តាម កម្មវិធី ពិធីប្រកាសបើកការជួញដូរមូលបត្រ នៅ
ក្នុងក្រុមហ៊ុនផ្សារមូលបត្រកម្ពុជា នឹងធ្វើឡើងនៅព្រឹកម៉ោង ៩ និង ៥ នាទី ដោយមានសាររបស់សម្តេចនាយករដ្ឋមន្ត្រី ហ៊ុន សែន និងការគោះជួង ប្រកាសបើកវគ្គជួញដូរមូលបត្រ ទី១ នៅក្នុងក្រុមហ៊ុនផ្សារមូលបត្រកម្ពុជា។
បន្ទាប់មក នឹងមានមតិស្វាគមន៍របស់លោកបណ្ឌិត ហ៊ាន សាហ៊ីប អគ្គលេខាធិការរងនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល នៃក្រុមហ៊ុនផ្សារមូលបត្រកម្ពុជា។ ក្នុងនោះ ក៏មានមតិអបអរសាទរបស់លោក Yoo Jae Hoon ស្នងការអចិន្ត្រៃយ៍នៃគណៈកម្មការសេវាកម្មហិរញ្ញវត្ថុនៃសាធារណៈរដ្ឋ កូរ៉េ ( កូរ៉េខាងត្បូង )។ ក្រៅពីនោះ ក៏មានមតិអបអរសាទររបស់លោក KIM Bong Soo ប្រធានអគ្គនាយកនៃក្រុមហ៊ុនផ្សារមូលបត្រកូរ៉េ។
តាម កម្មវិធី ដែលបានព្រាងទុក លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការមូលបត្រកម្ពុជា ក៏នឹងមានមតិអន្តរាគមន៍ ព្រមទាំងប្រគល់វិញ្ញបនបត្រចុះបញ្ជីមូលបត្រ។ លោកឧបនាយករដ្ឋមន្ត្រី គាត ឈន់ ក៏នឹងគោះជួងបិទវគ្គជួញដូរវគ្គទីមួយ នៅម៉ោង ១០ និង ១៥ នាទីផងដែរ។
ក្រៅពីពិធីប្រកាសបើកការជួញដូរមូលបត្រ នៅក្នុងក្រុមហ៊ុនផ្សារមូលបត្រកម្ពុជា នាព្រឹកថ្ងៃទី១៨មេសា ឆ្នាំ២០១២ ក៏មានពិធីបំពាក់គ្រឿងឥស្សរិយយស ដែលធ្វើឡើងដោយឧបនាយករដ្ឋមន្ត្រី គាត ឈន់ ជូនដល់មន្ត្រីកម្ពុជា និងកូរ៉េ ដែលបានជ្រុំជ្រែង បង្កើតផ្សារហ៊ុន នៅក្នុងប្រទេសកម្ពុជាផងដែរ។
ជាការកត់សម្គាល់ ក្រុមហ៊ុនផ្សារមូលបត្រកម្ពុជា ឬអាចហៅខ្លីថា ផ្សារមូលបត្រកម្ពុជា ( Cambodia Securities Exchange ) ដែលមានអក្សរកាត់ថា CSX គឺជាផ្សារមូលបត្រទី១ ដំបូងគេបង្អស់ជាប្រវត្តិសាស្ត្ររបស់កម្ពុជា។
ក្រុមហ៊ុន ផ្សារមូលបត្រកម្ពុជា គឺជាសហគ្រាសសាធារណៈ ដែលភាគហ៊ុនរបស់រដ្ឋចំនួនភាគច្រើន (៥៥%) និងត្រូវបង្កើតឡើងដើម្បីរៀបចំ និងដាក់អោយដំណើរការទីផ្សារមូលបត្រដំបូងនៅកម្ពុជា។ ផ្សារមូលបត្រកម្ពុជា ត្រូវបានសម្ពោធដាក់អោយដំណើរការ កាលពីថ្ងៃទី១១ ខែកក្កដា ឆ្នាំ២០១១ ក្រោមអធិបតីភាពរបស់លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕
