ពាក់មី កាន់តែល្បី កាន់តែមានហាងឆេង ដើរកាត់សក់ តាមរោងការ

តារាកំប្លែង ដែលទើបតែ បោះជំហាន ចូលក្នុងសិល្បៈ រយៈពេលខ្លី តែទទួលបាន ប្រជាប្រិយ ភាពខ្លាំង លោក ចែម ចាន់តារា ហៅនាយ ពាក់មី បានបង្ហើបប្រាប់ថា បច្ចុប្បន្ន បើនិយាយពីការងារ របស់លោក រវល់ជាងមុនច្រើន គឺច្រៀងកាត់សក់ តាមរោងការ និងកំប្លែង នៅស្ថានីយទូរទស្សន៍ ស៊ីធីអ៊ិន និងការងារសិល្បៈ ខាងក្រៅមួយចំនួនទៀត គ្មានពេលទំនេរទេ ។

បើទោះបីជា នាយពាក់មី គឺជាតារាកំប្លែងថ្មី ក៏ពិតមែន តែដោយសារតែទេពកោសល្យ ពូកែកំប្លុកកំប្លែង បានធ្វើឲ្យមហាជនជាច្រើន មានការកោតសរសើរ ទៅលើសមត្ថភាព នៃការកំប្លែងរបស់លោកផងនោះ ។ បុរសមាត់ឆែប ដែលនិយាយមិនចេះអស់ពាក្យកំប្លែង លោកពាក់មី បានប្រាប់មជ្ឈមណ្ឌល ព័ត៌មាន ដើមអម្ពិលតាមទូរស័ព្ទថា នៅក្នុងឆ្នាំថ្មីនេះ លោកមានការមមាញឹកច្រើនជាងឆ្នាំមុន ព្រោះថា លោកត្រូវ ដើរកាត់សក់តាមរោងការច្រើនខេត្ត-ក្រុង ដោយសារតែបងប្អូន ប្រជាពលរដ្ឋ ពុកម៉ែ ដែលរៀបមង្គល ការកូនប្រុស-ស្រីរបស់គាត់ ភាគច្រើន គឺចង់ឲ្យលោកទៅច្រៀងកំប្លែង កាត់សក់ ក្នុងរោងការ កូនប្រុស-ស្រីរបស់គាត់ ។

អតីតកម្មករសំណង់ បានប្រែក្លាយខ្លួនជាតារាកំប្លែង ដែលទទួលបានប្រជាប្រិយភាព ក្នុងរយៈពេល ដ៏ខ្លីរូបនេះ បានប្រាប់ទៀតថា ”បើនិយាយពីការងារវិញ គឺរវល់ច្រើនជាងមុនទៅទៀត ជាពិសេសនោះ គឺការដើរច្រៀងកាត់សក់ នៅរោងការតាមខេត្ត-ក្រុង ច្រើនខ្លាំងណាស់ គ្មានពេលសម្រាកទេ ព្រោះថា ក្រៅពីការកាត់សក់ការ ខ្ញុំក៏មានទទួលថតស្ពតពាណិជ្ជកម្មខ្លះ និងត្រូវឡើងកំប្លែង ជារៀងរាល់សប្តាហ៍ ឲ្យស្ថានីយទូរទស្សន៍ស៊ីធីអ៊ីនទៀត” ។

នាយ ពាក់មី បានបន្ថែមបែបលេងសើចទៀតថា ការងាររបស់លោកច្រើន ប្រាប់ចំណូលក៏រកបាន ទៅ តាមហ្នឹងដែរ ហើយជីវភាពរបស់លោក គឺមានភាពធូរធារ ច្រើនជាងកាលពីមុន ដែលកាលពីមុន រក ចំណូលបានតិច តែត្រូវចំណាយកម្លាំងនៅក្រោមកម្តៅថ្ងៃ តែឥឡូវលោករីករាយ ជាមួយនឹងអាជីព ជាអ្នកកំប្លែងនេះ។

តារាកំប្លែង ដែលមានស្រុកកំណើត នៅខេត្តស្វាយរៀងរូបនេះ បានប្រាប់ទៀតថា ចំពោះការងារ មិន រវល់គ្រប់រដូវកាលទេ គឺរវល់ខ្លាំងតែខែការប៉ុណ្ណោះ ហើយជាបន្តបន្ទាប់មក ការងារគឺមិនសូវរវល់ប៉ុន្មាន ទេ ទាល់តែមានបុណ្យទានធំៗ ដែលត្រូវការក្រុមកំប្លែងរបស់លោកម្តងម្កាលតែប៉ុណ្ណោះ។

គួររំលឹកផងដែរថា តារាកំប្លែង លោក ចែម ចាន់តារា ហៅ នាយពាក់មី មានស្រុកកំណើត នៅខេត្ត ស្វាយរៀង លោកមានបងប្អូន ៧ នាក់ ដោយសារតែលោក គឺជាកូនច្បង នៅក្នុងគ្រួសារកសិករ លោក មិនបានបន្តការសិក្សាឲ្យបានខ្ពង់ខ្ពស់ប៉ុន្មានទេ ប៉ុន្តែដោយសារតែលោក មានសមត្ថភាព ក្នុងការលេង កំប្លែងនោះ លោកក៏បានដាក់ពាក្យ ក្នុងកម្មវិធីប្រឡងជ្រើសរើស តារាកំប្លែង នៅក្នុងស្ថានីយ ទូរទស្សន៍ ស៊ីធីអ៊ីន កាលពីខែមករា ឆ្នាំ២០១០ ក្រោយមក លោកក៏បានជាប់ឈ្មោះ ជាតារាកំប្លែង ប្រចាំស្ថានីយ ទូរទស្សន៍ស៊ីធីអ៊ីន រហូតមកដល់បច្ចុប្បន្ននេះតែម្តង ៕