ភ្នំពេញៈ ទំហំពាណិជ្ជកម្មសរុបរបស់កម្ពុជានៅត្រីមាសទី១
កើនឡើងជាង១៨ភាគរយ បើធៀបនឹងរយៈពេលដូចគ្នាកាលពីឆ្នាំ២០១១។
នេះបើតាមតួលេខពីក្រសួងពាណិជ្ជកម្ម។មន្ត្រីនិយាយថា កំណើននៃការវិនិយោគ និងតម្រូវការក្នុងស្រុក បានជំរុញឲ្យការនាំចេញ និងការនាំចូលបន្តកើនឡើង។
តួលេខបង្ហាញថា ទំហំពាណិជ្ជកម្មសរុបនៅត្រីមាសទី១នេះមានប្រមាណ ៣ ១៨៩,៦៨លានដុល្លារ ពោលគឺកើនឡើង១៨,៩៥ភាគរយ បើធៀបនឹងត្រីមាសទី១ឆ្នាំ២០១១ដែលមានប្រមាណ២ ៦៨១,៤១លានដុល្លារ។
លោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាអភិវឌ្ឍន៍កម្ពុជា ថ្លែងថា បច្ចុប្បន្ននេះសកម្មភាពវិនិយោគ និងចង្វាក់ផលិតកម្មនៅកម្ពុជាកំពុងមានការរីកចម្រើនដែល ជំរុញឲ្យការធ្វើពាណិជ្ជកម្មក្រៅប្រទេសមានការកើនឡើង។ លោកបន្តថា៖ «យើងមានសេដ្ឋកិច្ចបើកចំហ ដូច្នេះយើងទទួលបានការវិនិយោគ ច្រើនដែលធ្វើឲ្យតម្រូវការនាំចេញ និងនាំចូលមានការកើនឡើងដែរ»។
លោកអះអាងថា កំណើននៃការនាំចូលច្រើនជាងនាំចេញមិនមែនជាសញ្ញាវិជ្ជមានសម្រាប់ សេដ្ឋកិច្ចរយៈពេលយូរទេ។ លោកបានបន្តថា៖ «វានៅតែជាក្តីបារម្ភសម្រាប់យើង ដូច្នេះយើងត្រូវប្រយ័ត្នប្រយែង បើយើងទុកវាឲ្យនៅរ៉ាំរ៉ៃយូរ នោះវាមិនមែនជារឿងល្អសម្រាប់យើងឡើយ»។ ទោះបីយ៉ាងនេះក្តីលោកបញ្ជាក់ថា កម្ពុជាជាប្រទេសកំពុងអភិវឌ្ឍត្រូវការនាំចូលសម្ភារ និងគ្រឿងអេឡិចត្រូនិកផ្សេងៗដើម្បីបំពេញប្រតិបត្តិការ ផលិតកម្ម។
តួលេខពីក្រសួងពាណិជ្ជកម្មបង្ហាញថា សកម្មភាពនាំចេញផលិតផលរបស់កម្ពុជារយៈពេល៣ខែនេះ មានទឹកប្រាក់ប្រមាណ ១ ៣៥៧,៩៣ លានដុល្លារ ពោលគឺកើនឡើង១៩,៩៧ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលមានប្រមាណ ១ ១៣១,៨២លានដុល្លារ ខណៈការនាំចូលកើនប្រមាណ១៨,២០ភាគរយ គឺពី១ ៥៤៩,៥៩លានដុល្លារ ទៅដល់១ ៨៣១,៧៥លានដុល្លារ។
លោក ម៉ី កល្យាណ បានឲ្យដឹងថា ការធូរស្បើយនៃវិបត្តិនៅអឺរ៉ុប និងអាមេរិកនឹងជួយឲ្យការនាំចេញរបស់កម្ពុជាបន្តកើនឡើងទៀតនៅ ឆ្នាំនេះ។ លោកថ្លែងថា៖ «តាមខ្ញុំដឹងឥឡូវនេះសេដ្ឋកិច្ចអាមេរិកបានងើបឡើងវិញហើយ ចំណែកគ្រោះថ្នាក់ធំៗនៅអឺរ៉ុបក៏បានដោះស្រាយរួចហើយដែរ ដូច្នេះការធ្វើពាណិជ្ជកម្មក្រៅប្រទេសរបស់កម្ពុជានឹងមានកំណើន បន្ថែមទៀតនៅពេលខាងមុខ»។ ទោះបីយ៉ាងនេះក្តីលោកបញ្ជាក់ថា កម្ពុជាត្រូវតែរកទីផ្សារឲ្យបានច្រើន ដូចជា ទីផ្សារក្នុងតំបន់ និងចិន ដើម្បីបង្កើនការនាំចេញរបស់ខ្លួនឲ្យបានច្រើន។
ការនំាចេញសំខាន់របស់កម្ពុជារួមមានផលិតផលវាយនភ័ណ្ឌ និងសម្លៀកបំពាក់ កៅស៊ូ និងអង្ករ ចំណែកការនាំចូលភាគច្រើន ប្រេងឥន្ធនៈ វត្ថុធាតុដើមកាត់ដេរ និងគ្រឿងសំណង់។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជាថ្លែងថា តាមរយៈកំណើននេះនឹងជំរុញឲ្យសេដ្ឋកិច្ចកម្ពុជាឆ្នាំនេះកើនក្នុង រង្វង់៧ភាគរយ។ លោកថ្លែងថា ការនាំចូលមានសន្ទុះខ្លាំងជាងការនំាចេញ ដោយសារតែឥឡូវនេះកម្ពុជាត្រូវការនាំចូលដើម្បីបំពេញក្នុងស្រុក ដូចជា ស៊ីម៉ងត៍សម្រាប់វិស័យសំណង់ជាដើម។
លោកបន្តថា៖ «រដ្ឋាភិបាលកំពុងជំរុញឲ្យមានការនាំចេញអង្ករដែលជាមុខព្រួញ មួយបន្ថែមទៀតបន្ទាប់ពីផលិតផលវាយនភ័ណ្ឌ និងសម្លៀកបំពាក់ ហើយក៏មានកៅស៊ូផងដែរ»។
តួលេខពីក្រសួងពាណិជ្ជកម្មបង្ហាញថាពាណិជ្ជកម្មសរុបរបស់កម្ពុជាឆ្នាំ២០១១ មានជាង១១ពាន់លានដុល្លារ៕
