ភ្នំពេញៈ ក្មេងស្ទាវពីរនាក់ បានជិះម៉ូតូមួយគ្រឿង
ម៉ាកសេ១២៥ ចេញពីមជ្ឈមណ្ឌលកោះពេជ្រ ដោយជ្រែកចុះ ជ្រែកឡើង
ពីមុខរថយន្តមួយគ្រឿង ក៏ជ្រុលទៅបុករ៉ឺម៉កកង់បី
ដែលកំពុងជិះតាមបណ្តោយផ្លូវសុធារសពេញ ទំហឹងធ្វើឲ្យរ៉ឺម៉កក្រឡាប់ផ្កាប់មុខ
និងបុរសជាអ្នកបើករ៉ឺម៉កត្រូវរបួសជើងម្ខាង កាលពីវេលាម៉ោង ៨ និង ៤០នាទី
យប់ថ្ងៃទី២៧ ខែមេសា ឆ្នាំ២០១២ ។
យោងតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញ បុរសម្នាក់ ជិះរ៉ឺម៉កកង់បីដោយមិនមានអ្នករួមដំណើរ ជាមួយឡើយ ក្នុងទិសដៅពីត្បូងទៅជើងតាមបណ្តោយផ្លូវសុធារស លុះជិះមកដល់ចំណុចផ្លូវកែងបត់ចូលកោះពេជ្រ ស្រាប់តែមានក្មេងស្ទាវពីរនាក់ ជិះម៉ូតូមួយគ្រឿងម៉ាកសេ១២៥ ស៊េរី ២០០៩ ពណ៌ខ្មៅ ចេញពីផ្លូវកោះពេជ្រឆ្ពោះមកផ្លូវសុធារស ដោយពួកគេជិះជ្រែកចុះជ្រែកឡើង ហាក់បី ដូចជាផ្លុវនោះពួកគេទិញដាច់សម្រាប់ជិះម្នាក់ឯងអីចឹង ហើយក៏ជ្រុលទៅបុកម៉ូតូកង់បីចំពីមុខយ៉ាងពេញទំហឹង បណ្តាលឲ្យក្បាលម៉ូតូបត់ក្រឡាប់ចូលក្រោមរ៉ឺម៉ក ចំណែកអ្នកបើករ៉ឺម៉កវិញត្រូវរងរបួសជើងម្ខាងដើរស្ទើរមិនរួច ហើយក្មេងពីរនាក់ខាងលើនេះ មិនមានអ្នករងរបួសធ្ងន់ធ្ងរឡើយ ប៉ុន្តែធ្វើឲ្យម៉ូតូរបស់ពួកត្រូវរងការខូចខាតផ្នែក ខាងមុខទាំងស្រុង។
ក្រោយពីកើតហេតុគេបានឃើញសមត្ថកិច្ចមូលដ្ឋាន បានចុះទៅអន្តរាគមន៍ ដើម្បីសម្រួល ចរាចរណ៍ជូនអ្នកដំណើរផ្សេងទៀត និងធ្វើការវាស់វែងអូសយករ៉ឺម៉កកង់បី និងម៉ូតូជនបង្កហេតុទៅរក្សាទុកនៅ អធិការដ្ឋាននគរបាលខណ្ឌចំការមន ដើម្បីដោះស្រាយតាមនីតិវិធីច្បាប់៕
