈ្មោះ និងចុះឈ្មោះបោះឆ្នោត នៅឆ្នាំ២០១២នេះ បានប្រព្រឹត្តទៅរលូន គ្មានអំពើហិង្សា គ្មានការបង្ខិតបង្ខំទេ

ភ្នំពេញ: គណៈកម្មាធិការជាតិរៀបចំការឆ្នោត (គ.ជ.ប) បានធ្វើសន្និសីទកាសែតបង្ហាញពីលទ្ធផលបណ្តោះអាសន្ន នៃការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ កាលពីថ្ងៃទី ២៥ ខែតុលាឆ្នាំ២០១២។ នោះគឺដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត នៅឆ្នាំ២០១២នេះ បានប្រព្រឹត្តទៅរលូន គ្មានអំពើហិង្សា និងគ្មានការបង្ខិតបង្ខំទេ។

គ.ជ.ប. បានប្រកាសថា មានប្រជាពលរដ្ឋគ្រប់អាយុចុះឈ្មោះបោះឆ្នោតថ្មីបន្ថែម នៅឆ្នាំ២០១២ មានចំនួន ៩១៦.៧៥៧ នាក់ និងកែតម្រូវឈ្មោះ មានចំនួន ៨៨.៦០៤នាក់ និងបានលុបឈ្មោះចេញពីបញ្ជីបោះឆ្នោត មានចំនួន ៤២៨.២៧៧ នាក់ ក្នុងចំណោម ១៦៣៣ ឃុំសង្កាត់ ២៤ រាជធានី-ខេត្ត ទូទាំងប្រទេស។

នៅក្នុងសន្និសីទនោះ មន្ត្រីគ.ជ.ប. បានបង្ហាញថា គិតមកត្រឹមថ្ងៃទី២៤ ខែតុលា ឆ្នាំ២០១២ គ.ជ.ប បានទទួលបណ្តឹងចំនួន ១៨បណ្តឹង ដែលត្រូវបានប្តឹង ដោយតំណាងគណបក្សនយោបាយ និងប្រជាពលរដ្ឋ ទាក់ទងទៅនឹងការចុះឈ្មោះ ចំពោះប្រជាពលរដ្ឋ ដែលគ្មានទីលំនៅពិតប្រាកដក្នុងឃុំ និងការលុបឈ្មោះ ព្រមទាំងការរក្សាទុកឈ្មោះ ក្នុងបញ្ជីបោះឆ្នោត ដែលបណ្តឹងទាំងនេះ ស្ថិតក្នុងដំណាក់កាលពិនិត្យបញ្ជីឈ្មោះ និងចុះឈ្មោះបោះឆ្នោត និងដំណាក់កាលបិទផ្សាយបញ្ជីបោះ ឆ្នោតដំបូង។

នៅក្នុងចំណោម បណ្តឹងទាំងនោះ មានបណ្តឹងចំនួន ១៦ ត្រូវបានប្តឹងទៅក្រុមប្រឹក្សាឃុំសង្កាត់។ ក្នុងនោះ នៅរាជធានីភ្នំពេញ មាន ៩ បណ្តឹង និងនៅខេត្តកណ្តាល មានចំនួន ៧ បណ្តឹង។ បណ្តឹងនៅរាជធានីភ្នំពេញ មានចំនួន ២ បណ្តឹង ត្រូវបានក្រុមប្រឹក្សាសង្កាត់ យល់ព្រមតាមដើមបណ្តឹង ហើយ ៧បណ្តឹងទៀត ក្រុមប្រឹក្សាសង្កាត់កំពុងធ្វើការដោះស្រាយ។

សូមបញ្ជាក់ថា បណ្តឹងទាំង ១៨ បណ្តឹងនោះ គឺត្រូវបានប្តឹងដោយគណបក្សប្រឆាំង សម រង្ស៊ី មានចំនួន ៤បណ្តឹង គណបក្សប្រជាជនកម្ពុជា ចំនួន ២បណ្តឹង គណបក្សសិទ្ធិមនុស្សចំនួន ២បណ្តឹង និងប្តឹងដោយប្រជាពលរដ្ឋ មានចំនួន ១០បណ្តឹង។

លោក អ៊ុក គឹមហាន ប្រធាននាយកដ្ឋានសរុប នៅខុទ្ទកាល័យគណបក្សប្រជាជនកម្ពុជា បានមានប្រសាសន៍នៅថ្ងៃទី២៥ ខែតុលា ឆ្នាំ២០១២ ថា ការពិនិត្យបញ្ជីឈ្មោះ និងចុះឈ្មោះបោះឆ្នោត នៅឆ្នាំ២០១២នេះ បានប្រព្រឹត្តទៅរលូន ថ្វីត្បិតនៅកន្លែងខ្លះ វាមានភ្លៀង និងទឹកជំនន់ ក៏ដោយ គឺពុំមានអ្វីជាឧបសគ្គ រាំងស្ទះធ្ងន់ធ្ងរ ដល់ការពិនិត្យបញ្ជីឈ្មោះ និងចុំឈ្មោះបោះឆ្នោតទេ។

លោក អ៊ុក គឹមហាន បានមានប្រសាសន៍បន្តថា នៅក្នុងរយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតនេះ មិនមានអំពើហិង្សា ឬក៏ប្រើប្រាស់កំលាំងអ្វី ទៅគាបសង្កត់ ឬបង្ខំឲ្យប្រជាពលរដ្ឋធ្វើនេះធ្វើនោះទេ។ ពោលគឺគ្រប់ភាគីទាំងអស់ បានគោរពទៅតាមច្បាប់ នៃវិធានការបោះឆ្នោតទាំងអស់។

សូមបន្ថែមថា គ.ជ.ប. ក៏បានប្រកាសថា គិតត្រឹមថ្ងៃទី២៤ ខែតុលា ឆ្នាំ២០១២ មានតំណាងគណបក្សនយោបាយ សរុបចំនួន ៤.៦៦៧ នាក់ និងអ្នកសង្កេតការណ៍ជាតិ-អន្តរជាតិ សរុបចំនួន ១.៦៣៤ នាក់ បានចូលរួមសង្កេតមើលដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២។

គ.ជ.ប. បានប្រកាសថា កាលបរិច្ឆេទទទួលពាក្យសុំចុះឈ្មោះតំណាងគណបក្សនយោបាយ គឺចាប់ពីថ្ងៃទី២៣ ខែសីហា រហូតដល់ថ្ងៃទី២២ ខែធ្នូ ឆ្នាំ២០១២។ ចំណែកកាលបរិច្ឆេទនៃការដាក់ពាក្យសុំចុះឈ្មោះអ្នកសង្កេតការណ៍ជាតិ ចាប់ពីថ្ងៃទី១៦ ខែសីហា ឆ្នាំ២០១២ រហូតដល់ថ្ងៃទី១៨ ខែកក្កដា ឆ្នាំ២០១៣ និងកាលបរិច្ឆេទនៃការដាក់ពាក្យ សុំចុះឈ្មោះអ្នកសង្កេតការណ៍អន្តរជាតិ ចាប់ពីថ្ងៃទី១៦ ខែសីហា ឆ្នាំ២០១២ រហូតដល់ថ្ងៃទី២៥ ខែកក្កដា ឆ្នាំ២០១៣៕

Hot News